• Oinsá atu halo desizaun diʼak
    Moris Haksolok ba Nafatin—Kursu Bíblia Interativu

    • 5. Respeitu ema seluk nia konxiénsia

      Ema ida-idak halo desizaun neʼebé la hanesan. Oinsá mak ita bele hatudu respeitu ba ema seluk nia konxiénsia? Hanoin toʼok situasaun rua tuirmai:

      Situasaun 1: Irmán ida neʼebé gosta pinta fuuk muda ba kongregasaun neʼebé irmán barak sente la diʼak kona-ba pinta fuuk.

      Lee Roma 15:1 no 1 Korinto 10:23, 24, depois koʼalia hamutuk kona-ba pergunta tuirmai:

      • Tuir eskritura sira-neʼe, karik irmán neʼe bele deside saida? Saida mak Ita sei halo se Ita hamutuk ho ema neʼebé sente la diʼak kona-ba buat neʼebé tuir Ita-nia konxiénsia la sala?

      Situasaun 2: Irmaun ida hatene katak tuir Bíblia la sala atu hemu tua, maibé nia deside ona atu la hemu tua. Nia simu konvite atu ransu ho maluk Kristaun, no nia haree irmaun sira hemu tua.

      Lee Eclesiastes 7:16 no Roma 14:1, 10, depois koʼalia hamutuk kona-ba pergunta tuirmai:

      • Tuir eskritura sira-neʼe, karik irmaun neʼe bele deside saida? Saida mak Ita sei halo kuandu Ita haree ema seluk halo buat neʼebé la diʼak tuir Ita-nia konxiénsia?

      Hakat sira atu halo desizaun neʼebé diʼak

      Feto ida halo orasaun.

      1. Husu Jeová atu ajuda Ita halo desizaun neʼebé diʼak.​—Tiago 1:5.

      Feto neʼebé hanesan halo peskiza hodi uza Bíblia, publikasaun neʼebé bazeia ba Bíblia, no komputadór.

      2. Buka informasaun husi Bíblia no publikasaun sira neʼebé bazeia ba Bíblia atu hetan prinsípiu sira neʼebé kona Ita-nia situasaun. Bele mós koʼalia ho maluk Kristaun neʼebé iha ona esperiénsia.

      Feto neʼebé hanesan hanoin kleʼan.

      3. Hanoin kona-ba rezultadu husi Ita-nia desizaun, neʼe sei fó impaktu saida ba Ita rasik no ema seluk nia konxiénsia.

  • Tanbasá dalan neʼebé ita hatais no hadiʼa an mak importante?
    Moris Haksolok ba Nafatin—Kursu Bíblia Interativu

    • Ita hotu iha hakarak no hanoin neʼebé la hanesan kona-ba dalan neʼebé ita hatais no hadiʼa an. Se ita halo tuir Bíblia nia prinsípiu balu, ita bele halo desizaun neʼebé tuir buat neʼebé ita gosta no halo Jeová kontente. Mai ita hanoin kona-ba prinsípiu balu.

      1. Prinsípiu saida mak bele ajuda ita atu hili roupa no hadiʼa an?

      Ita presiza hili “roupa neʼebé diʼak, ho respeitu no ho hanoin neʼebé loos”, no hadiʼa an ho moos nuʼudar ema neʼebé “adora Maromak”. (1 Timóteo 2:9, 10, nota-rodapé) Hanoin toʼok kona-ba prinsípiu haat tuirmai: (1) Ita-nia hatais tenkesér “diʼak”, ka “hatudu dignidade”. Hanesan Ita haree ona iha reuniaun kongregasaun nian, Jeová nia povu hatais roupa oioin, maibé sira-nia hatais no modelu fuuk hatudu katak sira respeitu Maromak. (2) Hatais “ho respeitu” katak dalan neʼebé ita hatais labele provoka ema atu iha hanoin foʼer, ka dada demais ema seluk nia atensaun ba ita-nia an. (3) Ita hatudu “hanoin neʼebé loos” kuandu ita la buka atu halo tuir modelu foun hotu neʼebé ema barak tuir. (4) Sempre hatais no hadiʼa an iha dalan neʼebé hatudu ba ema seluk katak ita “adora Maromak” neʼebé loos.​—1 Korinto 10:31.

      2. Tanbasá mak ita presiza hanoin maluk Kristaun nia sentimentu?

      Maski ita iha liberdade atu hili roupa neʼebé ita hatais, maibé ita mós presiza hanoin kona-ba neʼe sei fó impaktu saida ba ema seluk. Ita hakaʼas an atu la halo ema seluk sente la diʼak, maibé atu “fó ksolok ba ita-nia maluk tanba ninia diʼak, atu hametin nia”.​—Lee Roma 15:1, 2.

      3. Oinsá mak ita-nia hatais bele book ema seluk atu aprende kona-ba Jeová?

      Ita koko atu hatais no hadiʼa an ho diʼak iha tempu hotu, liuliu kuandu ita tuir reuniaun no bá haklaken. Ita lakohi dada ema nia atensaun ba ita-nia hatais no la fokus ba mensajen neʼebé ita hatoʼo. Duké halo nuneʼe, ita hakarak hatais no hadiʼa an iha dalan neʼebé book ema seluk atu hakbesik ba Maromak neʼebé loos no “fó hahiʼi ba hanorin husi ita-nia Salvadór”.​—Tito 2:10.

