HAREE Moisés halai husi Ejitu. Bele haree ema duni tuir nia? Hatene tanbasá sira hakarak oho Moisés? Mai ita haree tanbasá.

Faraó ukun Ejitu, no Moisés sai boot iha nia uma. Nia sai matenek tebes no ema importante ida. Moisés hatene katak nia laʼós ema Ejitu, maibé nia inan-aman loloos ema Izraél neʼebé sai atan.

Loron ida, kuandu Moisés tinan 40, nia bá atu haree oinsá nia maluk Izraél halaʼo sira-nia moris. Ema Ejitu trata aat sira. Nia haree ema Ejitu ida baku atan ida husi ema Izraél. Moisés haree katak la iha ema ida neʼebé haree nia, no nia baku ema Ejitu neʼe, no ema Ejitu mate. Depois, Moisés subar mate neʼe iha rai-henek.

Loron tuirmai, Moisés bá haree fali nia maluk sira. Nia hanoin katak nia bele ajuda sira hodi sira la sai atan tan. Maibé nia haree ema Izraél naʼin-rua baku malu, entaun Moisés hatete ba ema neʼebé sala: ‘Tanbasá Ita baku Ita-nia maun?’

Ema neʼe hatán fali: ‘Sé mak foti ó atu ukun no tesi lia mai ami? Ó atu oho haʼu hanesan oho ema Ejitu ka?’

Agora Moisés sai taʼuk. Nia haree katak ema hatene ona kona-ba buat neʼebé nia halo ba ema Ejitu neʼe. Faraó mós rona, no haruka ema atu oho Moisés. Tan neʼe mak Moisés halai husi Ejitu.

Kuandu Moisés sai husi Ejitu, nia bá dook toʼo rai Midian. Iha neʼebá, nia hasoru Jetro nia família, no kaben ho Jetro nia oan-feto ida naran Zípora. Moisés sai bibi-atan no hein Jetro nia bibi sira. Nia hela iha rai Midian durante tinan 40, toʼo nia tinan 80. Iha tempu neʼebá, kuandu Moisés hein Jetro nia bibi, buat ida halo Moisés hakfodak no troka Moisés nia moris tomak. Loke pájina, hodi ita bele haree saida mak halo nia hakfodak.

MOISÉS laʼo dook toʼo foho Horeb atu buka duʼut ba nia bibi sira. Iha neʼe nia haree ai-tarak lakan, maibé ahi la han!

Moisés hanoin: ‘Haʼu la fiar neʼe. Haʼu sei hakbesik atu haree diʼak liu.’ Kuandu nia halo nuneʼe, lian ida sai husi ai-tarak, hodi dehan: ‘Labele mai besik. Hasai Ita-nia xinelus, tanba Ita hamriik iha rai santu.’ Neʼe mak Maromak neʼebé koʼalia liuhusi ninia anju ida, nuneʼe Moisés taka nia oin.

Tuirmai, Maromak hatete: ‘Haʼu haree tiha ona haʼu-nia povu nia terus iha Ejitu. Tan neʼe, Haʼu sei halo sira livre, no ó mak ema neʼebé haʼu haruka atu lori haʼu-nia povu sai husi Ejitu.’ Jeová atu lori nia povu ba rai Kanaan neʼebé furak.

Maibé Moisés hateten: ‘Haʼu neʼe sé? Oinsá mak haʼu bele halo nuneʼe? Maibé haʼu bá karik, ema Izraél sei hatete: “Sé mak haruka ó?” Haʼu sei hatán saida?’

Maromak hatán: ‘Ó sei hatete nuneʼe: “JEOVÁ, Abraão nia Maromak, Isaac nia Maromak no Jacob nia Maromak mak haruka haʼu.”’ No Jeová hatutan: ‘Neʼe mak haʼu-nia naran ba nafatin.’

Moisés hatán: ‘Maibé, oinsá se sira la fiar katak Ita mak haruka haʼu?’

Maromak husu: ‘Ó kaer saida?’

Moisés hatán: ‘Ai-tonka.’

Maromak hatete: ‘Soe ai-tonka neʼe ba rai.’ No kuandu Moisés halo nuneʼe, ai-tonka sai samea ida. Depois, Jeová hatudu Moisés milagre ida tan. Nia hatete: ‘Hatama Ita-nia liman iha faru laran.’ Moisés halo nuneʼe, no kuandu nia hasai nia liman, liman neʼe mutin hanesan jelu-rahun! Liman neʼe haree hanesan kona moras aat naran lepra. Tuirmai, Jeová fó Moisés forsa atu halo milagre terseiru. Ikusmai nia hatete: ‘Hodi haree milagre sira-neʼe, ema Izraél sei fiar katak haʼu mak haruka ó.’

Depois, Moisés fila ba uma no hateten ba Jetro: ‘Husik haʼu fila fali lai ba haʼu-nia maluk iha Ejitu atu haree oinsá sira halaʼo sira-nia moris.’ Entaun, Jetro fó adeus ba Moisés, no Moisés fila fali ba Ejitu.