Dalan lima atu hetan estudu Bíblia
1. Se Ita sente susar atu hetan ema neʼebé hakarak estuda Bíblia, saida mak Ita tenke halo? Tanbasá?
1 Ita sente susar atu hetan ema neʼebé hakarak estuda Bíblia ka lae? Se nuneʼe, koko nafatin. Maromak Jeová fó bensaun ba sira neʼebé la kole atu halo ninia hakarak. (Gal 6:9) Iha kraik, ita bele hetan buat lima neʼebé bele ajuda ita.
2. Iha dalan saida mak ita bele komesa estudu Bíblia?
2 Husu ema kedas: Ema barak hatene katak ita fahe Livru Haklaken no Sedarlah!, maibé karik sira la hatene katak ita mós estuda Bíblia ho ema. Entaun, kuandu ita haklaken husi uma ba uma, diʼak atu husu ema kedas se sira hakarak atu estuda Bíblia. No mós, kuandu ita halo vizita fali, diʼak mós atu husu ema neʼe se nia hakarak atu estuda Bíblia. Se sira lakohi, ita bele kontinua fó ita-nia livru ba sira no ajuda sira atu aprende liután. Irmaun ida vizita beibeik kaben-naʼin ida hodi fó revista sira. Loron ida depois fó tiha revista foun ba sira, nia komesa ona atu sai maibé nia hanoin atu husu kaben-naʼin neʼe: “Imi hakarak estuda Bíblia?” Nia hakfodak tebes kuandu kaben-naʼin neʼe hatán katak sira hakarak. Agora kaben-naʼin neʼe hetan ona batizmu.
3. Tanbasá mak ita labele hanoin katak ema foun hotu neʼebé tuir reuniaun estuda Bíblia tiha ona? Esplika toʼok.
3 Ema neʼebé tuir reuniaun: Ita labele hanoin katak ema foun hotu neʼebé tuir reuniaun estuda Bíblia tiha ona. Irmaun ida hatete: “Husi haʼu-nia estudante sira, barak liu komesa estuda tanba haʼu koʼalia ba sira iha reuniaun.” Irmán ida deside atu koʼalia ho feto moedór ida neʼebé ninia ona-feto sira hetan ona batizmu. Feto neʼe tuir reuniaun maizumenus tinan 15 ona. Nia sempre tama Reuniaun-Fatin foin antes reuniaun komesa no fila kedas kuandu hotu. Feto neʼe simu konvite atu estuda Bíblia no ikusmai tama lia-loos. Irmán neʼe hatete: “Haʼu triste tanba haʼu hein tinan 15 antes haʼu husu nia atu estuda Bíblia.”
4. Oinsá mak ita bele hetan estudu Bíblia hodi husu ema seluk?
4 Husu ema seluk: Irmán ida hakaʼas an atu hamutuk ho irmán seluk kuandu estuda Bíblia ho ema. Antes estudu ramata, nia husu lisensa husi irmán neʼebé hanorin, depois nia husu estudante se nia koñese ema seluk neʼebé mós hakarak estuda Bíblia. Se Ita fahe livru Bíblia Hanorin ba Ita-nia vizita fali, Ita bele husu nia: “Ita hatene ema seluk neʼebé mós hakarak hetan livru neʼe ka lae?” Dala ruma, haklaken-naʼin ka pioneiru sira ladún iha tempu atu estuda ho ema neʼebé sira hasoru kuandu haklaken. Entaun, fó-hatene ba irmaun-irmán sira katak Ita iha tempu atu halaʼo estudu Bíblia ho ema.
5. Tanbasá diʼak atu husu irmaun ka irmán nia kaben neʼebé laʼós fiar-naʼin atu estuda Bíblia?
5 Kaben neʼebé laʼós fiar-naʼin: Iha Ita-nia kongregasaun, iha ka lae irmaun ka irmán neʼebé ninia kaben laʼós fiar-naʼin? Ema balu neʼebé laʼós fiar-naʼin lakohi koʼalia kona-ba Bíblia ho sira-nia família rasik, maibé se ema seluk mak konvida sira atu estuda Bíblia karik sira sei simu. Maibé antes ita konvida ema neʼebé laʼós fiar-naʼin atu estuda Bíblia ho ita, baibain diʼak atu koʼalia uluk ho ninia laʼen ka feen neʼebé fiar-naʼin.
6. Tanbasá mak orasaun importante kuandu ita buka estudu Bíblia?
6 Orasaun: Ita labele haluha katak orasaun iha kbiit duni. (Tgo 5:16) Jeová promete katak nia sei rona ita kuandu ita husu buat neʼebé tuir ninia hakarak. (1 Joao 5:14) Irmaun ida neʼebé okupadu tebes komesa halo orasaun atu nia hetan estudu Bíblia. Ninia feen hanoin karik nia la iha tempu atu tau matan ba estudante ida, liuliu se estudante neʼe iha problema barak. Entaun, kuandu nia halo orasaun ba Jeová atu ajuda nia laʼen hetan estudante, nia mós fó sai ninia hanoin neʼe. Maromak hatán sira-nia orasaun tanba semana rua liutiha pioneiru ida husu irmaun neʼe atu estuda ho mane ida neʼebé nia hasoru. Feen neʼe hatete: “Ba sira neʼebé sente katak todan liu atu tau matan estudante Bíblia, halo orasaun beibeik hodi fó sai Ita-nia hanoin hotu ba Maromak. Tanba hodi estuda ho ema, ami hetan haksolok boot.” Se ita hakaʼas an nafatin, ita mós bele hetan estudante Bíblia no hetan haksolok boot hodi ajuda ema laʼo iha dalan neʼebé “lori ema ba moris”.—Mt 7:13, 14.