SE Ó mate no depois moris filafali, ó-nia inan sente oinsá? Nia sei kontente duni! Maibé, ema neʼebé mate tiha ona bele moris filafali ka lae? Buat hanesan neʼe akontese tiha ona ka lae?

Haree mane iha neʼe, no feto ho labarik-mane kiʼikoan neʼe. Mane neʼe mak profeta naran Elias. Feto neʼe mak feto-faluk ida iha sidade naran Sarefá, no labarik neʼe mak ninia oan-mane. Entaun, loron ida, nia sai moras. Ninia moras sai todan liu toʼo ikusmai mate. Elias hatete ba feto neʼe: ‘Fó labarik neʼe mai haʼu.’

Elias lori labarik neʼebé mate ba andár-leten no hatoba nia iha kama. Tuirmai, nia halo orasaun: ‘Jeová, halo labarik-mane neʼe moris filafali.’ Hafoin, labarik neʼe hahú dada iis fali! Elias lori nia ba kraik no hatete ba feto neʼe: ‘Haree, ó-nia oan moris ona!’ Tan neʼe labarik nia inan kontente tebes.

Jeová nia profeta ida seluk neʼebé importante mak naran Eliseu. Nia nuʼudar Elias nia ajudante. Maibé lakleur, Jeová mós uza nia atu halo milagre. Loron ida, Elias bá sidade naran Suném. Feto ida iha neʼebá laran-diʼak tebes ba nia. Lakleur, feto neʼe mós iha oan-mane ida.

Dadeer-saan ida, kuandu labarik neʼe sai boot ona, nia bá tuir ninia aman neʼebé serbisu iha toʼos. Derrepente, nia hakilar: ‘Haʼu-nia ulun moras!’ Lori tiha toʼo uma, nia mate. Ninia inan triste tebes! Nia bá kedas atu bolu Eliseu.

Bainhira Eliseu toʼo tiha, nia tama ba kuartu neʼebé iha labarik mate neʼe. Nia halo orasaun ba Jeová, no toba iha labarik neʼe nia leten. Lakleur, labarik nia isin sai manas, no nia fani ba dala hitu. Kuandu ninia inan tama iha kuartu no haree ninia oan moris fali ona, nia kontente tebes!

Ema barak tebetebes mate tiha ona. Ida-neʼe halo sira-nia família no kolega sira triste tebes. Ita la iha forsa atu halo ema mate moris filafali. Maibé Jeová iha. Ita sei aprende oinsá mak Jeová sei halo ema rihun ba rihun moris filafali husi mate.

HATENE saida mak labarik-feto neʼe koʼalia daudauk? Nia hatete ba señora neʼe kona-ba Jeová nia profeta Eliseu, no buat furak neʼebé Eliseu halo ho Jeová nia ajuda. Señora neʼe la hatene kona-ba Jeová tanba laʼós ema Izraél. Entaun, mai ita haree tansá mak labarik-feto neʼe iha señora neʼe nia uma.

Señora neʼe ema Síria. Ninia laʼen naran Naaman, xefe ba tropa Síria. Ema Síria kaer labarik-feto Izraél neʼe, no lori ba Naaman nia feen atu sai ninia atan.

Naaman iha moras aat ida naran lepra. Moras neʼe bele halo ema nia isin balu monu. Tan neʼe labarik-feto neʼe hatete daudauk ba Naaman nia feen: ‘Diʼak tebes se haʼu-nia naʼi bele bá hasoru Jeová nia profeta iha Izraél. Nia bele kura moras-lepra.’ Señora neʼe hatoʼo fali liafuan neʼe ba ninia laʼen.

Naaman hakarak tebes atu sai diʼak; tan neʼe nia deside atu bá Izraél. Toʼo tiha neʼebá, nia bá Eliseu nia uma. Eliseu haruka ninia atan atu fó-hatene Naaman bá hariis dala hitu iha Mota Jordaun. Ida-neʼe halo Naaman sai hirus tebes, no nia hatete: ‘Mota iha haʼu-nia rai mak diʼak liu fali mota iha Izraél!’ Koʼalia tiha hanesan neʼe, Naaman bá.

Maibé, ninia atan ida hatete ba nia: ‘Naʼi, se Eliseu haruka ba Ita-Boot atu halo buat ida neʼebé todan karik, Ita-Boot sei halo nuneʼe. Agora, tansá mak Ita-Boot la bele hariis deʼit, hanesan nia hatete?’ Naaman rona ninia atan no bá hodi hatama ninia an iha Mota Jordaun ba dala hitu. Halo tiha neʼe, ninia isin sai metin no diʼak fali!

Naaman kontente tebes. Nia fila ba Eliseu no hatete ba nia: ‘Agora haʼu hatene duni katak Maromak iha Izraél mak Maromak loos mesak ida deʼit iha Rai tomak. Tan neʼe, halo favór, simu bá prezente hirak-neʼe husi haʼu.’ Maibé Eliseu hatán: ‘Lae, haʼu sei la simu.’ Eliseu hatene katak laloos atu simu prezente neʼe, tanba Jeová mak kura Naaman. Maibé, Eliseu nia atan naran Geazi hakarak prezente neʼe ba ninia an.

Entaun, Geazi halo hanesan neʼe. Depois Naaman bá tiha, Geazi halai tuir nia no hatete: ‘Eliseu haruka haʼu atu hatete ba Ita katak nia hakarak prezente balu husi Ita atu fó ba kolega sira neʼebé foin vizita nia.’ Ita hatene liafuan neʼe bosok deʼit. Maibé, Naaman la hatene neʼe bosok; tan neʼe, nia fó prezente balu ba Geazi.

Bainhira Geazi fila ba uma, Eliseu hatene tiha ona saida mak Geazi halo. Jeová mak fó-hatene. Eliseu hatete: ‘Tanba ó halo buat neʼebé aat, Naaman nia moras-lepra sei kona ó.’ Oras neʼe kedas, moras-lepra kona nia duni!

Saida mak ita bele aprende husi buat hotu neʼe? Primeiru, ita mós tenke sai hanesan labarik-feto neʼe no koʼalia kona-ba Jeová. Neʼe fó rezultadu neʼebé diʼak. Segundu, ita labele sai hanesan Naaman neʼebé uluk foti-an, maibé ita tenke halo tuir Maromak nia atan sira. Terseiru, ita labele bosok hanesan Geazi. Ita bele aprende buat barak kuandu ita lee Bíblia, loos ka lae?