Karik Ita-Boot haree ona Testemuña ba Jeová sira laʼo haklaken iha fatin públiku ka vizita ema husi uma ba uma, koʼalia ho ema, fahe livru sira no husu ema atu estuda Bíblia ho sira. Karik Ita-Boot mós lee daudauk livru ida-neʼe tanba Testemuña ba Jeová ida mak fó ba Ita. Maibé hanesan sira naʼin-haat neʼebé temi ona iha leten, karik Ita-Boot mós iha duvida ruma kona-ba ami.

Se Ita-Boot iha pergunta kona-ba ami-nia fiar no atividade, bele hetan resposta iha neʼebé? Porezemplu, osan neʼebé ami uza atu halaʼo atividade neʼe mai husi neʼebé, ka tansá mak ami haklaken ba ema?

Cecilie neʼebé temi ona iha leten hatete: “Haʼu lee informasaun barak kona-ba Testemuña ba Jeová iha internét. Haʼu mós rona ema koʼalia ladiʼak kona-ba sira. Tan neʼe, haʼu la gosta tebes sira.” Maibé ikusmai, nia hasoru no koʼalia ho Testemuña ba Jeová, no nia hetan resposta neʼebé loos.

Ita-Boot mós hakarak hatene ho loloos kona-ba ami Testemuña ba Jeová ka lae? Ami husu Ita-Boot atu buka-hatene informasaun neʼebé loos husi ami rasik, laʼós husi ema seluk. (Provérbios [Amsal] 14:15) Informasaun sira tuirmai neʼe sei ajuda Ita-Boot atu hatene liután kona-ba ami-nia fiar no atividade neʼebé ami halaʼo.

Ami Testemuña ba Jeová mak asosiasaun relijiaun nian ida neʼebé ketak husi grupu relijiaun sira seluk. Ami-nia sede-jerál iha rai-Estadus Unidus, maibé ami barak mak hela iha rai oioin. Tuir loloos, ami hamutuk naʼin-8.000.000 liu mak halaʼo atividade hanorin Bíblia iha rai 230 liu. Ami hakaʼas an atu kumpre Jesus nia liafuan, neʼebé dehan: “Ema sei haklaken liafuan diʼak kona-ba Maromak nia Ukun iha mundu tomak nuʼudar sasin ba nasaun hotu.”—Mateus 24:14.

Iha fatin neʼebé deʼit ami hela, ami hakaʼas an halo tuir nasaun nia lei sira. Maibé ami mós halo tuir Jesus nia liafuan ba ninia dixípulu sira, dehan: “Imi laʼós mundu neʼe nian.” Tan neʼe, ami hakarak moris neutrál deʼit, ami la hola parte iha buat polítiku nian no funu. (João 15:19; 17:16) Tuir loloos, durante Funu Mundiál Segundu, ema hatama Testemuña ba Jeová barak iha komarka, fó-terus no oho sira balu, tanba sira la apoia buat polítiku nian. Ulun-naʼin igreja protestante nian ida iha rai-Alemaña dehan: ‘Testemuña ba Jeová deʼit mak grupu ida neʼebé la hakruʼuk ba ditadór Hitler nia ukun.’

Maibé ami moris la haketak an husi ema seluk. Kona-ba ema kristaun sira, Jesus harohan ba Maromak: “Haʼu husu Ita laʼós atu hasai sira husi mundu.” (João 17:15) Tan neʼe, ami halaʼo ami-nia moris hanesan deʼit ho ema seluk, bá serbisu, eskola, bá kompras iha fatin neʼebé baibain ema hotu bá.

Ami Testemuña ba Jeová fiar katak “Maromak mak leno Eskritura hotu no neʼe diʼak atu hanorin”. (2 Timóteo 3:16) Ami estuda Bíblia atubele hatene lia-loos kona-ba Maromak Kriadór no oinsá atu halaʼo ami-nia moris ho loloos.

Bíblia dehan: “Atu ema bele hatene katak Ita neʼebé naran Jeová, Ita mesak deʼit mak Maromak Aas Liu Hotu iha mundu tomak.” (Salmo [Mazmur] 83:18) Tan neʼe, ami adora Maromak Jeová mesak ida deʼit, no nuʼudar ninia Testemuña sira, ami haklaken ninia naran ba ema seluk.—Isaías (Yesaya) 43:10-12.

Nuʼudar ema kristaun, ami fiar katak Jesus mak “Maromak nia Oan-Mane”a neʼebé mai toʼo mundu no sai nuʼudar Mesias. (João 1:34, 41; 4:25, 26) Depois Jesus mate, nia moris hiʼas no saʼe ba lalehan. (1 Korinto 15:3, 4) Liutiha tempu balu, nia sai Liurai ba Maromak nia Reinu. (Apokalipse 11:15) Reinu neʼe mak governu ida neʼebé harii ona iha lalehan, no lakleur tan, Liurai Jesus sei halo mundu neʼe sai fatin furak hanesan jardín Eden. (Daniel 2:44) Bíblia dehan: “Ema laran-maus sei simu rai nuʼudar liman-rohan, no sira sei haksolok tebes ho moris neʼebé nakonu ho dame.”—Salmo (Mazmur) 37:11, 29.

