Informasaun atu uza hamutuk livru Moris Kristaun no Haklaken
5-11 AGOSTU
RIKUSOIN HUSI BÍBLIA | 2 TIMÓTEO 1-4
“Espíritu neʼebé Maromak fó ba ita la hamosu hahalok taʼuk-teen”
(2 Timóteo 1:7) Tanba espíritu neʼebé Maromak fó ba ita la hamosu hahalok taʼuk-teen, maibé fó ita kbiit, domin no hanoin neʼebé loos.
w09-E 5/15 p. 15 par. 9
Joven sira, haree oinsá imi laʼo ba oin
Atu ajuda Timóteo, Paulo fó-hanoin nia: “Espíritu neʼebé Maromak fó ba ita la hamosu hahalok taʼuk-teen, maibé fó ita kbiit, domin no hanoin neʼebé loos.” (2Ti 1:7) “Hanoin neʼebé loos” neʼe katak hanoin ho klaru no matenek. Neʼe inklui abilidade atu hasoru situasaun naran deʼit hodi hanoin tuir realidade, maski situasaun neʼebé ita hasoru laʼós buat neʼebé ita hakarak. Joven barak neʼebé la maduru iha hahalok taʼuk-teen no hakarak atu halai husi situasaun neʼebé halo sira estrese hodi toba deʼit, haree televizaun, uza droga ka hemu tua demais, festa arbiru, ka halo hahalok seksuál neʼebé la morál. Ema Kristaun hetan matadalan ‘atu labele simu buat hotu neʼebé la tuir Maromak nia hakarak, no la simu mundu nia hakarak, no atu moris ho hanoin neʼebé loos, hahalok loos no laran-metin ba Maromak iha tempu agora’.—Tit 2:12.
(2 Timóteo 1:8) Nuneʼe, keta sai moe bainhira ó haklaken kona-ba ita-nia Naʼi, no keta sai moe kona-ba haʼu-nia situasaun nuʼudar dadur tanba Naʼi. Maibé, sai prontu atu hetan terus tanba liafuan diʼak hodi sadere ba Maromak nia kbiit.
w03-E 3/1 p. 9 par. 7
‘Sai aten-brani no sai forte bá!’
Paulo hakerek karta ba Timóteo, hodi hatete: “Espíritu neʼebé Maromak fó ba ita la hamosu hahalok taʼuk-teen, maibé fó ita kbiit, . . . Nuneʼe, keta sai moe bainhira ó haklaken kona-ba ita-nia Naʼi.” (2Ti 1:7, 8; Mc 8:38) Depois lee tiha liafuan sira-neʼe, bele husu ba ita-nia an: ‘Ha’u moe kona-ba haʼu-nia fiar, ka haʼu brani? Iha haʼu-nia serbisu-fatin (ka eskola), haʼu fó-hatene ba ema katak haʼu mak Testemuña ba Jeová, ka haʼu subar kona-ba neʼe? Haʼu moe atu la hanesan ema seluk, ka haʼu brani atu la hanesan ema seluk tanba haʼu-nia relasaun ho Jeová?’ Se ema ruma sente la brani atu haklaken liafuan diʼak ka sai la hanesan ema seluk, diʼak atu hanoin Jeová nia konsellu ba Josué: “Sai aten-brani no sai forte bá.” Keta haluha katak buat neʼebé importante laʼós ita-nia maluk serbisu ka eskola ninia opiniaun, maibé Jeová no Jesus Kristu nia hanoin mak importante.—Gal 1:10.
Keʼe no hetan buat murak husi Bíblia
(2 Timóteo 2:3, 4) Nuʼudar Kristu Jesus nia soldadu neʼebé diʼak, sai prontu bá atu hasoru terus. 4 Ema neʼebé sai nuʼudar soldadu la envolve an ho negósiu atu buka moris tanba nia hakarak atu halo kontente ema neʼebé hatama nia nuʼudar soldadu.
