Maromak nia inimigu boot liu maka Satanás. Nia maka kriatura espíritu ida neʼebé kontra hasoru Jeová. Satanás kontinua atu kontra Maromak no fó susar ba ema. Satanás laran-aat. Nia maka bosok-teen no ohodór-ema.​—Joao 8:44.

Kriatura espíritu seluk hamutuk ho Satanás atu kontra hasoru Maromak. Bíblia bolu sira diabu, ka demóniu. Hanesan Satanás, demóniu sira mak ema nia inimigu. Demóniu gosta halo terus ema. (Mateus 9:32, 33; 12:22) Jeová sei halakon ba nafatin Satanás ho nia demóniu sira. Sei hela tempu badak deʼit ba sira atu fó susar ba ema.​—Apokalipse [Wahyu] 12:12.

Se Ita hakarak sai Maromak nia belun, keta halo buat neʼebé Satanás hakarak Ita atu halo. Satanás no nia demóniu sira odi Jeová. Ita tenke hili sé mak Ita hakarak halo kontente, Satanás ka Jeová. Se Ita hakarak moris rohan-laek, Ita tenke hili atu halo buat neʼebé Maromak hakarak. Satanás iha dalan oin-oin neʼebé nia uza atu lohi no bosok ema. Nia lohi ema barak liu.​—Apokalipse [Wahyu] 12:9.

Jesus Kristu maka Jeová nia Oan, no belun besik liu neʼebé Jeová hadomi liu. Antes Jesus moris iha Rai nuʼudar ema, nia moris iha lalehan nuʼudar kriatura espíritu neʼebé makaʼas. (Joao 17:5) Depois, nia mai toʼo Rai atu hanorin ema lia-loos kona-ba Maromak. (Joao 18:37) Nia mós fó ninia moris, nuʼudar ema iha Rai, hodi salva husi sala no mate ema neʼebé halo tuir. (Roma 6:23) Agora Jesus maka Liurai ba Maromak nia Reinu, ida-neʼe maka governu ida iha lalehan neʼebé sei halo Rai neʼe sai Paraízu.​—Apokalipse [Wahyu] 19:16.

Anju sira mós Maromak nia belun. Anju la komesa sira-nia moris nuʼudar ema iha Rai. Maromak kria sira iha lalehan antes nia halo Rai. (Jó [Ayub] 38:4-7) Iha anju rihun ba rihun. (Daniel 7:10; Judas 14) Jeová nia belun sira iha lalehan hakarak ema iha Rai atu aprende lia-loos kona-ba Jeová.​—Apokalipse [Wahyu] 14:6, 7.

Maromak mós iha belun iha Rai; Nia bolu sira ninia testemuña. Testemuña ida mak ema neʼebé fó sasin iha tribunal kona-ba ema ruma ka buat ruma. Testemuña ba Jeová fó sasin kona-ba Jeová no buat neʼebé Jeová hakarak halo. (Isaías 43:10) Hanesan anju sira, Testemuña sira hakarak ajuda Ita atu aprende lia-loos kona-ba Jeová. Sira hakarak Ita mós atu sai Jeová nia belun.

Se Ita hakarak sai Maromak nia belun, Ita tenke halaʼo tuir relijiaun neʼebé Maromak simu. Jesus hateten katak “ema nebe adora lo-los” sei adora Maromak tuir “lialos”. (Joao 4:23, 24) Iha dalan ida deʼit maka loos atu adora Maromak. (Efeso 4:4-6) Relijiaun loos lori ema ba moris rohan-laek, no relijiaun falsu lori ema ba malisan mate.​—Mateus 7:13, 14.

Ita bele hatene relijiaun loos hodi haree ba ema neʼebé halaʼo tuir relijiaun neʼe. Tanba Jeová diʼak, ema neʼebé adora Nia ho loos, sira hotu mós diʼak. Hanesan ai-sabraka diʼak fó fuan diʼak, relijiaun loos mós halo ema sai diʼak.​—Mateus 7:15-20.

Jeová nia belun iha respeitu kleʼan ba Bíblia. Sira hatene katak Bíblia mai husi Maromak. Sira husik Bíblia hatudu dalan ba sira-nia moris, atu rezolve problema, no atu ajuda sira aprende kona-ba Maromak. (2 Timoteo 3:16) Sira hakaʼas an atu halaʼo tuir buat neʼebé sira hanorin.

Jeová nia belun hatudu domin ba malu. Jesus hatudu domin ba ema seluk hodi hanorin sira kona-ba Maromak, no kura ema moras. Ema neʼebé tuir relijiaun loos mós hatudu domin ba ema seluk. Hanesan Jesus, sira la sente katak sira maka diʼak liu duké ema neʼebé kiak ka mai husi rai seluk. Jesus dehan katak ema sei koñese ninia dixípulu tanba domin neʼebé sira hatudu ba malu.​—Joao 13:35.

