Família neʼebé aman ka inan la iha mós bele hetan susesu!

1-3. Tanbasá mak família neʼebé iha aman ka inan deʼit aumenta ba beibeik? Família hanesan neʼe hasoru susar saida deʼit?

FAMÍLIA neʼebé aman ka inan la iha aumenta ba beibeik iha mundu tomak. Ohin loron, ema barak soe malu, haketak malu, ka iha oan maski la kaben. Tan neʼe, família rihun ba rihun hasoru susar barak.

² Inan ida hakerek: “Haʼu feto-faluk, haʼu-nia tinan 28, ho oan naʼin-rua. Haʼu sente laran-todan tanba haʼu lakohi mesak atu haboot haʼu-nia oan. Haʼu sente katak ema ida la iha interese mai haʼu. Haʼu-nia oan sira sempre haree haʼu tanis no ida-neʼe halo sira mós laran-susar.” Aman ka inan barak neʼebé mesak atu haboot sira-nia oan luta ho sentimentu hanesan hirus, dúvida, no sente mesak. Liután neʼe, sira tenke serbisu makaʼas atu buka osan no mós halo serbisu iha uma laran. Ema ida hatete: “Susar ba ami neʼebé mesak atu haboot ami-nia oan. Ami tenke hakaʼas an tebes atu sai toman atu halo serbisu oioin. Maibé kuandu foin toman ho serbisu sira-neʼe, mosu fali serbisu ida seluk.”

³ Oan sira iha família hanesan neʼe mós hasoru sira rasik nia susar. Karik sira tenke luta ho sira-nia sentimentu tanba sira-nia aman ka inan mate ka husik sira. Kuandu aman ka inan la iha, ida-neʼe bele estraga joven nia hahalok.

4. Oinsá mak ita hatene katak Maromak Jeová hanoin família neʼebé aman ka inan la iha?

⁴ Iha tempu Bíblia mós iha família neʼebé la iha aman ka inan. Bíblia temi dala barak kona-ba “labarik-mane neʼebé aman la iha” no “feto-faluk”. (Êxodo 22:22; Deuteronômio 24:19-21; Tiago 1:27) Maromak Jeová la taka matan ba sira-nia susar. Ema neʼebé hakerek salmu ida bolu Maromak nuʼudar “aman ba labarik-mane sira neʼebé aman la iha no tesi-lia naʼin ba feto-faluk sira”. (Salmo 68:5) Ita mós bele fiar katak ohin loron Maromak Jeová hanoin nafatin família neʼebé aman ka inan la iha! Ninia Liafuan fó matadalan neʼebé ajuda sira atu hetan susesu.

KAER DIDIʼAK SERBISU IHA UMA LARAN

5. Ema neʼebé foin soe malu ka nia kaben foin mate, hasoru problema saida?

⁵ Hanoin toʼok kona-ba serbisu oioin iha uma laran. Iha situasaun barak neʼebé halo feto sira neʼebé soe malu ona hanoin katak sira presiza mane ida iha sira-nia sorin atu ajuda sira. Porezemplu, kuandu udan tun husi uma kakuluk, no sira la hatene oinsá atu hadiʼa. Mane neʼebé foin soe malu ka nia feen foin mate, mós karik sai bilán ho serbisu barak iha uma laran neʼebé nia nunka halo. Kuandu uma laran sai runguranga, ida-neʼe bele halo oan sira la sente hakmatek.

6. Feen neʼebé temi iha Provérbios fó ezemplu diʼak kona-ba saida?

⁶ Saida mak ita bele halo? Haree ezemplu husi feen matenek ida neʼebé temi iha Provérbios 31:10-31. Ita hakfodak ho serbisu oioin neʼebé nia halo, hanesan sosa sasán, suku, teʼin, sosa rai, halo toʼos, no fila liman. Oinsá mak nia bele halo buat sira-neʼe hotu? Nia badinas, hadeer sedu no serbisu toʼo kalan. Sin, nia arranja buat hotu ho diʼak, fahe serbisu ba ema iha família laran, no mós ajuda ema seluk. Feto hanesan neʼe merese atu gaba!

