SEMANA-SEMANA, Testemuña ba Jeová iha diskursu públiku atu esplika informasaun ruma husi Bíblia. Se ita mak katuas kristaun ka atan ba kongregasaun ida, ita hatudu ona katak ita mak diskursu-naʼin ka mestre neʼebé diʼak ka lae? Se nuneʼe, karik ita sei simu knaar atu hatoʼo diskursu públiku. Eskola Serbisu Kristaun nian ajuda ona irmaun barak hodi hatoʼo diskursu hanesan neʼe. Entaun, kuandu ita simu knaar atu hatoʼo diskursu públiku, oinsá mak ita sei prepara?

Estuda nota badak neʼebé ita simu

Antes halo riset, lee uluk nota badak neʼebé ita simu no hanoin kleʼan kona-ba neʼe toʼo ita bele komprende didiʼak diskursu neʼe. Hanoin kona-ba tema ba diskursu neʼe. Saida mak ita hakarak atu hanorin ba ita-nia rona-naʼin? Saida mak ita-nia objetivu?

Hanoin didiʼak kona-ba pontu importante sira. Oinsá mak pontu sira-neʼe liga ho tema? Iha pontu importante ida-idak nia okos, iha mós pontu seluk. No iha pontu sira-neʼe nia okos iha tan informasaun neʼebé apoia ida-neʼe. Hanoin kona-ba oinsá informasaun iha parte ida liga ho parte uluk nian no parte tuirmai, no oinsá mak parte ida-idak ajuda ita atu kumpre objetivu husi diskursu neʼe. Kuandu ita komprende ona tema ba diskursu, ninia objetivu, no oinsá pontu importante sira kumpre ida-neʼe, tuirmai ita bele prepara ita-nia diskursu.

Atu bele ajuda ita, diʼak atu hanoin kona-ba ita-nia diskursu nuʼudar diskursu badak haat ka lima, no parte ida-idak iha pontu importante ida. Ita bele prepara parte sira-neʼe ida ba ida.

Nota badak ba diskursu sira mak hanesan uma neʼebé harii daudaun. Uma neʼe presiza didin, kakuluk, odamatan, no mós presiza sasán atu halo kompletu antes ita bele hela. Nuneʼe mós, ita presiza aumenta informasaun balu atu halo kompletu ita-nia diskursu.

Uza Eskritura

Jesus Kristu no ninia dixípulu sira hanorin hodi uza Eskritura. (Lucas 4:16-21; 24:27; Apóstolu 17:2, 3) Ita mós bele halo nuneʼe. Ita tenke uza Eskritura nuʼudar hun ba ita-nia diskursu. Duké esplika deʼit no uza liafuan sira neʼebé iha ita-nia nota badak, diʼak liu atu haree toʼok oinsá mak Eskritura apoia liafuan sira-neʼe, no tuirmai hanorin husi Eskritura.

Nuʼudar ita prepara diskursu, haree didiʼak versíkulu ida-idak neʼebé temi iha nota badak. Haree mós tansá eskritura sira temi iha nota neʼe. Ita la presiza lee ka esplika eskritura hotu. Hili deʼit ida-neʼebé mak diʼak ba ita-nia rona-naʼin. Se ita uza didiʼak eskritura sira neʼebé temi iha nota badak, karik ita la presiza atu aumenta eskritura seluk tan.

Diskursu neʼebé diʼak la depende ba eskritura hira mak ita uza, maibé depende ba dalan neʼebé ita hanorin. Tan neʼe, kuandu ita hakarak atu lee eskritura ida, diʼak atu hatudu tansá mak ita uza eskritura neʼe. Fó tempu ba rona-naʼin atu hetan eskritura neʼe. Depois ita lee tiha eskritura, diʼak atu husik ita-nia Bíblia loke hela nuʼudar ita esplika informasaun neʼe. Hodi nuneʼe, karik ita-nia rona-naʼin mós sei halo tuir. Oinsá mak ita bele book rona-naʼin sira-nia laran no ajuda sira atu hetan buat diʼak husi Maromak nia Liafuan? (Neemias 8:8, 12) Ita bele halo ida-neʼe hodi esplika, fó ai-knanoik, no hatudu oinsá ita hotu bele halo tuir.