Buka rikusoin neʼebé loos
Timóteo mak ema neʼebé iha fiar. Apóstolu Paulo bolu nia nuʼudar “Kristu Jesus nia soldadu neʼebé diʼak”. Tuirmai nia hatete ba Timóteo: “Ema neʼebé sai nuʼudar soldadu la envolve an ho serbisu seluk atu buka moris tanba nia hakarak atu halo kontente ema neʼebé hatama nia nuʼudar soldadu.” (2Ti 2:3, 4) Ohin loron, Jesus nia dixípulu hotu hakaʼas an tebes atu halo tuir Paulo nia konsellu, inklui mós irmaun-irmán millaun ida liu neʼebé serbí tempu-tomak. Sira hasees an atu la monu ba promosaun sira neʼebé mundu neʼe uza atu tenta ema. Sira hanoin-hetan Bíblia nia prinsípiu neʼebé dehan: “Ema neʼebé empresta sei sai atan ba ida neʼebé fó-empresta.” (Prv 22:7) Satanás hakarak ita atu uza ita-nia tempu no forsa hotu ba sistema ekonomia nian. Ema balu debe osan barak hodi hola uma, hola karreta, bá eskola boot, ka halaʼo kazamentu neʼebé gasta osan barak tebes. Se ita mak la kuidadu, ita bele monu ba debe boot neʼebé presiza tinan barak atu selu. Ita bele hatudu matenek hodi halaʼo moris neʼebé simples, la monu ba debe, no la uza osan arbiru. Neʼe bele ajuda ita atu serbí Maromak ho livre duké sai atan ba mundu neʼe nia sistema ekonomia nian.—1Ti 6:10.
(2 Timóteo 2:23) Liután neʼe, hasees an husi haksesuk malu neʼebé beik no folin-laek, tanba ida-neʼe hamosu deʼit istori malu.
Jeová nia povu ‘tenke husik buat sira neʼebé la loos’
Ohin loron, ita ladún hetan ema neʼebé kontra lia-loos iha kongregasaun laran. Maibé kuandu ita hetan informasaun ruma neʼebé kontra Bíblia, ita presiza hadook an kedas husi neʼe. La diʼak duni atu koʼalia liuhusi internét ka husi dalan seluk ba sira neʼebé uluk iha lia-loos maibé agora habelar lia falsu kona-ba ita-nia fiar. Karik ita hakarak ajuda sira, maibé se ita koʼalia ho sira, neʼe katak ita la halo tuir Maromak Jeová. Loos duni, Jeová haruka ita atu hadook an husi ema sira hanesan neʼe.
TREINU KONA-BA HAKLAKEN
Jeová nia povu ‘tenke husik buat sira neʼebé la loos’
Iha 2 Timóteo 2:19, Paulo hatete kona-ba “uma hun neʼebé metin” neʼebé Maromak rasik mak tau. Iha uma hun neʼe bahat tiha lia-menon rua. Lia-menon primeiru mak “Jeová hatene sira neʼebé ninian”, neʼebé foti husi Números 16:5. (Haree ba lisaun uluk nian.) Maibé matenek-naʼin balu kona-ba Bíblia iha konfuzaun uitoan kona-ba lia-menon segundu neʼebé dehan: “Sira hotu neʼebé bolu Jeová nia naran tenke husik tiha buat sira neʼebé la loos.”
Lia-menon segundu neʼe rona hanesan Paulo foti husi Eskritura Lia-Ebraiku, maibé liafuan neʼe la bele hetan iha versu ida. Entaun, bainhira Paulo hakerek: “Sira hotu neʼebé bolu Jeová nia naran tenke husik tiha buat sira neʼebé la loos”, nia hanoin kona-ba akontesimentu saida? Paulo temi fali lia-menon primeiru husi Números kapítulu 16, neʼebé koʼalia kona-ba Kora nia hahalok aat neʼebé kontra hasoru Moisés. Se nuneʼe, lia-menon segundu mós iha relasaun ruma ho istória kona-ba Kora ka lae?
Datan no Abiram mós tuir Kora hodi kontra hasoru Moisés no Aarão. (Núm 16:1-5) Sira la respeitu Moisés nuʼudar ulun neʼebé Maromak hili. Tanba sira sei hela iha povu Izraél nia leet, sira-nia hahalok neʼe lori perigu boot ba povu. Ikusmai, kuandu tempu toʼo ba Jeová atu fó-hatene kona-ba sé mak ninia atan neʼebé loos, nia fó mandamentu ida ba povu.
Bíblia konta: “Jeová hatete ba Moisés: ‘Koʼalia ba ema-lubun hodi hatete ba sira: “Hasees an husi Kora, Datan, no Abiram nia tenda!”’ Tuirmai, Moisés hamriik no bá Datan no Abiram, no katuas sira husi povu Izraél mós bá hamutuk ho nia. Nia hatete ba ema-lubun: ‘Favór ida, sees husi ema aat sira-neʼe nia tenda no keta kona buat ida neʼebé sira-nian, hodi imi labele lakon mohu tanba sira-nia sala.’ Sira hasees an kedas husi Kora, Datan, no Abiram nia tenda sira, husi sorin-sorin hotu.” (Núm 16:23-27) Ikusmai, Jeová halakon ema hotu neʼebé kontra hasoru nia. Maibé ema neʼebé “husik tiha buat neʼebé la loos” hodi hatudu laran-metin ba Jeová, sira la lakon sira-nia moris.
