Mensajen neʼebé ita tenke fó sai

“HAMTAʼUK BA MAROMAK NEʼEBÉ LOOS NO HALO TUIR NINIA MANDAMENTU SIRA”

KLEUR antes ema kristaun nia tempu, Jeová fó sai ba ninia atan Abraão kona-ba arranju ida atu “nasaun hotu iha rai sei hetan bensaun”. (Gênesis [Kejadian] 22:18) Nia leno Salomão atu hakerek kona-ba responsabilidade neʼebé ema hotu iha, hodi dehan: “Hamtaʼuk ba Maromak neʼebé loos no halo tuir ninia mandamentu sira. Tanba ida-neʼe mak ema nia obrigasaun hotu.” (Eclesiastes [Pengkhotbah] 12:13) Maibé, oinsá mak ema husi nasaun hotu-hotu bele aprende kona-ba buat sira-neʼe?

Maski husi tempu uluk sempre iha ema balu neʼebé fiar ba Maromak nia liafuan, maibé Bíblia hatudu katak só deʼit iha “Naʼi nia loron” mak ema sei haklaken liafuan diʼak ba nasaun hotu-hotu iha mundu tomak. Ida-neʼe hahú iha tinan 1914. (Apokalipse 1:10) Kona-ba tempu neʼe, Apokalipse 14:6, 7 fó-hatene nanis katak anju sira sei dirije hodi haklaken mensajen importante “ba nasaun hotu, suku hotu, lian hotu no povu hotu”. Anju sira fó laran-manas ba ema hotu hodi dehan: “Hamtaʼuk Maromak no fó glória ba nia, tanba tempu ba ninia tesi-lia toʼo mai ona; tan neʼe adora bá Ida neʼebé halo lalehan no rai, tasi no bee-matan.” Sin, Maromak nia hakarak mak ema hotu rona mensajen neʼe. Entaun, ita mak iha knaar espesiál atu hola parte iha serbisu haklaken neʼe.

“Maromak neʼebé loos.” Kuandu Maromak Jeová hatete: “Imi mak haʼu-nia testemuña sira”, ida-neʼe akontese iha tempu neʼebé ema haksesuk malu kona-ba Maromak ida-neʼebé mak boot liu. (Isaías [Yesaya] 43:10) Tuir loloos, mensajen neʼebé ita fó sai laʼós deʼit katak ema tenke tuir relijiaun ida ka fiar iha maromak ida. Ema hotu presiza iha oportunidade atu aprende katak Maromak loos mak Ida neʼebé kria lalehan no rai. (Isaías [Yesaya] 45:5, 18, 21, 22; João 17:3) Só Maromak loos mesak deʼit bele fó-hatene nanis kona-ba saida mak sei akontese iha futuru. No ita iha oportunidade espesiál atu fó sai ba ema hotu katak Jeová nia liafuan sira neʼebé sai loos iha tempu uluk, halo ita fiar katak buat hotu neʼebé nia promete kona-ba futuru mós sei sai loos duni.—Josué (Yosua) 23:14; Isaías (Yesaya) 55:10, 11.

Klaru katak ema barak neʼebé ita hasoru kuandu haklaken, sira adora ona maromak seluk ka la adora maromak ida. Entaun, atu ema bele rona ba mensajen neʼebé ita fó sai, karik ita presiza koʼalia uluk kona-ba buat neʼebé rona-naʼin gosta. Ita bele aprende buat barak husi ezemplu neʼebé temi iha Apóstolu 17:22-31. Haree toʼok maski apóstolu Paulo koʼalia ho respeitu, nia esplika ho klaru katak ema hotu sei hatán ba Maromak neʼebé kria lalehan no rai.

Fó sai Maromak nia naran ba ema hotu. Keta dada an atu temi Maromak loos nia naran. Jeová hadomi ninia naran. (Êxodo [Keluaran] 3:15; Isaías [Yesaya] 42:8) Nia hakarak ema hotu atu hatene naran neʼe. Tan neʼe mak nia leno hakerek-naʼin sira atu tau naran santu neʼe ba dala 7.000 liu iha Bíblia laran. Nuneʼe, ita mak iha responsabilidade atu fó sai naran neʼe ba ema hotu.—Deuteronômio (Ulangan) 4:35.

Hodi ema hotu bele hetan moris iha futuru, sira presiza hatene kona-ba Maromak Jeová no bolu nia naran ho fiar. (Joel 2:32; Malaquias [Maleakhi] 3:16; 2 Tesalónika 1:8) Maibé, ema barak la hatene Jeová. Neʼe inklui ema rihun ba rihun neʼebé dehan katak sira adora Maromak neʼebé Bíblia temi. No maski sira iha Bíblia no lee ida-neʼe, maibé sira nafatin la hatene Maromak nia naran rasik tanba ohin loron naran neʼe hasai ona husi tradusaun barak. Ema seluk hatene deʼit katak sira-nia ulun-naʼin relijiaun nian bandu sira atu temi naran neʼe.