Esplika. Kuandu ita prepara atu esplika eskritura ida, husu ba ita-nia an: ‘Neʼe katak sá? Tansá mak haʼu uza ida-neʼe iha haʼu-nia diskursu? Saida mak rona-naʼin sei husu ba sira-nia an kona-ba versíkulu neʼe?’ Karik ita presiza hanoin kona-ba versíkulu neʼebé haleʼu eskritura neʼe, no kona-ba situasaun neʼebé mosu kuandu ema hakerek eskritura neʼe. Ita mós bele hanoin: ‘Ema neʼebé hakerek eskritura neʼe iha objetivu saida?’ Atu hatene buat sira-neʼe ita presiza halo riset. Ita sei hetan informasaun diʼak husi livru sira neʼebé “atan laran-metin no matenek” halo ona. (Mateus 24:45-47) Keta koko atu esplika buat hotu kona-ba versíkulu neʼe, maibé esplika deʼit tansá mak ita hakarak rona-naʼin atu lee versíkulu neʼe hodi liga ho informasaun neʼebé ita hatoʼo daudaun.

Ai-knanoik. Ita uza ai-knanoik atu ajuda rona-naʼin komprende liután ka hanoin-hetan pontu importante husi ita-nia diskursu. Ai-knanoik ajuda ema atu simu buat neʼebé ita fó sai ona no liga ida-neʼe ho buat neʼebé sira hatene ona. Jesus mós halo ida-neʼe kuandu nia hatoʼo diskursu iha foho ida. Nia uza ai-knanoik kona-ba “manu sira iha lalehan”, “ai-funan iha rai-luan”, “odamatan kloot”, “uma iha fatuk-boot nia leten”, no ai-knanoik sira hanesan neʼe halo ninia hanorin sai diʼak liu, moos liu, no rona-naʼin la bele haluha.—Mateus, kapítulu 5–7.

Halo tuir. Kuandu ita esplika no uza ai-knanoik kona-ba eskritura ida, ita ajuda rona-naʼin atu hatene. Maibé atu hetan rezultadu diʼak sira presiza halo tuir. Sin, rona-naʼin sira mak iha responsabilidade atu halo tuir mensajen Bíblia nian neʼe, maski nuneʼe ita mós bele ajuda sira atu hatene saida mak sira presiza halo. Kuandu ita sente katak rona-naʼin komprende ona versíkulu ida neʼebé ita uza no haree ona pontu neʼebé ita hakarak fó sai, diʼak atu uza tempu hodi hatudu ba sira oinsá mak ida-neʼe kona sira-nia fiar no hahalok. Hatudu sai buat diʼak neʼebé sira sei hetan se sira husik tiha hanoin sala ka hahalok neʼebé la tuir lia-loos.

Kuandu ita hanoin kona-ba oinsá rona-naʼin bele halo tuir eskritura ruma, hanoin-hetan katak sira mai husi situasaun neʼebé la hanesan. Karik sira balu mak foin tuir reuniaun sira, balu joven, balu idade ona, no balu tahan hasoru problema oioin. Hatoʼo ita-nia diskursu iha dalan neʼebé bele kona sira-nia situasaun no tuir duni buat neʼebé mosu. Diʼak atu la koʼalia hanesan ita fó konsellu ba ema balu deʼit husi ita-nia rona-naʼin.

