Ita sei hanoin-hetan ka lae, tempu neʼebé Ita halimar no monu bainhira Ita sei kiʼik? Karik Ita hetan kanek iha liman ka ain-tuur, no Ita komesa tanis. Iha momentu neʼebá, oinsá mak Ita-nia amá fó konsola ba Ita? Karik nia hamoos Ita-nia kanek no tau ai-moruk. Nia mós hamaus no hakoʼak Ita, lakleur Ita sente kmaan fali. Loos, bainhira Ita sei labarik, fasil ba Ita atu hetan kmaan.

Maibé nuʼudar Ita sai boot ba daudaun, Ita-nia moris la hanesan uluk ona. Ita hasoru problema oioin neʼebé susar atu rezolve, no la fasil ba Ita atu hetan kmaan. Haree toʼok ezemplu balu.

• Karik Ita sente estrese tanba lakon serbisu. Mane ida naran Julian hatete katak bainhira nia lakon serbisu, nia sente hakfodak no laran-susar tebes. Nia hanoin: ‘Oinsá mak haʼu sei tau matan ba haʼu-nia feen no oan sira-nia presiza? Haʼu serbisu makaʼas ba tempu kleur ona, tanbasá mak patraun la hafolin haʼu-nia serbisu?’

• Karik Ita sente laran-kanek tanba Ita soe malu ho Ita-nia kaben. Raquel dehan: “Tinan ida ho balu liubá, derrepente deʼit haʼu-nia laʼen husik hela haʼu, neʼe halo haʼu laran-triste no laran-kanek tebes toʼo haʼu-nia isin mós sente moras.”

• Karik Ita iha moras boot ruma neʼebé la bele kura. Karik dala ruma Ita sente hanesan fiar-naʼin ida iha tempu antigu, naran Job, neʼebé halerik: “Haʼu odi haʼu-nia moris, haʼu lakohi moris tan.” (Jó [Ayub] 7:16) Karik Ita mós sente hanesan ho katuas ida neʼebé tinan 80 liu, naran Luis. Nia hatete: “Dala ruma haʼu sente katak haʼu hein mate deʼit.”

• Karik Ita-nia família ka belun ida mate. Robert dehan: “Bainhira haʼu rona katak haʼu-nia oan-mane mate tanba aviaun monu, foufoun haʼu la bele fiar ida-neʼe. Depois, haʼu sente laran-kanek tebes, . . . hanesan surik ida sona borus haʼu-nia laran.”—Lucas 2:35.

Maibé ikusmai Robert, Luis, Raquel no Julian hetan kmaan husi Maromak neʼebé iha Kbiit Boot Liu Hotu. Oinsá mak Maromak sei fó kmaan ba ema neʼebé iha susar laran? Ita mós bele hetan kmaan husi Maromak tuir ita ida-idak nia presiza ka lae?

Apóstolu Paulo temi Jeováa nuʼudar “Maromak neʼebé fó kmaan ba ema iha situasaun hotu” no “susar hotu”. (2 Korinto 1:3, 4) Neʼe katak, ita-nia Aman Maromak bele fó kmaan ba ema hotu neʼebé hasoru terus oioin.

Maibé se ita hakarak simu kmaan husi Maromak, ita mós tenke halo buat ruma. Se ita sai moras maibé la bá konsulta, oinsá mak doutór bele ajuda ita? Tan neʼe, Bíblia fó anima mai ita: “Hakbesik ba Maromak, no nia sei hakbesik ba imi.”—Tiago 4:8.

Oinsá mak ita bele fiar katak Maromak sei hakbesik ba ita? Primeiru, tanba nia hatete beibeik katak nia hakarak ajuda ita. (Haree kaixa iha pájina sorin.) Segundu, tanba ema barak hetan ona kmaan husi Maromak, laʼós deʼit iha tempu antigu, maibé mós ohin loron.

