Maromak hakarak Ita atu sai nia belun. Dala ruma Ita hanoin ka lae, katak Ita bele sai belun, ho Nia neʼebé boot liu iha lalehan? Abraão, neʼebé moris horiuluk, bolu nuʼudar Maromak nia belun. (Tiago [Yakobus] 2:23) Bíblia mós koʼalia kona-ba ema seluk neʼebé kontente tanba sai Maromak nia belun no simu bensaun barak. Ohin loron, ema husi fatin hotu iha Rai sai tiha ona Maromak nia belun. Ita mós bele sai Maromak nia belun.

Sai belun ho Maromak maka diʼak liu duké sai belun ho ema ruma. Maromak nunka halo nia belun sai laran-kanek. (Salmo [Mazmur] 18:25) Sai Maromak nia belun diʼak liu duké iha rikusoin. Bainhira ema riku mate, ema seluk maka hetan nia osan. Maibé, ema neʼebé sai Maromak nia belun iha rikusoin murak neʼebé ema seluk la bele foti husi sira.​—Mateus 6:19.

Ema balu karik sei koko atu hapara ita aprende kona-ba Maromak. Ita-nia kolega no família mós karik sei koko atu halo hanesan neʼe. (Mateus 10:36, 37) Se ema seluk goza ka ameasa Ita, bele husu Ita-nia an: ‘Sé maka haʼu hakarak halo kontente, ema ka Maromak?’ Hanoin kona-ba neʼe: se ema ruma haruka Ita atu la han, Ita sei halo tuir ka lae? Lae duni! Ita presiza hahán atu moris. Maibé Maromak bele halo Ita moris rohan-laek! Tan neʼe, nunka husik ema ruma hapara Ita aprende oinsá atu sai Maromak nia belun.​—Joao 17:3.

Sai Maromak nia belun maka buat diʼak liu neʼebé bele mosu iha Ita-nia moris. Maromak sei hanorin Ita oinsá atu sai kontente no hakmatek. Nia sei halo Ita livre husi fiar barak neʼebé sala no hahalok neʼebé bele estraga Ita. Nia sei rona ba Ita-nia orasaun. Nia sei ajuda Ita atu hetan dame iha laran no konfia Ita-nia an. (Salmo [Mazmur] 71:5; 73:28) Maromak sei ajuda Ita iha tempu susar nia laran. (Salmo [Mazmur] 18:18) No Maromak bele fó ba Ita moris rohan-laek nuʼudar prezente ida.​—Roma 6:23.

Nuʼudar Ita hakbesik ba Maromak, Ita mós sei hakbesik ba Maromak nia belun sira. Sira mós sei sai Ita-nia belun. Tuir loloos, sira sei sai hanesan Ita-nia família rasik. Sira sei kontente atu hanorin Ita kona-ba Maromak, ajuda Ita no fó aten-barani ba Ita.

Ita la hanesan ho Maromak. Nuʼudar Ita buka atu sai Maromak nia belun, Ita tenke komprende buat ida neʼebé importante. Halo belun ho Maromak la hanesan Ita halo belun ho ema. Maromak mak idade liu, matenek liu, no iha forsa liu duké ita. Nia mak iha direitu atu ukun ita. Entaun, se ita hakarak sai nia belun, ita tenkesér rona ba nia no halo tuir buat neʼebé nia hateten ita atu halo. Halo ida-neʼe sempre serve ba ita-nia diʼak.​—Isaías 48:18.

Atu sai Maromak nia belun, Ita tenke aprende kona-ba nia. Ita-nia belun sira hatene no uza Ita-nia naran ka lae? Sira hatene no uza duni. Maromak mós hakarak Ita atu hatene no uza ninia naran. Maromak nia naran maka Jeová. (Salmo [Mazmur] 83:18; Mateus 6:9; Apokalipse [Wahyu] 19:6) Ita mós tenke aprende kona-ba buat neʼebé nia gosta no la gosta. Ita tenke hatene sé maka Maromak nia belun no sé maka ninia inimigu sira. Presiza tempu atu koñese diʼak ema seluk. Bíblia dehan katak matenek atu fó tempu para aprende kona-ba Jeová.​—Efeso 5:15, 16.