Entaun, oinsá mak ita bele hatudu Maromak nia naran ba ema? Dalan neʼebé diʼak liu mak hatudu husi Bíblia, no se bele uza sira-nia Bíblia rasik. Iha tradusaun Bíblia balu, naran neʼe mosu dala rihun ba rihun. Maibé iha tradusaun seluk naran neʼe mosu deʼit iha Salmo (Mazmur) 83:18 ka Êxodo (Keluaran) 6:3-6, ka iha nota-rodapé ba Êxodo (Keluaran) 3:14, 15 ka 6:3. Iha tradusaun balu tan, sira la tradús tuir lia orijinál neʼebé iha Maromak nia naran. Sira troka naran neʼe hodi uza fali liafuan hanesan “Naʼi” no “Maromak”, no hakerek neʼe ho letra boot. Se tradusaun sira ohin loron nian hasai tiha Maromak nia naran, entaun karik ita bele uza fali tradusaun Bíblia nian neʼebé tuan liu atu hatudu katak ema hasai tiha ona naran neʼe. Iha rai balu, ita bele hatudu katak naran santu neʼe mosu iha knananuk relijiaun nian ka hakerek iha uma boot nia leten.

Atu ajuda ema neʼebé adora maromak sira seluk, ita bele hatudu ba sira eskritura iha Jeremias (Yeremia) 10:10-13 iha Tradusaun Mundu Foun. Eskritura neʼe la temi deʼit Maromak nia naran, maibé mós esplika ho klaru nia mak sé.

Keta subar Jeová nia naran hodi uza fali títulu “Maromak” ka “Naʼi” hanesan relijiaun kristaun falsu sira halo. Maibé ida-neʼe la dehan katak ita presiza temi kedas naran neʼe kuandu ita foin komesa koʼalia ho ema. Karik ema balu iha hanoin neʼebé sala kona-ba naran neʼe, entaun sira bele hapara ita-nia koʼalia. Tan neʼe, depois koʼalia uitoan tiha ho sira, diʼak atu uza naran santu neʼe nuʼudar ita kontinua koʼalia.

Tuir loloos, Bíblia temi Jeová rasik nia naran dala barak liu se kompara ho títulu hanesan “Naʼi” no “Maromak”. Maski nuneʼe, sira neʼebé hakerek Bíblia la uza naran neʼe iha fraze hotu nia laran. Maibé sira uza naran neʼe iha fatin neʼebé loos no iha dalan neʼebé diʼak no respeitu. Ida-neʼe mak ezemplu diʼak mai ita atu halo tuir.

Jeová mak hanesan saida. Maski hatene Maromak nia naran rasik mak buat neʼebé importante, maibé ida-neʼe mak hakat primeiru deʼit atu iha relasaun diʼak ho nia.

Atu bele hadomi Jeová no bolu nia ho fiar, ema tenke hatene nia mak Maromak hanesan saida. Bainhira Jeová fó-hatene ninia naran ba Moisés iha Foho Sinai, Nia halo buat seluk tan duké repete deʼit liafuan “Jeová”. Nia dada atensaun ba Ninia hahalok balu neʼebé furak. (Êxodo [Keluaran] 34:6, 7) Ida-neʼe mak ezemplu diʼak mai ita atu halo tuir.

Maski ita haklaken ba ema ka hatoʼo diskursu iha kongregasaun, maibé kuandu ita koʼalia kona-ba bensaun sira husi Maromak nia Ukun, hatudu oinsá mak buat sira-neʼe ajuda ita atu hatene liután kona-ba Maromak neʼebé fó sai promesa neʼe. Kuandu koʼalia kona-ba ninia mandamentu sira, esplika oinsá ida-neʼe hatudu sai Maromak nia matenek no domin. Esplika ho klaru katak buat neʼebé Maromak hakarak ita atu halo la todan ba ita, maibé nia halo ida-neʼe tanba ita-nia diʼak. (Isaías [Yesaya] 48:17, 18; Miquéias [Mikha] 6:8) Esplika katak dalan sira neʼebé Jeová hatudu sai ninia forsa haleno duni ninia hahalok, ninia hakarak, no nia hanesan saida. Ajuda ema atu haree katak Jeová sempre hatudu ninia hahalok ida-idak iha dalan neʼebé loos. Diʼak ba ema atu rona oinsá ita hatudu sai ita-nia sentimentu kona-ba Jeová. Ita-nia domin ba Jeová bele book ema seluk atu hatudu mós domin ba nia.

Mensajen importante neʼebé ita haklaken agora mak atu fó laran-manas ba ema hotu atu taʼuk ba Maromak. Liuhusi buat neʼebé ita hatete, ita hakarak book ema atu haburas taʼuk ba Maromak. Taʼuk katak ita hatudu respeitu neʼebé kleʼan ba Jeová. (Salmo [Mazmur] 89:7) Ida-neʼe inklui fiar katak Jeová mak ita-nia Tesi-lia Naʼin neʼebé aas liu hotu no katak ita-nia moris ba futuru depende se nia simu ita ka lae. (Lucas 12:5; Roma 14:12) Tan neʼe, ita-nia taʼuk no ita-nia domin neʼebé kleʼan ba nia sei book ita atu hakarak tebes halo nia kontente. (Deuteronômio [Ulangan] 10:12, 13) Taʼuk ba Maromak book ita atu odi buat neʼebé aat, halo tuir Maromak nia mandamentu sira, no adora nia ho laran tomak. (Deuteronômio [Ulangan] 5:29; 1 Crônicas [Tawarikh] 28:9; Provérbios [Amsal] 8:13) No tanba ita taʼuk ba Maromak, ita hatene katak ita labele hadomi mundu aat neʼe nuʼudar ita serbí Maromak.—1 João 2:15-17.

