Pergunta husi haklaken-naʼin

◼ Ita tenke estuda ho ema neʼebé laʼo ba oin toʼo bainhira?

Diʼak atu ita kontinua estuda Bíblia ho ema neʼebé laʼo ba oin toʼo nia estuda livru rua tuirmai neʼe: Tuir loloos, Saida mak Bíblia Hanorin? no “Hela Nafatin iha Maromak nia Domin.” Ita bele halo nuneʼe maski estudante neʼe hetan batizmu ona antes nia estuda hotu livru rua neʼe. Depois nia hetan ona batizmu, ita bele kontinua sura oras, vizita fali, no estudu. Se haklaken-naʼin ida akompaña ita atu halo estuda, nia mós bele sura oras.—Haree Ita-nia Serbisu Reinu nian (Ita-nia Serbisu Kristaun) Marsu 2009, pájina 2.

Antes ita para estuda ho ema foun, importante tebes katak sira sai metin ona iha lia-loos. Sira presiza halo sira-nia “abut naruk” iha Kristu no sai ‘makaʼas liután iha sira-nia fiar’ atu sira bele tahan susar oioin neʼebé sira hasoru. (Kol 2:6, 7; 2 Tim 3:12; 1 Ped 5:8, 9) No mós, atu bele hanorin ema seluk ho diʼak, sira tenke “simu matenek kona-ba lia-loos”. (1 Tim 2:4) Hodi estuda livru rua toʼo ramata ba ita-nia estudante sira, ita ajuda sira atu laʼo nafatin iha ‘dalan kiʼik neʼebé lori ema ba moris’.—Mt 7:14.

Antes katuas sira fó lisensa ba estudante Bíblia ida atu hetan batizmu, sira presiza haree didiʼak katak estudante neʼe hatene ho klaru hanorin importante husi Bíblia no halo tuir ona hanorin sira-neʼe iha ninia moris. Katuas sira tenke tetu didiʼak kuandu sira hanoin kona-ba fó lisensa ba estudante neʼebé seidauk halo ramata livru primeiru atu hetan batizmu. Se estudante ida seidauk prontu, katuas sira sei arranja hodi estudante neʼe hetan ajuda neʼebé nia presiza atubele hetan batizmu iha futuru.—Haree Diorganisasi untuk Melakukan Kehendak Yehuwa, pájina 217-218.

[Liafuan neʼebé foti husi pájina 2]

Importante tebes katak estudante Bíblia sai metin iha lia-loos