Jeová haree duni ema ida-idak nia laran! Jeová hatene ema neʼebé laran-metin ba nia. Maibé, sira mós tenke hatudu ida-neʼe liuhusi sira-nia hahalok hodi haketak an husi ema aat sira. Tan neʼe, ita bele fiar katak Paulo hanoin hela kona-ba istória husi Números 16:5, 23-27 bainhira nia hakerek: “Sira hotu neʼebé bolu Jeová nia naran tenke husik tiha buat sira neʼebé la loos.” Ida-neʼe laʼo tuir Paulo nia lia-menon primeiru neʼebé dehan: “Jeová hatene sira neʼebé ninian.”—2Ti 2:19.
12-18 AGOSTU
RIKUSOIN HUSI BÍBLIA | TITO 1–FILEMON
“Foti katuas sira”
(Tito 1:5-9) Haʼu husik ó hela iha Kreta, atu nuneʼe ó bele korrije buat sira neʼebé la loos no foti katuas sira iha sidade ida-idak, hanesan haʼu hanorin ona ó atu halo: 6 Atu sai katuas ida, mane ida tenke halaʼo ninia moris ho didiʼak atu ema la hetan razaun atu duun nia, tenke iha feen ida deʼit, ninia oan sira mak fiar-naʼin, neʼebé ema la duun katak sira moris arbiru ka kontradór. 7 Nuʼudar Maromak nia atan, katuas ida tenke halaʼo ninia moris ho didiʼak atu ema la hetan razaun atu duun nia, la halo tuir deʼit ninia hakarak rasik, la hirus lalais, la lanu-teen, la halo violénsia, no la buka atu manán buat ruma ho laran-makerek, 8 maibé nia gosta simu ema ho laran-diʼak, hadomi buat diʼak, iha hanoin neʼebé loos, iha hahalok loos, laran-metin, kontrola an, 9 no bainhira nia hanorin nia tenke kaer metin ba Maromak nia liafuan neʼebé ema bele tau fiar, atu nuneʼe nia bele anima no hametin ema hodi hanorin buat neʼebé loos no bele korrije sira neʼebé koʼalia kontra.
Pergunta husi lee-naʼin
Maski eskritura sira la esplika prosesu ida-idak kona-ba oinsá mak sira foti irmaun ida iha tempu uluk, maibé ita bele haree matadalan balu oinsá mak sira foti irmaun sira. Eskritura hatete katak bainhira Paulo no Barnabé fila husi sira-nia knaar misionáriu primeiru nian, iha dalan “sira hili katuas sira iha kongregasaun ida-idak, no sira hasaʼe orasaun ho jejún, tuirmai sira entrega katuas sira-neʼe ba Jeová, ida neʼebé sira fiar ona.” (Aps 14:23) Tinan hirak liutiha, Paulo hakerek ba ninia maluk vizita kongregasaun nian naran Tito: “Haʼu husik ó atu hela iha Kreta, hodi nuneʼe ó bele hadiʼa buat neʼebé la loos no atu foti katuas sira iha sidade ida-idak, nuʼudar haʼu haruka ó atu halo.” (Tit 1:5) Nuneʼe mós ho maluk vizita kongregasaun Timóteo, apóstolu Paulo fó autoridade hanesan Tito nian. (1Ti 5:22) Husi neʼe ita bele haree momoos katak katuas vizita kongregasaun sira mak foti irmaun ida, laʼós apóstolu ka katuas sira iha Jeruzalein mak foti.
Tanba haree ba Bíblia nia ezemplu sira-neʼe mak Grupu Administradór husi Testemuña ba Jeová halo ona mudansa ida kona-ba oinsá atu foti katuas ka atan ba kongregasaun ida. Komesa husi loron 1 Setembru 2014, prosesu atu foti irmaun ida mak tuirmai neʼe: Se katuas área nian mak simu rekomendasaun kona-ba irmaun ida, nia sei haree didiʼak ba rekomendasaun ida-neʼe. Bainhira nia vizita kongregasaun neʼe, nia sei hakaʼas an hodi koñese liután irmaun neʼe, se bele haklaken hamutuk ho nia. Tuirmai nia sei koʼalia hamutuk ho grupu katuas nian kona-ba rekomendasaun neʼebé sira fó iha irmaun neʼe nia kongregasaun. Katuas área nian mak iha responsabilidade atu foti katuas ka atan ba kongregasaun ida iha ninia área. Neʼe hodi halo tuir sistema apóstolu sira-nian.