Maromak nia naran mak “uma aas neʼebé seguru”. Ema neʼebé hatene ho loloos Maromak Jeová hetan protesaun. Ida-neʼe laʼós tanba deʼit sira uza naran neʼe ka temi ninia hahalok ruma, maibé tanba sira tau fiar ba Jeová rasik. Kona-ba ema hanesan neʼe Bíblia dehan: “Jeová nia naran hanesan uma aas neʼebé seguru. Ema neʼebé loos halai tama ba neʼebá no hetan protesaun.”—Provérbios (Amsal) 18:10.

Uza didiʼak oportunidade sira atu ajuda ema seluk tau fiar ba Jeová. (Salmo [Mazmur] 37:3; Provérbios [Amsal] 3:5, 6) Fiar hanesan neʼe hatudu katak ita fiar metin ba Jeová no ninia promesa sira. (Ebreu 11:6) Kuandu ema “bolu Jeová nia naran”, sira hatudu katak sira fiar nia nuʼudar Ukun-Naʼin Boot Liu Hotu iha lalehan no rai, hadomi ninia dalan sira, no fiar metin katak salvasaun neʼebé loos mai husi nia. Se halo nuneʼe, Maromak nia Liafuan promete katak sira sei hetan salvasaun husi nia. (Roma 10:13, 14) Nuʼudar ita kontinua hanorin ema seluk, ajuda sira atu harii fiar hanesan neʼe iha buat hotu neʼebé sira halo iha sira-nia moris loron-loron nian.

Ema barak hasoru problema oioin iha sira-nia moris. Karik sira sente katak sira la iha dalan atu hadiʼa sira-nia situasaun. Entaun, ita bele ajuda sira atu aprende kona-ba Jeová nia hakarak, tau fiar ba nia, no halo tuir buat neʼebé sira aprende. (Salmo [Mazmur] 25:5) Fó laran-manas ba sira atu harohan ba Maromak hodi husu ninia ajuda no mós hatoʼo agradese ba bensaun neʼebé sira simu husi nia. (Filipe 4:6, 7) Sira sei hatene kona-ba Jeová, laʼós deʼit hodi lee kona-ba nia iha Bíblia, maibé mós hodi haree oinsá ninia promesa sira sai loos iha sira-nia moris rasik. Se nuneʼe, sira sei komesa sente seguru tanba komprende no hafolin saida mak arti loloos husi Jeová nia naran.—Salmo (Mazmur) 34:8; Jeremias (Yeremia) 17:7, 8.

Uza didiʼak oportunidade hotu atu ajuda ema komprende kona-ba tansá mak diʼak atu taʼuk ba Jeová, Maromak neʼebé loos, no halo tuir ninia mandamentu sira.

“FÓ SASIN KONA-BA JESUS”

DEPOIS Jesus Kristu moris-hiʼas no antes nia fila fali ba lalehan, nia fó mandamentu ba ninia dixípulu sira hodi dehan: “Imi sei sai haʼu-nia sasin . . . toʼo rai nia rohan.” (Apóstolu 1:8) Maromak nia atan sira neʼebé laran-metin iha tempu agora mak sira neʼebé “halo serbisu atu fó sasin kona-ba Jesus”. (Apokalipse 12:17) Entaun, ita rasik mós badinas hodi fó sasin ka lae?

Ema barak hatete katak sira fiar ba Jesus maibé sira la hatene buat ida kona-ba Jesus nia moris antes toʼo mai rai. Sira la hatene katak nia mak ema ida duni kuandu moris iha rai. Sira mós la komprende tanbasá Bíblia bolu nia nuʼudar Maromak nia Oan-Mane. Sira hatene buat uitoan deʼit kona-ba oinsá nia hola parte atu kumpre Maromak nia hakarak. Sira mós la hatene saida mak nia halo daudaun, no mós la hatene katak buat neʼebé nia sei halo iha futuru sei kona duni sira-nia moris. Karik sira mós hanoin sala katak Testemuña ba Jeová la fiar ba Jesus. Tan neʼe mak ita iha knaar espesiál atu fó sai ba ema hotu lia-loos kona-ba buat sira-neʼe.

Maibé iha mós ema balu neʼebé la fiar katak Jesus moris iha rai. Ema balu tan hanoin katak Jesus mak ema-boot deʼit. Ema barak lakohi simu katak Jesus mak Maromak nia Oan-Mane. Entaun, atu “fó sasin kona-ba Jesus” ba ema sira hanesan neʼe, presiza duni hakaʼas an, hatudu pasiénsia, no koʼalia ho respeitu.

