Kuidadu bá ho Diabu nia lasu sira!

“Sai husi fatin neʼebé Diabu kaer [ita].”—2 TIM 2:26.

OINSÁ ITA HATÁN?

Se ita iha toman atu koʼalia aat kona-ba ema seluk, saida mak ita tenke halo?

Saida deʼit mak ita aprende husi Pilatos no Pedro nia ezemplu kona-ba halo tuir deʼit ema seluk no sai taʼuk ba ema?

Oinsá mak ita bele hasees an husi hanoin demais kona-ba sala neʼebé ita halo uluk?

1, 2. Iha lisaun neʼe, ita sei koʼalia kona-ba Diabu nia lasu saida deʼit?

DIABU koko atu kaer Maromak Jeová nia atan sira hodi tau lasu oioin. Maibé la hanesan ho kasadór neʼebé oho animál neʼebé nia kaer, Diabu hakarak mak atu kaer moris ema no halo sira tuir deʼit ninia hakarak.—Lee 2 Timoteo 2:24-26.

² Ema tau lasu oioin atu kaer animál. Karik sira koko atu halo animál sai husi nia subar fatin atu nuneʼe sai fasil liu atu kaer ho tali. Karik sira mós uza lasu neʼebé subar atu kaer animál. Diabu mós uza lasu oioin atu kaer Maromak nia atan sira. Nuneʼe, se ita lakohi atu Diabu kaer ita, ita presiza matan-moris no haree sinál sira neʼebé bele ajuda ita atu hatene lasu saida mak Satanás uza. Iha lisaun neʼe, ita sei koʼalia kona-ba oinsá mak ita bele hasees an husi lasu tolu neʼebé Diabu uza atu kaer Maromak nia povu. Lasu sira-neʼe mak (1) koʼalia arbiru deʼit, (2) sai taʼuk no halo tuir deʼit ema seluk nia hakarak, no (3) hanoin demais kona-ba sala neʼebé ita halo uluk. Iha lisaun tuirmai, ita sei koʼalia kona-ba Satanás nia lasu rua tan.

KETA HAMOSU AHI HODI KOʼALIA ARBIRU DEʼIT

3, 4. Saida mak bele mosu se ita la kontrola dalan neʼebé ita koʼalia? Fó toʼok ezemplu.

³ Kuandu animál sira subar iha ai-laran, sira sente seguru. Maibé, atu bele kaer sira, kasadór dala ruma tau ahi ba parte balu atu nuneʼe animál sira bele halai sai husi sira-nia subar fatin. Iha kongregasaun kristaun, irmaun-irmán sira sente seguru. Maibé, Diabu hakarak hamosu ahi iha kongregasaun laran atu halo irmaun-irmán sira husik kongregasaun hodi nia bele kaer sira. Entaun, oinsá mak dala ruma ita halo fasil ba Diabu atu kaer ita iha ninia lasu?

⁴ Dixípulu Tiago hatete katak nanál mak hanesan ahi. (Lee Tiago 3:6-8.) Se ita la kontrola ita-nia nanál, ka dalan neʼebé ita koʼalia, ita bele hamosu ahi ka problema iha kongregasaun laran. Oinsá mak ida-neʼe bele mosu? Hanoin toʼok situasaun tuirmai neʼe: Iha reuniaun kongregasaun nian, iha avizu katak irmán ida agora serbí nuʼudar pioneiru regulár. Depois reuniaun hotu tiha, irmán naʼin-rua hahú koʼalia kona-ba avizu neʼe. Irmán ida dehan katak diʼak tebes ba irmán neʼe atu hahú pioneiru no nia hein katak irmán sei hetan susesu. Maibé, irmán ida seluk dehan katak irmán neʼe sai pioneiru tanba hakarak buka oin iha kongregasaun. Husi irmán naʼin-rua neʼe, ida-neʼebé mak ita hakarak hili atu sai ita-nia belun? Tuir loloos, fasil atu hatene ida neʼebé mak bele halo problema iha kongregasaun liuhusi ninia liafuan.

5. Saida mak ita presiza halo atu labele koʼalia arbiru deʼit?

⁵ Hanesan ahi bele han ai-laran, ita-nia nanál mós bele hamosu problema iha kongregasaun laran. Entaun, saida mak ita presiza halo atu labele koʼalia arbiru deʼit? Jesus hatete: “Basá ibun fakar sai buat neʼebé rai hela iha laran.” (Mt 12:34) Entaun, hakat primeiru mak buka-hatene ita-nia laran, ka buka-hatene oinsá ita sente kona-ba ema seluk hodi la husik ida-neʼe halo ita koʼalia buat neʼebé la diʼak. Porezemplu, kuandu ita rona katak irmaun ida hakaʼas an atu halo buat barak iha kongregasaun, ita sei sente katak nia halo ida-neʼe tanba nia hakarak halo Jeová kontente ka lae? Ka ita hanoin katak nia halo ida-neʼe tanba hakarak buka oin deʼit? Se ita sempre hanoin katak ita-nia irmaun-irmán sira serbí Jeová tanba hakarak buka oin, diʼak atu hanoin-hetan katak Diabu mós koʼalia buat neʼebé hanesan kona-ba Maromak nia atan Job neʼebé laran-metin. (Jó 1:9-11) Duké hanoin sala kona-ba ita-nia irmaun ka irmán, ita tenke buka-hatene tanbasá mak ita hanoin hanesan neʼe kona-ba ita-nia maluk. Ita iha duni razaun loos atu hanoin hanesan neʼe ka lae? Ka mundu nia hahalok hanoin an deʼit neʼebé sai barak iha loron ikus sira mak kona ona ita ka lae?—2 Tim 3:1-4.