Sé mak tau matan ba prosesu sira-neʼe? Hanesan ita hatene ona, “atan laran-metin no matenek” mak iha responsabilidade atu tau matan ba Naʼi nia atan sira seluk. (Mt 24:45-47) Neʼe inklui mós ho espíritu santu nia ajuda, sira buka-hatene eskritura ida-idak hodi fó matadalan oinsá atu uza Bíblia nia prinsípiu sira hodi kongregasaun iha mundu tomak bele organiza ho diʼak. Atan laran-metin mak foti katuas área nian no mós irmaun sira iha Grupu Koordenadór ba Sukursál. Bainhira iha matadalan foun ida, sukursál ida-idak sei ajuda oinsá atu implementa matadalan neʼe. Grupu katuas kongregasaun ida-idak iha responsabilidade hodi haree didiʼak ba kritériu husi eskritura sira kona-ba irmaun sira neʼebé sira atu halo rekomendasaun hodi serbí iha Maromak nia kongregasaun. Katuas área nian ida-idak iha responsabilidade todan hodi haree didiʼak no halo orasaun kona-ba rekomendasaun neʼebé sira simu husi katuas kongregasaun sira no depois mak sira foin foti irmaun sira neʼebé kumpre ona kritériu husi eskritura sira.
Keʼe no hetan buat murak husi Bíblia
(Tito 1:12) Profeta ida husi sira-nia rai hatete: “Ema Kreta sempre bosok-teen, sira hanesan animál fuik neʼebé siʼak, no sira mak ema baruk-teen neʼebé gosta atu han demais.”
w89-E 5/15 p. 31 par. 5
Pergunta husi lee-naʼin
Klaru katak, apóstolu Paulo la simu hahalok diskriminasaun neʼebé ema halo ba ema Kreta. Ita bele fiar neʼe tanba Paulo hatene katak iha Kreta iha ema Kristaun diʼak neʼebé Maromak simu no hili sira ho Ninia espíritu santu. (Aps 2:5, 11, 33) Iha ema Kristaun laran-metin barak iha kongregasaun sira iha sidade ida-idak. Maski ema Kristaun sira-neʼe laʼós perfeitu, ita bele fiar katak sira laʼós bosok-teen ka baruk-teen neʼebé gosta han demais tanba se lae, Jeová sei la simu sira. (Flp 3:18, 19; Apk 21:8) Hanesan iha rai barak ohin loron, iha Kreta karik iha mós ema laran-loos sira neʼebé triste haree ema nia morál neʼebé aat tebes haleʼu sira no neʼe halo sira prontu atu simu mensajen Kristaun nian.—Eze 9:4; kompara Aps 13:48.
(Filemon 15, 16) Karik tan neʼe mak nia haketak an husi ó ba tempu badak, atu nuneʼe ó bele simu fali nia ba nafatin, 16 laʼós tan nuʼudar atan, maibé liu fali atan, nuʼudar maluk fiar-naʼin. Haʼu hadomi tebes nia, maibé ó sei hadomi nia liután nuʼudar atan no mós nuʼudar maluk fiar-naʼin iha Naʼi.
w08-E 10/15 p. 31 par. 4
Pontu importante husi karta ba Tito, ba Filemon, no ema Ebreu
15, 16—Tanbasá mak Paulo la husu Filemon atu husik livre Onésimo? Paulo hili atu fokus deʼit ba ninia knaar ‘atu haklaken Maromak nia Ukun no hanorin kona-ba Naʼi Jesus Kristu’. Tan neʼe, nia la mete problema sosiál hanesan kona-ba atan.—Aps 28:31.
19-25 AGOSTU
RIKUSOIN HUSI BÍBLIA | EBREU 1-3
“Hadomi hahalok loos no odi hahalok aat”
(Ebreu 1:8) Maibé kona-ba ninia Oan-Mane, nia dehan: “Maromak fó podér ba Ita atu ukun tinan ba tinan ba nafatin, no liurai nia ai-tonka ba Ita-nia Ukun mak ai-tonka hahalok loos nian.
Hahiʼi Kristu, Liurai kmanek-waʼin!
