HAREE ba ai-fuan neʼebé ema lori. Haree, uvas futun boot tebes! Presiza mane naʼin-rua atu lori ida-neʼe. No haree ai-figeira nia fuan no romaun. Ai-fuan furak sira-neʼe mai husi neʼebé? Husi rai Kanaan. Hanoin-hetan, uluk Abraão, Isaac no Jacob moris iha neʼebá. Maibé tanba hamlaha boot, Jacob, ho nia família, muda ba Ejitu. Agora, tinan 216 liu tiha, Moisés lori fali ema Izraél ba Kanaan. Sira toʼo fatin ida iha rai-fuik maran naran Kades.

Ema aat hela iha rai Kanaan. Nuneʼe, Moisés haruka espiaun naʼin-12 hodi dehan: ‘Buka-hatene ema naʼin-hira mak hela iha neʼebá, no sira forte ka lae. Buka-hatene rai neʼebá buras ka lae. No la haluha atu lori ho ai-fuan ruma mai.’

Kuandu espiaun sira mai fali toʼo Kades, sira hatete ba Moisés: ‘Rai neʼebá kapás tebes.’ No atu hatudu ida-neʼe, sira fó Moisés ai-fuan balu. Maibé, espiaun naʼin-10 hatete: ‘Ema neʼebé hela iha rai neʼebá boot no forte. Ita sei mate se ita koko atu foti rai neʼe.’

Kuandu rona ida-neʼe ema Izraél taʼuk. Sira hatete: ‘Diʼak liu ita mate iha Ejitu ka iha rai-fuik maran. Ita sei mate iha funu, no ita-nia oan no feen sei sai dadur. Mai ita hili ulun-naʼin foun ida atu lori ita bá fali Ejitu!’

Maibé, espiaun naʼin-rua konfia ba Jeová, no koko atu hamaus povu. Sira mak Josué no Caleb. Sira hatete: ‘Jeová hamutuk ita. No sei fasil atu foti rai neʼebá.’ Maibé, povu lakohi rona. Sira mós hakarak atu oho tiha Josué no Caleb.

Ida-neʼe halo Jeová hirus tebes, no nia hatete ba Moisés: ‘La iha ema ida neʼebé tinan 20 ba leten sei tama iha rai Kanaan. Sira haree tiha ona milagre sira neʼebé haʼu halo iha Ejitu no iha rai-fuik maran, maibé sira la konfia mai haʼu. Tan neʼe, sira sei laʼo-lemo iha rai-fuik maran ba tinan 40 toʼo sira mate. Josué no Caleb deʼit mak sei tama iha rai Kanaan.’

HAREE ai-funan no ai-fuan tasak neʼebé moris husi ai-tonka neʼe. Ida-neʼe Aarão nia ai-tonka. Ai-funan no ai-fuan tasak neʼe moris husi Aarão nia ai-tonka iha kalan ida deʼit! Mai ita haree tansá.

Ema Izraél laʼo-lemo tiha iha rai-fuik maran ba tempu uitoan. Ema balu lakohi Moisés sai ulun-naʼin, no mós Aarão sai amlulik boot. Corá mak ida neʼebé hanoin hanesan neʼe, no mós Datan, Abiram no ulun naʼin-250 seluk. Sira hotu mai no hatete ba Moisés: ‘Tanbasá Ita halo Ita-nia an boot liu fali ami?’

Moisés hatete ba Corá no ema neʼebé tuir nia: ‘Aban dadeer, lori mai imi-nia kanuru-ahi ho insensu. Mai toʼo Jeová nia tabernákulu. Ita sei haree sé mak Jeová hili.’

Loron tuirmai, Corá ho mane naʼin-250 neʼebé tuir nia mai toʼo tabernákulu. Ema barak mai atu apoia mane sira-neʼe. Jeová hirus tebes. Moisés hatete: ‘Sees husi mane aat sira-nia tenda. Keta kaer buat ida neʼebé sira-nian.’ Povu rona, no hadook husi Corá, Datan no Abiram nia tenda sira.

Depois Moisés hatete: ‘Hodi nuneʼe ita sei hatene sé mak Jeová hili. Rai sei nakloke no tolan ema aat sira-neʼe.’

Kuandu Moisés koʼalia tiha, rai nakloke kedas. Corá nia tenda no sasán hotu, Datan, Abiram no ema hamutuk ho sira monu ba rai-kuak, no rai taka sira. Kuandu povu rona hakilar husi ema neʼebé monu ba rai-kuak, povu hatete: ‘Halai! Karik rai neʼe mós tolan ita!’

Corá no ema naʼin-250 neʼebé tuir nia sei besik tabernákulu. Nuneʼe, Jeová haruka ahi atu han sira hotu. Depois, Jeová haruka Aarão nia oan Eleazar atu foti kanuru-ahi sira husi ema mate no halo buat mihis ida atu taka altár. Buat mihis neʼebé taka altár sai nuʼudar avizu ba ema Izraél katak Aarão no nia oan sira deʼit bele halaʼo serbisu nuʼudar amlulik ba Jeová.

Maibé, Jeová hakarak halo klaru tebes katak nia hili Aarão ho nia oan sira atu sai amlulik sira. Nuneʼe, nia hatete ba Moisés: ‘Haruka ulun-naʼin ida husi Izraél nia suku ida-ida atu lori sira-nia ai-tonka. Ba suku Levi, haruka Aarão atu lori ninia ai-tonka. Depois, tau ai-tonka hotu neʼe iha tabernákulu laran, iha arka aliansa nia oin. Ema neʼebé haʼu hili nuʼudar amlulik, ai-funan sei moris husi ninia ai-tonka.’

Dadeer tuirmai Moisés haree katak ai-funan no ai-fuan tasak moris husi Aarão nia ai-tonka! Agora hatene tansá mak Jeová halo ai-funan moris husi Aarão nia ai-tonka?