Maromak nia belun hahiʼi Maromak nia naran, Jeová. Se ema ida lakohi uza Ita-nia naran, Ita sente katak ema neʼe Ita-nia belun ka lae? Lae! Bainhira ita iha belun ida, ita uza ninia naran no koʼalia ba ema seluk buat diʼak kona-ba nia. Tan neʼe, ema neʼebé hakarak sai Maromak nia belun tenke uza Nia naran no koʼalia ba ema seluk buat diʼak kona-ba Nia. Jeová hakarak ita atu halo hanesan neʼe.​—Mateus 6:9; Roma 10:13, 14.

Hanesan Jesus, Maromak nia belun hanorin ema seluk kona-ba Maromak nia Reinu. Maromak nia Reinu maka governu iha lalehan neʼebé sei halo Rai sai Paraízu. Maromak nia belun fahe ba ema seluk lia-foun diʼak kona-ba Maromak nia Reinu.​—Mateus 24:14.

Testemuña ba Jeová hakaʼas an atu sai Maromak nia belun. Sira respeita Bíblia no iha domin iha sira-nia leet. Sira mós uza no respeita Maromak nia naran no hanorin ema seluk kona-ba Maromak nia Reinu. Ohin loron, Testemuña ba Jeová halaʼo tuir relijiaun loos iha Rai.

Satanás ho nia demóniu sira lakohi Ita atu serbí Maromak. Sira hakarak koko atu halo ema hotu sees an husi Maromak. Oinsá maka sira koko atu halo nuneʼe? Dalan ida maka liuhusi relijiaun falsu. (2 Korinto 11:13-15) Relijiaun ida maka falsu bainhira relijiaun neʼe la hanorin lia-loos husi Bíblia. Relijiaun falsu hanesan osan falsu​—haree hanesan loos maibé la iha folin. Relijiaun loos bele halo susar barak ba Ita.

Lia-bosok husi relijiaun nunka bele halo kontente Jeová, Maromak lia-loos nian. Bainhira Jesus iha Rai, iha grupu relijiaun ida neʼebé hakarak oho nia. Sira hanoin katak sira-nia dalan atu adora Maromak maka loos. Sira hateten: “Ida deit mak ami nia Aman, katak Maromak.” Jesus simu ida-neʼe ka lae? Lae! Nia hateten ba sira: “Diabu mak imi nia aman.” (Joao 8:41, 44) Ohin loron ema barak sente katak sira adora Maromak, maibé tuir loloos sira serbí Satanás no nia demóniu sira!​—1 Korinto 10:20.

Hanesan ai aat fó fuan aat, relijiaun falsu halo ema sai aat. Mundu nakonu ho susar tanba buat aat neʼebé ema halo. Mundu neʼe iha hahalok imoralidade, kontra malu, naʼok, hanehan malu, oho malu, no estraga feto. Ema barak halo buat aat hirak-neʼe maski iha relijiaun, maibé sira-nia relijiaun la dada sira atu halo buat diʼak. Sira la bele sai Maromak nia belun se sira la para halo buat aat.​—Mateus 7:17, 18.

Relijiaun falsu hanorin ema atu halo orasaun ba estátua no imajen. Maromak haruka ita labele hatoʼo orasaun ba estátua no imajen. Buat neʼebé Maromak haruka maka loos. Ita sente oinsá, se ema ida nunka koʼalia ba Ita, maibé koʼalia maka ba Ita-nia retratu deʼit? Ema hanesan neʼe bele sai Ita-nia belun ka lae? Lae. Jeová hakarak ema atu koʼalia ba Nia, laʼós ba estátua ka imajen ida, neʼebé la moris.​—Êxodo [Keluaran] 20:4, 5; Apostolu [Kisah] 17:29.

Relijiaun falsu hanorin katak la sala atu oho ema seluk iha tempu funu nian. Jesus hateten katak Maromak nia belun sei iha domin iha sira-nia leet. Ita la oho ema neʼebé ita hadomi. (Joao 13:35) Atu oho ema aat mós sala. Bainhira Jesus nia inimigu sira mai atu kaer nia, nia la husik ninia dixípulu sira funu atu proteje nia.​—Mateus 26:51, 52.

Relijiaun falsu hanorin katak ema aat sei terus iha ahi infernu nian. Maibé, Bíblia hanorin katak tanba sala mak ita mate. (Roma 6:23) Jeová maka Maromak domin nian. Maromak ida neʼebé iha domin fó-terus ema ba nafatin ka lae? Lae duni! Iha Paraízu, sei iha relijiaun ida deʼit, relijiaun ida neʼebé Jeová simu. (Apokalipse [Wahyu] 15:4) Relijiaun hotu neʼebé tuir Satanás nia lia-bosok sei la iha tan.