Hanesan ho ita ohin loron, Liurai David mós hetan susar no terus oioin. Tan neʼe, nia husu ba Jeová hodi dehan: “Rona bá haʼu-nia harohan bainhira haʼu halerik hodi husu ajuda.” Maromak ajuda duni nia ka lae? Sin. David rasik hatutan tan: “Haʼu simu ona ninia ajuda, no haʼu-nia laran haksolok.”—Salmo (Mazmur) 28:2, 7.

JESUS NIA KNAAR ATU FÓ KMAAN BA EMA NEʼEBÉ TRISTE

Husi tempu uluk kedas, Maromak halo planu ona atu fó kmaan ba ema liuhusi Jesus. Maromak fó-hatene nanis katak Jesus sei “kura sira neʼebé laran-kanek” no “fó kmaan ba ema hotu neʼebé triste”. (Isaías [Yesaya] 61:1, 2) No bainhira Jesus tun mai rai, nia kumpre ida-neʼe hodi hanoin tebes ema neʼebé ‘kole no lori naha todan’.—Mateus 11:28-30.

Jesus fó kmaan ba ema hodi hatudu laran-diʼak ba sira, fó konsellu diʼak ba sira, no mós dala ruma kura sira-nia moras. Loron ida, ema moras-lepra ida ho laran husu ba Jesus, hodi dehan: “Se Ita-Boot hakarak, Ita bele halo haʼu sai moos.” Jesus hanoin tebetebes nia, no hatán: “Haʼu hakarak. Sai moos bá.” (Marcos 1:40, 41) Jesus kura duni ema neʼe.

Ohin loron, Jesus la tun mai mundu atu fó kmaan ba ita ida-idak. Maibé, ninia Aman, Jeová, ajuda nafatin ema neʼebé iha susar laran, tanba nia mak “Maromak neʼebé fó kmaan ba ema iha situasaun hotu”. (2 Korinto 1:3) Hanoin toʼok dalan haat neʼebé Maromak uza atu fó kmaan ba ema.

• Bíblia. “Buat hotu neʼebé hakerek ona horiuluk kedas, hakerek hodi hanorin ita no fó ita esperansa, basá Eskritura sira-neʼe ajuda ita atu tahan no fó kmaan mai ita.”—Roma 15:4.

• Espíritu santu. Depois Jesus mate, kongregasaun kristaun presiza duni atu hetan kmaan. Bíblia hatudu katak Maromak fó kmaan ba sira liuhusi ninia espíritu santu. (Apóstolu 9:31) Espíritu santu mak Maromak nia kbiit neʼebé iha forsa makaʼas. Maromak uza ida-neʼe atu fó kmaan ba ema hotu neʼebé iha susar laran.

• Orasaun. Bíblia fó laran-manas mai ita: “Keta laran-taridu kona-ba buat ida, maibé . . . hatoʼo imi-nia laran-susar ba Maromak liuhusi orasaun . . . no Maromak nia dame . . . sei proteje imi-nia laran no imi-nia kbiit atu hanoin.”—Filipe 4:6, 7.

• Maluk kristaun sira mós bele fó kmaan mai ita. Apóstolu Paulo mós dehan katak ninia maluk kristaun sira “fó kmaan” ba nia iha tempu neʼebé nia hasoru “susar no terus hotu”.—Koloso 4:11; 1 Tesalónika 3:7.

Maibé karik Ita hanoin: ‘Oinsá mak buat sira-neʼe bele ajuda haʼu?’ Hodi hatene didiʼak oinsá mak ema naʼin-haat neʼebé temi ona iha pájina 3 hetan kmaan, neʼe sei ajuda Ita atu fiar ba Maromak nia promete neʼebé dehan: “Hanesan inan ida fó kmaan ba ninia oan-mane, nuneʼe mós haʼu sei kontinua fó kmaan ba imi.”—Isaías (Yesaya) 66:13.

