Ita-Boot husu ona pergunta hanesan neʼe ka lae? Se Ita-nia resposta mak “Sin”, laʼós Ita mesak, tanba ema barak iha mundu tomak mós husu pergunta hirak-neʼe. Ita bele hetan resposta ka lae?

Ema barak hatete: “Bele!” Tansá? Tanba sira hetan ona resposta iha Bíblia laran. Ita mós hakarak hatene buat neʼebé Bíblia hatete ka lae? Se hakarak, Ita bele husu atu estuda Bíblia hamutuk ho Testemuña ba Jeová.a Ita lalika selu.

Bainhira hanoin kona-ba atu estuda Bíblia, karik ema balu nia hanoin mak: “Haʼu-nia tempu la iha.” “Estuda Bíblia neʼe susar loos ba haʼu.” “Haʼu lakohi envolve an ho relijiaun seluk.” Maibé iha mós ema balu neʼebé simu duni atu estuda Bíblia. Mai ita haree ezemplu tuirmai neʼe:

• “Uluk haʼu tuir igreja katólika no protestante, haʼu mós bá templu índia nian no buda nian, no estuda mós kona-ba relijiaun oioin iha universidade. Maski nuneʼe, haʼu la bele hetan resposta ba haʼu-nia pergunta sira kona-ba Maromak. Ikusmai, Testemuña ba Jeová ida mai vizita haʼu iha uma. Nia hatán ba haʼu-nia pergunta sira hodi loke Bíblia, ida-neʼe halo haʼu haksolok no haʼu komesa estuda Bíblia ho sira.”​—Gill, rai-Inglaterra.

• “Haʼu iha pergunta barak kona-ba moris, maibé haʼu-nia pastór nia resposta la halo haʼu kontente. Loron ida, Testemuña ba Jeová ida uza deʼit Bíblia atu hatán ba haʼu-nia pergunta sira. Tuirmai, nia husu se haʼu hakarak aprende liután kona-ba Bíblia, no haʼu simu kedas ho kontente.”​—Koffi, rai-Benín.

• “Kleur ona haʼu hanoin: ‘Ema neʼebé mate ona nia kondisaun mak oinsá?’ Haʼu-nia fiar mak ema mate nia klamar bele haterus ema neʼebé moris, maibé haʼu hakarak hatene saida mak Bíblia hatete. Tan neʼe, haʼu komesa estuda Bíblia ho haʼu-nia kolega Testemuña ba Jeová ida.”​—José, rai-Brazíl.

• “Haʼu koko ona lee Bíblia maibé la bele komprende. Lakleur Testemuña ba Jeová haklaken mai haʼu no esplika ho momoos profesia balu husi Bíblia. Haʼu hakarak buka-hatene saida tan mak haʼu bele aprende husi Bíblia.”​—Dennize, rai-Méxiku.

• “Haʼu husu beibeik: ‘Maromak hanoin haʼu ka lae?’ Loron ida, haʼu halo orasaun, husu ajuda ba Maromak neʼebé temi iha Bíblia laran. Loron tuirmai, Testemuña ba Jeová mai dere haʼu-nia odamatan, no haʼu komesa estuda Bíblia ho sira.”​—Anju, rai-Nepál.

Jesus dehan: “Kontente ba sira neʼebé hatene katak sira presiza Maromak nia matadalan.” (Mateus 5:3) Loos duni, ema hotu presiza Maromak nia matadalan, no Maromak fó matadalan neʼe mai ita liuhusi Ninia Liafuan, Bíblia.

Entaun, oinsá mak Ita bele estuda Bíblia? Buat diʼak saida mak Ita bele hetan? Haree toʼok informasaun tuirmai neʼe.

Ema barak hatene ami Testemuña ba Jeová mak nuʼudar organizasaun ida neʼebé haklaken liafuan diʼak husi uma ba uma ka iha fatin públiku. Maibé Ita-Boot hatene ona ka lae, ami mós halaʼo tan programa estuda Bíblia iha mundu tomak?