Diskursu-naʼin nia desizaun

Iha buat balu kona-ba ita-nia diskursu neʼebé metin ona. Porezemplu, pontu importante sira no mós minutu hira mak ita tenke uza hodi koʼalia kona-ba pontu sira-neʼe mak metin ona. Maibé, iha buat seluk neʼebé ita presiza deside rasik. Ita bele hili atu uza tempu barak liu atu koʼalia kona-ba subtítulu kiʼik balu duké subtítulu kiʼik seluk. Keta hanoin katak ita tenke esplika informasaun hotu iha subtítulu kiʼik ida-idak. Ida-neʼe karik sei halo ita ansi atu hatoʼo informasaun no halo susar ba rona-naʼin atu tau atensaun. Entaun, oinsá mak ita bele deside kona-ba informasaun neʼebé mak ita sei esplika klaru liu no ida-neʼebé mak ita sei esplika lalais deʼit? Husu ba ita-nia an: ‘Pontu ida-neʼebé mak sei ajuda haʼu atu hatoʼo informasaun importante? Pontu ida-neʼebé mak lori buat diʼak ba rona-naʼin sira? Se haʼu hasai eskritura ruma no pontu ruma iha haʼu-nia nota badak, ida-neʼe sei halo haʼu-nia informasaun ladún iha folin ka lae?’

Hakaʼas an atu la hatama ita-nia hanoin rasik ka siʼik deʼit kona-ba buat ruma. Maromak nia Oan-Mane, Jesus Kristu, mós lakohi atu ‘koʼalia tuir deʼit ninia hanoin’. (João 14:10) Hanoin-hetan katak ema tuir reuniaun atu rona informasaun kona-ba Bíblia. Ema sei hafolin ita nuʼudar diskursu-naʼin neʼebé diʼak kuandu ita iha toman atu dada atensaun ba Bíblia, laʼós ba ita-nia an rasik.—Filipe 1:10,11.

Agora tanba ita uza ona nota badak atu prepara ita-nia diskursu, ita presiza treinu ho lian makaʼas. Buat neʼebé diʼak liu mak atu hanoin-hetan pontu importante hotu. Ita tenke hakaʼas an atu hatoʼo ita-nia diskursu ho laran, halo informasaun neʼe sai moris liu, no hatoʼo lia-loos ho didiʼak. Antes hatoʼo diskursu, husu ba ita-nia an: ‘Saida mak haʼu hakarak atu kumpre? Pontu importante sira klaru ka lae? Haʼu uza eskritura sira nuʼudar hun ba haʼu-nia diskursu ka lae? Pontu importante ida liga ho ida tuirmai ka lae? Diskursu neʼe book ema atu hafolin Jeová liután no hafolin buat neʼebé nia fó ka lae? Liafuan ikus iha diskursu neʼe liga ho tema ka lae? No ida-neʼe hatudu ba rona-naʼin saida mak sira presiza halo, no book sira atu halo ida-neʼe ka lae?’ Se ita hatán sin ba pergunta sira-neʼe, neʼe katak ita uza ho didiʼak buat neʼebé ita aprende hodi bele ajuda kongregasaun no hodi fó hahiʼi ba Jeová.—Provérbios (Amsal) 15:2.

SAIDA mak ita-nia objetivu nuʼudar mestre ida? Se ita foin sai nuʼudar haklaken-naʼin, klaru katak ita hakarak aprende oinsá atu halaʼo estuda Bíblia ho ema, tanba Jesus fó knaar ba ema kristaun sira atu hanorin ema sai ninia dixípulu. (Mateus 28:19, 20) Maibé se ita iha ona esperiénsia kona-ba neʼe, karik ita mós hakarak atu hanorin iha dalan diʼak liután hodi bele book ema nia laran. Se ita mak inan-aman, ita hakarak atu sai nuʼudar mestre neʼebé bele book ita-nia oan nia laran hodi dedika sira-nia moris ba Maromak. (3 João 4) Se ita mak katuas kristaun ida ka irmaun neʼebé hakaʼas an atu hetan knaar neʼe, karik ita hakarak atu sai diskursu-naʼin neʼebé bele ajuda rona-naʼin hodi hafolin Jeová no ninia dalan sira. Entaun, oinsá mak ita bele kumpre ita-nia objetivu neʼe?