KUANDU LAKON SERBISU

Mane ida naran Setha dehan: “Haʼu ho haʼu-nia feen lakon serbisu iha tempu neʼebé hanesan. Durante tinan rua, ami moris hodi halo serbisu kiʼik-kiʼik sira no simu ajuda husi ema seluk maski ami moe atu simu. Susar neʼe halo haʼu-nia feen Priscilla sai depresaun, no haʼu mós sente la iha folin.

“Oinsá mak ami bele tahan? Priscilla sempre hanoin-hetan Jesus nia liafuan iha Mateus 6:34, neʼebé haruka ita atu la hanoin barak kona-ba loron-aban, tanba loron ida-idak iha ninia problema rasik. No liuhusi orasaun, nia hetan forsa atu tahan. Haʼu mós entrega haʼu-nia laran-susar hotu ba Jeová hodi halo tuir Salmo (Mazmur) 55:22, no Nia ajuda duni haʼu. Agora haʼu iha serbisu ona, maibé ami kontinua moris simples hodi tuir Jesus nia konsellu iha Mateus 6:20-22. Ikusmai, ami hakbesik liután ba Maromak no ami-nia relasaun nuʼudar feen-laʼen mós sai metin liután.”

Jonathan mós hatete: “Bainhira ami-nia negósiu kiʼik bangkrut tiha, neʼe halo haʼu taʼuk tebes ba futuru. Tanba situasaun ekonomia sai aat, ami-nia serbisu makaʼas ba tinan 20 nia laran sai saugati deʼit. Haʼu-nia feen no haʼu komesa diskute malu kona-ba osan.

“Maibé Maromak nia Liafuan no ninia espíritu santu ajuda ami atu halo desizaun neʼebé diʼak. Haʼu aprende atu simu serbisu naran deʼit, no ami mós hakaʼas an atu la gasta osan. Nuʼudar Testemuña ba Jeová, ami-nia maluk kristaun sira mós ajuda duni ami.”

KUANDU MORIS KABEN NIAN NAKSOBU

Raquel hatete: “Bainhira haʼu-nia laʼen derrepente deʼit husik hela haʼu, neʼe halo haʼu laran-kanek no triste tebes. Maibé hodi hakbesik ba Maromak, haʼu bele sente kmaan. Loron-loron bainhira haʼu halo orasaun ba Maromak, haʼu bele sente Maromak nia dame proteje haʼu-nia laran, hanesan Nia kura haʼu-nia laran-kanek.

“Haʼu hafolin tebes Bíblia tanba ajuda ona haʼu atu la rai hirus tan. Haʼu hanoin beibeik apóstolu Paulo nia liafuan iha Roma 12:21: ‘Keta husik buat aat manán imi, maibé kontinua manán buat aat ho buat neʼebé diʼak.’

“Haʼu-nia belun ida mós fó hanoin haʼu katak haʼu presiza husik tiha buat neʼebé liu ona. Nia loke Eclesiastes (Pengkhotbah) 3:6 no ho laran-diʼak nia dehan ba haʼu atu labele ‘hanoin tan kona-ba buat neʼebé lakon ona’. Konsellu neʼe makaʼas tebes, maibé neʼe mak haʼu presiza. Agora haʼu iha planu foun ba haʼu-nia moris.”

Elizabeth mós dehan: “Bainhira moris kaben nian naksobu, ita presiza ema atu ajuda ita. Haʼu iha kolega diʼak ida neʼebé ajuda haʼu loroloron. Nia tanis hamutuk ho haʼu, fó kmaan mai haʼu, no nia halo haʼu fiar katak ema sei hadomi haʼu. Haʼu fiar katak Jeová mak uza nia atu kura haʼu-nia laran-kanek.”

KUANDU HETAN MORAS KA SAI IDADE

Luis neʼebé temi ona iha pájina 3, iha problema ho ninia fuan, no nia besik atu mate dala rua ona. No agora, loroloron nia presiza uza mákina oksijéniu nian ba oras 16. Nia dehan: “Haʼu harohan beibeik ba Jeová. Depois halo tiha orasaun, haʼu sente Maromak nia espíritu fó forsa mai haʼu. Orasaun ajuda haʼu atu la rende an tanba haʼu tau fiar no hatene katak Jeová hanoin haʼu.”

