Ema iha opiniaun oioin kona-ba hemu tua. Ema balu gosta hemu tua bainhira hamutuk ho kolega sira. Ema seluk deside atu la hemu tua. Iha mós ema neʼebé hemu toʼo lanu. Saida mak Bíblia hatete kona-ba hemu tua?

1. Sala ka lae atu hemu tua?

Bíblia la bandu ema atu hemu tua. Kuandu Bíblia hatete kona-ba prezente diʼak neʼebé Maromak fó mai ita ema, Bíblia mós temi “tua-uvas neʼebé halo ema nia laran haksolok”. (Salmo 104:14, 15) Mane no feto fiar-naʼin balu neʼebé temi iha Bíblia mós hemu tua.​—1 Timóteo 5:23.

2. Bíblia fó konsellu saida kona-ba hemu tua?

Jeová la simu hahalok hemu tua demais no hemu toʼo lanu. (Galásia 5:21) Ninia Liafuan hatete: “Keta sai hanesan ema neʼebé hemu tua demais.” (Provérbios 23:20) Tan neʼe, se ita deside atu hemu tua mesak ka hamutuk ho ema seluk, ita labele hemu demais toʼo labele hanoin ho momoos, labele kontrola ita-nia liafuan no hahalok, ka estraga ita-nia saúde. Se ita labele kontrola an kona-ba hemu tua, ita tenke prontu deside atu la hemu tan.

3. Oinsá mak ita bele respeitu ema seluk nia desizaun kona-ba hemu tua?

Ema ida-idak tenke deside rasik kona-ba hemu tua. Ita labele tesi-lia ka hatún ema neʼebé hemu tua uitoan, no ita mós labele obriga ema seluk atu hemu tua kuandu nia rasik lakohi. (Roma 14:10) Ita deside atu la hemu se ema seluk sente la diʼak kuandu sira haree ita hemu. (Lee Roma 14:21.) Ita ‘buka uluk ema seluk nia diʼak, laʼós buka diʼak deʼit ba ita-nia an’.​—Lee 1 Korinto 10:23, 24.

KEʼE KLEʼAN

4. Deside Ita sei hemu ka lae

Oinsá Jesus nia hanoin kona-ba hemu tua? Atu hetan resposta, hanoin toʼok kona-ba milagre primeiru neʼebé nia halo. Lee João 2:1-11, depois koʼalia hamutuk kona-ba pergunta tuirmai:

• Saida mak ita bele aprende husi Jesus nia haree kona-ba tua no ema neʼebé hemu tua?

• Tanba Jesus la bandu hemu tua, ema Kristaun presiza iha hanoin saida kona-ba ema neʼebé hemu tua?

Maski ema Kristaun iha liberdade atu hemu tua, neʼe la dehan katak sempre diʼak atu hemu. Lee Provérbios 22:3, depois hanoin toʼok oinsá mak situasaun sira tuirmai bele kona Ita-nia desizaun atu hemu ka la hemu tua:

• Ita sei lori karreta, ka serbisu ho mákina ruma.

• Ita mak isin-rua.

• Doutór bandu Ita atu labele hemu tua.

• Ita sente susar atu kontrola an kona-ba hemu tua.

• Governu nia lei bandu Ita labele hemu tua.

• Ita hamutuk ho ema ida neʼebé deside ona atu la hemu tua tanba iha tempu uluk nia iha problema kona-ba kontrola ninia an.

Kuandu halo festa kazamentu ka ransu hamutuk, Ita sei oferese tua ka lae? Atu hatene oinsá mak Ita bele halo desizaun, loke VÍDEO.

VÍDEO: Haʼu sei oferese tua ka lae? (2:41)

Lee Roma 13:13 no 1 Korinto 10:31, 32. Depois lee tiha eskritura ida-idak, koʼalia hamutuk kona-ba pergunta tuirmai:

• Oinsá mak prinsípiu neʼe bele ajuda Ita atu foti desizaun neʼebé halo Jeová kontente?

5. Deside nanis Ita sei hemu tua toʼo hira

Se Ita hili atu hemu tua, hanoin-hetan: Maski Jeová la bandu ema atu hemu tua, maibé nia bandu atu hemu tua demais. Tanbasá? Lee Oseias 4:11, 18, depois koʼalia hamutuk kona-ba pergunta tuirmai:

• Saida mak bele akontese ba ema neʼebé hemu tua demais?

Saida mak bele ajuda ita atu la hemu tua demais? Ita presiza haraik an, no rekoñese ita-nia limite. Lee Provérbios 11:2, depois koʼalia hamutuk kona-ba pergunta tuirmai:

• Tanbasá diʼak atu deside nanis kona-ba Ita bele hemu toʼo hira?