Ami fiar metin katak matadalan husi Bíblia bele ajuda ema hotu nia moris, tan neʼe ami hakaʼas an moris tuir matadalan neʼe. (Isaías [Yesaya] 48:17, 18) Porezemplu, ami la fuma no la uza droga tanba Bíblia hanorin katak ita labele hafoʼer ita-nia neon no isin. (2 Korinto 7:1) Ami mós la halo hahalok sira neʼebé Bíblia bandu duni, hanesan hemu-lanu, naʼok no hahalok la morál hanesan sala-foʼer.—1 Korinto 6:9-11.

Tinan-tinan, iha mundu tomak, ami fahe ba ema Bíblia no livru sira rihun ba rihun. Ami harii sukursál no eskritóriu sira atu halo ami-nia livru. Ami mós harii ami-nia reuniaun-fatin barak atu halaʼo adorasaun. Osan neʼebé ami uza atu halaʼo atividade hirak-neʼe mai husi neʼebé?

Ami hetan apoiu husi osan neʼebé ema fó ho laran nuʼudar kontribuisaun. (2 Korinto 9:7) Livru Haklaken edisaun segundu iha lia-inglés neʼebé fó sai iha tinan 1879 dehan: “Ami fiar katak Maromak JEOVÁ mak sei apoia ami, nuneʼe ami nunka husu ezmola ba ema ka obriga ema atu apoia ami.” Ami kaer metin ba liafuan neʼe toʼo ohin loron.

Bainhira ema hakarak fó kontribuisaun, balu haruka kedas ba ami-nia eskritóriu no balu seluk tau iha kaixa kontribuisaun iha reuniaun-fatin. Ami nunka haruka ema haketak porsentu sanulu husi sira-nia osan hodi fó ba ami. Ami la faʼan ami-nia livru sira no la husu ema atu selu ami ba atividade neʼebé ami halo. Ami mós la simu saláriu bainhira ami haklaken ka hanorin Bíblia, ka ajuda harii reuniaun-fatin sira. Tanba Jesus dehan: “Imi simu la selu, fó mós hodi la hein atu ema selu imi.” (Mateus 10:8) Serbisu-naʼin sira iha ami-nia sukursál no sede-jerál no membru sira husi Grupu Administradór, sira hotu la simu saláriu.

Hanesan ema kristaun iha tempu uluk ho haksolok fahe sira-nia osan ba maluk kristaun sira neʼebé monu ba susar, ami mós uza osan kontribuisaun atu ajuda ema neʼebé kona dezastre naturais. (Roma 15:26) Porezemplu, ami ajuda harii fali sira-nia uma no reuniaun-fatin sira, fó ai-han, hatais no ai-moruk ba sira.

Ema barak koñese ami Testemuña ba Jeová nuʼudar grupu ida neʼebé sempre haklaken kona-ba Bíblia husi uma ba uma, iha fatin públiku, no mós iha fatin hotu neʼebé ema iha. Tanbasá mak ami halo ida-neʼe?

Ami haklaken ba ema tanba ami hakarak hahiʼi Maromak no fó-hatene Nia naran ba ema. (Ebreu 13:15) Ami mós hakarak halo tuir Jesus Kristu nia mandamentu, neʼebé dehan: “Laʼo bá no hanorin ema husi nasaun hotu. . . . Hanorin sira atu halo tuir buat hotu neʼebé haʼu haruka ba imi.”—Mateus 28:19, 20.

Ami mós hadomi ema hotu. (Mateus 22:39) Maski ami hatene ema barak iha ona sira-nia relijiaun rasik no laʼós ema hotu mak hakarak rona ba ami, maibé ami fiar katak hanorin husi Bíblia bele salva ema hotu nia moris. Tan neʼe, hanesan ho ema kristaun iha apóstolu sira-nia tempu, ami mós “la para atu hanorin no haklaken liafuan diʼak kona-ba Jesus”.—Apóstolu 5:41, 42.

Ema hotu neʼebé lee ona ami-nia livru sira, barak liu mak laʼós ema neʼebé sai ona Testemuña ba Jeová. No ema rihun ba rihun neʼebé estuda Bíblia ho ami mós iha ona sira-nia relijiaun rasik. Maski nuneʼe, sira kontente atu simu bainhira ami vizita sira.

Karik Ita-Boot sei iha pergunta barak tan kona-ba ami Testemuña ba Jeová. Ami hakarak konvida Ita-Boot atu buka-hatene liután kona-ba ami hodi

• Koʼalia hamutuk ho Testemuña ba Jeová ida.

• Loke ami-nia sítiu www.pr418.com/tdt.

• Asiste ami-nia reuniaun sira. Ami la husu ezmola, no benvindu ba ema hotu.