Ita bele aprende husi Mestre Boot, Jesus Kristu. (Lucas 6:40) Maski Jesus koʼalia ba ema-lubun iha foho ka ba ema uitoan neʼebé laʼo iha dalan, maibé sira hanoin-hetan nafatin buat neʼebé nia hatete ba sira no dalan neʼebé nia hanorin. Jesus hanorin iha dalan neʼebé book ema nia neon no laran, no nia hatudu dalan oinsá atu halo tuir matadalan sira. Ita mós bele halo hanesan neʼe ka lae?

Sadere ba Jeová

Jesus iha matenek boot atu hanorin tanba nia iha relasaun neʼebé metin ho ninia Aman iha lalehan no tanba simu ajuda husi espíritu santu. Ita husu ho laran ba Jeová atu bele halaʼo estuda Bíblia iha dalan diʼak liu ka lae? Se ita mak inan-aman, ita halo orasaun beibeik hodi husu matadalan atu hanorin ita-nia oan ka lae? Ita halo orasaun ho laran kuandu ita prepara diskursu sira ka dirije reuniaun sira ka lae? Hodi sadere ba Jeová liuhusi orasaun, ida-neʼe sei ajuda ita atu sai mestre neʼebé diʼak liután.

Ita mós bele hatudu katak ita sadere ba Jeová kuandu ita uza beibeik ninia Liafuan, Bíblia. Bainhira Jesus halo orasaun iha kalan ikus antes nia saran nia moris perfeitu, nia dehan ba nia Aman: “Haʼu fó ona Ita-nia liafuan ba sira.” (João 17:14) Maski Jesus iha esperiénsia neʼebé barak, maibé nia nunka koʼalia tuir ninia hanoin rasik. Nia sempre koʼalia buat neʼebé ninia Aman hanorin ba nia, no nia hatudu ezemplu diʼak ba ita atu halo tuir. (João 12:49, 50) Maromak nia liafuan iha Bíblia laran iha kbiit atu book ema nia moris, katak sira-nia hahalok, hanoin no sentimentu. (Ebreu 4:12) Nuʼudar ita aumenta liután ita-nia matenek kona-ba Maromak nia Liafuan no aprende atu uza ida-neʼe iha ita-nia serbisu ba Maromak, ita sei aumenta liután ita-nia matenek atu hanorin hodi dada ema ba Maromak.—2 Timóteo 3:16, 17.

Fó hahiʼi ba Jeová

Hodi sai mestre diʼak hanesan Kristu, neʼe laʼós deʼit katak ita bele hatoʼo diskursu neʼebé ema gosta. Loos duni, ema hakfodak ho Jesus nia “liafuan furak sira”. (Lucas 4:22) Maibé saida mak Jesus nia objetivu atu koʼalia ho didiʼak? Nia hakarak atu fó hahiʼi ba Maromak Jeová, no la dada atensaun ba nia an rasik. (João 7:16-18) No nia fó laran-manas ba nia dixípulu sira dehan: “Halo imi-nia naroman nabilan iha ema nia oin, atu sira bele haree hahalok diʼak neʼebé imi halo no fó hahiʼi ba imi-nia Aman neʼebé iha lalehan.” (Mateus 5:16) Ita tenke halo tuir konsellu neʼe iha dalan neʼebé ita hanorin. Ita lakohi duni atu halo buat ruma neʼebé hadook ita husi ita-nia objetivu. Entaun, kuandu ita prepara buat neʼebé ita sei koʼalia ka oinsá ita sei koʼalia ida-neʼe, ita tenke husu ba ita-nia an: ‘Ida-neʼe sei halo ema hafolin liu Jeová, ka sei dada atensaun ba haʼu?’

Porezemplu, ita bele uza didiʼak ai-knanoik no ema nia esperiénsia sira kuandu ita hanorin. Maibé, se ai-knanoik ida naruk loos ka esperiénsia ida iha informasaun barak, karik rona-naʼin bele lakon pontu importante neʼebé ita hakarak hanorin. Hanesan neʼe mós, se ita konta deʼit istória atu halo ema kontente hodi rona, ida-neʼe sei hadook ita husi ita-nia objetivu. Se ita halo buat sira-neʼe, ita sei dada atensaun ba ita-nia an rasik duké kumpre objetivu atu hahiʼi Maromak.

