Uza pergunta ho diʼak

BAIBAIN se ita husu pergunta, ida-neʼe book ema atu hatán, maski neʼe iha laran ka ho lian. Pergunta sira bele ajuda ita atu hahú koʼalia ho ema no troka hanoin ho sira. Nuʼudar diskursu-naʼin no mestre, ita bele uza pergunta sira atu book ema nia laran, ajuda sira atu hetan resposta neʼebé loos, ka halo klaru liután buat neʼebé ita hakarak fó sai. Se ita uza didiʼak pergunta sira, ida-neʼe bele book ema nia hanoin, duké rona deʼit. Entaun, hanoin kona-ba ita-nia objetivu, depois neʼe husu pergunta sira iha dalan neʼebé kumpre objetivu neʼe.

Uza pergunta atu book ema fó sai ninia hanoin. Kuandu ita bá haklaken, diʼak atu husu ema atu fó sai sira-nia hanoin kona-ba buat ruma se sira hakarak.

Haklaken-naʼin barak hahú koʼalia hodi husu pergunta hanesan: “Dala ruma ita hanoin kona-ba . . . ?” Se ita hili pergunta neʼebé ema barak hanoin daudaun, ita sei hetan susesu kuandu haklaken. Maski pergunta neʼe uma-naʼin seidauk rona, maibé ida-neʼe mós bele book ninia laran. Ita bele koʼalia kona-ba tópiku oioin hodi husu pergunta sira hanesan: “Ita hanoin oinsá kona-ba . . . ?” “Oinsá Ita sente kona-ba . . . ?” no “Ita fiar ka lae, katak . . . ?”

Bainhira Filipe hakbesik ba ema-boot husi Etiópia neʼebé lee hela livru Isaías, Filipe husu: “Ita hatene [ka, Ita komprende] buat neʼebé Ita lee ka lae?” (Apóstolu 8:30) Pergunta neʼe loke dalan ba Filipe atu hanorin nia kona-ba Jesus Kristu. Ohin loron, Testemuña ba Jeová mós uza pergunta hanesan neʼe hodi ajuda ema neʼebé hamlaha ba lia-loos husi Bíblia.

Baibain ema sei prontu rona ba ita kuandu sira fó sai tiha sira-nia hanoin. Entaun, depois husu tiha pergunta ida, rona didiʼak ba ema nia resposta. Hatudu laran-diʼak kuandu nia fó sai ninia hanoin, duké koʼalia kontra nia. Se bele, diʼak atu gaba nia. Loron ida, kuandu eskriba ida “hatán ho matenek”, Jesus gaba nia hodi dehan: “Ó la dook husi Maromak nia Ukun.” (Marcos 12:34) Maski ema nia hanoin la hanesan ho ita-nian, maibé ita bele fó obrigadu ba nia tanba fó sai ninia hanoin. Karik ida-neʼe ajuda ita hatene liután kona-ba oinsá atu fahe lia-loos husi Bíblia ba nia.

Uza pergunta antes fó sai pontu importante. Kuandu ita koʼalia ba ema barak ka ba ema ida, koko atu uza pergunta se ita hakarak atu esplika pontu importante. Husu pergunta neʼebé kona rona-naʼin nia laran. Ita mós bele uza pergunta neʼebé halo ema hein namanas atu hetan resposta. Se ita husu pergunta ida no depois para uitoan, rona-naʼin sei hakarak hatene buat neʼebé ita atu fó sai.

Loron ida, profeta Miquéias uza pergunta barak atu hanorin. Nia husu: ‘Saida mak Maromak nia hakarak husi ema neʼebé adora nia?’ Depois neʼe, nia husu tan pergunta haat neʼebé sai hanesan resposta ba pergunta ida primeiru. Pergunta sira-neʼe halo lee-naʼin sira hakarak hatene resposta neʼebé loos, neʼebé ikusmai nia rasik fó sai. (Miquéias [Mikha] 6:6-8) Koko atu halo hanesan neʼe kuandu ita hanorin.

