Laʼós Christopher, Hannah, no Gina deʼit mak sente hanesan neʼe. Ema barak iha mundu tomak mós sente ona katak Maromak haree sira nuʼudar ninia belun. Ita-Boot rasik sente oinsá? Ita-Boot sente besik loos ba Maromak ka lae? Ita-Boot hakarak atu hakbesik liután ba Maromak ka lae? Dala ruma, Ita-Boot hakarak hatene: ‘Ema bele hakbesik ba Maromak Kbiit Boot Liu Hotu no habelun ho nia ka lae? Oinsá mak ema bele halo nuneʼe?’

EMA BELE HAKBESIK BA MAROMAK

Bíblia dehan katak ema bele hakbesik ba Maromak no habelun ho nia. Iha Bíblia laran hakerek kona-ba mane ida naran Abraão neʼebé Maromak bolu nuʼudar “haʼu-nia belun”. (Isaías [Yesaya] 41:8) No mós iha konvite kapás ida neʼebé hakerek ona iha Tiago 4:8: “Hakbesik ba Maromak, no nia sei hakbesik ba imi.” Nuneʼe, ita ema bele duni hakbesik ba Maromak no habelun ho nia. Maibé tanba ita-nia matan la bele haree Maromak, oinsá mak ita bele hakbesik ba nia no sai belun diʼak?

Hanoin toʼok kona-ba oinsá ema ho ema bele sai belun diʼak. Baibain, ulukliu ema naʼin-rua fó-koñese naran ba malu. Depois, sira komesa koʼalia ba malu beibeik hodi fahe hanoin no sentimentu ba malu. Ikusmai sira sai belun neʼebé besik. Sira mós fó liman ba malu, no kontinua apoia malu, neʼe halo sira naʼin-rua sai belun neʼebé besik liután. Hanesan neʼe mós se ita hakarak sai belun diʼak ho Maromak. Mai ita haree toʼok hakat sira tuirmai neʼe.

Se hakarak hakbesik ba Maromak, buat saida deʼit mak Ita-Boot tenke halo? Tuirmai neʼe mak buat balu neʼebé Ita-Boot tenke halo atubele habelun ho Maromak:

1. Hatene no bolu Maromak nia naran, Jeová.

2. Koʼalia beibeik ba Maromak liuhusi orasaun no estuda ninia Liafuan, Bíblia.

3. Halo nafatin hahalok neʼebé halo Maromak Jeová kontente.

Ita-Boot halo ona buat tolu neʼe ka lae? Husi buat tolu neʼe, ida-neʼebé mak Ita-Boot presiza atu halo diʼak liután? Loos duni, se hakarak halo ida-neʼe ita presiza hakaʼas an. Maibé hanoin ba rezultadu diʼak neʼebé ita sei hetan.

Jennifer, feto ida husi rai-Estadus Unidus dehan: “Buat hotu neʼebé ita halo atubele hakbesik ba Maromak, neʼe sei la sai saugati deʼit. Habelun ho Maromak lori bensaun barak hanesan ita-nia fiar sai metin liután no ita komprende liután Maromak nia hahalok sira. Bensaun neʼebé diʼak liu hotu mak domin entre ita ho Maromak sai kleʼan ba beibeik. La iha tan buat seluk neʼebé diʼak liu fali ida-neʼe!”

Se Ita-Boot hakarak hakbesik liután ba Maromak, ami Testemuña ba Jeová kontente atu estuda Bíblia ho Ita-Boot no neʼe la presiza selu. Ita-Boot mós bele asiste ami-nia reuniaun sira neʼebé esplika kona-ba Bíblia. Iha reuniaun sira-neʼe, Ita-Boot bele hamutuk ho ema neʼebé hafolin tebes sira-nia relasaun nuʼudar Maromak nia belun.a Kuandu Ita-Boot halo nuneʼe, Ita-Boot sei sente duni hanesan ho fiar-naʼin ida neʼebé hakerek Bíblia. Nia dehan: “Ba haʼu, atu hakbesik ba Maromak mak diʼak mai haʼu.”—Salmo (Mazmur) 73:28.