Maski ita-nia rona-naʼin iha hanoin oioin, maibé sira presiza aprende kona-ba Jesus Kristu tanba neʼe mak dalan ba sira atu simu Maromak nia arranju hodi bele hetan moris rohan-laek. (João 17:3) Maromak nia hakarak mak ema hotu neʼebé moris tenke “fó sai iha ema nia oin katak Jesus Kristu mak Naʼi” no sira tenke hakruʼuk an ba ninia kbiit. (Filipe 2:9-11) Tan neʼe, ita labele subar ita-nia fiar kona-ba Kristu kuandu ita hasoru ema neʼebé kaer metin ba fiar neʼebé laloos ka iha hanoin neʼebé sala. Iha situasaun balu ita bele koʼalia ho livre kona-ba Jesus Kristu kuandu foin hasoru uma-naʼin. Maibé iha situasaun seluk karik ita presiza uza matenek atu koʼalia kona-ba Jesus iha dalan neʼebé ajuda rona-naʼin atu iha hanoin neʼebé loos kona-ba nia. Karik ita mós presiza hanoin kona-ba oinsá mak ita bele fahe informasaun seluk tan kona-ba Jesus kuandu ita vizita fali sira. Maski nuneʼe, ita la bele koʼalia buat hotu kona-ba Jesus toʼo tempu neʼebé ita komesa estuda Bíblia ho ema neʼe.—1 Timóteo 2:3-7.

Jesus nia knaar importante atu halo Maromak nia hakarak. Ita presiza ajuda ema komprende katak Jesus mak “dalan” no ‘ema ida la bele hakbesik Aman se la liu husi nia’. Entaun, hodi ema ida bele monu loos ba Maromak nia laran nia tenke hatudu fiar ba Jesus Kristu. (João 14:6) Atu ema bele komprende saida mak iha Bíblia laran, ulukliu nia presiza komprende kona-ba knaar importante neʼebé Jeová fó ona ba ninia Oan-Mane primeiru. Tanbasá? Tanba Jeová foti ninia Oan-Mane no uza nia atu kumpre ninia hakarak hotu. (Koloso 1:17-20) Eskritura barak fó-hatene nanis ona kona-ba neʼe. (Apokalipse 19:10) Jesus Kristu mak ida neʼebé sei hadiʼa problema hotu neʼebé mosu tanba Satanás kontra Maromak no tanba Adão halo sala.—Ebreu 2:5-9, 14, 15.

Atu komprende Jesus nia knaar, ita ida-idak presiza hatene katak ita moris iha situasaun neʼebé triste no la iha dalan atu sai livre husi ida-neʼe. Ita hotu moris mai nuʼudar ema sala-naʼin. Tanba sala ita hotu hasoru susar oioin iha ita-nia moris tomak. Ikusmai, ida-neʼe lori rezultadu mate. (Roma 3:23; 5:12) Entaun, diʼak atu esplika kona-ba neʼe kuandu haklaken ba ema. Tuirmai esplika katak Maromak Jeová ho domin loke dalan ba ema neʼebé hatudu fiar ba Jesus Kristu nia sakrifísiu atu sira bele sai livre husi sala no mate. (Marcos 10:45; Ebreu 2:9) Ida-neʼe loke dalan ba sira atu moris ba nafatin. (João 3:16, 36) Sin, liuhusi Jesus nia sakrifísiu deʼit mak ema bele hetan bensaun neʼe. (Apóstolu 4:12) Entaun, nuʼudar ita hanorin ema iha uma ka iha kongregasaun, la toʼo atu fó sai deʼit informasaun kona-ba neʼe. Ho laran-diʼak no pasiénsia, ajuda ita-nia rona-naʼin atu hafolin no hatudu agradese ba Kristu nia knaar nuʼudar Ida neʼebé sosa fali ita. Se ema hafolin sakrifísiu neʼe, ida-neʼe sei kona duni sira-nia sentimentu, hahalok, no dalan neʼebé sira halaʼo sira-nia moris.—2 Korinto 5:14, 15.

Klaru katak Jesus fó ninia moris nuʼudar sakrifísiu ba dala ida deʼit. (Ebreu 9:28) No agora nia serbí daudaun nuʼudar Amlulik Boot. Entaun, ajuda ema seluk atu komprende ida-neʼe katak sá. Porezemplu, karik agora sira estrese hela kona-ba buat ruma, ka sente laran-taridu, moras ka iha problema ruma tanba ema seluk neʼebé haleʼu sira la hatudu laran-diʼak ba sira. Tuir loloos, Jesus mós hasoru situasaun hanesan neʼe kuandu nia moris iha rai. Tan neʼe Jesus komprende ita-nia sentimentu. Tanba ita ema sala-naʼin, ita presiza duni Maromak nia laran-sadiʼa, loos ka lae? Kuandu ita halo orasaun ba Maromak no husu perdua liuhusi Jesus nia sakrifísiu, Jesus sei sai nuʼudar “ajuda-naʼin ida neʼebé hamutuk ho Aman”. Ho laran-diʼak “nia harohan ba ita”. (1 João 2:1, 2; Roma 8:34) Liuhusi Jesus nia sakrifísiu no ninia serbisu nuʼudar Amlulik Boot, ita bele hakbesik ba Jeová nia “kadunan laran-diʼak nian” hodi simu ajuda iha tempu neʼebé loos. (Ebreu 4:15, 16) Maski ita ema sala-naʼin, maibé liuhusi Jesus nia knaar nuʼudar Amlulik Boot, nia ajuda ita serbí Maromak ho laran neʼebé moos.—Ebreu 9:13, 14.

