Saida mak Loron Tesi-Lia nian?

KUANDU Ita rona kona-ba Loron Tesi-Lia nian, ka Loron Justisa nian, saida mak Ita hanoin? Ema barak hanoin katak ema rihun ba rihun hamriik iha Maromak nia kadunan oin, no Maromak tesi lia ba ema ida-idak. Balu sei simu bensaun atu moris haksolok iha lalehan, no balu sei simu kastigu atu terus ba nafatin. Maibé, tuir Bíblia, Loron Tesi-Lia nian laʼós hanesan neʼe. Maromak nia Liafuan esplika Loron Tesi-Lia nian nuʼudar tempu neʼebé lori bensaun ba ema, laʼós tempu neʼebé halo ita taʼuk.

Iha Apokalipse 20:11, 12, ita lee apóstolu João nia liafuan kona-ba Loron Tesi-Lia nian. Nia hatete: “Haʼu haree kadunan boot ida neʼebé mutin no haree ida neʼebé tuur iha nia leten. No rai no lalehan halai tiha husi nia oin, no la iha ona fatin ba sira. No haʼu haree ema sira neʼebé mate ona, kiʼik no boot, sira hamriik iha kadunan nia oin, no livru sira loke tiha. Maibé, iha mós livru seluk neʼebé loke; neʼe mak livru moris nian. No ema mate sira simu tesi-lia tuir buat neʼebé hakerek iha livru sira-neʼe nia laran hodi tuir sira-nia hahalok.” Sé mak Tesi-Lia Naʼin iha eskritura neʼe?

Maromak Jeová mak Tesi-Lia Naʼin neʼebé boot liu. Maibé, nia hili kriatura ida iha lalehan atu tesi lia ba ema ida-idak. Tuir Apóstolu 17:31, apóstolu Paulo hatete katak Maromak “sei tesi-lia . . . liuhusi mane ida neʼebé nia foti tiha ona”. Tesi-Lia Naʼin neʼebé Maromak hili iha lalehan mak Jesus Kristu neʼebé moris fali ona. (João 5:22) Maibé, bainhira loos mak Loron Tesi-Lia nian komesa? No Loron Tesi-Lia nian neʼe mak tempu hira?

Livru Apokalipse hatudu katak depois Armajedón, kuandu Satanás nia mundu naksobu ona, Loron Tesi-Lia nian sei komesa.a (Apokalipse 16:14, 16; 19:19–20:3) Liutiha Armajedón, Jesus sei kesi metin Satanás no nia anju aat sira hodi la bele lohi tan ema durante tinan rihun ida nia laran. Iha tempu neʼebá, ema naʼin-144.000 sei sai tesi-lia naʼin iha lalehan no hodi “ukun nuʼudar liurai hamutuk ho Kristu ba tinan 1.000”. (Apokalipse 14:1-3; 20:1-4; Roma 8:17) Loron Tesi-Lia nian laʼós akontesimentu neʼebé mosu lalais iha loron ida deʼit, maibé ba tinan rihun ida.

Durante tinan rihun ida nia laran, Jesus Kristu sei “tesi lia ba ema moris no ema mate”. (2 Timóteo 4:1) “Ema moris” katak “ema-lubun boot” neʼebé moris liu Armajedón. (Apokalipse 7:9-17) Apóstolu João mós haree “ema sira neʼebé mate ona . . . hamriik iha kadunan nia oin” atu simu tesi-lia. Nuʼudar Jesus promete nanis ona, “ema hotu neʼebé iha rate laran sei rona [Kristu] nia lian” no moris fali. (João 5:28, 29; Apóstolu 24:15) Maibé, oinsá mak Kristu sei tesi lia ba ema hotu?

Tuir apóstolu João nia vizaun, “livru sira loke tiha”, no “ema mate sira simu tesi-lia tuir buat neʼebé hakerek iha livru sira-neʼe nia laran hodi tuir sira-nia hahalok”. Livru sira-neʼe hakerek kona-ba sira-nia hahalok uluk nian ka lae? Lae, ema sei la simu tesi-lia tuir sira-nia hahalok antes sira mate. Tansá mak ita hatene ida-neʼe? Bíblia hatete: “Ema neʼebé mate, selu ona tusan hotu husi ninia sala.” (Roma 6:7) Entaun, sira neʼebé hetan moris-hiʼas bele komesa sira-nia moris foun, tanba Maromak la sura tan sala hotu neʼebé sira uluk halo. Tan neʼe, ita bele fiar katak livru sira-neʼe hakerek kona-ba buat seluk tan neʼebé Maromak haruka ba ema atu halo. Se sira hakarak moris ba nafatin, ema neʼebé moris liu Armajedón no mós ema neʼebé moris-hiʼas ona, sira hotu tenke halo tuir Maromak nia ukun-fuan sira-neʼe. Ukun-fuan neʼe inklui buat hotu neʼebé Jeová fó sai durante tinan rihun ida nia laran. Entaun, Kristu sei tesi lia ba ema ida-idak tuir buat neʼebé sira halo durante Loron Tesi-Lia nian.

Iha Loron Tesi-Lia nian ema rihun ba rihun sei hetan oportunidade ba dala primeiru atu aprende no halo tuir Maromak nia hakarak. Ida-neʼe katak iha mundu tomak sei halaʼo serbisu atu hanorin ema. Tuir loloos, “ema neʼebé hela iha rai sei aprende duni buat neʼebé loos”. (Isaías [Yesaya] 26:9) Maibé, laʼós katak ema hotu sei gosta atu halo tuir Maromak nia hakarak. Eskritura iha Isaías (Yesaya) 26:10 hatete: “Maski ema aat simu laran-sadiʼa, maibé nia sei la aprende buat neʼebé loos. Maski iha rai nakonu ho buat neʼebé loos, maibé nia sei hatudu hahalok neʼebé laloos no sei la haree Jeová nia kmanek.” Durante Loron Tesi-Lia nian ema aat sira-neʼe sei simu kastigu, katak sira sei mate ba nafatin.—Isaías (Yesaya) 65:20.

Antes Loron Tesi-Lia nian atu ramata, ema neʼebé moris sei sai perfeitu. Entaun, neʼe hatudu katak durante Loron Tesi-Lia nian, ema nia moris neineik-neineik sei sai fali perfeitu hanesan tempu uluk kuandu Maromak kria ema primeiru. (1 Korinto 15:24-28) Depois, Maromak sei halo Satanás livre no husik nia atu koko ema ba dala ikus. (Apokalipse 20:3, 7-10) Ema neʼebé tahan hasoru Satanás sei simu ksolok hodi haree oinsá mak promesa husi Bíblia sai loos: “Ema loos sei simu rai, no sira sei moris ba nafatin iha neʼebá.” (Salmo [Mazmur] 37:29; Mateus 5:5) Loos duni, Loron Tesi-Lia nian sei lori bensaun furak ba ema hotu neʼebé laran-metin ba Maromak Jeová!