7. Tanbasá mak aman ka inan neʼebé mesak tenke halo serbisu iha uma laran ho badinas?

⁷ Se Ita mak aman ka inan neʼebé mesak, hakaʼas an atu halo didiʼak Ita-nia serbisu iha uma laran. Halo serbisu hotu ho laran-kontente, tanba ida-neʼe sei halo Ita-nia oan kontente. Maibé, atu halo nuneʼe, importante tebes atu halo planu didiʼak. Bíblia hatete: “Ema badinas nia planu sei hetan rezultadu neʼebé diʼak.” (Provérbios 21:5) Aman ida neʼebé mesak hatete: “Baibain, haʼu sente hamlaha mak haʼu foin hanoin atu teʼin.” Maibé, kuandu halo planu hodi teʼin, ita sei teʼin hahán neʼebé gostu liu no diʼak liu ba saúde duké hahán neʼebé teʼin ho ansi. Karik Ita mós tenke aprende atu halo serbisu oioin neʼebé Ita nunka halo. Iha inan balu neʼebé aprende husi kolega ruma no badain sira neʼebé laran-diʼak atu pinta uma, hadiʼa torneira no hadiʼa buat seluk tan.

8. Oinsá mak oan sira bele ajuda aman ka inan iha uma laran?

⁸ Diʼak atu husu oan sira-nia ajuda ka lae? Inan ida neʼebé mesak, hatete: “Haʼu hanoin haʼu-nia oan sira neʼebé aman la iha, tan neʼe haʼu hakarak halo buat hotu kmaan ba sira.” Maski ema barak hanoin hanesan neʼe, maibé tuir loloos, ida-neʼe laʼós dalan neʼebé diʼak atu ajuda oan. Iha tempu Bíblia nian, joven sira neʼebé taʼuk Maromak iha knaar atu halo serbisu hodi ajuda família. (Gênesis 37:2; Cântico de Salomão 1:6) Nuneʼe, maski labele fó serbisu barak demais ba oan sira, maibé diʼak se aman ka inan fahe serbisu ba oan sira hanesan fase bikan no hili ai. Diʼak atu halo serbisu hanesan neʼe hamutuk ho Ita-nia oan sira, loos ka lae?

KUANDU SUSAR ATU BUKA MORIS

9. Tanbasá mak susar ba inan barak neʼebé mesak atu buka moris?

⁹ Ema barak neʼebé mesak atu haboot oan hasoru susar atu buka moris, liuliu feto joven sira neʼebé iha oan maibé aman la iha.a Iha rai neʼebé estadu fó ajuda ba ema hanesan neʼe, karik diʼak atu simu, liuliu se sira serbisu la iha. Bíblia hatudu katak ema kristaun bele simu ajuda hanesan neʼe kuandu presiza. (Roma 13:1, 6) Feto-faluk no feto neʼebé soe malu mós hasoru susar atu buka moris. Sira barak neʼebé toman halo serbisu iha uma deʼit presiza buka serbisu iha liʼur, no ikusmai sira hetan serbisu neʼebé simu osan uitoan deʼit. Sira balu konsege tuir kursu ruma no hetan serbisu ruma neʼebé hamenus sira-nia todan.

10. Se karik oan la kontente tanba inan buka serbisu, saida mak inan bele halo?

¹⁰ Se karik Ita-nia oan la kontente tanba Ita buka serbisu, lalika fó-sala ba Ita-nia an. Diʼak liu atu esplika ba sira tansá mak Ita presiza atu serbisu, no ajuda sira atu komprende katak Maromak Jeová hakarak Ita atu tau matan ba sira-nia presiza. (1 Timoteo 5:8) Neineik-neineik, oan sei sai toman. Maibé, hakaʼas an atu uza tempu hamutuk ho oan sira, maski Ita iha serbisu barak. Hodi hatudu domin hanesan neʼe bele ajuda família tomak atu la hanoin demais kona-ba problema ekonomia.—Provérbios 15:16, 17.

