Oinsá mak reuniaun sira husi Testemuña ba Jeová bele ajuda Ita?

Ita simu ona konvite atu tuir reuniaun husi Testemuña ba Jeová ka lae? Se Ita seidauk tuir, karik Ita sente moe uitoan atu tuir reuniaun ba dala primeiru. Karik Ita hanoin: ‘Reuniaun sira-neʼe halaʼo oinsá? Tanbasá reuniaun sira mak importante? Tanbasá haʼu tenke tuir?’ Iha lisaun neʼe, Ita sei aprende oinsá mak tuir reuniaun ho Testemuña ba Jeová sira bele halo Ita hakbesik liután ba Maromak no bele ajuda Ita rasik.

1. Tanbasá mak Testemuña ba Jeová sira halibur hamutuk?

Hakerek-naʼin ba Bíblia fó sai razaun importante liu tanbasá tuir reuniaun sira: “Haʼu sei hahiʼi Jeová iha kongregasaun boot nia leet.” (Salmo 26:12) Nuneʼe mós, Testemuña ba Jeová sira sente kontente bainhira sira tuir reuniaun hamutuk. Iha mundu tomak, sira halibur hamutuk semana-semana atu adora Maromak, kanta, no halo orasaun. Tinan-tinan sira mós halibur hamutuk atu halaʼo reuniaun boot sira.

2. Saida mak Ita sei aprende iha ami-nia reuniaun sira?

Iha reuniaun sira, ami uza beibeik Maromak nia Liafuan, hodi ‘esplika informasaun sira ho didiʼak’. (Lee Neemias 8:8.) Hodi tuir reuniaun, Ita sei aprende kona-ba Jeová no ninia hahalok furak sira. Nuʼudar Ita aprende liután kona-ba ninia domin ba Ita, Ita sei sai besik liután ba nia. Ita mós sei aprende oinsá nia bele ajuda Ita atu iha moris neʼebé hakmatek.​—Isaias 48:17, 18.

3. Oinsá mak ransu ho ema seluk iha ami-nia reuniaun bele ajuda Ita?

Jeová husu ita atu “hanoin malu hodi fó laran-manas ba malu atu hatudu domin no hahalok diʼak, no . . . keta haluha atu halibur hamutuk”. (Ebreu 10:24, 25) Iha reuniaun sira, Ita sei hasoru ema neʼebé hatudu domin ba malu, no iha interese atu aprende liután kona-ba Maromak hanesan Ita. Ita sei haree oinsá sira fó korajen ba malu hodi uza Bíblia. (Lee Roma 1:11, 12.) Ita mós bele dada lia ho ema seluk neʼebé tahan hasoru ona sira-nia problema. Neʼe mak razaun balu tanbasá Jeová hakarak Ita atu tuir reuniaun beibeik.

KEʼE KLEʼAN

4. Testemuña ba Jeová nia reuniaun sira

Iha tempu uluk, ema Kristaun sira halibur malu beibeik atu adora Jeová. (Roma 16:3-5) Lee Koloso 3:16, depois koʼalia hamutuk kona-ba pergunta tuirmai:

• Saida deʼit mak ema Kristaun iha tempu uluk halo atu adora Jeová?

VÍDEO: Oinsá mak ami halaʼo reuniaun sira? (2:12)

• Husi vídeo neʼe, saida mak hanesan entre dalan neʼebé ami halaʼo reuniaun sira ho buat neʼebé Ita lee iha Koloso 3:16?

• Iha vídeo ka dezeñu, Ita nota buat balu neʼebé Ita gosta husi reuniaun sira?

Lee 2 Korinto 9:7, depois koʼalia hamutuk kona-ba pergunta tuirmai:

• Tanbasá Testemuña ba Jeová la husu ezmola iha reuniaun sira?

Haree hamutuk ho Ita-nia mestre ka mestra kona-ba reuniaun semana neʼe nian sei koʼalia kona-ba saida.

• Ita hanoin parte ida-neʼebé husi reuniaun mak Ita sei gosta liu ka bele ajuda Ita?

Ita hatene ka lae?

Iha jw.org/tdt, Ita bele hetan fatin no oras ba reuniaun sira neʼebé halaʼo iha mundu tomak.

