MANE sira-neʼe obriga daudauk ema seluk atu serbisu. Haree ba ema neʼebé uza xikote atu baku serbisu-naʼin ida! Serbisu-naʼin sira-neʼe mak família husi Jacob, sira mak ema Izraél. No ema neʼebé obriga sira atu serbisu mak ema Ejitu. Ema Izraél sai ema Ejitu nia atan sira. Oinsá mak ida-neʼe akontese?

Durante tinan barak Jacob nia família boot moris hakmatek iha Ejitu. Liurai Faraó mak ema-boot liu iha Ejitu, tuir nia mak José, no José mak tau matan ba sira. Maibé depois, José mate. No Faraó foun ida, neʼebé la gosta ema Izraél, sai liurai iha Ejitu.

Liurai aat neʼe halo ema Izraél sai atan. No nia halo ema neʼebé siʼak no laran-aat atu manda sira. Sira obriga ema Izraél atu serbisu makaʼas tebes hodi harii sidade sira ba Faraó. Maibé, ema Izraél sai barak. Lakleur, ema Ejitu taʼuk katak ema Izraél sei sai barak liu no forte liu.

Hatene saida mak Faraó halo? Nia koʼalia ba feto sira neʼebé ajuda inan sira husi ema Izraél kuandu sira tuur ahi, hodi dehan: ‘Imi tenke oho bebé-mane hotu neʼebé moris.’ Maibé tanba feto sira-neʼe diʼak, sira la oho bebé sira-neʼe.

Tan neʼe, Faraó haruka nia povu hotu atu halo nuneʼe: ‘Foti bebé-mane Izraél no oho sira hotu. Husik deʼit bebé-feto mak moris.’ Ida-neʼe aat tebes, loos ka lae? Mai ita haree oinsá bebé-mane ida hetan salvasaun.

HAREE bebé kiʼik neʼe, nia tanis hela no kaer feto nia liman. Nia mak Moisés. Hatene sé mak feto bonita neʼe? Nia mak Liurai Faraó nia oan-feto rasik.

Moisés nia inan subar nia bebé toʼo nia fulan tolu, tanba inan lakohi ema Ejitu oho nia. Maibé, nia hatene katak sira bele hetan Moisés karik, entaun nia halo buat ruma atu salva nia.

Nia foti raga ida no hametin raga neʼe hodi bee la bele tama. Depois, nia tau Moisés iha laran, no tau raga neʼe iha duʼut aas iha mota Nilu. Nia haruka Moisés nia biin, Miriam, atu hamriik besik no haree saida mak sei akontese ba Moisés.

Lakleur, Faraó nia oan-feto mai atu hariis iha mota Nilu. Derrepente, nia haree raga neʼe iha duʼut aas nia leet. Nia haruka atan-feto ida, hodi dehan: ‘Bá foti raga neʼebá mai.’ Kuandu liurai-oan feto loke raga, nia haree bebé oin-kapás tebes! Bebé Moisés tanis hela, no liurai-oan feto sente hanoin ba nia. Nia lakohi bebé neʼe mate.

Depois, Miriam hakbesik hanesan ó bele haree iha dezeñu neʼe. Miriam husu ba Faraó nia oan-feto: ‘Hakarak haʼu bá bolu feto Izraél ida atu fó susu ba bebé neʼe ka lae?’

Liurai-oan feto hatán: ‘Sin, hakarak.’

Nuneʼe, Miriam bá lalais atu fó-hatene nia inan. Kuandu Moisés nia inan mai, liurai-oan feto hatete ba nia: ‘Lori bebé neʼe no fó susu ba nia, no haʼu sei selu ó.’

Nuneʼe, Moisés nia inan mak tau matan ba nia oan rasik. Kuandu Moisés sai boot uitoan, inan lori nia ba Faraó nia oan-feto, neʼebé hakiak nia nuʼudar oan rasik. Hanesan neʼe, Moisés sai boot iha Faraó nia umakain.