Iha tinan 1914, Jeová foti ninia Oan nuʼudar Liurai ba Mesias nia Ukun iha lalehan. Ita bele fiar katak Jesus sempre halaʼo ninia ukun iha dalan neʼebé loos, tanba Jesus nia ai-tonka mak “ai-tonka justisa nian”. Nia iha direitu atu sai Liurai tanba ‘Maromak mak ninia kadunan’, katak Jeová mak hili nia nuʼudar Liurai. Jesus nia kadunan neʼe metin “ba nafatin”. Ita kontente tebes atu serbí Jeová hodi hakruʼuk ba Liurai neʼebé Nia mak foti!
(Ebreu 1:9) Ita hadomi hahalok loos, no odi hahalok aat. Tan neʼe mak Maromak, Ita-nia Maromak, hili Ita hodi fui mina ba Ita no fó ba Ita ksolok neʼebé boot liu fali Ita-nia maluk sira.”
Hahiʼi Kristu, Liurai kmanek-waʼin!
Lee Salmo 45:6, 7. Jesus hadomi buat neʼebé loos no odi buat aat hotu neʼebé hafoʼer ninia Aman nia naran, tan neʼe, Jeová foti Jesus nuʼudar Liurai ba Mesias nia Ukun. Jeová kose “mina ksolok nian” ba Jesus iha dalan boot liu fali ninia “maluk sira”, katak David nia oan no bei-oan sira neʼebé sai liurai iha nasaun Judá. Oinsá? Primeiru, Jeová rasik mak hili Jesus nuʼudar Liurai. Segundu, Jesus hetan knaar laʼós deʼit nuʼudar Liurai, maibé mós nuʼudar Amlulik Boot. (Sal 2:2; Ebr 5:5, 6) Terseiru, kuandu Jeová hili Jesus nuʼudar liurai, nia uza espíritu santu atu fó knaar neʼe. Ikusliu, Jesus nia ukun mak laʼós iha rai, maibé iha lalehan.
Keʼe no hetan buat murak husi Bíblia
(Ebreu 1:3) Nia haleno Maromak nia glória no nia mak Maromak nia ilas loloos, nia halo buat hotu kontinua moris ho ninia liafuan neʼebé iha kbiit, no bainhira nia hamoos tiha ita-nia sala, nia tuur iha fatin aas iha Maromak neʼebé Boot Liu nia liman sorin loos.
it-1-E p. 1185 par. 1
Ilas
Husi uluk kedas, Jesus sempre haleno ho kompletu ninia aman nia hahalok ka lae?
Maromak nia Oan-Mane primeiru, neʼebé ikusmai sai Jesus, kria tuir ninia Aman nia ilas. (2Ko 4:4) Tanba Maromak koʼalia ba ninia Oan-Mane bainhira nia dehan: “Mai ita kria ema tuir ita-nia ilas,” neʼe hatudu katak, Oan-Mane haleno Maromak nia hahalok sira husi tempu neʼebé Maromak kria nia. (Gén 1:26; Jo 1:1-3; Kol 1:15, 16) Bainhira nia moris iha mundu nuʼudar ema perfeitu, nia haleno ninia Aman nia hahalok sira ho kompletu tuir ninia kapasidade nuʼudar ema ida, tan neʼe mak nia dehan “ema neʼebé haree ona haʼu, haree ona mós Aman”. (Jo 14:9; 5:17, 19, 30, 36; 8:28, 38, 42) Maibé bainhira Jesus saʼe fali ba lalehan nuʼudar kriatura espíritu no hetan “kbiit tomak iha lalehan no rai” husi ninia Aman, Maromak Jeová, ita bele fiar katak nia haleno iha dalan kompletu liután Jeová nia hahalok sira. (1Pe 3:18; Mt 28:18) Tanba Maromak foti Jesus “ba pozisaun neʼebé aas liu”, tan neʼe Maromak nia Oan-Mane haleno ninia Aman nia glória iha dalan neʼebé aas liu fali se kompara ho antes nia mai mundu. (Flp 2:9; Ebr 2:9) Agora “nia mak Maromak nia ilas loloos”.—Ebr 1:2-4.