1. Ami-nia reuniaun sira inklui diskursu, drama kiʼik, no vídeo sira. Reuniaun sira loke no taka ho knananuk no orasaun

2. Durante programa balu, rona-naʼin sira sei hetan oportunidade atu hatoʼo komentáriu

3. Ema hotu bele tuir inklui família, joven, ferik-katuas, no labarik sira

4. La presiza selu atu bele tuir. Testemuña ba Jeová la husu ezmola.

5. Presiza hakaʼas an atu tuir reuniaun sira

Haree toʼok ezemplu kona-ba Jesus nia família. Atu tuir festa tinan-tinan nian hodi adora Maromak, sira presiza laʼo liu área foho sira husi Nazaré toʼo Jeruzalein maizumenus kilómetru 100. Lee Lucas 2:39-42, depois koʼalia hamutuk kona-ba pergunta tuirmai:

• Tuir Ita-nia hanoin, presiza hakaʼas an ka lae atu halo viajen toʼo Jeruzalein?

• Tanbasá karik Ita mós presiza hakaʼas an atu tuir reuniaun sira?

• Ita sente Ita-nia hakaʼas an atu tuir reuniaun sira mak iha folin duni ka lae? Tanbasá?

• Tanbasá mak ita presiza tuir reuniaun beibeik?

PONTU IMPORTANTE

Tuir reuniaun sira ajuda Ita atu aprende liután kona-ba Jeová, atu hametin Ita-nia relasaun ho nia, no atu adora nia hamutuk ho ema oioin.

Rezumu

• Tanbasá mak Jeová hakarak ita atu tuir reuniaun sira?

• Saida deʼit mak Ita sei aprende iha reuniaun sira husi Testemuña ba Jeová?

• Tuir Ita-nia hanoin, iha dalan seluk saida tan mak reuniaun sira bele ajuda Ita?

BUKA-HATENE LIUTÁN

Oinsá se Ita sente moe atu tuir reuniaun? Haree toʼok oinsá mak mane ida sente hanesan neʼe maibé ikusmai gosta tuir reuniaun sira.

Ami nunka haluha sira-nia laran-diʼak (4:16)

Haree oinsá mak joven ida gosta tuir reuniaun sira no saida mak nia halo atu sempre tuir reuniaun.

Haʼu gosta tebes reuniaun sira! (4:33)

Haree toʼok saida mak ema seluk sente kona-ba tuir reuniaun sira.

“Tanbasá tuir reuniaun sira iha Reuniaun-Fatin?” (Informasaun iha jw.org/tdt)

Haree toʼok oinsá mak mane neʼebé uluk gosta halo violénsia troka ninia moris kuandu nia tuir tiha reuniaun husi Testemuña ba Jeová.

“Haʼu sempre lori haʼu-nia kilat” (Informasaun husi Livru Haklaken)

5. Mundu nia situasaun iha mudansa boot husi tinan 1914

Loke VÍDEO.

VÍDEO: Mundu nia situasaun troka ona husi tinan 1914 (1:10)

Jesus fó-hatene nanis kona-ba mundu nia situasaun sei sai oinsá kuandu nia sai Liurai. Lee Lucas 21:9-11, depois koʼalia hamutuk kona-ba pergunta tuirmai:

• Ita rasik haree ka rona ona kona-ba situasaun saida deʼit?

Apóstolu Paulo esplika kona-ba ema nia hahalok sei sai oinsá durante loron ikus sira kuandu ema nia ukun besik ona atu lakon. Lee 2 Timóteo 3:1-5, depois koʼalia hamutuk kona-ba pergunta tuirmai:

• Tuir Ita-nia haree, ema barak ohin loron hatudu hahalok saida deʼit?

6. Maromak nia Ukun motiva ita atu halo buat ruma

Lee Mateus 24:3, 14, depois koʼalia hamutuk kona-ba pergunta tuirmai:

• Serbisu importante saida mak hatudu katak Maromak nia Ukun hahú ona?

• Oinsá mak Ita bele hola parte iha serbisu neʼe?

Maromak nia Ukun hahú ona, no lakleur tan sei kontrola buat hotu iha mundu. Lee Ebreu 10:24, 25, depois koʼalia hamutuk kona-ba pergunta tuirmai:

• Tanba ita “haree loron neʼe besik daudaun ona”, ita presiza halo saida?