Hanorin hodi halo komparasaun

Atu ema ida sai Jesus nia dixípulu, nia tenke komprende didiʼak hanorin neʼebé nia simu. Nia tenke rona lia-loos no haree oinsá mak ida-neʼe la hanesan ho fiar sira seluk. Hodi halo komparasaun bele ajuda ita atu kumpre ida-neʼe.

Dala barak, Jeová haruka ninia povu atu haree saida mak la hanesan entre buat neʼebé moos no buat neʼebé foʼer. (Levítico [Imamat] 10:9-11) Nia dehan katak sira neʼebé serbí iha ninia templu espirituál nian sei hanorin ema atu haree saida mak “la hanesan entre buat neʼebé santu no buat neʼebé foʼer”. (Ezequiel [Yehezkiel] 44:23) Livru Provérbios iha informasaun barak hodi halo komparasaun entre buat neʼebé loos ho buat neʼebé aat, matenek no beik. Ita mós bele halo komparasaun kona-ba buat ruma maski ida-neʼe besik atu hanesan. Apóstolu Paulo halo komparasaun kona-ba ema laran-loos no ema diʼak, hanesan hakerek iha Roma 5:7. Iha livru Ebreu, nia hatudu katak Kristu nia knaar nuʼudar Amlulik Boot mak diʼak liu fali Aarão nian. Mestre ida naran John Amos Comenius hakerek: “Atu hanorin ema, neʼe katak hatudu sai oinsá buat ida la hanesan ho buat seluk. .  . . Tan neʼe, mestre diʼak mak ema neʼebé iha matenek atu halo komparasaun kona-ba buat ida ho buat seluk.”

Porezemplu, hanoin toʼok se ita atu hanorin ema ida kona-ba Maromak nia Ukun. Se nia la komprende saida mak Ukun neʼe, karik ita bele hatudu oinsá mak Bíblia nia hanorin kona-ba Maromak nia Ukun la hanesan ho hanorin neʼebé dehan katak Maromak nia Ukun iha ita-nia laran. Ka, ita bele hatudu oinsá mak Maromak nia Ukun la hanesan ho ema nia ukun. Maibé, ba ema neʼebé hatene ona lia-loos importante neʼe, karik ita bele halo klaru liután informasaun kona-ba neʼe. Ita bele hatudu oinsá mak Kristu nia Ukun la hanesan ho Jeová nia ukun ba lalehan no rai neʼebé temi iha Salmo (Mazmur) 103:19, ka la hanesan ho “ninia Oan doben nia ukun” neʼebé temi iha Koloso 1:13, ka la hanesan ho ninia arranju atu ‘organiza buat hotu iha Kristu’, neʼebé temi iha Éfeso 1:10. Hodi halo komparasaun, ida-neʼe bele ajuda ita atu halo klaru liután Bíblia nia hanorin neʼe ba ita-nia rona-naʼin.

Dala barak Jesus uza dalan neʼe atu hanorin. Nia halo komparasaun oinsá ema barak nia hanoin kona-ba Moisés nia Ukun-Fuan ho arti loloos husi Ukun-Fuan sira-neʼe. (Mateus 5:21-48) Nia halo komparasaun kona-ba serbí Maromak iha dalan loos ho hahalok laran-makerek neʼebé ema farizeu sira hatudu. (Mateus 6:1-18) Nia halo komparasaun kona-ba ema neʼebé gosta atu domina sira-nia povu ho hahalok neʼebé ninia dixípulu sira hatudu hodi la hanoin an deʼit. (Mateus 20:25-28) Iha tempu ida, hanesan hakerek iha Mateus 21:28-32, Jesus konvida ninia rona-naʼin sira atu haree rasik saida mak la hanesan entre hahalok foti-an no arrepende an neʼebé loos. Ida-neʼe lori ita ba dalan seluk tan neʼebé ajuda ita atu hanorin ho didiʼak.