      KEʼE KLEʼAN

      Haree toʼok oinsá mak ita bele hatais no hadiʼa an iha dalan neʼebé diʼak nuʼudar ema Kristaun.

      Mane naʼin-rua hamriik iha juís nia oin. Ida hatais kazaku, ida seluk hatais kalsa neʼebé naklees, faru la formál no taka xapeu baseball.

      Dalan neʼebé ita hatais no hadiʼa an bele hatudu se ita respeitu autoridade sira ka lae. Maski Jeová haree ita-nia laran, ita presiza hatudu sai ita-nia respeitu ba nia liuhusi dalan neʼebé ita hatais no hadiʼa an

      4. Hatudu respeitu ba Jeová liuhusi ita-nia hatais no hadiʼa an

      Saida mak razaun importante liu ba ita atu hanoin kona-ba hatais no hadiʼa an? Lee Salmo 47:2, depois koʼalia hamutuk kona-ba pergunta tuirmai:

      • Tanba ita reprezenta Jeová, oinsá mak ida-neʼe kona dalan neʼebé ita hatais?

      • Importante ka lae atu hanoin didiʼak kona-ba ita-nia hatais kuandu tuir reuniaun ka bá haklaken? Tanbasá?

      5. Oinsá atu halo desizaun diʼak kona-ba roupa no hadiʼa an?

      Loke VÍDEO.

      VÍDEO: “Halo buat hotu-hotu ba Maromak nia glória” (10:18)

      Maski ita-nia roupa mak karun ka baratu, importante mak roupa neʼe moos no kabeer, no diʼak tuir situasaun. Lee 1 Korinto 10:24 no 1 Timóteo 2:9, 10. Depois koʼalia hamutuk kona-ba tanbasá mak la diʼak atu uza roupa neʼebé . . .

      • sabraut ka runguranga.

      • aperta demais, hatudu isin, ka bele provoka ema iha dalan seksuál.

      Maski ema Kristaun la presiza halo tuir Moisés nia Ukun-Fuan, maibé Ukun-Fuan neʼe bele ajuda ita atu komprende Jeová nia hanoin. Lee Deuteronómio 22:5, depois koʼalia hamutuk kona-ba pergunta tuirmai:

      • Tanbasá mak ita presiza kuidadu atu la hatais roupa no hadiʼa an iha dalan neʼebé mane haree hanesan feto ka feto haree hanesan mane?

      Lee 1 Korinto 10:32, 33 no 1 João 2:15, 16, depois koʼalia hamutuk kona-ba pergunta tuirmai:

      • Tanbasá Ita presiza hanoin kona-ba Ita-nia hatais no hadiʼa an atu la halo ema seluk iha ita-nia área ka kongregasaun sente la diʼak?

      • Iha Ita-nia área, ema barak nia roupa ka modelu fuuk mak oinsá?

      • Tuir Ita-nia hanoin, modelu hanesan saida mak karik ladún diʼak ba ema Kristaun? Tanbasá?

      Ita bele hatais no hadiʼa an iha dalan oioin no nafatin halo Jeová kontente

      Mane no feto ho idade, rasa no husi rai oioin hatais roupa la hanesan no modelu fuuk mós la hanesan, maibé hatais diʼak nuʼudar ema Kristaun.

      EMA BALU DEHAN: “Haʼu iha direitu atu hatais roupa naran deʼit neʼebé haʼu gosta.”

      • Ita konkorda ka lae? Tanbasá?

      PONTU IMPORTANTE

      Kuandu ita halo desizaun diʼak kona-ba ita-nia roupa no hadiʼa an, ita hatudu respeitu ba Jeová no ba ema seluk.

      Rezumu

      • Tanbasá dalan neʼebé ita hatais no hadiʼa an mak importante ba Jeová?

      • Prinsípiu saida mak bele ajuda ita atu hili roupa no hadiʼa an?

      • Oinsá mak dalan neʼebé ita hatais no hadiʼa an bele afeta ema seluk nia hanoin kona-ba adorasaun neʼebé loos?

      Planu

      BUKA-HATENE LIUTÁN

      Haree toʼok roupa neʼebé Ita hatais hatudu saida kona-ba Ita-nia an.

      “Haʼu-nia roupa hatudu saida kona-ba haʼu?” (Informasaun iha jw.org/tdt)

      Buka-hatene tanbasá mak diʼak atu hanoin uluklai antes atu halo tato.

      “Saida mak Bíblia nia hanorin kona-ba tato?” (Informasaun iha jw.org/tdt)

      Hanoin toʼok prinsípiu seluk tan neʼebé bele ajuda ita atu halo desizaun diʼak.

      “Dalan neʼebé ita hatais fó glória ba Maromak ka lae?” (Livru Haklaken, Setembru 2016)

      Oinsá mak feto ida hadiʼa ninia hanoin kona-ba ema seluk nia dalan atu hatais no hadiʼa an?

      “Hatais no hadiʼa an halo haʼu sidi” (Matan-moris bá!, 22 Dezembru 2003)