Watchtower BIBLIOTEKA ONLINE
Watchtower
BIBLIOTEKA ONLINE
Tetun Dili
Á
  • Á
  • á
  • É
  • é
  • Í
  • í
  • Ó
  • ó
  • Ú
  • ú
  • Ã
  • ã
  • Ç
  • ç
  • Ñ
  • ñ
  • ʼ
  • BÍBLIA
  • LIVRU SIRA
  • REUNIAUN SIRA
  • Naʼok-teen iha Izraél
    Livru Istória husi Bíblia
    • Acan subar osan-mean besi-tomak ida, osan-mutin rahun balu, no faru furak ida iha ninia tenda laran

      ISTÓRIA 47

      Naʼok-teen iha Izraél

      HAREE ba sasán neʼebé ema neʼe hakoi daudauk iha ninia tenda! Faru furak ida, osan-mean besi-tomak ida no osan-mutin rahun balu. Nia foti sasán neʼe husi sidade Jerikó. Maibé loloos, saida mak nia tenkesér halo ba sasán husi Jerikó? Hanoin-hetan ka lae?

      Sira tenke sobu sasán hotu husi Jerikó, no sira tenke fó osan-mean no osan-mutin ba ema neʼebé toma konta ba Jeová nia tabernákulu. Nuneʼe, ema sira-neʼe la halo tuir Maromak. Sira naʼok Maromak nia sasán. Mane neʼe naran Acan, no sira neʼebé hamutuk ho nia mak ninia família. Mai ita haree saida mak akontese.

      Depois Acan naʼok sasán sira-neʼe, Josué haruka ema balu atu funu hasoru sidade ida naran Ai. Maibé sira lakon. Ema balu mate, no sira seluk halai. Josué triste tebes. Nia hakneʼak ho oin ba rai no halo orasaun ba Jeová: ‘Tanbasá mak Ita husik ida-neʼe akontese?’

      Jeová hatán: ‘Hamriik! Izraél halo sala. Sira foti tiha sasán balu neʼebé sira tenkesér sobu ka fó ba Jeová nia tabernákulu. Sira naʼok no rai subar faru furak ida. Haʼu sei la fó bensaun ba imi toʼo imi sobu sasán neʼe, no oho ema neʼebé naʼok sasán neʼe.’ Jeová hatete katak nia sei hatudu ba Josué ema aat neʼe sé.

      Tan neʼe, Josué halibur povu tomak, no Jeová hatudu katak ema aat neʼe mak Acan. Acan hatete: ‘Haʼu halo sala. Haʼu haree faru furak, osan-mean besi-tomak no osan-mutin rahun balu. Haʼu hakarak tebes sasán sira-neʼe no foti deʼit. Sasán neʼe hakoi iha haʼu-nia tenda laran.’

      Kuandu ema hetan sasán neʼe no lori ba Josué, Josué hatete ba Acan: ‘Tanbasá ó lori susar neʼe mai ami? Agora Jeová sei lori susar ba ó!’ Tan neʼe, povu hotu tuda mate Acan no ninia família. Ida-neʼe hatudu katak ita labele foti ema seluk nia sasán, loos ka lae?

      Depois, Izraél bá fali atu funu hasoru Ai. Agora, Jeová ajuda ninia povu, no sira manán.

      Josué 7:1-26; 8:1-29.

      Pergunta atu estuda

  • Ema Jibeón neʼebé matenek
    Livru Istória husi Bíblia
    • Ema Jibeón ba iha kampu Izraél no hatudu Josué sira-nia hatais roupa aat no xinelus bosan no lori paun neʼebé maran

      ISTÓRIA 48

      Ema Jibeón neʼebé matenek

      IHA Kanaan, sidade barak prepara ona atu funu hasoru Izraél. Sira hanoin katak bele manán. Maibé, povu iha sidade naran Jibeón, neʼebé besik povu Izraél, la hanoin hanesan neʼe. Sira fiar katak Maromak ajuda ema Izraél, no sira lakohi funu kontra Maromak. Nuneʼe, hatene saida mak ema Jibeón halo?

      Sira deside atu finje katak sira hela iha fatin dook tebes. Nuneʼe, ema balu hatais roupa aat no xinelus bosan. Sira tula sira-nia kuda-burru ho saku bosan, no lori paun neʼebé maran. Depois, sira bá hasoru Josué no hatete: ‘Ami mai husi rai ida dook tebes, tanba ami rona kona-ba Ita-Boot sira nia Maromak boot, Jeová. Ami rona kona-ba buat hotu neʼebé nia halo ba imi iha Ejitu. Tan neʼe, ami-nia ulun-naʼin sira haruka ami atu foti ai-han hodi laʼo-rai no hatete ba Ita-Boot sira: “Ami imi-nia atan. Promete katak imi sei la halo funu ho ami.” Ita-Boot sira bele haree ami-nia roupa bosan no paun sai maran ona, tanba ami laʼo-rai husi dook.’

      Josué no ulun-naʼin seluk sira fiar ba ema Jibeón neʼe. Nuneʼe, sira promete atu la funu hasoru sira. Maibé loron tolu tuirmai, sira foin hatene katak ema Jibeón hela besik deʼit.

      Josué husu sira: ‘Tanbasá imi dehan katak imi mai husi rai dook?’

      Ema Jibeón hatán: ‘Ami halo nuneʼe tanba ami rona tiha ona katak imi-nia Maromak Jeová promete atu fó rai hotu iha Kanaan ba imi. Tan neʼe, ami taʼuk imi sei oho ami.’ Ema Izraél halo tuir sira-nia promesa, no la oho ema Jibeón, maibé halo sira sai atan.

      Jeruzalein nia liurai hirus tanba ema Jibeón halo dame ho Izraél. Tan neʼe, nia hatete ba liurai naʼin-haat seluk: ‘Mai ajuda haʼu atu funu hasoru Jibeón.’ No liurai naʼin-lima neʼe halo nuneʼe duni. Tanba liurai sira-neʼe mai atu funu hasoru Jibeón, ema Jibeón matenek atu halo dame ho Izraél ka lae? Mai ita haree toʼok.

      Josué 9:1-27; 10:1-5.

      Pergunta atu estuda

Livru sira iha lian Tetun Dili (1993-2026)
Log Out
Log In
  • Tetun Dili
  • Fahe
  • Organiza tuir Ita-nia hakarak
  • Copyright © 2025 Watch Tower Bible and Tract Society of Pennsylvania
  • Kondisaun atu Uza
  • Informasaun Privadu
  • Setting kona-ba privasidade
  • JW.ORG
  • Log In
Fahe