Book rona-naʼin atu hanoin

Iha Mateus 21:28, Jesus hahú ninia komparasaun hodi husu: “Imi hanoin oinsá?” Mestre neʼebé diʼak la fó sai deʼit informasaun ka fó resposta ba pergunta sira. Maibé, nia book ninia rona-naʼin atu haburas kbiit atu hanoin. (Provérbios [Amsal] 3:21; Roma 12:1) Nia halo ida-neʼe hodi uza pergunta sira. Hanesan hakerek iha Mateus 17:25, Jesus husu dehan: “Simão, ó hanoin oinsá? Liurai sira rai neʼe nian simu impostu sira husi sé? Husi sira-nia oan ka husi ema seluk?” Jesus nia pergunta diʼak neʼe ajuda Pedro atu nia rasik bele hatán kona-ba selu taxa. Nuneʼe mós, kuandu Jesus hatán ba ema neʼebé husu ba nia dehan: “Sé loos mak haʼu-nia maluk?” Jesus halo komparasaun kona-ba amlulik no ema Levi ida nia hahalok ho ema Samaria ida nian. Tuirmai, Jesus husu pergunta dehan: “Entaun tuir ó-nia hanoin, husi ema naʼin-tolu neʼe, ida-neʼebé mak sai nuʼudar maluk ba ema neʼebé monu iha naʼok-teen nia liman?” (Lucas 10:29-36) Duké fó resposta kedas ba ninia rona-naʼin, Jesus konvida rona-naʼin atu hatán ba ninia pergunta rasik.—Lucas 7:41-43.

Book ema nia laran

Mestre neʼebé komprende Maromak nia Liafuan hatene katak adorasaun neʼebé loos, neʼe laʼós dekor deʼit informasaun ka halo tuir deʼit lei sira. Adorasaun neʼe harii liuhusi relasaun neʼebé diʼak ho Jeová no hafolin ninia dalan. Adorasaun neʼe envolve ita-nia laran tomak. (Deuteronômio [Ulangan] 10:12, 13; Lucas 10:25-27) Iha Eskritura, liafuan “laran” dala barak koʼalia kona-ba buat hotu iha ema nia laran, inklui ninia hakarak, domin, no sentimentu.

Jesus hatene katak, maski ema haree deʼit buat neʼebé iha liʼur, maibé Maromak haree buat neʼebé iha ema nia laran. (1 Samuel 16:7) Entaun, ita tenke halo serbisu ba Maromak tanba domin ba nia, laʼós tanba halo ita-nia maluk sira gaba ita. (Mateus 6:5-8) Iha parte seluk, ema farizeu sira halo buat barak atu ema bele haree. Sira dehan katak importante atu halo tuir lei ida-idak iha Moisés nia Ukun-Fuan no lei neʼebé sira rasik inventa. Tuir loloos, maski sira dehan katak sira adora Maromak, maibé sira la haleno Maromak nia hahalok iha sira-nia moris rasik. (Mateus 9:13; Lucas 11:42) Jesus hanorin katak halo tuir Maromak nia matadalan mak importante, maibé buat neʼebé folin-boot liu mak halo ida-neʼe husi ita-nia laran. (Mateus 15:7-9; Marcos 7:20-23; João 3:36) Ita-nia hanorin mós bele lori buat diʼak barak ba ema se ita halo tuir Jesus nia ezemplu atu hanorin. Tuir loloos, importante atu ita ajuda ema aprende saida mak Maromak hakarak sira atu halo. Maibé, importante mós ba sira atu hatene no hadomi Jeová hodi nuneʼe sira-nia hahalok bele hatudu katak sira hafolin relasaun diʼak ho Maromak neʼebé loos.