Liután neʼe, Jesus mak ida neʼebé Maromak hili atu sai nuʼudar Ulun ba kongregasaun kristaun. (Mateus 28:18; Éfeso 1:22, 23) Nuneʼe, nia fó matadalan neʼebé kongregasaun presiza hodi tuir Maromak nia hakarak. Entaun, kuandu ita hanorin ema seluk, ajuda sira atu komprende katak Jesus Kristu deʼit mak Ulun ba kongregasaun, laʼós ema. (Mateus 23:10) Kuandu ita foin hasoru ema neʼebé hatudu interese, konvida sira atu tuir reuniaun iha kongregasaun. Iha reuniaun sira-neʼe, ita estuda Bíblia hodi uza livru sira husi “atan laran-metin no matenek”. Esplika ba sira kona-ba sé mak “atan” neʼe no mós sé mak atan neʼe nia Naʼi, hodi nuneʼe sira bele hatene katak Jesus mak Ulun ba kongregasaun. (Mateus 24:45-47) Fó-koñese sira ba katuas sira iha kongregasaun no esplika katak irmaun sira-neʼe kumpre ona kritériu husi Bíblia hodi bele serbí nuʼudar katuas kongregasaun nian. (1 Timóteo 3:1-7; Tito 1:5-9) Esplika ba sira katak kongregasaun laʼós katuas sira-nian maibé katuas sira ajuda ita atu laʼo tuir Jesus Kristu nia ain-fatin. (Apóstolu 20:28; Éfeso 4:16; 1 Pedro 5:2, 3) Ajuda ema foun atu haree katak iha duni organizasaun ida iha mundu tomak neʼebé halaʼo serbisu iha Kristu nia Ukun okos.

Kuandu ita lee Evanjellu sira, ita aprende katak iha tempu neʼebé Jesus tama ba Jeruzalein foin antes nia mate, ninia dixípulu sira hahiʼi nia hanesan “Ida neʼebé mai nuʼudar Liurai hodi Jeová nia naran!” (Lucas 19:38) Kuandu ema estuda Bíblia liután, sira bele aprende katak Jeová fó ba Jesus kbiit atu ukun no neʼe kona duni ema husi nasaun hotu. (Daniel 7:13, 14) Kuandu ita hatoʼo diskursu iha kongregasaun ka estuda Bíblia ho ema ida, ajuda sira atu komprende no hafolin buat neʼebé Jesus nia ukun sei halo ba ita hotu.

Esplika ho klaru katak dalan neʼebé ita halaʼo ita-nia moris bele hatudu se ita loloos tau fiar ba Jesus Kristu nuʼudar Liurai no mós se ita hakarak hakruʼuk an ba ninia ukun. Esplika mós katak depois Maromak hili tiha nia atu sai Liurai, Jesus haruka ninia dixípulu sira atu halo serbisu ida. (Mateus 24:14; 28:18-20) Koʼalia hamutuk kona-ba Jesus nuʼudar “Konsellu-Naʼin neʼebé Diʼak Liu” no saida mak nia hatete kona-ba buat neʼebé ita presiza tau uluk iha ita-nia moris. (Isaías [Yesaya] 9:6, 7; Mateus 6:19-34) Dada sira-nia atensaun ba hahalok neʼebé Liurai-Oan Dame nian hakarak ninia dixípulu sira atu hatudu. (Mateus 20:25-27; João 13:35) Kuidadu atu la tesi lia kona-ba ema ida nia hakaʼas-an atu halo tuir Kristu ka lae. Maibé ajuda sira atu hanoin kona-ba oinsá sira-nia hahalok bele hatudu se sira hakruʼuk an ba Kristu nuʼudar liurai ka lae. Kuandu ita koʼalia kona-ba hahalok sira-neʼe, diʼak atu esplika katak ita rasik mós presiza hatudu hahalok sira-neʼe.

Jesus mak uma nia hun. Bíblia kompara serbisu atu halo ema sai dixípulu hanesan ho serbisu atu harii uma, no Jesus Kristu mak uma nia hun. (1 Korinto 3:10-15) Atu halo ida-neʼe, ita presiza ajuda ema hatene kona-ba Jesus tuir buat neʼebé Bíblia fó sai kona-ba nia. Kuidadu atu sira labele haree ita nuʼudar ema neʼebé sira presiza halo tuir. (1 Korinto 3:4-7) Importante atu dada sira-nia atensaun ba Jesus Kristu.