AMAN KA INAN NIA POZISAUN IHA FAMÍLIA

11, 12. Aman ka inan neʼebé mesak tenke kuidadu kona-ba saida? Saida mak sira bele halo kuandu sira hasoru problema?

¹¹ Baibain aman ka inan neʼebé mesak sai besik tebes ho oan sira, maibé sira tenke kuidadu atu la haluha kona-ba pozisaun neʼebé Maromak fó ba ema ida-idak iha família laran. Porezemplu, problema barak bele mosu se inan neʼebé mesak hakarak nia oan-mane sai família nia ulun, ka fó sai ninia problema hotu ba oan-feto. Kuandu halo ida-neʼe bele fó estrese no halo oan sai bilán.

¹² Halo oan sira fiar katak Ita, nuʼudar aman ka inan, sei tau matan nafatin ba sira, laʼós katak sira mak tenke tau matan ba Ita. (Kompara ho 2 Korinto 12:14.) Dala ruma Ita presiza buka konsellu ka ajuda. Se nuneʼe, buka ajuda husi katuas kristaun ka inan kristaun neʼebé iha esperiénsia barak, laʼós husi Ita-nia oan neʼebé sei joven.—Tito 2:3.

OINSÁ ATU FÓ DIXIPLINA

13. Tanbasá mak susar ba inan neʼebé mesak atu fó dixiplina ba oan sira?

¹³ Karik ladún susar ba mane atu fó dixiplina ba nia oan, maibé ida-neʼe susar liu ba feto. Inan ida neʼebé mesak, dehan: “Haʼu-nia oan-mane sira boot liu haʼu. Tan neʼe, dala ruma susar atu fó dixiplina iha dalan neʼebé sira bele simu.” Liután neʼe, karik Ita sei triste hela tanba Ita-nia kaben mate, ka karik Ita fó-sala ba Ita-nia an ka hirus tanba moris kaben nian naksobu. Se Ita soe malu ona no fahe direitu atu haboot oan, karik Ita sente taʼuk katak oan sira sei gosta liu atu tuir deʼit Ita-nia kaben uluk. Iha situasaun hanesan neʼe susar liu atu Ita fó dixiplina ho diʼak.

14. Oinsá mak aman ka inan neʼebé mesak bele fó dixiplina iha dalan neʼebé diʼak?

¹⁴ Bíblia hatete katak “labarik-mane neʼebé husik livre deʼit sei hamoe nia inan”. (Provérbios 29:15) Maromak Jeová mak fó direitu ba Ita atu halo lei iha uma-laran. Tan neʼe, labele husik Ita-nia direitu neʼe tan deʼit Ita sente sala ka taʼuk atu fó dixiplina. (Efeso 6:1) Kaer metin nafatin ba Bíblia nia matadalan. (Ebreu 12:11) Hakaʼas an atu fó dixiplina ho laran-diʼak, hodi la troka beibeik lei sira iha uma-laran. Baibain, oan sira sei halo tuir. Maibé importante mós atu hanoin nafatin oan nia sentimentu. Aman ida hatete: “Tanba haʼu-nia oan triste hela tan sira-nia inan la iha, haʼu tenke fó dixiplina hodi hanoin sira-nia situasaun. Haʼu sempre buka tempu atu koʼalia ho sira. Kuandu ami prepara han-kalan, ami gosta atu koʼalia hamutuk. Iha tempu neʼe mak sira koʼalia sai sira-nia sentimentu ba haʼu.”