Feto ida naran Petra neʼebé tinan 80 liu mós hatete: “Haʼu hakarak halo buat barak, maibé la bele. Haʼu sente triste tanba haʼu sai fraku ba beibeik, kole lalais no presiza hemu ai-moruk. Haʼu hanoin beibeik kona-ba Jesus husu ba ninia Aman atu hasai ninia susar. Jeová fó forsa ba Jesus atu tahan, no nia mós sei fó forsa mai haʼu. Halo orasaun loroloron mak hanesan ai-moruk neʼebé bele halo haʼu sente kmaan.”—Mateus 26:39.

Julian neʼebé durante besik tinan 30 luta hasoru moras aat ida mós hatete: “Haʼu tenke uza kadeira-roda. Maibé haʼu sente haʼu-nia moris iha folin duni tanba haʼu hakaʼas an atu ajuda ema seluk, no neʼe halo haʼu sente kmaan. Jeová mós fó forsa mai ita iha tempu neʼebé loos hodi tuir ninia promesa. Hanesan ho apóstolu Paulo, haʼu mós bele hatete: ‘Iha buat hotu haʼu hetan forsa liuhusi nia neʼebé fó kbiit mai haʼu.’”—Filipe 4:13.

KUANDU EMA NEʼEBÉ ITA HADOMI MATE

Antonio dehan: “Bainhira haʼu-nia apá mate tanba asidente karreta, foufoun haʼu la bele fiar. Haʼu sente neʼe la justisa tanba nia laʼo ain deʼit. Maibé haʼu la bele halo buat ida. Depois asidente neʼe, nia la hadeer durante loron lima no ikusmai mate. Haʼu lakohi tanis iha amá nia oin, maibé haʼu tanis makaʼas bainhira haʼu mesak. Haʼu husu ba haʼu-nia an: ‘Tanbasá? Tanbasá?’

“Iha tempu susar neʼe, haʼu husu beibeik Jeová nia ajuda atubele kontrola haʼu-nia emosaun no halo haʼu sente dame. No neineik-neineik haʼu sente kalma fali. Haʼu hanoin-hetan Bíblia dehan katak buat aat bele ‘mosu derrepente deʼit ba ema hotu. Haʼu fiar metin katak haʼu sei hasoru fali haʼu-nia apá bainhira nia moris hiʼas tanba Maromak nunka bosok.”—Eclesiastes (Pengkhotbah) 9:11; João 11:25; Tito 1:2.

Robert neʼebé temi ona iha pájina 3, mós hatete: “Haʼu no haʼu-nia feen sente dame iha laran hanesan hakerek iha Filipe 4:6, 7 bainhira ami halo orasaun ba Jeová. Tan neʼe, ami bele fó sai ami-nia fiar kona-ba moris-hiʼas ba jornalista sira. Maski ami-nia oan-mane mate, maibé ami sei iha memória neʼebé diʼak kona-ba tempu neʼebé ami hamutuk, no ami hakaʼas an atu hanoin beibeik kona-ba neʼe.

“Bainhira maluk Testemuña sira hatete katak sira haree ami fó sai ami-nia fiar ho kalma iha televizaun, ami hatete katak neʼe tanba sira halo orasaun beibeik ba ami. Ami fiar duni katak Jeová fó kmaan mai ami liuhusi ami-nia maluk sira.”

Loos duni, Maromak bele fó kmaan ba ema neʼebé hasoru problema no susar oioin. Oinsá ho Ita? Maski Ita hasoru susar naran deʼit, maibé Ita bele hetan duni kmaan. Tan neʼe, ami anima Ita atu hakbesik ba Jeová hodi husu ninia ajuda.b Sin, nia mak “Maromak neʼebé fó kmaan ba ema iha situasaun hotu”.—2 Korinto 1:3.