Se ita halo nuneʼe, ita-nia estudante Bíblia nian bele hatene katak Kristu mak hatudu ezemplu ba ita hodi ita “laʼo tuir ninia ain-fatin ho didiʼak”. (1 Pedro 2:21) Entaun, fó laran-manas ba sira atu lee Evanjellu sira laʼós deʼit nuʼudar istória neʼebé loos, maibé mós nuʼudar ezemplu neʼebé sira tenkesér halo tuir. Ajuda sira atu hanoin-hetan no halo tuir Jesus nia hahalok sira. Fó laran-manas ba sira atu haree oinsá Jesus sente kona-ba ninia Aman, oinsá nia tahan hasoru tentasaun no susar oioin, oinsá nia hakruʼuk an ba Maromak, no mós oinsá nia hanoin ema iha situasaun oioin. Nuneʼe, iha futuru kuandu estudante neʼe presiza foti desizaun ruma ka hasoru tentasaun iha ninia moris, nia bele husu ba ninia an rasik: ‘Se Jesus mak iha haʼu-nia fatin, nia sei halo saida? Buat neʼebé haʼu halo hatudu katak haʼu hafolin no fó-agradese ba buat neʼebé Jesus halo ona mai haʼu ka lae?’

Kuandu ita hatoʼo diskursu iha kongregasaun, keta hanoin katak ita lalika dada atensaun ba Jesus tan deʼit irmaun-irmán sira fiar ona kona-ba Jesus. Ita-nia diskursu sei iha folin se ita hametin fiar neʼebé sira iha ona. Kuandu koʼalia kona-ba reuniaun sira, esplika katak Jesus mak iha knaar nuʼudar Ulun ba kongregasaun. Kuandu koʼalia kona-ba serbisu haklaken, esplika kona-ba hahalok neʼebé Jesus hatudu iha serbisu haklaken, no esplika katak liuhusi serbisu haklaken mak Kristu nuʼudar Liurai halibur daudaun ema neʼebé sei moris iha mundu foun.

Klaru katak ita presiza halo buat seluk tan duké aprende deʼit kona-ba Jesus. Atu sai ema kristaun neʼebé loos, ita presiza hatudu fiar ba nia no hadomi tebes nia. Domin hanesan neʼe sei book ita atu halo tuir nia ho laran-metin. (João 14:15, 21) Ida-neʼe ajuda duni ita atu hamriik metin iha fiar maski hasoru terus oioin, no atu laʼo nafatin iha Kristu nia ain-fatin iha ita-nia moris tomak. Ida-neʼe mós ajuda ita atu sai ema kristaun neʼebé laʼo ba oin no iha ‘abut neʼebé metin’ no sai ‘hanesan uma neʼebé harii iha hun neʼebé metin’. (Éfeso 3:17) Hodi halaʼo moris hanesan neʼe, ita fó glória ba Jeová, neʼebé nuʼudar Maromak no Aman ba Jesus Kristu.

“LIAFUAN DIʼAK KONA-BA MAROMAK NIA UKUN”

KUANDU Jesus koʼalia kona-ba sinál neʼebé sei hatudu katak nia toʼo ona mai no mundu neʼe atu hotu, nia dehan: “Ema sei haklaken liafuan diʼak kona-ba Maromak nia Ukun iha mundu tomak nuʼudar sasin ba nasaun hotu, no depois neʼe mundu nia rohan sei mai.”—Mateus 24:14.

Entaun, saida mak mensajen neʼebé ema hotu presiza rona? Neʼe mak mensajen kona-ba Maromak nia Ukun. Jesus hanorin ita atu halo orasaun kona-ba Ukun neʼe hodi dehan: “Halo Ita-nia Ukun toʼo mai rai.” (Mateus 6:10) Apokalipse 11:15 koʼalia kona-ba Ukun neʼe nuʼudar ‘ita-nia Maromak [Jeová] no ninia Kristu nia ukun’ tanba kbiit atu ukun mai husi Jeová no nia foti Kristu nuʼudar Liurai. Maibé, mensajen neʼebé Jesus dehan katak ninia povu sei haklaken ohin loron la hanesan ho mensajen neʼebé ninia dixípulu sira haklaken iha tempu uluk. Mensajen neʼebé sira haklaken iha tempu neʼebá mak: “Maromak nia Ukun besik ona imi.” (Lucas 10:9) Sin, sira haklaken mensajen hanesan neʼe tanba Jesus nuʼudar ida neʼebé Maromak hili atu sai liurai sei iha hela sira-nia leet. Maibé hanesan hakerek iha Mateus 24:14, Jesus fó-hatene nanis katak ninia povu ohin loron sei haklaken kona-ba akontesimentu importante ida tan neʼebé mosu tuir Maromak nia hakarak.