Iha tinan 2014, Testemuña ba Jeová naʼin-8.000.000 liu iha rai hamutuk 240 mak halaʼo estuda Bíblia besik 9.500.000.a Loos duni, ema neʼebé estuda Bíblia ho Testemuña ba Jeová barak tebetebes!

Atubele halaʼo programa estuda Bíblia neʼe, Testemuña ba Jeová halo livru, Bíblia, revista sira, no buat seluk tan hamutuk 1.500.000.000 tinan-tinan iha língua hamutuk maizumenus 700! Ida-neʼe ajuda duni ema barak atu estuda Bíblia iha sira ida-idak nia língua rasik.

PERGUNTA SIRA NEʼEBÉ BAIBAIN EMA HUSU KONA-BA PROGRAMA ESTUDA BÍBLIA

Estuda Bíblia neʼe halaʼo oinsá?

Ami halaʼo estuda Bíblia tuir tópiku ida-idak, no lee eskritura balu atubele komprende kona-ba tópiku sira-neʼe. Porezemplu, Bíblia fó resposta ba pergunta sira hanesan: Sé mak Maromak? Maromak neʼe hanesan saida? Nia iha naran ka lae? Nia hela iha neʼebé? Ita bele hakbesik ba Maromak ka lae? Maibé, susar liu ba ema hotu mak atu loke eskritura neʼebé bele fó resposta ho loloos ba pergunta sira-neʼe.

Atu ajuda ema hetan resposta, baibain ami uza livru ida ho títulu Tuir Loloos, Saida mak Bíblia Hanorin?b Livru neʼe ajuda ema atu hatene Bíblia nia hanorin sira neʼebé importante tebes. Livru neʼe mós esplika kona-ba tópiku oioin hanesan Maromak, Jesus Kristu, ema nia susar no terus, moris-hiʼas, orasaun, no tópiku seluk tan.

Estuda neʼe sei halaʼo iha sá oras? No iha neʼebé?

Ami halaʼo estuda neʼe iha oras no fatin neʼebé diʼak tuir Ita-Boot nia situasaun.

Estuda neʼe han oras hira?

Ema barak hakarak estuda ho ami semana ida oras ida. Maibé neʼe konforme ba ema ida-idak nia situasaun se hakarak estuda badak deʼit ka liu oras ida. Ema balu estuda ba minutu 10 ka 15 deʼit semana-semana.

Estuda neʼe tenke selu hira?

Estuda no livru hotu gratuitu deʼit. Ami hakarak halo tuir Jesus nia liafuan ba ninia dixípulu sira, dehan: “Imi simu la selu, fó mós hodi la hein atu ema selu imi.”—Mateus 10:8.

Estuda Bíblia neʼe sei halaʼo toʼo bainhira?

Neʼe mós konforme ba Ita-Boot nia hakarak. Livru Tuir Loloos, Saida mak Bíblia Hanorin? iha kapítulu 19, maibé neʼe la dehan katak Ita tenke estuda kapítulu hotu. Ema balu gosta estuda neineik uitoan, ema seluk gosta estuda lalais liu, tuir ema ida-idak nia hakarak.

Estuda Bíblia katak haʼu tenke sai Testemuña ba Jeová ka lae?

Lae. Ami respeitu ema ida-idak nia direitu atu hili sira-nia fiar rasik. Ami ajuda deʼit ema atu hatene buat neʼebé Bíblia hanorin, depois ema ida-idak mak bele hili rasik.

Oinsá mak haʼu bele hatene liután kona-ba Testemuña ba Jeová?

Loke ami-nia sítiu ofisiál www.jw.org atubele hatene liután kona-ba ami-nia fiar no atividade sira.

Oinsá haʼu bele husu atu estuda Bíblia?

• Loke www.jw.org, prenxe formuláriu atu husu estuda Bíblia no haruka ba ami.

• Hakerek karta ba ami-nia eskritóriu ida. Haree ami-nia eskritóriu nia diresaun iha pájina 2 iha livru ida-neʼe.

• Hakbesik no husu ba Testemuña ba Jeová ida neʼebé Ita koñese ona, ka vizita ami-nia reuniaun-fatin.