6. Oinsá atu para hemu tua demais

VÍDEO: ‘Haʼu baruk ona ho haʼu-nia moris uluk’ (6:32)

• Dmitry nia hahalok sai oinsá bainhira nia hemu tua demais?

• Nia bele husik kedas ninia toman hemu tua ka lae?

• Oinsá mak ikusmai nia konsege para hemu tua demais?

Lee 1 Korinto 6:10, 11, depois koʼalia hamutuk kona-ba pergunta tuirmai:

• Saida mak Bíblia hatete kona-ba hemu toʼo lanu?

• Oinsá mak ita hatene katak lanu-teen sira mós bele troka sira-nia toman?

Lee Mateus 5:30, depois koʼalia hamutuk kona-ba pergunta tuirmai:

• Bainhira Jesus koʼalia kona-ba tesi tiha liman, nia atu dehan katak ita presiza halo sakrifísiu ruma atu bele halo Jeová kontente. Saida mak Ita bele halo se ita sente susar atu kontrola an kona-ba hemu tua?a

Lee 1 Korinto 15:33, depois koʼalia hamutuk kona-ba pergunta tuirmai:

• Ita-nia kolega bele fó impaktu saida ba Ita kona-ba hemu tua?

PONTU IMPORTANTE

Tua mak prezente ida husi Jeová atu ita bele sente haksolok, maibé nia bandu atu hemu tua demais ka hemu toʼo lanu.

Rezumu

• Saida mak Bíblia hatete kona-ba hemu tua?

• Se hemu barak demais, neʼe lori perigu saida deʼit?

• Oinsá mak ita bele respeitu ema seluk nia desizaun kona-ba hemu tua?

BUKA-HATENE LIUTÁN

Oinsá mak joven sira bele halo desizaun diʼak kona-ba hemu tua?

Hanoin kona-ba perigu husi hemu tua (2:31)

Buka-hatene hakat balu oinsá atu manán problema kona-ba hemu tua demais.

“Iha hanoin neʼebé loos kona-ba hemu tua” (Informasaun husi Livru Haklaken)

Ema Kristaun bele hasaʼe kalis no brinda antes atu hemu ka lae?

“Pergunta husi lee-naʼin” (Livru Haklaken, 15 Fevereiru 2007)

Lee istória “Haʼu mak bidón neʼebé kuak”, no haree toʼok oinsá mak mane ida para hemu tua barak demais.

“Bíblia troka ema nia moris” (Informasaun husi Livru Haklaken)

Ita hotu iha hakarak no hanoin neʼebé la hanesan kona-ba dalan neʼebé ita hatais no hadiʼa an. Se ita halo tuir Bíblia nia prinsípiu balu, ita bele halo desizaun neʼebé tuir buat neʼebé ita gosta no halo Jeová kontente. Mai ita hanoin kona-ba prinsípiu balu.

1. Prinsípiu saida mak bele ajuda ita atu hili roupa no hadiʼa an?

Ita presiza hili “roupa neʼebé diʼak, ho respeitu no ho hanoin neʼebé loos”, no hadiʼa an ho moos nuʼudar ema neʼebé “adora Maromak”. (1 Timóteo 2:9, 10, nota-rodapé) Hanoin toʼok kona-ba prinsípiu haat tuirmai: (1) Ita-nia hatais tenkesér “diʼak”, ka “hatudu dignidade”. Hanesan Ita haree ona iha reuniaun kongregasaun nian, Jeová nia povu hatais roupa oioin, maibé sira-nia hatais no modelu fuuk hatudu katak sira respeitu Maromak. (2) Hatais “ho respeitu” katak dalan neʼebé ita hatais labele provoka ema atu iha hanoin foʼer, ka dada demais ema seluk nia atensaun ba ita-nia an. (3) Ita hatudu “hanoin neʼebé loos” kuandu ita la buka atu halo tuir modelu foun hotu neʼebé ema barak tuir. (4) Sempre hatais no hadiʼa an iha dalan neʼebé hatudu ba ema seluk katak ita “adora Maromak” neʼebé loos.​—1 Korinto 10:31.

2. Tanbasá mak ita presiza hanoin maluk Kristaun nia sentimentu?

Maski ita iha liberdade atu hili roupa neʼebé ita hatais, maibé ita mós presiza hanoin kona-ba neʼe sei fó impaktu saida ba ema seluk. Ita hakaʼas an atu la halo ema seluk sente la diʼak, maibé atu “fó ksolok ba ita-nia maluk tanba ninia diʼak, atu hametin nia”.​—Lee Roma 15:1, 2.

