Moisés lori ema Izraél sai husi dadur iha Ejitu ba Foho Sinai, iha neʼebá Maromak fó ninia ukun-fuan sira. Depois, Moisés haruka espiaun naʼin-12 atu hafuhu rai Kanaan. Maibé, sira naʼin-10 fila fali hodi konta istória la diʼak. Sira halo povu hakarak bá fali Ejitu. Tanba povu la fiar Maromak, Maromak fó kastigu hodi halo sira laʼo-lemo iha rai-fuik maran durante tinan 40.

Ikusmai, Maromak hili Josué atu lori ema Izraél tama rai Kanaan. Hodi ajuda sira foti rai neʼe, Jeová halo milagre sira. Nia halo Mota Jordaun la suli tan, moru Jerikó monu, no loro-matan para durante loron tomak. Depois tinan neen liu tiha, sira foti duni rai husi ema Kanaan.

Komesa ho Josué, juis sira ukun Izraél durante tinan 356. Ita sei aprende kona-ba juis barak hanesan Barac, Gideão, Jefté, Sansão no Samuel. Ita sei lee mós kona-ba feto sira hanesan Raab, Débora, Jael, Rute, Noemi no Dalila. Parte TOLU mak istória neʼebé akontese durante tinan 396.

HATENE saida mak ema neʼe foti husi rai? Ida-neʼe hanesan mahon-been jelu. Ida-neʼe mutin, no mihis no bele silu. Maibé, ida-neʼe laʼós mahon-been jelu; ida-neʼe mak buat ida atu han.

Foin liu fulan ida husi tempu neʼebé ema Izraél sai husi Ejitu. Sira iha rai-fuik maran. Iha neʼebá iha ai-han uitoan deʼit, nuneʼe ema Izraél muramura, hodi dehan: ‘Diʼak liu Jeová oho ita iha Ejitu. Iha neʼebá, ita iha hahán hotu neʼebé ita hakarak.’

Tan neʼe Jeová hatete: ‘Haʼu sei halo ai-han monu husi lalehan.’ No Jeová halo nuneʼe duni. Dadeer tuirmai, kuandu ema Izraél haree buat mutin neʼebé monu tiha, sira husu ba malu: ‘Saida mak neʼe?’

Moisés hatete: ‘Ida-neʼe mak ai-han neʼebé Jeová fó ba imi.’ Ema bolu ai-han neʼe MANÁ. Nia gostu hanesan dose mihis neʼebé halo ho bani-been.

Moisés hatete ba povu: ‘Imi tenke foti, tuir ema ida-idak nia presiza.’ No sira halo nuneʼe dadeer-dadeer. Kuandu loron manas ona, maná neʼebé hela iha rai sai nabeen.

Moisés mós dehan: ‘Ema ida labele rai maná toʼo aban.’ Maibé, ema balu la rona. Hatene saida mak akontese? Dadeer tuirmai maná neʼebé sira rai hela neʼe sai nakonu ho ular, no dois!

Maibé, semana-semana iha loron ida neʼebé Jeová haruka povu atu foti maná ba loron rua nian. Ida-neʼe mak loron neen, neʼebé ita agora bolu loron-sesta. No Jeová hateten atu rai maná ba aban, tanba nia sei la halo maná atu monu iha loron hitu, loron neʼebé ita agora bolu loron-sábadu. Kuandu sira rai maná toʼo loron hitu, la sai ular no la dois! Ida-neʼe mak milagre ida tan!

Durante tinan hotu neʼebé ema Izraél hela iha rai-fuik maran, Jeová fó maná ba sira atu han.