Klaru katak atu hetan buat diʼak husi hanorin sira-neʼe, ema presiza hatene ho loloos saida mak iha sira-nia laran rasik. Jesus fó laran-manas ba ema atu hanoin didiʼak kona-ba sira-nia hakarak no sentimentu. Kuandu hadiʼa hanoin neʼebé sala, nia husu ninia rona-naʼin kona-ba tansá sira hanoin, koʼalia, ka halo hanesan neʼe. Maibé, atu ajuda ema liután, Jesus aumenta ninia hanorin sira hodi uza liafuan ruma ka ai-knanoik ka ezemplu ruma neʼebé bele ajuda sira atu iha hanoin neʼebé loos. (Marcos 2:8; 4:40; 8:17; Lucas 6:41, 46) Ita mós bele ajuda ita-nia rona-naʼin hodi book sira atu husu ba sira-nia an pergunta sira tuirmai neʼe: ‘Tansá mak haʼu hakarak atu halo ida-neʼe? Tanbasá mak haʼu hatudu hahalok neʼe?’ Tuirmai, book sira atu haree situasaun neʼe tuir Jeová nia haree.

Hatudu dalan atu halo tuir

Mestre neʼebé diʼak hatene katak “matenek mak buat neʼebé importante liu”. (Provérbios [Amsal] 4:7) Matenek mak kbiit atu uza buat neʼebé ita aprende ona hodi rezolve problema ruma ho didiʼak, hasees an husi perigu, kumpre ita-nia planu, no ajuda ema seluk. Mestre iha responsabilidade atu ajuda estudante hodi aprende atu halo ida-neʼe, maibé laʼós atu halo desizaun ba sira. Kuandu ita koʼalia kona-ba matadalan oioin husi Bíblia, ajuda ita-nia estudante atu hanoin kleʼan kona-ba neʼe. Karik ita bele konta situasaun ida neʼebé mosu iha moris loroloron nian, no tuirmai husu ba ita-nia estudante kona-ba oinsá mak Bíblia nia matadalan neʼebé nia foin aprende bele ajuda nia se nia hasoru situasaun neʼe.—Ebreu 5:14.

Apóstolu Pedro nia diskursu iha loron Pentekostes 33 mak ezemplu diʼak kona-ba oinsá mak ema bele halo tuir informasaun neʼebé kona sira-nia moris. (Apóstolu 2:14-36) Depois Pedro fó sai tiha eskritura tolu neʼebé rona-naʼin sira hatene, Pedro hatudu katak eskritura neʼe sai loos ona tuir situasaun neʼebé sira hotu haree rasik. Ho ida-neʼe, ema-lubun sente katak sira presiza halo tuir buat neʼebé sira rona. Ita-nia hanorin mós halo ema sente hanesan neʼe ka lae? Duké fó sai deʼit informasaun sira, ita ajuda ema atu komprende buat neʼebé sira rona ka lae? Ita fó laran-manas ba ema atu hanoin kona-ba oinsá mak buat neʼebé sira aprende kona sira-nia moris ka lae? Karik sira sei la hakilar hanesan ema-lubun iha loron Pentekostes hodi dehan: “Ami tenke halo saida?” Maibé se ita rasik hanorin didiʼak hodi ajuda ema atu hatene oinsá sira bele halo tuir eskritura, karik ida-neʼe sei book sira atu halo buat ruma.—Apóstolu 2:37.

Kuandu ita lee Bíblia ho ita-nia oan sira, nuʼudar inan-aman ita iha oportunidade atu treinu sira atu hanoin kona-ba oinsá mak atu halo tuir Bíblia nia matadalan sira. (Éfeso 6:4) Porezemplu, karik ita bele hili versíkulu balu husi programa atu lee Bíblia ba semana neʼe, koʼalia hamutuk kona-ba ninia arti, no tuirmai husu pergunta sira hanesan: ‘Oinsá mak ida-neʼe hatudu matadalan ba ami? Oinsá mak ami bele uza versíkulu sira-neʼe iha serbisu haklaken? Versíkulu sira-neʼe hatudu saida kona-ba Jeová no ninia dalan atu halo buat ruma? No oinsá mak ida-neʼe halo ami hafolin liután Jeová?’ Fó laran-manas ba ita-nia família atu hatoʼo komentáriu kona-ba buat sira-neʼe durante programa atu lee Bíblia iha Eskola Serbisu Kristaun nian. Karik sira sei nunka haluha versíkulu neʼebé sira rasik fó komentáriu ona.