15. Se soe malu ona, la diʼak atu halo saida?

¹⁵ Se Ita soe malu ona, la diʼak atu halo oan la respeitu Ita-nia kaben uluk. Se inan-aman istori malu beibeik, ida-neʼe halo oan sira sente laran-kanek, no susar ba sira atu respeitu imi. Tan neʼe, labele temi liafuan neʼebé hakanek oan nia laran, hanesan: “Ó hanesan deʼit ho ó-nia aman!” Maski Ita-nia kaben halo Ita sente laran-kanek, maibé nia nafatin Ita-nia oan nia aman ka inan. Tuir loloos, Ita-nia oan presiza domin, atensaun, no dixiplina husi aman no inan.b

16. Oinsá mak aman ka inan neʼebé mesak bele fó treinu no hanorin oan sira atu haburas sira-nia relasaun ho Maromak?

¹⁶ Hanesan ita koʼalia ona iha livru neʼe, fó dixiplina laʼós katak fó kastigu deʼit, maibé mós fó treinu no hanorin. Kuandu Ita iha programa diʼak atu hanorin no ajuda oan sira atu haburas sira-nia relasaun ho Maromak, Ita sei hamenus problema barak. (Filipe 3:16) Tan neʼe, importante tebes atu tuir beibeik reuniaun kristaun. (Ebreu 10:24, 25) Importante mós atu estuda Bíblia hamutuk nuʼudar família semana-semana, maski ida-neʼe la fasil. Inan ida hatete: “Depois serbisu loron tomak, haʼu hakarak atu deskansa deʼit. Maibé haʼu hanoin katak atu estuda ho haʼu-nia oan-feto mak buat neʼebé haʼu tenkesér halo duni. Nia kontente tebes kuandu ami estuda hamutuk!”

17. Saida mak Ita bele aprende husi Timóteo nia istória?

¹⁷ Apóstolu Paulo nia maluk serbisu, Timóteo, hetan ona treinu kona-ba Bíblia nia matadalan husi nia inan no avó-feto, maibé karik laʼós husi nia aman. Maski nuneʼe, Timóteo sai ema kristaun ida neʼebé diʼak tebes! (Apostolu 16:1, 2; 2 Timoteo 1:5; 3:14, 15) Ita mós bele hetan rezultadu diʼak se Ita hakaʼas an atu hanorin Ita-nia oan “dixiplina no Naʼi nia doutrina loloos”.—Efeso 6:4.

TAHAN SENTE MESAK

18, 19. (a) Problema saida deʼit mak bele mosu tanba ema sente mesak? (b) Konsellu saida mak ajuda ita atu kontrola hakarak seksuál nian?

¹⁸ Sente mesak bele sai problema boot liu ba aman ka inan neʼebé mesak ona. Ema ida hatete: “Kuandu haʼu fila ba uma, no liuliu kuandu oan sira toba ona, sente mesamesak haleʼu haʼu hanesan kalohan metan.” Normál ba ita ema atu hakarak iha kaben no goza relasaun besik entre laʼen no feen. Maibé diʼak atu estraga Ita-nia relasaun ho Maromak atu rezolve problema neʼe ka lae? Iha apóstolu Paulo nia tempu, feto-faluk balu neʼebé sei foin-saʼe husik “sira-nia neon nuʼudar feto [“hakarak seksuál nian”, MF] sai makaʼas liu sira-nia hakarak atu serbí Kristu”. (1 Timoteo 5:11, 12) Kuandu husik hakarak isin nian sai makaʼas liu fali hakarak atu serbí Maromak no Kristu, ida-neʼe sei la lori buat diʼak mai ita.—1 Timoteo 5:6.

¹⁹ Mane kristaun ida hatete: “Hakarak seksuál nian bele sai makaʼas, maibé ita bele kontrola an. Kuandu hanoin neʼebé sala mosu iha ita-nia neon, labele husik ida-neʼe domina ita. Ita tenke hasai tiha ida-neʼe. Hanoin kona-ba oan mós bele ajuda ita atu halakon hanoin neʼebé sala.” Maromak nia Liafuan fó konsellu: “Imi sei oho hakarak rai neʼe nian neʼebé book imi-nia laran, hanesan sala-foʼer.” (Koloso 3:5) Se Ita hakarak para atu hemu tua, diʼak atu hanoin kona-ba tua, ka tuur hamutuk ho ema neʼebé hemu tua ka lae? Lae duni! Nuneʼe, se Ita hakarak duni atu kontrola hakarak seksuál nian, keta hanoin kona-ba neʼe ka ransu ho ema neʼebé gosta koʼalia kona-ba neʼe.