6, 7. (a) Razaun saida deʼit mak halo ema koʼalia aat kona-ba ema seluk? (b) Saida mak ita tenke halo se ema koʼalia aat ita?

⁶ Hanoin toʼok kona-ba razaun balu seluk tansá ema koʼalia arbiru deʼit kona-ba ba ema seluk. Razaun ida mak sira hakarak ema seluk gaba buat neʼebé sira halo. Karik sira koko atu hatudu sai katak sira diʼak liu ema seluk. No karik sira mós koko atu buka razaun hodi la halo buat neʼebé sira rasik tenke halo. Maski iha razaun oioin tansá ema koʼalia aat kona-ba ema seluk, hanesan foti-an, laran-moras, ka ladún fiar an, maibé hanoin-hetan katak rezultadu husi koʼalia hanesan neʼe bele estraga buat barak.

⁷ Dala ruma, ita sente katak ita iha razaun loos atu koʼalia la diʼak kona-ba ema seluk. Porezemplu, karik ita sente laran-kanek tanba sira koʼalia buat ruma kona-ba ita. Maski nuneʼe, hodi halo sira sente laran-kanek fali mak laʼós buat neʼebé diʼak. Se ita halo ida-neʼe, neʼe hanesan ita aumenta gazolina ba ahi no ita halo tuir deʼit Diabu nia hakarak, laʼós Maromak nian. (2 Tim 2:26) Tan neʼe, diʼak atu ita banati-tuir Jesus. Kuandu ema koʼalia aat Jesus, “nia la hasara fali”. Duké halo ida-neʼe, nia “tau nia laran-metin ba Ida neʼebé tesi lia loloos”. (1 Ped 2:21-23) Jesus fiar katak Jeová sei hadiʼa situasaun neʼe tuir ninia dalan no ninia tempu. Ita mós tenke hatudu fiar hanesan neʼe. Kuandu ita koʼalia buat neʼebé fó laran-manas ba maluk kristaun, ita hola parte atu haburas dame no unidade iha kongregasaun laran.—Lee Efeso 4:1-3.

KETA SAI TAʼUK NO LABELE HALO TUIR DEʼIT EMA SELUK

8, 9. Tanbasá mak Pilatos fó kastigu-mate ba Jesus?

⁸ Kuandu animál ida tama ba lasu, nia la livre ona atu book an ka bá mai tuir ninia hakarak. Nuneʼe mós, se ema ida sai taʼuk demais ba ema no halo tuir deʼit ema seluk, nia lakon ninia liberdade balu atu kontrola ninia moris. (Lee Provérbios 29:25.a) Mai ita hanoin kona-ba ezemplu husi ema naʼin-rua neʼebé sai taʼuk ba ema no halo tuir deʼit ema seluk, no ita mós sei haree saida mak ita bele aprende husi sira-nia esperiénsia.

⁹ Governadór Roma nian ida naran Pôncio Pilatos hatene katak Jesus la halo sala ida, nuneʼe nia lakohi atu fó-terus ba Jesus. Tuir loloos, Pilatos hatete katak Jesus la iha “sala ida” hodi hetan kastigu. Maski nuneʼe, Pilatos fó kastigu-mate ba nia. Tanbasá? Tanba Pilatos rende an hodi halo tuir deʼit ema-lubun. (Lc 23:15, 21-25) Ema-lubun koko atu obriga Pilatos atu halo tuir buat neʼebé sira hakarak hodi hakilar dehan: “Ó husik nia sai karik, ó laʼós César nia belun.” (Joao 19:12) Pilatos karik sai taʼuk atu lakon ninia pozisaun ka taʼuk atu lakon ninia moris se nia husik Kristu sai livre. Tan neʼe, nia halo tuir deʼit ema seluk no halo Diabu nia hakarak.

10. Tanbasá mak Pedro nega Kristu?

¹⁰ Apóstolu Pedro mak Jesus nia belun ida neʼebé besik. Pedro la taʼuk atu fó sai iha ema hotu nia oin katak Jesus mak Mesias. (Mt 16:16) Pedro mós laran-metin nafatin kuandu dixípulu seluk husik hela Jesus tanba sira la komprende buat neʼebé Jesus hatete. (Joao 6:66-69) No mós, kuandu inimigu sira mai atu kaer Jesus, Pedro foti surik atu defende Jesus. (Joao 18:10, 11) Maski nuneʼe, ikusmai Pedro monu ba lasu hodi sai taʼuk ba ema no nega katak nia la hatene Jesus Kristu. Ba tempu uitoan, apóstolu neʼe lakon ninia aten-brani atu halo buat neʼebé loos.—Mt 26:74, 75.

