Paraízu sei la hanesan ho mundu neʼebé agora ita hela bá. Maromak nunka hakarak Rai nakonu ho susar no triste, sofre no terus. Iha aban-bainrua, Maromak sei halo Rai sai paraízu ida. Paraízu neʼe sei hanesan saida? Mai ita haree saida maka Bíblia hateten:

Ema diʼak. Paraízu sei sai Maromak nia belun sira nia uma. Sira sei halo buat diʼak ba malu. Sira sei moris tuir Maromak nia dalan loos.​—Provérbios [Amsal] 2:21; Mateus 5:45.

Hahán barak. Iha Paraízu, sei la iha tan hamlaha. Bíblia hateten: “Sei iha fini [ka hahán] barak iha Rai.”​—Salmo [Mazmur] 72:16.

Uma kapás no serbisu diʼak. Iha Paraízu iha Rai família ida-idak sei iha uma rasik. Ema ida-idak sei halo serbisu neʼebé fó haksolok loos.​—Isaías 65:21-23.

Dame iha mundu tomak. Ema sei la halo funu no la mate iha funu tan. Maromak nia Liafuan hateten: “[Maromak] sei hapara funu.”​—Salmo [Mazmur] 46:8, 9.

Saúde diʼak. Bíblia promete: “La iha ema neʼebé hela iha rai [Paraízu] sei dehan: ‘Haʼu moras.’” (Isaías 33:24) Mós, la iha tan ema kudeʼik, tilun-diuk, matan-delek no la bele koʼalia, ka monok.​—Isaías 35:5, 6.

La iha tan sofre, triste, no mate. Maromak nia Liafuan hateten: “Nia [Maromak] sei hamaran sira nia mataben housi sira nia matan; mate la iha ona, no ema sei la tanis tan eh laran susar, basa sasan raiklaran uluk nian liu tiha ona.”​—Apokalipse [Wahyu] 21:4.

Ema aat sei la iha tan. Jeová promete: “Ema aat . . . sei halakon tiha husi Rai, no kona-ba traidór sira, sei fokit sai tiha husi neʼebá.”​—Provérbios [Amsal] 2:22.

Ema sei hadomi no respeita malu. Sei la iha tan ema neʼebé halo buat la loos, hanehan malu, kaan-teen, no odi malu. Ema sei hamutuk ho unidade no halaʼo tuir Maromak nia dalan loos.​—Isaías 26:9; Apokalipse [Wahyu] 15:4.

Buat aat neʼebé akontese daudaun iha Rai hatudu katak Paraízu besik ona. Bíblia hateten katak ita sei haree tempu susar antes Paraízu mai. Agora mak ita moris iha tempu neʼe! Buat balu neʼebé Bíblia hateten sei akontese maka neʼe:

Funu boot sira. “Povu sei hamriik hasouru povu, reinu hasouru reinu.” (Mateus 24:7) Profesia neʼe sai loos tiha ona. Husi tinan 1914, iha funu boot rua iha mundu tomak, no funu kiʼik barak. Ema rihun ba rihun mate tiha ona iha funu hirak-neʼe.

Moras iha fatin oin-oin. “Iha fatin oi-oin . . . moras peste sei mosu.” (Lucas 21:11) Ida-neʼe sai loos ka lae? Loos. Moras kankru, moras fuan nian, tuberkuloze, malária, AIDS, no moras sira seluk oho tiha ema rihun ba rihun.

Hahán latoʼo. Iha fatin oin-oin ema barak falta hahán. Tinan-tinan ema rihun ba rihun mate tanba hamlaha. Ida-neʼe maka sinál ida tan neʼebé hatudu katak Paraízu besik ona. Bíblia hateten katak sei iha “hamlaha boot”.​—Marcos 13:8.

Rai-nakdoko. “Rai sei nakdoko iha fatin oi-oin.” (Mateus 24:7) Ida-neʼe mós sai loos iha tempu agora. Husi tinan 1914 toʼo agora, ema 1.000.000 liu mate tanba rai-nakdoko.