20. (a) Perigu saida mak bele mosu ba sira neʼebé namora ho ema neʼebé iha fiar la hanesan? (b) Iha tempu uluk no mós ohin loron, oinsá mak kaben-naʼin balu neʼebé mesak hasoru problema sente mesak?

²⁰ Ema kristaun balu komesa namora ho ema neʼebé iha fiar la hanesan. (1 Korinto 7:39) Ida-neʼe rezolve sira-nia problema ka lae? Lae. Feto kristaun ida neʼebé soe malu ona ho nia laʼen fó avizu: “Iha buat ida neʼebé aat liu fali moris mesak. Neʼe mak kaben ho ema neʼebé sala!” Feto-faluk kristaun iha apóstolu sira-nia tempu mós hasoru problema sente mesak, maibé sira neʼebé matenek halo sira-nia an okupadu hodi ‘simu ema laʼo-rai no fase maun-alin sira-nia ain, no fó-tulun ba ema neʼebé hetan susar’. (1 Timoteo 5:10) Ohin loron, ema kristaun balu neʼebé hein ba tinan barak atu hetan kaben neʼebé adora Maromak, mós halo sira-nia an okupadu. Feto-faluk ida neʼebé tinan 68 vizita feto-faluk seluk bainhira nia sente mesak. Nia hatete: “Hodi vizita sira, halo serbisu uma laran, no halo haʼu-nia relasaun ho Maromak sai besik liután, ida-neʼe halo haʼu la iha tempu atu sente mesak.” Hanorin ema seluk kona-ba Maromak nia Reinu mós serbisu ida neʼebé diʼak tebes.—Mateus 28:19, 20.

21. Oinsá mak buat tuirmai neʼe bele ajuda ema atu tahan sente mesak: (a) Harohan ba Maromak? (b) Ransu ho ema neʼebé diʼak?

²¹ Tuir loloos, la iha ai-moruk neʼebé bele halakon sente mesak. Maibé ema bele tahan hodi simu forsa husi Maromak Jeová. Ema kristaun bele hetan forsa neʼe kuandu “harohan no hamulak kalan-loron”. (1 Timoteo 5:5) Harohan mak halo orasaun ho laran hodi husu Maromak atu fó ajuda, no karik halo nuneʼe ho matabeen. (Kompara ho Ebreu 5:7.) Fó sai Ita-nia problema hotu ba Maromak Jeová “kalan-loron” bele ajuda Ita. Liután neʼe, ransu ho ema neʼebé diʼak bele ajuda ita atu tahan sente mesak, tanba ita bele simu liafuan neʼebé “hametin malu”, hanesan hakerek iha 1 Tesalonika 5:11.

22. Kuandu sente mesak mosu, diʼak atu hanoin kona-ba saida deʼit?

²² Se sente mesak mosu beibeik iha Ita-nia laran, hanoin-hetan katak ema hotu-hotu mós hasoru problema iha sira-nia moris. Tuir loloos, ita-nia “maluk sira iha mundu tomak” hetan terus oioin. (1 Pedro 5:9) Keta hanoin demais kona-ba tempu uluk. (Filipe 3:13) Hanoin kona-ba buat diʼak neʼebé Ita iha agora. Liuliu hakaʼas an atu laran-metin nafatin no halo kontente Maromak Jeová.—Provérbios 27:11.

