Oinsá mak ita bele ajuda ema neʼebé tuir Naʼi nia Han-Kalan?

1. Iha loron 22 Marsu, 2008, sasin furak saida mak ita sei fó?

¹ Iha loron 22 Marsu, 2008, ita sei fó sasin neʼebé furak ba ema rihun ba rihun iha mundu tomak. Ema neʼebé tuir Naʼi nia Han-Kalan sei rona kona-ba oinsá mak Maromak Jeová hatudu domin boot hodi fó ninia Oan nuʼudar sakrifísiu atu salva ema. (Joao 3:​16) Sira sei aprende kona-ba Reinu no mós oinsá mak Maromak Jeová sei uza Reinu neʼe atu halaʼo ninia hakarak iha mundu tomak. (Mt 6:​9, 10) Sira sei haree ho matan rasik domin no unidade neʼebé ita nuʼudar Maromak nia povu iha, no laran-luak neʼebé ita hatudu ba ema seluk.​—Sal 133:1.

2. Oinsá mak ita bele ajuda estudante Bíblia neʼebé tuir Naʼi nia Han-Kalan?

² Estudante Bíblia: Ema balu neʼebé tuir reuniaun espesiál neʼe karik foin komesa atu estuda Bíblia ho ita. Fó-koñese estudante foun sira-neʼe ba irmaun no irmán sira. Fó-hatene sira kona-ba reuniaun semana-semana nian, no hatudu sentina no buat seluseluk tan iha Salaun Reinu. Durante diskursu, ita sei rona kona-ba oinsá mak estudante sira bele hametin liután sira-nia relasaun ho Maromak Jeová. Ita bele koʼalia ho Ita-nia estudante kona-ba ida-neʼe hodi ajuda sira atu laʼo ba oin.

3. Saida mak ita bele halo atu ajuda haklaken-naʼin neʼebé la haklaken ona, neʼebé tuir Naʼi nia Han-Kalan?

³ Haklaken-naʼin neʼebé la haklaken ona: Ema balu neʼebé tuir reuniaun neʼe mak haklaken-naʼin neʼebé la haklaken ona. Diʼak atu hakbesik sira hodi koʼalia ho laran-diʼak. Keta husu pergunta ka koʼalia kona-ba buat neʼebé karik halo sira sente moe. Lakleur, katuas sira tenke vizita haklaken-naʼin neʼebé la haklaken ona, neʼebé tuir Naʼi nia Han-Kalan. Katuas sei gaba sira tanba hakaʼas an atu tuir reuniaun neʼe atu komemora Jesus nia mate, no konvida sira atu tuir reuniaun iha kongregasaun.

4. Oinsá mak ita ida-idak bele ajuda bainaka sira?

⁴ Bainaka sira: Ema balu neʼebé tuir Naʼi-nia Han-Kalan mak kolega ka família neʼebé ita konvida. Iha ema balu tan neʼebé tuir reuniaun ida-neʼe tanba simu konvite durante ita-nia haklaken espesiál. Se Ita haree ema neʼebé Ita seidauk koñese, koko atu fó benvindu no koʼalia ho sira. Sira balu karik foin tuir ita-nia reuniaun ba dala primeiru. Kuandu ita koʼalia ho sira, karik ita bele husu oinsá mak bele hasoru malu fali ho sira. Liutiha loron balu, ita bele vizita ka telefone ba sira atu koʼalia liután kona-ba lia-loos no esplika kona-ba estudu Bíblia.

5. Oinsá mak ita bele komesa estudu Bíblia?

⁵ Ita bele uza informasaun neʼebé hatoʼo iha diskursu iha reuniaun atu komemora Jesus nia mate hodi koʼalia kona-ba livru Bíblia Hanorin kuandu ita halo vizita fali. Porezemplu, oradór sei lee Isaías 65:21-​23. Kuandu halo vizita fali, ita bele koʼalia kona-ba diskursu no eskritura ida-neʼe no hatete: “Haʼu gosta hatudu kona-ba bensaun seluk tan neʼebé ema bele simu liuhusi Jesus nia sakrifísiu.” Tuirmai, hatudu pájina 4-5 iha livru Bíblia Hanorin. Ka ita bele hatete: “Ema barak hanoin kona-ba bainhira mak Isaías nia liafuan neʼe sei sai loos.” Tuirmai, estuda parágrafu 1-3 iha kapítulu 9. Dalan seluk atu halo vizita fali mak koʼalia uitoan kona-ba diskursu, hatudu livru Bíblia Hanorin, no esplika oinsá mak uza livru neʼe atu estuda Bíblia.

6. Nuʼudar ita halo tuir Jesus nia mandamentu atu komemora ninia mate, ita bele hakaʼas an atu halo saida?

⁶ Mai ita hotu hakaʼas an atu ajuda estudante Bíblia, haklaken-naʼin neʼebé la haklaken ona, no bainaka neʼebé tuir Naʼi nia Han-Kalan hodi komemora Jesus nia mate. (Lc 22:19) Maromak Jeová sei haraik duni bensaun mai ita, nuʼudar ita aumenta ita-nia serbisu ba Maromak nia Reinu.

Oinsá atu fahe livru fulan-fulan nian

Menara Pengawal 1 Feb.

“Tuir Ita-nia hanoin, se ema ida-idak iha família laran halo tuir Bíblia nia matadalan ida-neʼe, moris família nian sei sai oinsá? [Lee Efeso 4:​31. Hein ba resposta.] Livru ida-neʼe hatudu matadalan husi Bíblia kona-ba rezolve problema hanesan hirus-malu atubele moris haksolok nuʼudar kaben-naʼin.” Hatudu informasaun neʼebé komesa iha pájina 18.

Sedarlah! Feb.

“Ema balu hanoin katak Maromak nunka haluha sala hotu neʼebé ita halo. Ema seluk tan hanoin katak Maromak fó perdua ba sala hotu-hotu, maski sala neʼe boot tebes. Oinsá mak Ita-nia hanoin? [Hein ba resposta. Tuirmai, lee Apostolu 3:​19.] Livru ida-neʼe fó-hatene kona-ba hakat tolu husi Bíblia neʼebé ajuda ita atu hetan perdua husi Maromak.” Hatudu informasaun neʼebé komesa iha pájina 10.

Menara Pengawal 1 Mar.

“Haʼu bele husu Ita-nia hanoin kona-ba eskritura ida-neʼe? [Lee Joao 3:​16.] Ita husu ona ka lae, tanbasá mak ema ida nia mate bele halo ema barak hetan moris rohan-laek? [Hein ba resposta.] Livru neʼe esplika ho klaru kona-ba bensaun sira neʼebé ita bele hetan liuhusi Jesus nia mate.”

Sedarlah! Mar.

“Tuir Ita-nia hanoin, relijiaun hotu-hotu diʼak ka lae? [Hein ba resposta.] Haree lai saida mak Jesus hatete kona-ba ida-neʼe. [Lee Marcos 7:7.] Oinsá mak ita bele hatene se relijiaun ida hanorin lia-loos ka hanorin buat neʼebé ‘mesak ema nian’? Ita bele hetan duni lia-loos ka lae? Livru ida-neʼe fó resposta ba pergunta sira-neʼe.”