Profeta Daniel haree vizaun ida kona-ba buat neʼebé mosu. Nia haree “ema ida hanesan oan-mane”, katak Jesus Kristu, no nia simu “kbiit no hahiʼi no ukun, . . . no ema husi nasaun no língua oioin serbí nia”. Nia simu ukun neʼe husi “Ida neʼebé Idade Boot Liu”, katak Maromak Jeová. (Daniel 7:13, 14) Buat importante neʼe akontese iha lalehan iha tinan 1914. No tuirmai Miguel no nia anju sira duni tun Diabu no ninia anju aat sira ba rai. (Apokalipse 12:7-10) Mundu aat neʼe tama ona ba loron ikus sira. Maibé antes mundu neʼe lakon hotu, ita presiza haklaken ba ema hotu iha mundu tomak katak Liurai neʼebé Jeová hili ona, nia ukun daudaun iha lalehan. Mensajen neʼe mak sai nuʼudar avizu ba ema hotu. Desizaun neʼebé sira foti kuandu sira rona mensajen neʼe sei hatudu ho klaru oinsá mak sira hanoin kona-ba ida neʼebé Aas Liu Hotu nuʼudar Ukun-Naʼin ba “ema hotu nia ukun”.—Daniel 4:32.

Tuir loloos, ita hein atu haree buat barak tan sai loos! Entaun, kuandu ita halo orasaun kona-ba “halo Ita-nia Ukun toʼo mai rai” neʼe laʼós katak Maromak nia Ukun sei komesa ukun iha futuru. Maibé ita hakarak Ukun neʼe atu kumpre liafuan neʼebé hakerek iha Daniel 2:44 no mós iha Apokalipse 21:2-4. Ukun neʼe sei hadiʼa rai hodi sai fali paraízu ida no ema neʼebé hadomi Jeová no hadomi sira-nia maluk sei hela iha neʼebá. Kuandu ita haklaken “liafuan diʼak kona-ba Maromak nia Ukun”, ita esplika ba ema kona-ba bensaun sira-neʼe iha futuru. Maibé ita mós esplika ho fiar katak Jeová fó ona kbiit ba nia Oan-Mane atu ukun. Entaun, ita dada ema nia atensaun ba liafuan diʼak neʼe kuandu ita haklaken kona-ba Ukun neʼe ka lae?

Esplika saida mak Maromak nia Ukun. Oinsá mak ita bele kumpre ita-nia knaar atu fó sai Maromak nia Ukun? Karik ita bele komesa hodi koʼalia kona-ba tópiku oioin, maibé tuirmai rona-naʼin presiza haree ho klaru katak ita-nia mensajen loloos mak kona-ba Maromak nia Ukun.

Parte importante husi ita-nia serbisu haklaken mak lee ka temi eskritura sira kona-ba Maromak nia Ukun. Kuandu koʼalia kona-ba Ukun neʼe, diʼak atu hatene se ita-nia rona-naʼin komprende saida mak Ukun neʼe. Karik ita presiza esplika liután duké dehan deʼit katak neʼe mak Maromak nia governu. Ba ema balu, susar ba sira atu komprende katak iha duni governu ida maski la haree ho matan. Karik ita presiza uza ezemplu oioin atu esplika ho klaru kona-ba neʼe. Ezemplu ida mak anin. Maski ita la bele haree anin ho matan, maibé ita bele haree no sente anin nia forsa. Hanesan neʼe mós, maski ita la bele haree ho matan Ida neʼebé kria anin, maibé ita bele komprende katak nia iha forsa boot liu. Bíblia koʼalia kona-ba Maromak nuʼudar “Liurai neʼebé laiha rohan”. (1 Timóteo 1:17) Ezemplu ida tan mak kona-ba rai ida neʼebé boot. Ita bele esplika katak ema barak iha rai neʼe karik nunka vizita sidade kapitál no karik nunka haree ukun-naʼin iha rai neʼe. Maski nuneʼe sira hatene kona-ba sidade boot no ukun-naʼin liuhusi jornál ka notísias ruma. Hanesan neʼe mós, Bíblia neʼebé agora tradús ona iha língua maizumenus 2.600 liu mak fó-hatene mai ita kona-ba Maromak nia Ukun. Bíblia fó-hatene mai ita kona-ba sé mak simu kbiit atu ukun no mós saida mak Ukun neʼe halo daudaun. Livru Haklaken neʼebé halo kada fulan iha língua barak liu fali jornál sira seluk mak livru neʼebé “Fó sai Maromak Jeová nia Ukun”, hanesan temi iha livru nia oin.

Atu ajuda ema komprende saida mak Maromak nia Ukun sei halo, karik ita bele temi buat balu neʼebé sira rasik hakarak ema nia governu atu halo, hanesan: Hadiʼa ekonomia, halo dame, halakon krime, tau matan ba ema hodi la todan ba sorin, fó edukasaun, no saúde. Esplika ba sira katak Maromak nia Ukun deʼit mak sei kumpre buat hotu neʼe no mós buat seluk tan neʼebé sei halo ita ema sente kontente liu.—Salmo (Mazmur) 145:16.