Uza pergunta atu ajuda ema komprende. Pergunta sira bele ajuda ema komprende tanbasá hanorin ida mak loos. Apóstolu Paulo halo ida-neʼe iha 1 Korinto 14:4-12. Iha eskritura neʼe nia esplika kona-ba koʼalia ho lian oioin iha kongregasaun laran, no nia hatete katak ema tenke halo ida-neʼe atu harii kongregasaun. Depois neʼe, atu hatudu tansá importante atu koʼalia hodi ema komprende, nia husu: “Maun-alin sira, se agora haʼu toʼo ba imi hodi koʼalia lia oioin, oinsá mak ida-neʼe sei ajuda imi? Se haʼu hakarak ajuda imi, haʼu tenke fó sai ba imi segredu ida husi Maromak ka koʼalia ho matenek ka koʼalia nuʼudar profeta ka fó sai hanorin ida.” Depois neʼe nia fó sai ai-knanoik no pergunta sira atu hatudu katak koʼalia lia oioin laʼós importante liu. Nuneʼe apóstolu Paulo koʼalia hodi dada ema nia atensaun. No ninia liafuan sira-neʼe klaru no ema sei la haluha.

Diskursu-naʼin balu mós uza pergunta ho didiʼak. Maski rona-naʼin sira lalika hatán ho lian, maibé liuhusi pergunta hanesan neʼe, sira sente katak diskursu-naʼin koʼalia ba sira ida-idak.

Bainhira ita estuda Bíblia ho ema, ita hanorin hodi uza pergunta no resposta. Maibé, sira sei aprende diʼak liután se sira hatán ho sira-nia liafuan rasik, duké lee deʼit resposta husi livru. Entaun, ho laran-diʼak husu pergunta seluk hodi bele book estudante nia hanoin. Bainhira koʼalia kona-ba pontu importante ida, husu nia atu hatán hodi uza eskritura. Karik ita husu pergunta hanesan: “Oinsá mak eskritura neʼe ajuda ita atu komprende hanorin seluk neʼebé ita aprende ona? Tanbasá mak neʼe importante ba ita? Oinsá mak ita bele moris tuir ida-neʼe?” Halo hanesan neʼe mak diʼak liu duké koʼalia naruk kona-ba ita-nia hanoin ka esplika barak. Ho ida-neʼe, ita ajuda estudante atu uza ninia “kbiit atu hanoin” hodi adora Maromak.—Roma 12:1.

Ita tenke hatudu pasiénsia se estudante seidauk komprende hanorin ruma. Karik nia fiar buat ruma ba tinan barak ona no agora nia kompara hela ida-neʼe ho buat neʼebé ita fó sai. Se nuneʼe, karik ita bele buka dalan seluk atu esplika informasaun neʼe. Maibé, dala ruma esplika iha dalan simples deʼit mak diʼak liu. Uza beibeik eskritura no ai-knanoik sira. No husu pergunta sira neʼebé simples atu ajuda nia hanoin tansá mak ida-neʼe loos.

Uza pergunta atu hatene ema nia laran. Bainhira ema hatán ita-nia pergunta, dala ruma sira la hatudu sai sira-nia hanoin rasik. Karik sira hakarak hatán deʼit buat neʼebé ita gosta rona. Tan neʼe, ita presiza hatudu matenek. (Provérbios [Amsal] 20:5) Halo tuir Jesus nia ezemplu hodi husu: “Ó fiar ida-neʼe ka lae?”—João 11:26.