(Ebreu 1:10-12) No: “Oh Naʼi, horiuluk kedas, Ita tau rai nia hun, no Ita kria lalehan ho Ita-nia liman. 11 Sira sei lakon, maibé Ita sei hela ba nafatin; no hanesan roupa ida, sira sei sai tuan, 12 no Ita sei lulun sira hanesan roupa neʼebé naruk no Ita sei troka sira hanesan ema troka roupa, maibé Ita sei hanesan nafatin, no Ita-nia tinan sira nunka iha rohan.”
it-1-E p. 1063 par. 7
Lalehan
Liafuan iha Salmo 102:25, 26 koʼalia kona-ba Maromak Jeová, maibé apóstolu Paulo temi fali liafuan sira-neʼe no aplika ida-neʼe ba Jesus Kristu. Neʼe tanba Maromak kria rasik ninia Oan-Mane mesak nuʼudar serbisu-naʼin atu kria universu. Paulo hatudu katak Oan-Mane la hanesan ho kriasaun. Se Maromak hakarak, nia bele lulun kriasaun sira “hanesan roupa neʼebé naruk” no buat sira-neʼe sei lakon mohu, maibé Oan-Mane Jesus sei hela ba nafatin.—Ebr 1:1, 2, 8, 10-12; kompara 1Pe 2:3, nota.
26 AGOSTU–1 SETEMBRU
RIKUSOIN HUSI BÍBLIA | EBREU 4-6
“Hakaʼas an atu tama Maromak nia fatin deskansa”
(Ebreu 4:1) Neʼe duni, tanba promesa atu tama iha ninia fatin deskansa nian sei iha nafatin, mai ita matan-moris bá atu ita labele lakon promesa neʼe.
(Ebreu 4:4) Tanba iha eskritura ida nia koʼalia kona-ba loron hitu, hodi dehan: “Iha loron hitu, Maromak deskansa husi ninia serbisu hotu”,
Saida mak Maromak nia hakmatek?
Iha buat rua neʼebé hatudu katak loron hitu neʼe kontinua nafatin iha Jesus nia tempu no mós iha apóstolu sira-nia tempu. Buat ida mak Jesus nia liafuan ba ema neʼebé kontra nia tanba nia kura ema moras iha loron Sábadu. Tuir sira-nia hanoin kura ema iha loron Sábadu mak hahalok neʼebé sala tanba hanesan halo serbisu. Jesus hatán ba sira hodi dehan: “Haʼu-nia Aman serbisu toʼo ohin, nuneʼe mós haʼu serbisu.” (Jo 5:16, 17) Jesus nia liafuan neʼe katak sá? Neʼe hanesan nia dehan: “Haʼu ho haʼu-nia Aman halaʼo serbisu neʼebé hanesan. Tanba haʼu-nia Aman kontinua halo serbisu durante ninia loron Sábadu neʼebé naruk tebetebes, hanesan tinan rihun ba rihun, nuneʼe mós haʼu serbisu iha loron Sábadu.” Tan neʼe, Jesus nia liafuan hatudu katak Maromak nia loron hitu, ka loron deskansa husi serbisu atu kria buat hotu iha rai, sei kontinua hela iha Jesus nia tempu.
Iha buat ida tan neʼebé hatudu katak loron hitu neʼe kontinua nafatin iha Jesus nia tempu no mós iha apóstolu sira-nia tempu. Neʼe mak buat neʼebé apóstolu Paulo hatete ba ema ebreu kristaun. Hodi temi Génesis 2:2 kona-ba Maromak nia hakmatek, nia hatete: “Ita neʼebé fiar ona tama iha hakmatek neʼe.” (Ebr 4:3, 4, 6, 9) Nuneʼe, loron hitu neʼe ka loron hakmatek neʼe kontinua nafatin iha Paulo nia tempu. Loron neʼe sei kontinua toʼo bainhira?
Atubele fó resposta ba pergunta neʼe, ita presiza hatene tansá mak Maromak Jeová hili loron hitu neʼe. Génesis 2:3 esplika hodi hatete: “Maromak haraik bensaun ba loron hitu neʼe no halo loron neʼe sai sagradu.” Jeová halo loron neʼe “sai sagradu” tanba nia hili loron neʼe atu kumpre ninia hakarak ba rai. Ninia hakarak mak atu ema hotu neʼebé halo tuir nia moris iha rai no tau matan ba rai no buat hotu neʼebé iha rai. (Gén 1:28) Atu kumpre hakarak neʼe mak Maromak Jeová no Jesus Kristu, “Sábadu nia Naʼi”, kontinua “serbisu toʼo ohin”. (Mt 12:8) Maromak nia loron hakmatek sei kontinua toʼo tempu neʼebé nia kumpre ninia hakarak iha rai. Ida-neʼe sei sai loos iha Kristu nia ukun ba tinan rihun ida nia rohan.
(Ebreu 4:6) Tan neʼe, sira neʼebé rona uluk liafuan diʼak la tama ba fatin deskansa neʼe tanba sira la halo tuir. Maibé ema balu sei bele tama iha fatin neʼe.