11. Ita presiza tahan hasoru tentasaun saida deʼit?

¹¹ Nuʼudar ema kristaun, ita hotu presiza tahan hasoru tentasaun husi ema neʼebé hakarak obriga ita atu halo buat neʼebé Maromak la gosta. Patraun ka ema seluk karik koko atu obriga ita atu la hatudu laran-moos ka halo sala-foʼer. Joven kristaun sira neʼebé sei eskola karik hasoru estudante seluk neʼebé koko atu obriga sira atu bosok iha ezame, haree pornografia, fuma, uza droga, hemu tua barak, ka halo sala-foʼer. Taʼuk ema no halo tuir deʼit ema seluk hodi halo buat neʼebé Jeová la gosta mak hanesan lasu ida. Entaun, saida mak bele ajuda ita atu labele monu ba lasu neʼe?

12. Saida deʼit mak ita aprende husi Pilatos no Pedro nia ezemplu?

¹² Saida deʼit mak ita aprende husi Pilatos no Pedro nia ezemplu? Pilatos la hatene buat barak kona-ba Kristu. Maibé, nia hatene katak Jesus la halo sala ida no katak Jesus laʼós ema baibain. Maski nuneʼe, Pilatos la hatudu haraik-an no domin ba Maromak loos. Entaun, fasil ba Diabu atu kaer moris nia. Pedro hatene didiʼak kona-ba Maromak no hadomi Nia. Maibé, dala ruma Pedro la hatudu haraik-an, sai taʼuk ba ema, no halo tuir deʼit ema seluk. Antes tempu neʼebé ema kaer Jesus, Pedro foti an dehan: “Maski [sira] hotu-hotu sei monu, haʼu lae!” (Mc 14:29) Se Pedro tau fiar ba Maromak hanesan ema neʼebé hakerek salmu ida, karik nia sei prontu atu hasoru tentasaun neʼebé sei mosu. Ema neʼebé hakerek salmu kanta hodi dehan: “Jeová hamutuk ho haʼu; haʼu sei la taʼuk buat ida. Ema bele halo saida mai haʼu?” (Sal 118:6) Iha Jesus nia kalan ikus iha rai, Jesus lori Pedro no apóstolu naʼin-rua seluk hamutuk ho nia ba jardín Getsémani. Jesus husu sira atu hadeer nafatin, maibé sira toba. Kuandu Jesus fanu sira, nia dehan: “Hadeer no harohan bá atu imi labele monu ba tentasaun.” (Mc 14:38) Maibé Pedro toba dala ida tan, no ikusmai nia monu ba tentasaun hodi halo tuir deʼit ema seluk tanba sai taʼuk.

13. Saida deʼit mak ita tenke halo atu la monu ba lasu atu halo sala?

¹³ Ezemplu husi Pilatos no Pedro hanorin ita buat importante seluk tan. Neʼe mak ita presiza hatene didiʼak Maromak, hatudu haraik-an, hadomi no taʼuk ba Jeová hodi nuneʼe ita labele monu ba tentasaun atu halo tuir deʼit ema seluk, ka sai taʼuk ba ema. Se ita hatene didiʼak lia-loos husi Bíblia, ida-neʼe sei hametin ita-nia fiar no sei halo ita aten-brani atu fó sai ita-nia fiar ba ema seluk. No ida-neʼe mós sei ajuda ita atu la rende an deʼit kuandu ema obriga ita atu halo sala ka sai taʼuk ba ema. Diʼak atu nunka hanoin katak ita bele tahan ho ita-nia forsa rasik. Duké halo ida-neʼe, ita tenke haraik an no hanoin katak ita presiza Maromak nia forsa atu labele halo tuir deʼit ema seluk. Ita presiza husu Jeová nia espíritu santu. Ita mós tenke husik ita-nia domin ba nia book ita atu halo tuir ninia matadalan sira, no hasees an husi hahalok ruma neʼebé bele halo ema seluk hanoin aat kona-ba Jeová. Ita mós presiza prepara an hodi prontu atu hasoru tentasaun atu halo tuir deʼit ema seluk. Porezemplu, ita presiza halo orasaun hamutuk ho ita-nia oan no prepara sira, atu nuneʼe sira sei hatene saida mak sira bele halo kuandu labarik seluk koko atu obriga sira hodi halo buat neʼebé sala.—2 Kor 13:7.b

KETA HUSIK SALA ULUK NIAN HANEHAN ITA

14. Diabu hakarak ita atu hanoin saida kona-ba sala neʼebé ita halo ona iha tempu uluk?

¹⁴ Dala ruma ema halo lasu hodi uza ai boot ka fatuk neʼebé tara hela iha dalan neʼebé animál baibain liu. Sira tau tali iha dalan neʼe no kuandu animál sama tali neʼe, ai boot ka fatuk sei monu no hanehan animál neʼe. Nuneʼe mós kuandu ita hanoin demais kona-ba sala sira neʼebé ita halo ona iha tempu uluk, karik ida-neʼe halo ita sente “laran-kraik tebes” hanesan fatuk neʼebé hanehan ita. (Lee Salmo 38:3-5, 8.c) Satanás hakarak ita hanoin katak ita-nia sala mak aat tebes toʼo Jeová la perdua ona ita no katak ita la bele halo tuir Maromak nia matadalan sira.

