MORIS NUʼUDAR EMA KRISTAUN

Buat foun ida ba reuniaun loron baileet

Hahú husi fulan Janeiru 2018, programa ba reuniaun loron baileet sei aumenta nota estudu no média husi edisaun estudu online Bíblia Sagrada Tradusaun Mundu Foun lia-inglés (nwtsty), maski seidauk sai iha Ita-nia língua rasik. Ami fiar katak informasaun sira-neʼe sei ajuda tebes Ita-nia preparasaun ba reuniaun neʼe. Importante liu mak neʼe sei ajuda Ita hakbesik liután ba Ita-nia Aman Jeová neʼebé iha domin!

NOTA ESTUDU

Nota estudu fó sai informasaun kona-ba kultura, jeografia, no língua atu komprende liután eskritura sira.

Mateus 12:20

Ahi-oan neʼebé besik atu mate: Baibain ema uza ahi-oan fatin neʼebé halo husi rai no enxe ho mina oliveira. Kabas husi ai-liñu mak xupa mina neʼe hodi ahi bele lakan nafatin. “Ahi-oan neʼebé besik atu mate” iha lia-gregu karik refere ba kabas neʼebé sei klaak no suar hela maibé ahi komesa lakon ka mate ona. Isaías 42:3 fó-hatene nanis katak Jesus nakonu ho laran-diʼak tanba nia nunka halakon ema haraik-an no ema laran-susar sira-nia esperansa, maski esperansa sira-neʼe haree hanesan ahi-funan deʼit.

Mateus 26:13

Loloos: Liafuan neʼe mai husi liafuan gregu, a·menʹ, neʼebé tradús tuir lia-ebraiku ʼa·menʹ, signifika katak “sai nuneʼe ba”, ka “loos duni”. Dala barak Jesus hahú ho liafuan neʼe bainhira nia koʼalia buat ruma, promete buat ruma, ka hatoʼo profesia ruma, neʼe atu hatudu katak buat neʼebé nia koʼalia sei sai loos duni. Iha livru sagrada sira, só Jesus mak uza liafuan “loloos”, ka amen, iha dalan hanesan neʼe. Se Jesus mak repete liafuan neʼe tuituir malu (a·menʹ a·menʹ), hanesan iha Evanjellu João, neʼe tradús sai fali “tebes haʼu hatete loloos”.—Jo 1:51.

MÉDIA

Foto, dezeñu, no vídeo oioin neʼebé la iha lian esplika informasaun sira neʼebé hetan iha Bíblia.

Betfage, Foho Oliveira, no Jeruzalein

Vídeo badak neʼe komesa husi knua modernu ida naran et-Tur neʼebé ema hatete katak neʼe mak Betfage iha tempu Bíblia neʼebé besik Jeruzalein leste, no lori ita toʼo fatin aas iha Foho Oliveira. Betánia mak iha Betfage nia leste, iha Foho Oliveira nia parte leste. Bainhira Jesus ho ninia dixípulu sira bá Jeruzalein, baibain sira toba iha Betánia, ohin loron sidade neʼe naran el-ʽAzariyeh (El ʽEizariya) neʼebé iha lia-arabi signifika “Lázaro nia fatin.” Ita fiar katak Jesus hela iha Marta, Maria, no Lázaro nia uma iha tempu sira-neʼe. (Mt 21:17; Mc 11:11; Lc 21:37; Jo 11:1) Bainhira Jesus sai husi sira-nia uma atu bá Jeruzalein, karik Jesus uza dalan neʼebé hatudu iha vídeo neʼe. Iha loron 9 fulan Nisan tinan 33 bainhira Jesus saʼe kuda-burru husi Foho Oliveira bá Jeruzalein, karik nia husi Betfage tuir dalan toʼo Jeruzalein.

Dalan husi Betánia toʼo Betfage
Betfage
Foho Oliveira
Foho-leet Sedrom
Templu nia fatin

Pregu sona hela ruin tuban

Foto neʼe hatudu ezemplu ida kona-ba ema nia ruin tuban neʼebé sona borus ho pregu naruk ho sentímetru 11,5. Sasán orijinál husi ezemplu neʼe mai husi ema Roma nia tempu no ema keʼe hetan iha Jeruzalein parte norte iha 1968. Neʼe mak evidénsia neʼebé hatudu katak ema uza pregu atu hedi ema neʼebé simu kastigu-mate ba ai-riin. Pregu neʼe karik hanesan ho pregu neʼebé ema Roma uza atu hedi Jesus Kristu ba ai-riin. Sasán neʼe ema hetan iha kaixa fatuk ida, bolu osuáriu. Baibain ema nia ruin sira tau iha osuáriu laran bainhira isin lahuk ona. Neʼe hatudu katak karik ema neʼebé hetan kastigu-mate hodi hedi ba ai-riin, ema mós hakoi sira-nia mate-isin.—Mt 27:35.