OINSÁ EMA SELUK BELE AJUDA

23. Iha kongregasaun laran, ema kristaun iha responsabilidade saida ba família neʼebé aman ka inan la iha?

²³ Apoiu no ajuda husi maluk kristaun sira iha folin boot. Tiago 1:27 hatete: “Relijiaun momoos no loloos iha Maromak no Aman nia oin mak neʼe: Tau matan ba oan-kiak no feto-faluk sira iha sira-nia susar.” Sin, ema kristaun iha responsabilidade atu ajuda família neʼebé aman ka inan la iha. Iha dalan saida deʼit mak ita bele halo nuneʼe?

24. Iha dalan saida deʼit mak ita bele ajuda família neʼebé aman ka inan la iha?

²⁴ Ita bele ajuda hodi fó sasán ruma. Bíblia hatete: “Ema . . . ida haree nia maluk iha susar laran karik, maibé taka nia fuan ba nia, Maromak nia domin horik iha nia oinsá loos?” (1 Joao 3:17) Iha eskritura neʼe, liafuan gregu neʼebé tradús nuʼudar “haree” laʼós katak haree liu deʼit, maibé haree atu hatene. Ida-neʼe hatudu katak ema kristaun neʼebé laran-diʼak sei buka atu hatene kona-ba nia maluk nia situasaun no presiza. Karik balu presiza osan. Karik balu presiza ajuda atu hadiʼa sira-nia uma. No karik balu sei kontente se ita konvida sira atu han ka halimar hamutuk.

25. Oinsá mak maluk kristaun bele hatudu katak sira hanoin aman ka inan neʼebé mesak?

²⁵ Liután neʼe, 1 Pedro 3:8 hatete: “Imi hotu, neon ida deʼit iha espíritu bá, hanoin malu, domin ba maluk sarani sira, laran-kmaus.” Inan ida neʼebé mesak, ho oan naʼin-neen, hatete: “Haʼu hasoru susar barak no dala ruma sente laran-tun. Maibé, dala ruma irmaun ka irmán ida dehan mai haʼu: ‘Joana, Ita mak ema neʼebé badinas. Ita-nia hakaʼas-an sei la saugati.’ Hodi hatene katak ema seluk hanoin haʼu, neʼe ajuda duni haʼu.” Feto kristaun neʼebé idade ona mós bele ajuda inan foin-saʼe sira, liuliu kuandu sira hasoru problema no la sente kmaan atu koʼalia kona-ba problema neʼe ho mane ruma.

26. Oinsá mak mane kristaun sira bele ajuda labarik neʼebé aman la iha?

²⁶ Mane kristaun bele ajuda iha dalan seluk. Ema diʼak ida naran Job hatete: “Haʼu salva . . . labarik-mane neʼebé aman la iha no mós ema naran deʼit neʼebé la hetan ajuda.” (Jó 29:12) Ohin loron mós, mane kristaun balu hatudu interese ba labarik neʼebé aman la iha, no hatudu “domin neʼebé mai husi neon moos, laran-moos”, laʼós hodi hakarak simu buat ruma. (1 Timoteo 1:5) Maski mane kristaun labele haluha atu tau matan ba sira-nia família rasik, maibé karik sira bele haklaken hamutuk ho labarik hanesan neʼe no konvida sira atu tuir estudu família nian ka halimar hamutuk. Hatudu laran-diʼak hanesan neʼe bele salva labarik neʼebé aman la iha atu sees husi dalan neʼebé aat.

27. Aman ka inan neʼebé mesak bele sente saida?

²⁷ Klaru katak ikusmai aman ka inan neʼebé mesak tenke “lori nia todan rasik”. (Galasia 6:5) Maski nuneʼe, sira bele sente katak Maromak Jeová rasik, no irmaun-irmán kristaun nafatin hadomi sira. Bíblia hatete kona-ba Maromak: “Nia fó kmaan ba labarik-mane neʼebé aman la iha no ba feto-faluk.” (Salmo 146:9) Ho ninia ajuda neʼebé nakonu ho domin, família neʼebé aman ka inan la iha mós bele hetan susesu!