Ema aat. “Ema sei hanoin deʼit sira an hodi buka osan” no “loko an”. Sira sei “hakarak deit buka sira rasik nia ksolok liu fali hadomi Maromak”. Labarik sei la halo tuir, ka “refila sira nia aman inan sira”. (2 Timoteo 3:1-5) Ita mós sente katak ohin loron iha ema barak hanesan neʼe ka lae? Sira la iha respeitu ba Maromak, no fó-terus ba ema neʼebé buka atu aprende kona-ba Maromak.

Krime. “Hahalok aat sira sei sai wa’in liu tan.” (Mateus 24:12) Karik Ita mós sente katak agora krime barak liu duké tempu uluk. Ema naʼok, lohi no hakanek ema seluk iha fatin barak.

Buat hirak-neʼe hotu hatudu katak Maromak nia Reinu besik ona. Bíblia hateten: “Wainhira imi hare buat hirak ne’e mosu, imi sei hatene katak Maromak nia reinu besik ona.” (Lucas 21:31) Saida maka Maromak nia Reinu? Ida-neʼe maka Maromak nia governu iha lalehan neʼebé sei halo Rai neʼe sai Paraízu. Maromak nia Reinu sei troka governu ema nian.​—Daniel 2:44; Apokalipse [Wahyu] 11:15.

Jeová sei la husik ema aat atu estraga Paraízu. Jeová nia belun sira deʼit maka sei hela neʼebá. Saida maka sei akontese ba ema aat? Atu hatene, hanoin lai kona-ba istória loos Noé nian. Noé moris iha tinan rihun ba rihun liubá. Nia mak ema diʼak neʼebé sempre koko makaʼas atu halo Jeová nia hakarak. Maibé ema seluk halo aat. Tan neʼe Jeová fó-hatene Noé katak Nia sei halo rai-nabeen atu halakon ema aat hotu. Nia haruka Noé atu halo ró boot ida, hodi Noé no nia família sei la mate bainhira Rai-nabeen mosu.​—Gênesis [Kejadian] 6:9-18.

Noé ho nia família halo ró boot. Noé fó avizu ba ema seluk katak Rai-nabeen sei mai, maibé sira la rona nia. Sira halo aat nafatin. Bainhira halo tiha ró boot, Noé hatama animál sira ba ró laran, no nia ho ninia família mós tama. Depois Jeová hatún udan boot. Udan tau durante loron 40 no kalan 40. Rai tomak sai nabeen.​—Gênesis [Kejadian] 7:7-12.

Ema aat hotu mate, maibé Noé no nia família hetan salvasaun. Jeová salva sira husi Rai-nabeen, no lori sira ba Rai neʼebé moos tiha ona husi buat aat. (Gênesis [Kejadian] 7:22, 23) Bíblia hateten katak Jeová sei halakon dala ida tan ema neʼebé lakohi halo buat loos. Jeová sei la halakon ema diʼak. Sira sei moris ba nafatin iha Paraízu iha Rai.​—2 Pedro 2:5, 6, 9.

Ohin loron ema barak halo buat aat. Mundu nakonu ho susar. Jeová haruka nia Testemuña sira dala barak atu fó avizu ba ema, maibé ema barak lakohi rona ba Jeová nia liafuan sira. Ema lakohi troka sira-nia hahalok. Sira lakohi simu saida maka Maromak dehan kona-ba loos no sala. Saida maka sei akontese ba ema sira-neʼe? Karik loron ruma sira sei troka sira-nia an ka lae? Ema barak sei nunka troka. Tempu sei mai bainhira Jeová atu halakon ema aat, no sira sei nunka moris fali.​—Salmo [Mazmur] 92:7.

Rai sei nunka lakon, sei sai paraízu ida. Ema neʼebé sai Maromak nia belun sei moris ba nafatin iha Paraízu iha Rai.​—Salmo [Mazmur] 37:29.