MANE sira-neʼe iha susar laran. Se sira la halai karik, ema sei oho sira. Sira mak espiaun husi Izraél, no feto neʼebé ajuda sira mak Raab. Raab hela iha uma ida iha sidade Jerikó nia moru leten. Mai ita buka-hatene tansá mane sira-neʼe iha susar laran.

Ema Izraél prontu ona atu hakur Mota Jordaun hodi tama rai Kanaan. Maibé antes ida-neʼe, Josué haruka espiaun naʼin-rua hodi dehan: ‘Bá haree rai neʼebá no sidade Jerikó nuʼusá.’

Kuandu espiaun tama Jerikó, sira bá Raab nia uma. Maibé ema ida hatete ba Jerikó nia liurai: ‘Ohin kalan, ema Izraél naʼin-rua mai atu hafuhu ita-nia rai.’ Kuandu liurai rona ida-neʼe, nia haruka mane sira bá Raab, no sira haruka nia: ‘Lori sai mane sira husi ó-nia uma laran!’ Maibé Raab subar espiaun sira iha uma-kakuluk. Nuneʼe, nia hatete: ‘Mane sira mai duni haʼu-nia uma, maibé haʼu la hatene sira husi neʼebé. Sira sai kuandu besik atu nakukun, antes sidade nia odamatan taka. Se imi bá lalais, bele kaer sira!’ Entaun, mane sira-neʼe sai atu duni tuir espiaun sira.

Depois sira bá, Raab saʼe lalais ba uma-kakuluk. Nia hatete ba espiaun sira: ‘Haʼu hatene katak Jeová sei fó rai neʼe ba imi. Ami rona tiha ona oinsá nia hamaran Tasi Mean bainhira imi sai husi Ejitu, no oinsá imi oho liurai Síon no Og. Haʼu hatudu laran-diʼak ba imi, nuneʼe, favór ida, promete katak imi mós sei hatudu fali laran-diʼak mai haʼu. Salva haʼu-nia inan-aman, no maun-alin hotu.’

Espiaun sira promete atu halo nuneʼe, maibé Raab tenke halo buat ruma. Sira hatete: ‘Foti tali mean neʼe no kesi iha janela, no halibur Ita-nia família hotu iha uma laran. Kuandu ami hotu fila fali atu foti Jerikó, ami sei haree tali neʼe iha Ita-nia janela no sei la oho ema ida iha uma laran.’ Kuandu espiaun sira bá fali Josué, sira fó-hatene buat hotu neʼebé akontese.

HAREE! Ema Izraél hakur daudauk Mota Jordaun! Maibé, bee hotu iha neʼebé? Iha tempu neʼebá udan boot, no foin minutu balu liubá mota nakonu ho bee. Maibé agora mota maran! Ema Izraél laʼo hakur mota iha rai maran hanesan deʼit iha Tasi Mean! Bee hotu bá neʼebé? Mai ita haree.

Kuandu tempu toʼo ba ema Izraél atu hakur Mota Jordaun, Jeová haruka Josué atu dehan ba povu: ‘Amlulik sira tenke foti arka aliansa nian no laʼo iha povu nia oin. Kuandu sira hakat tama Mota Jordaun, bee neʼe sei la suli tan.’

Nuneʼe, amlulik sira foti arka aliansa nian, no laʼo iha povu nia oin. Kuandu sira toʼo Jordaun, amlulik hakat tama bee. Mota neʼe kleʼan no suli makaʼas. Maibé, iha tempu neʼebé sira-nia ain kona bee, bee neʼe komesa atu la suli tan! Ida-neʼe milagre ida! Jeová hapara bee hodi la bele suli tan. Hodi nuneʼe, mota sai maran duni!

Amlulik sira neʼebé lori arka aliansa nian tama toʼo mota nia klaran. Ó bele haree sira iha dezeñu ka lae? Nuʼudar sira hamriik iha neʼebá, ema Izraél sira seluk laʼo kedas hakur Mota Jordaun iha rai maran!

Kuandu ema hotu liu ba sorin seluk, Jeová haruka Josué atu dehan ba ema forte naʼin-12: ‘Bá fali hasoru amlulik sira neʼebé iha arka aliansa nian. Foti fatuk 12 iha mota, no hada iha fatin neʼebé imi sei hela kalan neʼe. Hanesan neʼe, iha futuru, kuandu imi-nia oan sira husu kona-ba fatuk sira-neʼe katak sá, imi tenke fó-hatene katak bee la suli tan kuandu Jeová nia arka aliansa nian hakur Jordaun. Fatuk sira-neʼe sei fó-hanoin kona-ba milagre ida-neʼe!’ Josué mós tau fatuk 12 iha mota klaran iha neʼebé amlulik sira hamriik.

Ikusliu, Josué hatete ba amlulik sira neʼebé lori arka aliansa nian: ‘Sai husi Jordaun.’ Iha tempu neʼebé sira sai, mota komesa suli fali.