15, 16. Oinsá mak ita bele sai livre husi lasu neʼebé hanehan ita?

¹⁵ Oinsá mak ita bele sai livre husi lasu neʼebé hanehan ita? Se ita halo tiha ona sala neʼebé boot, ita tenke hakaʼas an agora atu hadiʼa ita-nia relasaun ho Jeová. Fó-hatene katuas sira no husu sira-nia ajuda. (Tgo 5:14-16) Ita mós tenke hadiʼa ita-nia sala neʼe. (2 Kor 7:11) Se ita simu dixiplina, keta laran-tun tanba dixiplina mak sinál neʼebé hatudu katak Jeová hadomi ita. (Ebr 12:6) Hakaʼas an atu la halo tan sala neʼe, no kuidadu atu la halo fali buat neʼebé lori ita atu halo sala neʼe. Kuandu ita arrepende an ona no hadiʼa fali ita-nia hahalok, ita tenke fiar katak Maromak perdua ita-nia sala liuhusi Jesus Kristu nia sakrifísiu.—1 Joao 4:9, 14.

¹⁶ Ema balu kontinua hanoin demais kona-ba sala neʼebé loloos Maromak perdua tiha ona. Se agora daudauk ita sente hanesan neʼe, hanoin-hetan katak Jeová fó perdua ba Pedro no apóstolu seluk maski sira halai hodi husik hela ninia Oan doben Jesus iha tempu neʼebé susar. Jeová mós fó perdua ba mane neʼebé kongregasaun Korinto hasai tanba halo sala-foʼer maibé ikusmai arrepende an. (1 Kor 5:1-5; 2 Kor 2:6-8) Bíblia koʼalia kona-ba ema sira neʼebé halo sala boot maibé tanba sira arrepende an Maromak fó perdua ba sira.—2 Crôn 33:2, 10-13; 1 Kor 6:9-11.

17. Oinsá mak Jesus nia sakrifísiu bele ajuda ita?

¹⁷ Jeová sei perdua ita no haluha sala neʼebé ita halo ona se ita arrepende an duni hodi fiar katak nia sei hatudu laran-sadiʼa ba ita. Nunka hanoin katak Jesus nia sakrifísiu la bele taka ita-nia sala. Se ita hanoin hanesan neʼe, ita sei monu ba Satanás nia lasu. Nia hakarak ita hanoin katak Jesus nia sakrifísiu la toʼo atu Jeová fó perdua ba ita-nia sala sira. Maibé tuir loloos, sira neʼebé halo sala no arrepende an ona, Jeová perdua duni sira-nia sala hotu. (Prov 24:16) Hodi tau fiar ba Jesus nia sakrifísiu, ida-neʼe bele ajuda ita atu la hanoin demais kona-ba ita-nia sala neʼebé ita halo iha tempu uluk no bele fó forsa mai ita atu serbí Maromak ho ita-nia laran tomak, neon tomak no moris tomak.—Mt 22:37.

ITA HATENE SATANÁS NIA LASU SIRA

18. Oinsá mak ita bele hasees an husi Satanás nia lasu sira?

¹⁸ Ba Satanás, la buat ida iha lasu ida-neʼebé mak ita monu. Ninia hakarak mak atu kaer moris ita atu ita halo tuir ninia hakarak. Maibé, tanba ita hatene ona kona-ba Satanás nia lasu sira, ita bele hasees an hodi nia la bele kaer ita. (2 Kor 2:10, 11) Ita sei la monu ba ninia lasu sira, se ita halo orasaun atu husu matenek hodi bele hasoru ita-nia susar sira. Tiago hatete: “Imi ida kuran matenek karik, nia sei husu Maromak bá. Nia sei fó ba ema hotu-hotu ho laran-luak hodi la siʼak, no ema neʼe sei hetan matenek.” (Tgo 1:5) Atu Jeová fó ita matenek, ita tenke estuda Bíblia beibeik no halo tuir Bíblia nia matadalan sira. Livru sira neʼebé atan laran-metin no matenek halo bele ajuda ita atu hatene Diabu nia lasu sira hodi nuneʼe ita bele hasees an.

19, 20. Tanbasá mak ita tenke odi buat neʼebé aat?

¹⁹ Orasaun no estuda Bíblia bele ajuda ita atu hadomi buat neʼebé loos. Maibé, importante mós atu odi buat neʼebé aat. (Sal 97:10) Hodi hanoin kona-ba rezultadu neʼebé bele mosu, ida-neʼe bele ajuda ita atu hasees an husi hahalok neʼebé buka ita rasik nia hakarak. (Tgo 1:14, 15) Sin, kuandu ita aprende atu odi buat neʼebé aat no hadomi buat neʼebé diʼak, ita sei la monu ba lasu naran deʼit neʼebé Satanás tau atu kaer ita.

²⁰ Ita agradese tebes ba Maromak tanba nia ajuda ita atu nuneʼe Satanás la bele kaer ita! Jeová uza ninia espíritu santu, Bíblia, no ninia organizasaun atu salva ita husi aat-naʼin. (Mt 6:13, MF) Iha lisaun tuirmai, ita sei estuda kona-ba oinsá atu hasees an husi lasu rua tan neʼebé Diabu uza atu kaer moris Maromak nia atan sira.