Hatudu ezemplu diʼak

Ita hanorin ema laʼós deʼit liuhusi ita-nia liafuan maibé mós liuhusi ita-nia hahalok. Ita-nia hahalok bele sai nuʼudar ezemplu hodi halo tuir buat neʼebé ita hatete. Liuhusi hahalok mak oan sira sei aprende buat ruma. Kuandu sira banati-tuir sira-nia inan-aman, sira hatudu katak sira hakarak atu sai hanesan sira-nia inan-aman. Sira hakarak hatene saida mak sira sente hodi halo buat neʼebé inan-aman sira halo. Nuneʼe mós, kuandu ema sira neʼebé ita hanorin ‘halo tuir ita-nia ezemplu, hanesan ita mós halo tuir Kristu’, sira rasik sei simu bensaun tanba laʼo iha Jeová nia dalan sira. (1 Korinto 11:1) Sira bele haree rasik oinsá mak Maromak tau matan ba sira.

Buat sira-neʼe hatudu ho klaru tansá importante ba ita atu fó ezemplu neʼebé diʼak. ‘Buat neʼebé ita halo’ no ita-nia “hahalok santu” atu “serbí Maromak ho laran-metin”, iha kbiit boot atu hanorin ita-nia estudante kona-ba oinsá atu halo tuir Bíblia nia matadalan. (2 Pedro 3:11) Se ita fó laran-manas ba estudante Bíblia nian atu lee Maromak nia Liafuan beibeik, ita rasik mós tenke badinas atu lee ida-neʼe beibeik. Se ita hakarak atu ita-nia oan aprende hodi moris tuir Bíblia nia matadalan, sira tenke haree katak ita-nia hahalok tuir duni Maromak nia hakarak. Se ita fó laran-manas ba kongregasaun atu badinas hodi haklaken, ita mós tenke hola parte beibeik iha serbisu neʼe. Entaun, se ita halo tuir buat neʼebé ita hanorin, ita bele duni book ema seluk nia laran.—Roma 2:21-23.

Nuʼudar ita hanoin kona-ba oinsá mak ita bele halo diʼak liután ita-nia dalan atu hanorin, husu ba ita-nia an: ‘Kuandu haʼu fó matadalan ruma, haʼu halo ida-neʼe iha dalan neʼebé book ema nia laran, hodi troka sira-nia hahalok no koʼalia ka lae? Atu halo informasaun sai klaru liu, haʼu halo komparasaun kona-ba oinsá ideia ida la hanesan ho ideia seluk ka lae? Saida mak haʼu halo atu ajuda haʼu-nia estudante, haʼu-nia oan, ka haʼu-nia rona-naʼin sira atu hanoin-hetan buat neʼebé haʼu dehan? Haʼu hatudu ho klaru ba haʼu-nia rona-naʼin sira kona-ba oinsá atu halo tuir buat neʼebé sira aprende ka lae? Sira bele haree haʼu-nia ezemplu ka lae? Sira hatene katak informasaun neʼebé sira estuda daudaun bele kona sira-nia relasaun ho Maromak ka lae?’ (Provérbios [Amsal] 9:10) Kontinua tau atensaun ba buat sira-neʼe nuʼudar ita buka atu aumenta liután ita-nia matenek nuʼudar mestre ida. Bíblia dehan: “Haree didiʼak ó-nia an no ó-nia hanorin. Kaer metin ba buat sira-neʼe, tanba hodi halo ida-neʼe mak ó sei salva ó-nia an rasik no mós sira neʼebé rona ba ó.”—1 Timóteo 4:16.