Maromak nia belun sira halo buat neʼebé fó kontente nia. Hanoin kona-ba Ita-nia belun sira. Se Ita trata aat sira no halo buat neʼebé sira la gosta, sira sei kontinua Ita-nia belun ka lae? Lae duni! Nuneʼe mós, se Ita hakarak sai Maromak nia belun, Ita tenke halo buat neʼebé fó kontente nia.​—Joao 4:24.

Laʼós relijiaun hotu hatudu dalan atu sai Maromak nia belun. Jesus, neʼebé Maromak nia belun besik liu, koʼalia kona-ba dalan rua. Dalan ida maka luan no nakonu ho ema. Dalan neʼe maka lori ema ba malisan mate. Dalan seluk maka kloot no ema uitoan tuir dalan neʼe. Dalan neʼe lori ema ba moris rohan-laek. Ida-neʼe hatudu katak se Ita hakarak halo belun ho Maromak, Ita tenke aprende atu adora nia iha dalan loos.​—Mateus 7:13, 14.

Ita bele aprende kona-ba Maromak hodi lee Bíblia. Iha tempu kleur liubá, Maromak hili ema balu atu hakerek Ninia hanoin. Buat neʼebé sira hakerek mak ita bolu Bíblia. Ohin loron ita aprende kona-ba Maromak hodi lee Bíblia. Bíblia iha Jeová nia liafuan, ka mensajen, tan neʼe ita mós bolu Bíblia nuʼudar Maromak nia Liafuan. Ita bele fiar buat hotu Bíblia hateten tanba Jeová nunka bosok. “Maromak la bele bosok.” (Ebreu [Ibrani] 6:18) Maromak nia Liafuan hotu maka lia-loos.​—Joao 17:17.

Bíblia maka prezente folin boot ida neʼebé Maromak fó mai ita. Bíblia hanesan karta husi aman ida, neʼebé iha domin, ba nia oan sira. Bíblia fó-hatene mai ita katak Maromak promete atu halo Rai sai fatin furak tebetebes nuʼudar paraízu ida. Bíblia fó-hatene mai ita buat sira Maromak halo iha tempu uluk, agora, no iha aban-bainrua ba nia oan sira neʼebé fiar-metin. Bíblia mós ajuda ita atu rezolve ita-nia problema sira no atu moris kontente.​—2 Timoteo 3:16, 17.

Testemuña ba Jeová, nuʼudar Maromak nia belun, sei ajuda Ita atu komprende buat neʼebé Bíblia hanorin. Ita hakarak estuda Bíblia, fó-hatene deʼit sira. Ita la selu atu estuda Bíblia hamutuk ho sira. (Mateus 10:8) No mós, Ita bele tuir reuniaun kristaun nian. Reuniaun neʼe halaʼo iha adorasaun fatin neʼebé sira hanaran Salaun Reinu. Se Ita tuir reuniaun kristaun sira, Ita sei aumenta lalais ita-nia koñesimentu kona-ba Maromak.

Ita bele aprende kona-ba Maromak husi buat nia kria. Porezemplu, Bíblia hateten: “Maromak kria lalehan no Rai.” (Gênesis [Kejadian] 1:1) Bainhira Jeová kria “lalehan”, nia halo loro-matan. Entaun, ida-neʼe hanorin ita saida kona-ba Maromak? Ida-neʼe hanorin ita katak Jeová iha kbiit boot. Jeová deʼit maka bele halo loro-matan neʼebé iha forsa makaʼas. Ida-neʼe mós hanorin ita katak Jeová iha matenek, tanba presiza matenek hodi halo loro-matan neʼebé lakan nafatin, nunka mate, atu fó manas no naroman mai ita.

Buat neʼebé Maromak kria hatudu katak nia hadomi ita. Hanoin kona-ba ai-fuan oin-oin neʼebé hetan iha Rai. Jeová karik bele halo ai-fuan oin ida deʼit, ka la halo ida. Maibé, Jeová fó mai ita ai-fuan neʼebé kabuar-naruk, ki’ik-boot, kór no gostu oin-oin. Ida-neʼe hatudu katak Jeová maka Maromak ida neʼebé iha domin, laran-luak, laran-diʼak, no tau matan mai ita.​—Salmo [Mazmur] 104:24.