Hamriik metin no hasees an husi Satanás nia lasu sira!

“[Tahan] hasoru Diabu nia babeur aat hotu.”—EF 6:11.

OINSÁ ITA HATÁN?

Hodi halo saida deʼit mak ita bele hasees an husi lasu atu buka rikusoin?

Saida deʼit mak bele ajuda kaben-naʼin kristaun sira atu la monu ba tentasaun atu halo sala-foʼer?

Tanbasá mak importante atu ita nunka monu ba tentasaun atu buka rikusoin no tentasaun atu halo sala-foʼer?

1, 2. (a) Tanbasá mak Satanás odi ema kose-mina sira no mós “bibi seluk”? (b) Satanás nia lasu rua saida mak ita sei koʼalia iha lisaun neʼe?

DIABU SATANÁS nunka hatudu laran-diʼak ba ema, liuliu ba sira neʼebé adora Maromak Jeová. Tuir loloos, Satanás halo funu hasoru restu husi ema kose-mina sira. (Apok 12:17) Maromak nia atan sira-neʼe ho aten-brani dirije serbisu haklaken kona-ba Maromak nia Ukun no fó sai katak Satanás mak ukun mundu neʼe. Diabu mós odi “bibi seluk”, tanba sira fó apoiu ba ema kose-mina sira no iha esperansa atu moris ba nafatin. (Joao 10:16) Satanás lakon ona oportunidade atu moris ba nafatin, no tan neʼe mak nia sai hirus tebetebes! Maski ita iha esperansa atu moris iha lalehan ka iha rai, Satanás mak ita-nia inimigu duni. Nia hakarak ita atu monu ba ninia lasu sira.—1 Ped 5:8.

² Atu kaer ita, Satanás uza lasu oioin. Nia hakaʼas an halo buat hotu neʼebé nia bele atu ‘taka ema nia hanoin’, atu sira la bele hatene kona-ba lia-foun diʼak no la bele haree ninia lasu sira. Maski nuneʼe, Diabu mós tau lasu ba sira neʼebé simu tiha ona lia-foun diʼak kona-ba Maromak nia Ukun. (2 Kor 4:3, 4) Lisaun uluk hatudu mai ita oinsá mak ita bele hasees an husi Satanás nia lasu tolu: (1) koʼalia arbiru deʼit, (2) sai taʼuk no halo tuir deʼit ema seluk nia hakarak, no (3) hanoin demais kona-ba sala neʼebé ita halo uluk. Maibé agora, mai ita haree oinsá mak ita bele hamriik metin hodi hasees an husi Satanás nia lasu rua tan. Lasu sira-neʼe mak hakarak atu hetan rikusoin no tentasaun atu halo sala-foʼer.

HAKARAK ATU HETAN RIKUSOIN MAK LASU IDA

3, 4. Oinsá mak hanoin demais kona-ba moris bele halo ita monu ba lasu atu buka rikusoin?

³ Iha Jesus nia ai-knanoik ida, nia esplika kona-ba kuda fini iha ai-tarak nia leet. Nia hatudu sai katak ema bele rona liafuan kona-ba Maromak nia Ukun, maibé “hanoin mundu neʼe nian no mós babeur husi rikusoi . . . hanehan liafuan neʼe. Nuneʼe nia la fó fuan ida”. (Mc 4:18, 19) Sin, hakarak atu hetan rikusoin mak lasu ida husi ita-nia inimigu Satanás.

⁴ Iha buat rua neʼebé bele “hanehan liafuan”. Ida mak “hanoin mundu neʼe nian”, ka hanoin demais kona-ba oinsá atu buka moris. Iha loron ikus sira-neʼe, karik iha buat barak neʼebé halo ita hanoin resin. (2 Tim 3:1) Dala ruma susar atu sosa buat neʼebé ita presiza tanba sasán nia folin karun tebes ka tanba ita la iha serbisu. Karik ita mós hanoin barak kona-ba futuru, no husu ita-nia an: ‘Haʼu-nia osan sei toʼo atu moris kuandu haʼu sai katuas ona ka lae?’ Tanba hanoin demais kona-ba buat sira-neʼe, ema balu hakaʼas an atu sai riku hodi hanoin katak se sira iha osan barak, sira sei bele hola buat hotu neʼebé sira presiza.

5. Oinsá mak “babeur husi rikusoi” bele lohi ita?

⁵ Jesus mós koʼalia kona-ba “babeur husi rikusoi”. Babeur neʼe no hanoin barak kona-ba buka moris bele halo ita monu ba lasu atu buka deʼit rikusoin. Bíblia hatete katak “osan bele fó protesaun”. (Ecle 7:12) Neʼe katak osan bele ajuda ita atu hetan buat neʼebé ita presiza. Maibé, ladún matenek se ita hakaʼas an deʼit atu sai riku. Ema barak neʼebé hakaʼas an atu sai riku, ikusmai sira rekoñese katak sira monu ba lasu atu buka deʼit rikusoin. Ema balu sai atan ba sira-nia rikusoin rasik.—Mt 6:24.

