-
Liurai Izraél primeiru toʼo povu sai dadur iha BabilóniaLivru Istória husi Bíblia
-
-
PARTE 4
Liurai Izraél primeiru toʼo povu sai dadur iha Babilónia
Saul sai liurai Izraél primeiru. Maibé, Jeová la simu nia, no hili David atu sai liurai iha ninia fatin. Ita aprende buat barak kona-ba David. Kuandu nia sei joven, nia funu hasoru jigante Golias. Tuirmai, nia halai husi Liurai Saul neʼebé laran-moras. Depois, Abigail neʼebé bonita hapara David atu la halo buat neʼebé beik.
Tuirmai, ita aprende buat barak kona-ba David nia oan Salomão, neʼebé sai liurai Izraél tuir David. Izraél nia liurai primeiru naʼin-tolu neʼe, ida-idak ukun ba tinan 40. Depois Salomão mate tiha, Izraél fahe ba reinu rua, ida reinu norte no ida seluk reinu súl.
Reinu norte suku 10 ukun ba tinan 257, depois ema Asíria halakon reinu neʼe. Liutiha tinan 133 husi tempu neʼe, reinu súl suku rua mós lakon. Iha tempu neʼebá, ema Izraél sira sai dadur iha Babilónia. Nuneʼe, iha Parte HAAT, ita sei haree istória kmanek barak neʼebé akontese durante tinan 510.
-
-
Saul—Izraél nia liurai primeiruLivru Istória husi Bíblia
-
-
ISTÓRIA 56
Saul—Izraél nia liurai primeiru
HAREE Samuel fui mina ba ema neʼe nia ulun. Ema halo hanesan neʼe iha tempu uluk atu hatudu katak sira hili ema atu sai liurai. Jeová haruka Samuel atu fui mina ba Saul nia ulun. Mina espesiál neʼe morin loos.
Saul hanoin katak nia ladún diʼak atu sai liurai. Nia hatete ba Samuel: ‘Haʼu mai husi suku Benjamim, suku kiʼik liu iha Izraél. Tanbasá mak Ita dehan katak haʼu sei sai liurai?’ Jeová gosta Saul tanba nia la foti-an hanesan ema-boot. Tan neʼe, Jeová hili nia atu sai liurai.
Tuir loloos, Saul laʼós ema kiak ka ema kiʼik. Nia mai husi família neʼebé riku, no nia bonitu tebes no ain-aas. Nia aas maizumenus sentímetru 30 liu fali ema seluk hotu iha Izraél! Saul mós ema ida neʼebé halai lalais tebes, no nia forte tebes. Povu kontente tanba Jeová hili Saul atu sai liurai. Sira hotu hakilar: ‘Viva liurai!’
Ema Izraél nia inimigu sira forte. Sira nafatin halo susar ba ema Izraél. Depois Saul sai liurai, ema Amon mai atu funu hasoru ema Izraél. Maibé, Saul halibur tropa barak, no manán ema Amon neʼe. Ida-neʼe mós halo povu kontente katak Saul sai sira-nia liurai.
Nuʼudar tinan liu daudauk, Saul lori ema Izraél atu manán sira-nia inimigu barak. Saul iha oan-mane ida neʼebé brani naran Jónatas. Jónatas mós halo ema Izraél manán funu barak. Ema Filístia sei nafatin ema Izraél nia inimigu boot. Loron ida ema Filístia rihun ba rihun mai atu funu hasoru ema Izraél.
Samuel haruka Saul atu hein toʼo nia mai atu fó sakrifísiu, ka prezente ida, ba Jeová. Maibé, Samuel demora atu mai. Saul taʼuk katak ema Filístia sei hahú atu funu, tan neʼe nia rasik mak fó sakrifísiu neʼe. Kuandu Samuel mai, nia fó-hatene Saul katak Saul la halo tuir Jeová. Samuel hatete: ‘Jeová sei hili ema seluk atu sai liurai ba Izraél.’
Depois, Saul la halo tuir Maromak dala ida tan. Nuneʼe, Samuel hatete ba nia: ‘Diʼak liu atu halo tuir Jeová duké fó prezente hanesan bibi barak neʼebé bokur liu. Tanba Ita la halo tuir Jeová, Jeová sei la husik tan Ita ukun Izraél nuʼudar liurai.’
Ita bele aprende lisaun diʼak husi istória neʼe. Ida-neʼe hatudu katak importante tebes atu ita sempre halo tuir Jeová. No mós, ida-neʼe hatudu katak ema hanesan Saul neʼebé uluk diʼak, bele sai ema aat. Ita lakohi sai ema aat, loos ka lae?
-