3. Oinsá mak ita-nia hatais bele book ema seluk atu aprende kona-ba Jeová?

Ita koko atu hatais no hadiʼa an ho diʼak iha tempu hotu, liuliu kuandu ita tuir reuniaun no bá haklaken. Ita lakohi dada ema nia atensaun ba ita-nia hatais no la fokus ba mensajen neʼebé ita hatoʼo. Duké halo nuneʼe, ita hakarak hatais no hadiʼa an iha dalan neʼebé book ema seluk atu hakbesik ba Maromak neʼebé loos no “fó hahiʼi ba hanorin husi ita-nia Salvadór”.​—Tito 2:10.

KEʼE KLEʼAN

4. Hatudu respeitu ba Jeová liuhusi ita-nia hatais no hadiʼa an

Saida mak razaun importante liu ba ita atu hanoin kona-ba hatais no hadiʼa an? Lee Salmo 47:2, depois koʼalia hamutuk kona-ba pergunta tuirmai:

• Tanba ita reprezenta Jeová, oinsá mak ida-neʼe kona dalan neʼebé ita hatais?

• Importante ka lae atu hanoin didiʼak kona-ba ita-nia hatais kuandu tuir reuniaun ka bá haklaken? Tanbasá?

5. Oinsá atu halo desizaun diʼak kona-ba roupa no hadiʼa an?

Loke VÍDEO.

VÍDEO: “Halo buat hotu-hotu ba Maromak nia glória” (10:18)

Maski ita-nia roupa mak karun ka baratu, importante mak roupa neʼe moos no kabeer, no diʼak tuir situasaun. Lee 1 Korinto 10:24 no 1 Timóteo 2:9, 10. Depois koʼalia hamutuk kona-ba tanbasá mak la diʼak atu uza roupa neʼebé . . .

• sabraut ka runguranga.

• aperta demais, hatudu isin, ka bele provoka ema iha dalan seksuál.

Maski ema Kristaun la presiza halo tuir Moisés nia Ukun-Fuan, maibé Ukun-Fuan neʼe bele ajuda ita atu komprende Jeová nia hanoin. Lee Deuteronómio 22:5, depois koʼalia hamutuk kona-ba pergunta tuirmai:

• Tanbasá mak ita presiza kuidadu atu la hatais roupa no hadiʼa an iha dalan neʼebé mane haree hanesan feto ka feto haree hanesan mane?

Lee 1 Korinto 10:32, 33 no 1 João 2:15, 16, depois koʼalia hamutuk kona-ba pergunta tuirmai:

• Tanbasá Ita presiza hanoin kona-ba Ita-nia hatais no hadiʼa an atu la halo ema seluk iha ita-nia área ka kongregasaun sente la diʼak?

• Iha Ita-nia área, ema barak nia roupa ka modelu fuuk mak oinsá?

• Tuir Ita-nia hanoin, modelu hanesan saida mak karik ladún diʼak ba ema Kristaun? Tanbasá?

PONTU IMPORTANTE

Kuandu ita halo desizaun diʼak kona-ba ita-nia roupa no hadiʼa an, ita hatudu respeitu ba Jeová no ba ema seluk.

Rezumu

• Tanbasá dalan neʼebé ita hatais no hadiʼa an mak importante ba Jeová?

• Prinsípiu saida mak bele ajuda ita atu hili roupa no hadiʼa an?

• Oinsá mak dalan neʼebé ita hatais no hadiʼa an bele afeta ema seluk nia hanoin kona-ba adorasaun neʼebé loos?

BUKA-HATENE LIUTÁN

Haree toʼok roupa neʼebé Ita hatais hatudu saida kona-ba Ita-nia an.

“Haʼu-nia roupa hatudu saida kona-ba haʼu?” (Informasaun iha jw.org/tdt)

Buka-hatene tanbasá mak diʼak atu hanoin uluklai antes atu halo tato.

“Saida mak Bíblia nia hanorin kona-ba tato?” (Informasaun iha jw.org/tdt)

Hanoin toʼok prinsípiu seluk tan neʼebé bele ajuda ita atu halo desizaun diʼak.

“Dalan neʼebé ita hatais fó glória ba Maromak ka lae?” (Livru Haklaken, Setembru 2016)

Oinsá mak feto ida hadiʼa ninia hanoin kona-ba ema seluk nia dalan atu hatais no hadiʼa an?

“Hatais no hadiʼa an halo haʼu sidi” (Matan-moris bá!, 22 Dezembru 2003)