6, 7. (a) Situasaun saida mak bele mosu iha serbisu-fatin hodi halo ita haburas hakarak atu sai riku? (b) Saida mak ema kristaun tenke hanoin se patraun husu atu serbisu liu oras?

⁶ Karik la ho neon, ita hahú ona haburas hakarak atu sai riku. Porezemplu, hanoin toʼok kona-ba situasaun tuirmai neʼe. Ita-nia patraun hakbesik ita no dehan: “Haʼu iha liafuan diʼak! Kompañia foin hetan kontratu boot. Neʼe katak, fulan balu tuirmai ita tenke serbisu liu oras. Maibé, haʼu promete katak ó sei hetan osan barak liután.” Oinsá mak ita-nia hanoin kona-ba neʼe? Maski importante atu tau matan ba ita-nia família nia presiza, maibé hanoin-hetan katak laʼós ida-neʼe deʼit mak ita-nia responsabilidade. (1 Tim 5:8) Iha mós buat seluk tan neʼebé ita tenke hanoin. Porezemplu, tempu hira mak ita presiza serbisu liu oras? Ita-nia serbisu halo susar ba ita atu serbí Maromak no hanetik ita atu tuir reuniaun kristaun no halaʼo Adorasaun Família nian ka lae?

⁷ Ita presiza hanoin didiʼak kona-ba saida mak importante liu ba ita. Hetan osan barak tan, ka ita-nia relasaun ho Jeová? Ita sei para atu tau uluk Maromak nia hakarak iha ita-nia moris tanba ita hakarak atu hetan osan barak tan ka lae? Ita bele haree ka lae, oinsá rikusoin bele hanetik ita atu la tau matan didiʼak ba ita no ita-nia família nia relasaun ho Jeová? Se ita hasoru situasaun hanesan neʼe, oinsá mak ita bele hasees an hodi la monu ba babeur atu buka rikusoin?—Lee 1 Timoteo 6:9, 10.

8. Bíblia nia ezemplu saida deʼit mak bele ajuda ita atu haree didiʼak oinsá ita moris?

⁸ Atu la husik hakarak atu hetan rikusoin sai hanesan lasu ida neʼebé bele hanehan ita, importante atu sempre haree didiʼak oinsá ita halaʼo ita-nia moris. Ita lakohi atu sai hanesan Esaú neʼebé liuhusi ninia hahalok hatudu katak nia hakribi buat neʼebé Jeová promete. (Gên 25:34; Ebr 12:16) No mós, ita labele sai hanesan ema riku neʼebé lakohi atu faʼan ninia rikusoin tomak no fó osan ba ema kiak sira hodi bele tuir Jesus. Duké halo ida-neʼe, nia “fila ho neon nakraik, basá nia iha rikusoin barak”. (Mt 19:21, 22) Sin, ema neʼe nia rikusoin sai hanesan lasu ida no nia lakon oportunidade atu laʼo tuir ema neʼebé diʼak liu hotu neʼebé moris iha rai! Tan neʼe, mai ita kuidadu atu nunka halakon oportunidade espesiál neʼebé ita iha atu sai Jesus Kristu nia dixípulu ida.

9, 10. Tuir Bíblia, oinsá mak ita tenke hanoin kona-ba rikusoin?

⁹ Se ita lakohi atu monu ba lasu atu buka deʼit rikusoin, ita presiza rona ba Jesus nia konsellu, neʼebé dehan: “Keta laran-taridu bá hodi dehan: ‘Ita sei han ka hemu, ka hatais loos saida?’ Jentiu sira buka buat sira-neʼe hotu. Maibé imi-nia Aman lalehan hatene katak imi kuran sira-neʼe.”—Mt 6:31, 32; Lc 21:34, 35.

¹⁰ Atu ita la monu ba lasu atu buka rikusoin, ita presiza haburas hanoin hanesan Agur neʼebé hakerek parte ida husi Bíblia. Nia dehan: “Keta husik haʼu atu sai kiak liu ka riku liu. Maibé fó mai haʼu buat neʼebé haʼu presiza.” (Prov 30:8) Agur komprende katak nia presiza osan atu moris, maibé nia mós hatene katak hakarak atu buka rikusoin mak hanesan lasu ida. Ita mós presiza komprende katak hanoin demais kona-ba buat mundu neʼe nian no babeur husi rikusoin bele halo ita lakon ita-nia relasaun ho Jeová. Se ita hanoin demais kona-ba sasán ka osan, karik ita sei la iha tempu, forsa ka hakarak atu tau uluk Maromak nia Ukun iha ita-nia moris. Entaun, ita presiza kuidadu duni atu la monu ba Satanás nia lasu hodi buka rikusoin!—Lee Ebreu 13:5.

SALA-FOʼER MAK HANESAN KUAK NEʼEBÉ SUBAR

11, 12. Oinsá mak ema kristaun bele monu ba lasu atu halo sala-foʼer ho kolega serbisu?

