Mate katak la iha moris tan. Mate hanesan toba-dukur. (Joao 11:11-14) Ema mate la rona, la haree, la koʼalia, no la hanoin buat ida. (Eclesiastes [Pengkhotbah] 9:5, 10) Relijiaun falsu hanorin katak ema mate bá iha mundu espíritu nian atu moris hamutuk ho sira-nia beiʼala. Ida-neʼe laʼós buat neʼebé Bíblia hanorin.

Ema neʼebé mate la ajuda ita, no la halo aat mai ita. Dala barak, ema halaʼo buat lulik no sakrifísiu tanba sira fiar katak ida-neʼe sei halo kontente ema neʼebé mate. Ida-neʼe la halo kontente Maromak tanba hahalok neʼe tuir ba Satanás nia lia-bosok. Hahalok neʼe mós la bele halo kontente ema mate, tanba sira la iha moris. Ita labele taʼuk ka adora ba ema mate. Ita tenke adora deʼit Maromak.​—Mateus 4:10.

Ema mate sei moris filafali. Jeová sei fanun ema mate atu moris iha Rai paraízu ida. Buat neʼe sei mosu iha futuru. (Joao 5:28, 29; Apostolu [Kisah] 24:15) Maromak bele fanun ema neʼebé mate, hanesan Ita bele fanun ema neʼebé toba.​—Marcos 5:22, 23, 41, 42.

Fiar katak ita la mate maka bosok ida neʼebé Diabu Satanás habelar. Satanás ho nia demóniu sira halo ema hanoin katak ema mate nia espíritu moris hela, no katak espíritu neʼe halo ema sai moras no hetan problema seluk. Dala ruma Satanás lohi ema hodi uza mehi no vizaun. Jeová hakribi ema neʼebé koko atu koʼalia ba ema mate.​—Deuteronômio [Ulangan] 18:10-12.

Satanás hakarak Ita atu halaʼo tuir masonik. Ema barak halo sakrifísiu ba beiʼala ka espíritu atu proteje an husi buat aat. Sira halo ida-neʼe tanba taʼuk ba forsa husi mundu espíritu nian. Sira tara buat lulik iha kakorok, no uza kadeli ou kelu. Sira hemu ou kose ba sira-nia isin “ai-moruk” neʼebé sira hanoin iha forsa masonik. Ema balu subar iha uma laran ka hakoi buat ruma neʼebé sira fiar iha forsa atu proteje sira. Ema seluk uza “ai-moruk” maninga nian tanba sira fiar katak ida-neʼe sei ajuda sira atu fila-liman, manán ezame eskola, ka iha namora diʼak.

Buat diʼak liu atu proteje Ita husi Satanás maka sai Jeová nia belun. Maromak Jeová no nia anju sira iha forsa boot liu tebes duké Satanás no nia demóniu sira. (Tiago [Yakobus] 2:19; Apokalipse [Wahyu] 12:9) Jeová hakarak tebes uza nia forsa atu ajuda nia belun​—ema neʼebé fó-laran tomak ba Nia.​—2 Crônicas [2 Tawarikh] 16:9; 1 Pedro 3:12.

Maromak nia Liafuan hateten: “Ó labele hala’o tuir masonik.” Jeová hakribi masonik no maninga tanba hahalok sira-neʼe bele husik Diabu Satanás domina ita.​—Levítico [Imamat] 19:26; Galasia 5:20, 21.

Satanás tenta ema atu halo buat aat. Ema ida neʼebé hakarak sai Maromak nia belun tenke odi buat neʼebé Jeová odi. (Salmo [Mazmur] 97:10; Roma 12:9) Maromak nia belun hadook an husi buat balu maka tuirmai neʼe:

Sala seksuál. “Ó labele halo adultériu”, ou sala-fo’er ho ema seluk. (Êxodo [Keluaran] 20:14; Marcos 10:19) Halo relasaun seksuál antes kaben mós sala.​—1 Korinto 6:18.

Hemu-lanu. “Lanuten . . . sei la simu Maromak nia reinu nudar liman rohan.”​—1 Korinto 6:10.

Oho–ema, oho labarik iha inan nia kabun laran. “Ó labele oho-ema.”​—Êxodo [Keluaran] 20:13; Tiago [Yakobus] 2:11.

Naʼok. “Ó labele na’ok.”​—Êxodo [Keluaran] 20:15; Mateus 19:18.

Bosok. Jeová odi “nanál bosok”.​—Provérbios [Amsal] 6:17; Efeso 4:25.

Violénsia no la kontrola hirus. “Ema ruma ne’ebé hadomi violénsia maka [Jeová] odi tebes.” (Salmo [Mazmur] 11:5) “Wainhira imi buka imi rasik nia ksolok, buat nebe mosu mak . . . hirus malu no istori malu.”​—Galasia 5:19, 20.

Taru-osan. “Keta la’o hamutuk ho ema naran deit . . . wainhira nia . . . karakten.”​—1 Korinto 5:11.

Odi ema husi rasa ka rai seluk. “Hadomi imi nia funu balun sira, harohan ba sira nebe duni imi.”​—Mateus 5:43, 44.

Buat neʼebé Maromak hateten mai ita maka ba ita-nia diʼak. Dala ruma laʼós fasil atu hadook an husi hahalok aat. Ho ajuda husi Jeová no nia Testemuña sira, Ita bele hadook an husi hahalok neʼebé la halo kontente Maromak.​—Isaías 48:17; Filipe 4:13; Ebreu [Ibrani] 10:24, 25.

Bainhira Ita iha belun ida neʼebé Ita gosta tebes no respeita, Ita koko atu sai hanesan nia. “Laran-di’ak no laran-loos maka Jeová”, katak Bíblia. (Salmo [Mazmur] 25:8) Atu sai Maromak nia belun, ita tenkesér laran-diʼak no laran-loos. Bíblia hateten: “Imi banati tuir Maromak, nudar nia oan doben sira. La’o iha domin.” (Efeso 5:1, 2) Dalan balu neʼebé ita bele halo nuneʼe maka neʼe:

Ajuda ema seluk. “Ita sei halo diak ba ema hotu.”​—Galasia 6:10.

Serbisu makaʼas. “Ema nebe uluk na’ok, lalika na’ok tan, maibe buka serbisu ho liman.”​—Efeso 4:28.

Mantein isin no moralidade moos. “Ita hamos ita an housi buat foer sira hotu isin no klamar nian, no sai santu lo-los hodi tauk Maromak.”​—2 Korinto 7:1.

Trata Ita-nia família ho domin no respeitu. “Mane ida-ida sei hadomi nia kaben . . . hanesan nia an rasik, no feto mos sei hamtauk nia laen. Oan sira, halo tuir imi nia aman inan sira nia hakarak.”​—Efeso 5:33–6:1.

Hatudu domin ba ema seluk. “Ita hadomi malu basa domin mai housi Maromak.”​—1 Joao 4:7.

Halo tuir governu nia lei. “Ema ida-ida hamtauk [governu] ba . . . selu imi nia tusan hotu; impostu ba sira nebe simu impostu.”​—Roma 13:1, 7.