Hakaʼas an atu ajuda ema haburas hakarak hodi moris iha Liurai Jesus Kristu nia Ukun okos. Esplika katak milagre sira neʼebé Jesus halo iha tempu uluk mak ezemplu kona-ba buat neʼebé nia sei halo nuʼudar Liurai iha lalehan. Kontinua esplika kona-ba Jesus nia hahalok furak sira. (Mateus 8:2, 3; 11:28-30) Fó-hatene katak nia fó ona ninia moris nuʼudar sakrifísiu ba ita-nia diʼak no tuirmai Maromak halo nia moris-hiʼas ba lalehan atu moris ba nafatin. No nia ukun daudaun nuʼudar Liurai husi lalehan.—Apóstolu 2:29-35.

Esplika katak Maromak nia Ukun iha lalehan ukun daudaun. Maski nuneʼe, klaru katak ema barak la haree prova neʼebé hatudu katak ukun neʼe iha duni. Diʼak atu komprende sira-nia hanoin, no tuirmai husu se sira hatene saida mak Jesus Kristu hatete kona-ba sinál ba ninia Ukun neʼe. Koʼalia kona-ba parte balu husi sinál loron ikus nian neʼebé temi iha Mateus kapítulu 24, Marcos kapítulu 13, ka Lucas kapítulu 21. Tuirmai husu tansá mak situasaun sai aat bainhira Kristu foin sai nuʼudar liurai iha lalehan. Depois neʼe, dada sira-nia atensaun ba Apokalipse 12:7-10, 12.

Atu hatudu kona-ba saida mak Maromak nia Ukun halo daudaun, lee Mateus 24:14 no koʼalia kona-ba programa atu hanorin Bíblia neʼebé halaʼo iha mundu tomak ohin loron. (Isaías [Yesaya] 54:13) Fó-hatene ba sira kona-ba eskola oioin neʼebé Testemuña ba Jeová halaʼo no oinsá sira hetan buat diʼak husi eskola sira-neʼe. Eskola hotu neʼe fó sai hanorin husi Bíblia no lalika selu atu tuir. Esplika katak ita laʼós haklaken deʼit husi uma ba uma maibé mós fó tempu atu estuda Bíblia hodi la selu ho ema ida-idak ka família ida-idak iha rai 230 liu. Governu ida-neʼebé mak bele fó edukasaun hanesan neʼe ba ninia povu no mós ba ema hotu iha mundu tomak? Ita bele konvida sira atu tuir reuniaun sira, no mós reuniaun boot sira. Iha neʼebá sira bele haree ho matan rasik oinsá edukasaun neʼe ajuda duni ema nia moris.—Isaías (Yesaya) 2:2-4; 32:1, 17; João 13:35.

Maibé, oinsá mak uma-naʼin bele hatene katak ida-neʼe bele kona duni ninia moris? Ho respeitu ita bele esplika katak ita mai vizita nia atu koʼalia kona-ba oportunidade espesiál neʼebé ema hotu iha hodi bele moris iha Maromak nia Ukun okos. Oinsá mak sira bele hetan moris neʼe? Sira presiza aprende kona-ba Maromak nia hakarak ba sira no moris tuir ida-neʼe agora.—Deuteronômio (Ulangan) 30:19, 20; Apokalipse 22:17.

Ajuda ema seluk atu tau uluk Maromak nia Ukun. Maski ema ida simu ona mensajen kona-ba Maromak nia Ukun, maibé nia tenke foti desizaun ruma. Nia sei tau uluk Maromak nia Ukun iha ninia moris ka lae? Jesus fó laran-manas ba ninia dixípulu sira atu “kontinua buka uluknanain Maromak nia Ukun”. (Mateus 6:33) Oinsá mak ita bele ajuda maluk kristaun sira atu halo nuneʼe? Ita rasik presiza hatudu ezemplu diʼak kona-ba neʼe no mós koʼalia kona-ba oportunidade oioin neʼebé ita iha atu buka uluknanain Maromak nia Ukun. Dala ruma ita bele husu se ita-nia maluk hanoin ona kona-ba oportunidade ruma atu aumenta ninia serbisu ba Maromak, no mós ita bele fahe esperiénsia ruma kona-ba maluk balu neʼebé halo ona ida-neʼe. Ita mós bele koʼalia kona-ba istória ruma husi Bíblia iha dalan neʼebé hametin liután ita-nia domin ba Jeová. No mós koʼalia iha dalan neʼebé hatudu ita fiar katak Ukun neʼe tebes duni. Esplika katak haklaken liafuan diʼak kona-ba Maromak nia Ukun mak serbisu neʼebé importante duni. Entaun, dalan diʼak liu atu ajuda ema mak hodi book sira-nia laran atu hakarak halo ida-neʼe duké haruka deʼit.

Tuir loloos, mensajen importante neʼebé ita haklaken ba ema mak liuliu kona-ba Maromak Jeová, Jesus Kristu, no kona-ba Ukun. Ita tenkesér koʼalia kona-ba lia-loos importante sira-neʼe iha serbisu haklaken, reuniaun sira iha kongregasaun, no iha ita-nia moris rasik. Kuandu ita halo nuneʼe, ita hatudu katak ita hetan duni buat diʼak husi programa Eskola Serbisu Kristaun nian.