AIÁ! Ema sira-neʼe halo saida? Sira harohan ba karau-oan! Tanbasá sira halo nuneʼe?

Moisés hela iha foho kleur, no povu hatete: ‘Ita la hatene saida mak akontese ba Moisés. Nuneʼe, mai ita halo maromak ida atu lori ita sai husi rai neʼe.’

Moisés nia maun Aarão hatete: ‘Diʼak. Lori imi-nia brinkus osan-mean mai.’ Kuandu sira halo nuneʼe, Aarão halo nabeen brinkus sira-neʼe no halo karau-oan osan-mean. No povu hatete: ‘Ida-neʼe mak ita-nia Maromak, neʼebé lori ita sai husi Ejitu!’ Depois ema Izraél halo festa boot, no adora karau-oan osan-mean neʼe.

Kuandu Jeová haree ida-neʼe, nia hirus tebes. Entaun, nia hatete ba Moisés: ‘Tun lalais. Povu halo buat neʼebé aat tebes. Sira haluha ona haʼu-nia ukun-fuan sira no hakruʼuk ba karau-oan osan-mean.’

Moisés tun lalais husi foho. Kuandu nia hakbesik, nia haree ida-neʼe. Povu kanta no dansa haleʼu karau-oan osan-mean! Moisés hirus toʼo soe tun fatuk belar rua ho ukun-fuan, no sira nakfera. Depois, nia halo nabeen karau-oan osan-mean neʼe, no harahun toʼo uut.

Povu halo tiha buat ida neʼebé aat tebes. Tan neʼe, Moisés haruka mane balu atu foti sira-nia surik. Moisés hatete: ‘Ema aat neʼebé adora karau-oan osan-mean tenke mate.’ Nuneʼe, mane ho surik oho ema naʼin-3.000! Ida-neʼe hatudu katak ita tenke kuidadu atu adora deʼit Jeová, laʼós maromak falsu sira, loos ka lae?

HATENE ida-neʼe saida? Ida-neʼe mak tenda espesiál atu fó adorasaun ba Jeová, neʼebé mós bolu tabernákulu. Povu halo hotu tenda neʼe tinan ida depois sira sai husi Ejitu. Hatene sé mak haruka sira atu halo tenda neʼe?

Jeová mak haruka. Kuandu Moisés iha Foho Sinai, Jeová hatudu oinsá atu halo tenda neʼe. Nia haruka sira halo iha dalan ida neʼebé bele sobu lalais deʼit. Hanesan neʼe, sira bele lori ba fatin seluk, no monta fali. Nuneʼe, kuandu ema Izraél muda husi fatin ida ba fatin seluk iha rai-fuik maran, sira lori mós tenda neʼe.

Iha sala kiʼik iha tenda laran, ó bele haree kaixa ida. Kaixa neʼe naran arka aliansa nian. Iha sorin ida-ida, iha anju ka kerubín husi osan-mean. Maromak hakerek fali Ukun-Fuan Sanulu iha fatuk belar rua, tanba Moisés halo rahun tiha fatuk belar rua neʼebé uluk. No fatuk neʼe tau iha arka aliansa nia laran. No mós, iha laran iha fatin atu tau maná. Hanoin-hetan maná neʼe saida?

Jeová hili Moisés nia maun Aarão atu sai amlulik boot. Nia dirije povu iha sira-nia adorasaun ba Jeová. No ninia oan-mane sira mós amlulik.

Agora, haree ba sala neʼebé boot liu iha tenda laran. Sala neʼe boot liu fali sala kiʼik dala rua. Haree kaixa ho ahi-suar saʼe ka lae? Ida-neʼe altár neʼebé amlulik uza atu sunu buat neʼebé morin diʼak naran insensu. Iha mós ahi-oan fatin ho ahi-oan hitu. No buat terseiru iha sala laran mak meza. Iha meza leten iha paun-fuan 12.

Iha liʼur, besik tabernákulu, iha basia boot nakonu ho bee. Amlulik sira fase sira-nia liman no ain iha neʼebá. Iha mós altár boot ida atu sunu animál mate nuʼudar sakrifísiu ba Jeová. Ema Izraél sira hela iha tenda neʼebé haleʼu tenda neʼe.