¹¹ Dala ruma, kasadór sira neʼebé hakarak kaer animál neʼebé iha forsa, sira keʼe kuak ida iha dalan neʼebé animál baibain laʼo. Depois, sira subar netik rai-kuak neʼe hodi taka ho ai ruma no rai atu animál bele monu. Satanás mós uza tentasaun atu halo sala-foʼer hanesan lasu ida neʼebé subasubar. No nia lasu neʼe dala barak hetan susesu. (Prov 22:14; 23:27) Ema kristaun balu monu tiha ona ba lasu neʼe tanba sira la hasees an husi situasaun sira neʼebé fasil atu book sira atu halo sala-foʼer. Ema kristaun balu neʼebé kaben tiha ona monu ba sala-foʼer tanba sira hatudu sentimentu gosta ba ema neʼebé laʼós sira-nia kaben.

¹² Kuandu feto no mane serbisu hamutuk, ida-neʼe bele hamosu sentimentu gosta ba malu. Tuir loloos, feto ka mane sira neʼebé halo sala-foʼer, barak liu halo ida-neʼe ho sira-nia maluk serbisu. Se ita serbisu ho feto ka mane ida neʼebé laʼós ita-nia kaben, ita-nia relasaun ho sira hanesan saida? Ita iha ona ukun-fuan ruma ba ita-nia an rasik ka lae, hodi proteje ita atu la hatudu sentimentu gosta? Porezemplu, karik irmán ida koʼalia beibeik ho mane ida iha serbisu-fatin. Karik mane neʼe mak ema neʼebé nia fiar no sai ninia kolega diʼak, nuneʼe nia fó-hatene mane neʼe kona-ba problema sira iha ninia moris kaben nian. Ka irmaun ida karik halo kolega diʼak ho feto ida iha ninia serbisu-fatin. Karik irmaun neʼe hanoin: “Nia gosta buat neʼebé haʼu fó sai no nia rona ba haʼu kuandu haʼu koʼalia ba nia. Nia hatudu respeitu ba haʼu. Haʼu hakarak haʼu-nia feen mós halo hanesan neʼe mai haʼu!” Klaru katak situasaun hanesan neʼe bele hamosu perigu ba ema kristaun sira hodi monu ba tentasaun atu halo sala-foʼer.

13. Oinsá mak ita bele monu ba lasu hodi hatudu sentimentu gosta ba ema seluk iha kongregasaun laran neʼebé laʼós ita-nia kaben?

¹³ Ita mós bele monu ba lasu hodi hatudu sentimentu gosta ba ema seluk iha kongregasaun laran neʼebé laʼós ita-nia kaben. Hanoin toʼok kona-ba istória loos tuirmai neʼe. Kaben-naʼin ida naran Daniel no Saraa uluk serbí nuʼudar pioneiru regulár. Daniel hatete katak uluk nia mós serbí nuʼudar katuas kongregasaun nian, no nia sempre prontu atu halo knaar naran deʼit neʼebé nia simu. Nia estuda Bíblia ho mane naʼin-lima, no naʼin-tolu hetan batizmu. Mane sira neʼebé foin hetan batizmu presiza apoiu barak. Tanba Daniel halo serbisu barak iha kongregasaun, entaun Sara mak sempre fó apoiu ba sira. Maibé, Sara mós presiza hetan domin no apoiu, no nia hetan fali ida-neʼe husi Daniel nia estudante Bíblia. Situasaun neʼe sai hanesan lasu neʼebé perigu. Daniel hatete: ‘Fulan ba fulan haʼu-nia feen uza ninia forsa tomak atu ajuda ema seluk, tan neʼe nia mós presiza domin no ajuda atu hametin ninia relasaun ho Jeová. Maibé durante tempu neʼe, haʼu la tau matan ba nia, no situasaun neʼe lori susar. Haʼu-nia feen halo sala-foʼer ho mane ida neʼebé uluk estuda ho haʼu. Loloos, haʼu uza tempu barak liu atu halo serbisu toʼo haʼu la haree katak haʼu-nia feen nia relasaun ho Jeová sai fraku ona.’ Oinsá mak ita bele hasees an husi situasaun hanesan neʼe?

14, 15. Saida mak bele ajuda kaben-naʼin kristaun sira atu hasees an husi sala-foʼer?

¹⁴ Atu hasees an husi sala-foʼer, ita presiza hanoin kleʼan kona-ba laran-metin ba ita-nia kaben katak sá. Jesus hatete: “Buat neʼebé Maromak tau hamutuk ema keta haketak.” (Mt 19:6) Entaun, nunka hanoin katak ita-nia knaar iha kongregasaun mak importante liu fali ita-nia kaben. Liután neʼe, hanoin-hetan katak kuandu ita uza tempu barak liu dook husi ita-nia kaben tan deʼit razaun neʼebé ladún importante, ida-neʼe sei halo ita-nia relasaun kaben nian sai fraku, no bele hetan tentasaun atu halo sala-foʼer.

