Ita bele fó buat ruma ba Maromak Jeová
1 Ita ema bele fó buat ruma ba Maromak ka lae? Abel fó animál neʼebé iha folin boot, no Noé no Job mós fó buat neʼebé sira iha nuʼudar sakrifísiu ba Maromak Jeová. (Gên 4:4; 8:20; Jó 1:5) Ita hatene katak sakrifísiu sira-neʼe la halo ita-nia Kriadór sai riku liu, tanba tuir loloos buat hotu-hotu mak ninian. Maibé bainhira Maromak nia atan ruma halo sakrifísiu ba nia, ida-neʼe hatudu katak sira iha domin neʼebé kleʼan ba nia. Ohin loron mós ita bele fó ita-nia tempu, kbiit, osan no sasán nuʼudar “sakrifísiu hahiʼi” nian ba Maromak Jeová.—Ebr 13:15.
2 Tempu: Diʼak tebes se ita uza ita-nia tempu neʼebé baibain ita gasta ba buat neʼebé ladún importante atu aumenta ita-nia serbisu haklaken! (Ef 5:15, 16) Karik ita bele troka ita-nia planu hodi nuneʼe ita bele serbí nuʼudar pioneiru ausiliár ba fulan ida ka liu iha tinan ida nia laran. Karik ita mós bele aumenta tempu neʼebé ita baibain uza iha serbisu haklaken. Porezemplu se ita aumenta haklaken minutu 30 tan semana-semana, ida-neʼe sei aumenta oras rua ka liu ba ita-nia serbisu haklaken iha fulan ida.
3 Kbiit: Atu iha kbiit hodi bá haklaken, ita presiza kuidadu kona-ba halimar no serbisu neʼebé halo ita sai kole liu. Tanba se ita sente kole demais, ita la bele serbí Maromak Jeová ho ita-nia kbiit tomak. Ita mós presiza tau ba kotuk problema sira neʼebé bele halo ita “laran-tun”. Tanba hanoin demais kona-ba ida-neʼe bele hamenus ita-nia kbiit neʼebé bele uza atu serbí Maromak. (Prov 12:25) Maibé se ita hasoru duni problema ruma, diʼak liu atu ‘husik ita-nia laran todan ba Maromak Jeová’!—Sal 55:22; Flp 4:6, 7.
4 Osan no sasán: Ita mós bele fó ita-nia osan no sasán atu apoiu serbisu haklaken. Paulo fó laran-manas ba maluk kristaun atu sai toman atu “rai-hela no tau ketak” buat ruma, atu nuneʼe sira bele fó ba maluk neʼebé presiza ajuda. (1 Kor 16:1, 2) Hanesan neʼe ita mós bele rai-hela osan balun atu apoiu ita-nia kongregasaun nia presiza no mós atu apoiu serbisu Reinu nian iha mundu tomak. Maromak Jeová hafolin buat neʼebé ita fó ho laran, maski folin-kiʼik deʼit.—Lc 21:1-4.
5 Maromak Jeová fó buat barak mai ita. (Tgo 1:17) Ita hatudu katak ita fó-agradese ba Maromak hodi uza tempu, kbiit, osan no sasán atu serbí nia. Ita halo Maromak Jeová kontente kuandu ita fó buat sira-neʼe ho laran, tanba “Maromak hadomi ema neʼebé fó ho laran-haksolok”.—2 Kor 9:7.