Loron ida, Jesus nia dixípulu barak husik nia tanba sira la simu buat neʼebé nia hatete. Tan neʼe, Jesus husu apóstolu sira-nia hanoin. Nia husu: “Imi mós hakarak atu bá ka?” Pedro fó sai sira-nia hanoin, hodi dehan: “Naʼi, ami atu bá ho sé loos? Ita iha liafuan moris rohan-laek nian; no ami fiar ona no hatene katak Ita-Boot mak Ida neʼebé Santu husi Maromak.” (João 6:67-69) Iha tempu seluk, Jesus husu ba dixípulu sira: “Ema dehan katak Oan-Mane husi ema mak sé?” Depois neʼe, nia husu tan pergunta ida atu buka-hatene saida mak sira hanoin. Nia husu: “Maibé, tuir imi-nia hanoin haʼu neʼe sé?” Pedro hatán: “Ita mak Kristu, Maromak moris nia Oan-Mane.”—Mateus 16:13-16.

Bainhira ita estuda ho ema, ita mós bele uza pergunta hanesan neʼe atu koʼalia kona-ba buat balu. Ita bele husu: “Ita-nia kolega eskola (ka kolega serbisu) hanoin oinsá kona-ba ida-neʼe?” Depois neʼe, ita bele husu tan: “Ita-nia hanoin oinsá kona-ba ida-neʼe?” Ita bele ajuda estudante diʼak liután se ita hatene loloos buat neʼebé iha ninia laran.

Uza pergunta atu énfaze. Hodi uza pergunta sira, ita bele tau énfaze ba buat neʼebé ita esplika. Iha Roma 8:31, 32, apóstolu Paulo halo hanesan neʼe hodi husu: “Se Maromak hamutuk ho ita, sé mak sei kontra ita? Nia husik nia Oan-Mane atu hetan terus hodi entrega nia ba mate tanba ita hotu. Nuneʼe ita hatene katak Maromak no ninia Oan-Mane mós prontu atu fó ba ita buat seluk hotu, loos ka lae?” Nia uza pergunta sira atu tau énfaze ba informasaun neʼebé nia foin temi.

Ezemplu ida tan mak iha Tiago 2:14. Iha neʼe, Tiago esplika katak fiar mak importante no ita hatudu neʼe liuhusi hahalok. Nia dehan: “Haʼu-nia maun-alin sira, ema ida sei manán sá se nia dehan katak nia iha fiar maibé la hatudu liuhusi hahalok? Fiar neʼe la bele salva nia, loos ka lae?” Ema lalika buka resposta ba pergunta sira-neʼe, tanba ida-neʼe klaru ona.

Uza pergunta atu hatudu sai hanoin sala. Pergunta sira neʼebé diʼak bele hatudu sai hanoin neʼebé laloos. Antes Jesus kura mane ida, nia husu ba ema farizeu no ema neʼebé hatene Moisés nia ukun-fuan: “Tuir lei, bele kura ema iha loron Sábadu ka lae?” Kura tiha mane neʼe, Jesus husu fali: “Husi imi hotu, sé mak sei la bá lalais hodi dada sai ninia oan ka karau-aman neʼebé monu iha bee-matan maski iha loron Sábadu?” (Lucas 14:1-6) Jesus la hein ba sira-nia resposta no tuir loloos, sira lalika fó resposta. Jesus nia pergunta sira hatudu sai ona sira-nia hanoin neʼebé sala.

Dala ruma, ema kristaun loos bele iha hanoin sala. Iha apóstolu nia tempu, ema kristaun balu iha Korinto lori sira-nia maluk bá tribunál atu rezolve sira-nia problema. Maibé loloos, sira rasik tenke rezolve problema sira-neʼe. Oinsá mak apóstolu Paulo ajuda sira? Nia uza pergunta tuituir malu atu halo loos sira-nia hanoin.—1 Korinto 6:1-8.

Hodi hakaʼas an, neineik-neineik ita mós bele uza pergunta ho diʼak. Maibé, keta haluha atu koʼalia ho respeitu, liuliu ba ema idade sira, ba ema neʼebé ita seidauk koñese diʼak, no mós ba ema-boot governu nian. Ita-nia hakarak mak atu uza pergunta sira hodi esplika lia-loos husi Bíblia atu halo ema gosta liután atu rona.