¹⁵ Se Ita mak katuas ida, Ita iha duni responsabilidade atu tau matan ba kongregasaun. Apóstolu Pedro hatete: “Tau matan ba Maromak nia luhan neʼebé Nia tau ba imi-nia liman, laʼós tanba laran-todan maibé ho laran-haksolok; laʼós atu manán buat ruma hodi la moe ida, maibé ho laran-kmaan.” (1 Ped 5:2) Klaru katak Ita presiza hakaʼas an atu tau matan ba ema iha kongregasaun laran, maibé Ita-nia knaar nuʼudar katuas labele hanetik Ita atu sai laʼen neʼebé diʼak. Tuir loloos, perigu duni se Ita ajuda deʼit irmán-irmaun iha kongregasaun, maibé la tau matan ba Ita-nia feen iha uma. Irmaun Daniel neʼebé temi uluk hatete: ‘Labele hakaʼas an deʼit atu halo ita-nia responsabilidade iha kongregasaun no haluha tiha ita rasik nia família.’

16, 17. (a) Saida deʼit mak kaben-naʼin kristaun sira bele halo iha serbisu-fatin atu hatudu sai katak sira lakohi atu hatudu sentimentu gosta ba ema seluk? (b) Fó toʼok ezemplu kona-ba ita-nia livru sira neʼebé bele ajuda ema kristaun hodi hasees an husi sala-foʼer.

¹⁶ Livru Menara Pengawal no Sedarlah! fó konsellu diʼak oioin neʼebé ajuda kaben-naʼin kristaun sira atu hasees an husi sala-foʼer. Porezemplu, livru Menara Pengawal, 15 Setembru 2006, fó avizu kona-ba perigu sira neʼebé bele mosu iha serbisu-fatin neʼebé bele dada ema atu hatudu sentimentu gosta ba ema neʼebé laʼós sira-nia kaben. Se ita serbisu liu oras hamutuk ho feto ka mane neʼebé laʼós ita-nia kaben, ida-neʼe bele hamosu sentimentu gosta ba ema neʼe. Se ita kaben ona, ita tenke hatudu ho klaru liuhusi ita-nia koʼalia no hahalok katak ita lakohi atu hatudu sentimentu gosta ba ema seluk. Keta dada ema nia atensaun hodi hatudu katak ita gosta sira ka dada atensaun husi dalan neʼebé ita hatais ka hadiʼa an. Diʼak atu tau ita-nia kaben no oan sira-nia foto iha ita-nia meza serbisu nian. Ida-neʼe sei ajuda ita no mós ema seluk atu hanoin-hetan katak ita-nia família mak importante tebes ba ita. Keta book ema atu hatudu sentimentu gosta ba ita no keta husik ema hatudu sentimentu gosta ba ita.

¹⁷ Iha livru Sedarlah!, Abríl 2009, ho tema “Kesetiaan dalam Perkawinan—Apa Arti Sebenarnya?” fó avizu atu kuidadu hodi labele hanoin iha ita-nia laran kona-ba halo relasaun seksuál ho ema neʼebé laʼós ita-nia kaben. Iha livru neʼe mós dehan katak se ita haburas hanoin hanesan neʼe, klaru katak ikusmai ita sei halo sala-foʼer. (Tgo 1:14, 15) Se ita kaben ona, matenek duni atu ita no ita-nia kaben lee informasaun neʼe hamutuk. Jeová mak hahú moris kaben nian no nia haree moris kaben nian nuʼudar buat sagradu. Entaun, buka tempu atu ita no ita-nia kaben koʼalia kona-ba ita-nia moris kaben nian. Ida-neʼe sei hatudu katak ita hafolin buat neʼebé sagradu iha Maromak nia haree.—Gên 2:21-24.

18, 19. (a) Saida mak bele mosu se ita halo sala-foʼer? (b) Laran-metin ba ita-nia kaben lori rezultadu diʼak saida deʼit?

¹⁸ Se iha ita-nia laran ita hetan tentasaun atu komesa hatudu sentimentu gosta ba ema seluk, diʼak atu hanoin kona-ba problema neʼebé bele mosu kuandu ita halo sala-foʼer. (Prov 7:22, 23; Gal 6:7) Sira neʼebé halo sala-foʼer halo Jeová la kontente. No sira lori problema ba sira-nia kaben no mós ba sira-nia an. (Lee Malaquias 2:13, 14.b) Duké halo ida-neʼe, ita presiza hanoin kona-ba rezultadu diʼak neʼebé ita bele hetan se ita laran-metin nafatin ba ita-nia kaben. Ita bele iha laran neʼebé moos no iha moris neʼebé kontente, no ita bele iha esperansa atu moris ba nafatin.—Lee Provérbios 3:1, 2.c

¹⁹ Ema neʼebé hakerek salmu ida dehan: “Sira neʼebé hadomi Ita-nia ukun-fuan sei hetan dame neʼebé la iha rohan, no la iha fatuk sidi nian ba sira.” (Sal 119:165) Tanba ita moris iha loron ikus sira, mai ita hadomi lia-loos no halo tuir Paulo nia konsellu neʼebé dehan: “Haree oinsá imi moris. Keta moris hanesan ema beik, maibé hanesan ema matenek.” (Ef 5:15, 16) Ohin loron, Satanás uza lasu oioin atu kaer ema neʼebé adora Maromak. Maibé Jeová fó ona ba ita buat barak neʼebé ita presiza atu proteje ita-nia an no hamriik metin hodi la monu ba Satanás nia lasu sira.—Ef 6:11, 16.