Saida mak Maromak nia hakmatek?
Maromak esplika ho klaru ninia hakarak ba Adão no Eva, maibé sira la halo tuir. Ikusmai, ema rihun ba rihun mós la halo tuir. Maromak nia povu, ema Israel, dala barak mós la halo tuir nia. Paulo fó avizu ba ema kristaun iha ninia tempu katak se sira la kuidadu, sira balu bele monu ba lasu hanesan ema Israel antigu. Nia hatete: “Neʼe duni, ita sei hakaʼas an atu tama iha hakmatek neʼe, atu ita ida labele monu hanesan sira neʼebé lakohi halo tuir nia ezemplu.” (Ebr 4:11) Paulo nia liafuan hatudu katak ema neʼebé la halo tuir Maromak labele tama iha Ninia hakmatek. Ida-neʼe katak sá mai ita? Neʼe katak se ita halo buat ruma neʼebé kontra Maromak nia hakarak, ita labele tama ona iha Maromak nia hakmatek ka lae? Importante tebes atu ita hatene resposta ba pergunta neʼe. Maibé agora, mai ita haree saida mak ita bele aprende husi ema Israel nia ezemplu aat no tansá sira labele tama iha Maromak nia hakmatek.
(Ebreu 4:9-11) Neʼe duni, sei iha hela loron deskansa nian ba Maromak nia povu, neʼebé hanesan ho loron Sábadu. 10 Tanba ema neʼebé tama ona iha Maromak nia fatin deskansa nian, nia mós deskansa ona husi ninia serbisu rasik, hanesan ho Maromak neʼebé deskansa ona husi ninia serbisu. 11 Tan neʼe, mai ita hakaʼas an atu tama ba fatin deskansa neʼe, atu nuneʼe ita labele tuir ezemplu aat husi sira neʼebé la halo tuir.
Saida mak Maromak nia hakmatek?
Ema kristaun ohin loron hatene katak laʼós hodi halo tuir Moisés nia Ukun-Fuan mak sira bele hetan salvasaun. Paulo koʼalia ho klaru ba ema kristaun iha Éfeso, hodi dehan: “Basá husi grasa mak ita hetan maksoin, husi fiar, laʼós husi buat ruma neʼebé mai husi imi, maibé husi prezente ida husi Maromak; laʼós husi imi-nia hahalok ruma, atu nuneʼe ema ida la bele gaba an.” (Éf 2:8, 9) Nuneʼe, oinsá mak ema kristaun bele tama iha Maromak nia hakmatek? Hanoin-hetan katak Maromak Jeová hili ninia loron hitu, ka ninia loron hakmatek, atubele kumpre ninia hakarak ba rai no ba ema neʼebé halo tuir nia. Liuhusi Jeová nia organizasaun, nia fó sai ninia hakarak no saida mak nia hakarak ita atu halo. Nuneʼe, ita bele tama iha Maromak nia hakmatek hodi halo tuir nia no ninia organizasaun.
Maibé, se ita la halo tuir konsellu husi Bíblia neʼebé atan laran-metin no matenek fó mai ita no halo tuir deʼit buat neʼebé ita hakarak, ita sei kontra Jeová nia hakarak. Halo ida-neʼe bele halakon ita-nia dame no relasaun diʼak ho Jeová. Iha lisaun tuirmai, ita sei koʼalia kona-ba situasaun balu neʼebé fó oportunidade mai ita atu halo tuir Maromak no oinsá desizaun neʼebé ita halo hatudu se ita tama ona iha Maromak nia hakmatek.
Keʼe no hetan buat murak husi Bíblia
(Ebreu 4:12) Tanba Maromak nia liafuan moris no iha kbiit boot no kroʼat liu fali surik ida ho kroʼat iha sorin-sorin, no bele sona tama toʼo haketak ema nia moris husi ema nia laran, no haketak ruin-fukun husi ruin-dolen, no bele hatene ema nia hanoin no hakarak iha laran.
Pergunta husi lee-naʼin
“Maromak nia liafuan” neʼebé “moris no iha kbiit boot” hanesan temi iha Ebreu 4:12 neʼe kona-ba saida?
▪ Apóstolu Paulo nia liafuan hatudu katak nia koʼalia kona-ba buat hotu neʼebé Maromak fó sai kona-ba ninia hakarak ka planu sira, inklui mós liafuan sira neʼebé ita hetan iha Bíblia laran.
