Atu sai nafatin ema ida nia belun, Ita tenke koʼalia ho nia. Ita rona ba nia, no nia rona ba Ita. Ita mós koʼalia ba ema seluk buat diʼak kona-ba nia. Hanesan neʼe mós atu sai nafatin Maromak nia belun. Hanoin saida maka Bíblia hateten kona-ba ida-neʼe:

Koʼalia beibeik ba Jeová iha orasaun. “La kole atu harohan.”​—Roma 12:12.

Lee Maromak nia Liafuan, Bíblia. “Maromak leno Eskritura hotu; nia diak atu hanorin, atu halakon hanorin nebe la los, atu sai matadalan ba ema nia moris.”​—2 Timoteo 3:16.

Hanorin ema seluk kona-ba Maromak. “Ne’e duni, imi ba hanorin nasaun hot-hotu; . . . hanorin sira atu halo lo-los buat hotu nebe Ha’u haruka ba imi.”​—Mateus 28:19, 20.

Hakbesik ba Maromak nia belun sira. “Nia ne’ebé la’o hamutuk ho ema matenek sei sai matenek.”​—Provérbios [Amsal] 13:20.

Tuir reuniaun sira iha Salaun Reinu husi Testemuña ba Jeová. “Ita hanoin oin sa ita bele haka’as malu atu hadomi no halo hahalok diak, . . . fo laran manas ba malu.”​—Ebreu [Ibrani] 10:24, 25.

Ajuda hodi fó apoiu ba serbisu Reinu nian. “Ida-ida sei [fó] nudar nia deside ona, la hodi laran susar ka obriga an, basa Maromak hadomi ema nebe fo ho laran haksolok.”​—2 Korinto 9:7.

Belun-malu harii husi domin. Bainhira Ita aprende barak liu kona-ba Jeová, Ita-nia domin ba nia sei aumenta liután. Nuʼudar Ita-nia domin ba Maromak sai boot liu, Ita-nia hakarak atu serbí Nia mós sei sai boot liu. Ida-neʼe sei dada Ita atu sai Jesus Kristu nia dixípulu. (Mateus 28:19) Hodi hamutuk ho família Testemuña ba Jeová neʼebé kontente, Ita bele iha Maromak nuʼudar Ita-nia belun ba nafatin. Saida mak Ita tenke halo?

Ita tenke hatudu Ita-nia domin ba Maromak hodi halo tuir nia lei sira. “Basa ita nia domin ba Maromak mak neʼe: katak ita halo tuir nia ukunfuan sira. Nia ukunfuan la susar mai ita.”​—1 Joao 5:3.

Halo tuir buat neʼebé Ita aprende. Jesus konta istória neʼebé esplika ida-neʼe. Ema matenek ida harii nia uma iha fatuk leten. Ema beik-teen ida harii nia uma iha rai-henek leten. Bainhira udan no anin boot mai, uma iha fatuk leten la monu, maibé uma iha rai-henek leten monu no naksobu hotu. Jesus hateten katak ema neʼebé rona ba ninia hanorin, no halo tuir, maka hanesan ema matenek neʼebé harii uma iha fatuk leten. Maibé ema neʼebé la rona ba ninia hanorin, no la halo tuir, maka hanesan ema beik-teen neʼebé harii uma iha rai-henek leten. Ita hakarak sai hanesan ema ida-neʼebé?​—Mateus 7:24-27.

Dedikasaun. Ida-neʼe dehan katak Ita hakbesik Jeová iha orasaun no fó-hatene katak Ita hakarak halo ninia hakarak ba nafatin. Hodi halo Maromak nia hakarak hatudu katak Ita mós Jesus Kristu nia dixípulu.​—Mateus 11:29.

Batizmu. “Nune’e mos, ohin loron baptismu soi imi.”​—1 Pedro 3:21.

Serbí Maromak ho Ita-nia an tomak. “Buat hotu nebe imi halo, halo ho laran hanesan imi halo tuir Maromak nia hakarak, la’os ema nia hakarak.”​—Koloso 3:23.

Presiza hakaʼas an atu halo belun ida; presiza hakaʼas an atu hametin belun ida. Kuandu Ita hakaʼas an atu sai nafatin Maromak nia belun, Ita sei hetan bensaun barak. Bíblia hateten ba ema neʼebé fiar Jesus: “Ita iha liberdade.” (Galasia 5:1) Ida-neʼe katak saida?

Ita bele goza liberdade agora. Ita bele livre husi hanorin falsu no lia-bosok neʼebé Satanás habelar tiha ona. Ita bele livre husi situasaun la iha esperansa neʼebé ema barak sente tanba sira la koñese Jeová. (Roma 8:22) Maromak nia belun livre mós husi “tauk mate”.​—Ebreu [Ibrani] 2:14, 15.

Ita bele goza liberdade iha Maromak nia mundu foun. Ita bele goza liberdade kapás tebes iha futuru! Iha Paraízu iha Rai sei iha liberdade husi funu, moras, no krime. Sei iha liberdade husi kiak no hamlaha. Sei iha liberdade husi idade tuan no mate. Sei iha liberdade husi taʼuk, hanehan-malu, no ema ne’ebé halo buat laloos. Bíblia hateten kona-ba Maromak: “Ó loke ó-nia liman no halo kontente buat hotu ne’ebé moris nia hakarak.”​—Salmo [Mazmur] 145:16.

Maromak nia belun sei moris ba nafatin. Moris rohan-laek maka prezente folin boot ida neʼebé Maromak sei fó ba ema hotu neʼebé buka atu sai nia belun. (Roma 6:23) Hanoin toʼok saida mak Ita bele halo bainhira Ita moris rohan-laek!

Iha futuru Ita sei iha tempu atu halo buat barak. Karik Ita hakarak aprende atu toka instrumentu-múzika. Ou karik Ita hakarak aprende atu pinta dezeñu, ka sai karpinteiru. Karik Ita hakarak aprende kona-ba animál ka ai-moris. Ou karik Ita hakarak laʼo-rai atu haree rai oioin no hasoru ema seluk. Hodi moris rohan-laek Ita bele halo buat hotu neʼe.

Iha futuru Ita sei iha tempu atu halo belun barak. Hodi moris ba nafatin Ita bele koñese ema barak neʼebé sai Maromak nia belun tiha ona. Ita sei hatene kona-ba sira-nia matenek no atitude kapás, no sira mós sei sai Ita-nia belun. Ita sei hadomi sira, no sira sei hadomi Ita. (1 Korinto 13:8) Hodi moris laiha rohan, Ita sei iha tempu atu halo belun ho ema hotu iha Rai! Buat neʼebé diʼak liu hotu maka durante tinan atus ba atus, Ita-nia belun-malu ho Jeová sei sai metin liu. Ami hein katak Ita sei sai Maromak nia belun ba nafatin!