Baibain ita-nia livru sira uza Ebreu 4:12 atu hatudu katak Bíblia iha kbiit atu troka ema nia moris. Esplika hanesan neʼe mós loos, maibé ita tenke komprende saida mak Paulo koʼalia daudaun bainhira nia hakerek Ebreu 4:12. Tuir loloos, nia anima hela ema kristaun ebreu atu apoia Jeová nia hakarak ka planu sira. Planu sira-neʼe barak hakerek iha eskritura sira. Apóstolu Paulo fó ezemplu kona-ba ema Izraél neʼebé Maromak halo livre husi rai-Ejitu. Sira iha esperansa atu tama rai neʼebé Maromak promete ba sira, rai neʼebé “iha susu-been no bani-been barak”, hodi sira bele tama Maromak nia fatin deskansa nian.—Éx 3:8; Deu 12:9, 10.
Ida-neʼe mak Maromak nia hakarak neʼebé nia fó sai ba ema Izraél. Maibé ikusmai sira la halo tuir, no la tau fiar ba Maromak Jeová, tan neʼe barak husi sira mak la tama ba fatin deskansa neʼe. (Núm 14:30; Jos 14:6-10) Maibé Paulo hatete katak “promesa atu tama iha [Maromak nia] fatin deskansa nian sei iha nafatin”. (Ebr 3:16-19; 4:1) Ita bele haree ho momoos katak “promesa” neʼe mak parte ida husi Maromak nia hakarak neʼebé nia fó sai. Ohin loron ita mós bele aprende no apoia Maromak nia hakarak neʼe. Atu hatudu katak promesa neʼe mai duni husi eskritura, apóstolu Paulo temi liafuan balu husi Génesis 2:2 no Salmo 95:11.
Ita agradese tanba “promesa atu tama iha [Maromak nia] fatin deskansa nian sei iha nafatin”. Ita fiar duni katak buat neʼebé Bíblia hanorin kona-ba tama Maromak nia fatin deskansa mak buat neʼebé ita bele halo, tan neʼe mak ita mós halo ona hakat balu hodi tama ba fatin neʼe. Atu tama fatin neʼe, ita la presiza atu halo tuir Moisés nia Ukun-Fuan, no mós latoʼo atu iha deʼit hahalok neʼebé diʼak. Ita tenke iha fiar no kontinua apoia Maromak nia hakarak neʼebé nia fó sai. Maibé hanesan ita hatete tiha ona, “Maromak nia Liafuan” mós refere ba Bíblia. Tan neʼe mak bainhira ema rihun ba rihun iha mundu tomak komesa estuda Bíblia no aprende kona-ba Maromak nia hakarak sira, neʼe book sira atu troka sira-nia moris, hatudu fiar no hetan batizmu. Neʼe hatudu duni katak “Maromak nia liafuan mak moris no iha kbiit boot”. Loos duni, Maromak nia hakarak ka planu sira neʼebé nia fó sai, inklui mós sira neʼebé ita hetan liuhusi Bíblia book ona ita-nia moris, no kbiit neʼe sei kontinua atu book ita-nia moris toʼo aban-bainrua.
(Ebreu 6:17, 18) Hanesan neʼe mós, bainhira Maromak deside atu hatudu ho klaru liután ba sira neʼebé simu promesa nuʼudar liman-rohan katak ninia hakarak labele muda, nia mós halo juramentu ida hodi fó garantia, 18 atu nuneʼe, liuhusi buat rua neʼebé labele muda tanba Maromak nunka bosok, ita neʼebé halai ona ba Maromak nia fatin seguru bele hetan aten-brani atu kaer metin ba esperansa neʼebé tau ona iha ita-nia oin.
it-1-E p. 1139 par. 2
Esperansa
Esperansa kona-ba moris ba nafatin no la mate tan, mak ba sira “neʼebé Maromak bolu ona atu bá lalehan”, no neʼe iha fundasaun neʼebé metin no bele tau fiar. (Ebr 3:1) Esperansa neʼe bazeia ba buat rua neʼebé Maromak labele bosok, neʼe mak ninia promesa no juramentu, no neʼe sai loos iha Kristu, neʼebé agora iha lalehan nuʼudar kriatura espíritu neʼebé labele mate. Tan neʼe, esperansa neʼe hanesan “ankor neʼebé loos no metin ba ita-nia moris, no esperansa neʼe lori ita tama ba laran liuhusi kortina ida. Jesus tama ona iha neʼebá uluk liu ita, no nia loke dalan no prepara dalan ba ita. Nia sai ona amlulik boot hanesan Melkizedek ba nafatin”.—Ebr 6:17-20.