• Maromak loloos hanoin feto sira ka lae?
    Livru Haklaken—2012 | 1 Outubru

    • Maromak loloos hanoin feto sira ka lae?

      “Sala komesa ho feto ida, no tanba nia, ita hotu sei mate.”—HUSI LIVRU ECLESIÁSTICO, MAIZUMENUS TINAN 200 MOLOK KRISTU.

      “Ó mak loke dalan ba Diabu: ó mak primeiru neʼebé han husi ai-hun neʼebé bandu: ó mak ema primeiru neʼebé kontra Maromak nia ukun-fuan . . . Ó mak lori mane primeiru atu monu ba sala.”—TERTULIANO, IHA NINIA LIVRU IDA (ON THE APPAREL OF WOMEN), MAIZUMENUS TINAN 200 LIUTIHA KRISTU.

      LIAFUAN sira-neʼe laʼós mai husi Bíblia. Ba tinan atus ba atus ona, ema uza liafuan sira-neʼe atu hatún feto sira. Ohin loron mós, ema balu sei temi liafuan husi livru relijiaun nian atu fó razaun katak la sala atu trata aat feto sira. Sira fó-sala ba feto kona-ba problema sira neʼebé ema hasoru ohin loron. Saida mak Maromak nia hanoin kona-ba neʼe? Ninia hakarak horiuluk kedas mak atu mane fó-terus ba feto ka lae? Saida mak Bíblia hatete kona-ba neʼe? Mai ita haree.

      Maromak fó malisan ba feto sira ka lae?

      Lae, Maromak la fó malisan ba feto sira. Tuir loloos, nia fó malisan ba “samea uluk nian, neʼebé ema hanaran Diabu”. (Apokalipse 12:9; Gênesis [Kejadian] 3:14) Maski Maromak hatete katak Adão sei “domina” ninia feen, maibé neʼe la hatudu katak Maromak simu atu mane kontrola feto. (Gênesis 3:16) Tuir loloos ho liafuan sira-neʼe, Maromak fó-hatene nanis kona-ba rezultadu aat neʼebé Adão no Eva sei hetan tanba sira halo sala.

      Tan neʼe, feto sira hetan terus tanba ema sai sala-naʼin, laʼós tanba ida-neʼe mak Maromak nia hakarak. Bíblia nunka hanorin ideia katak mane tenke kontrola feto hodi selu fali sala primeiru.—Roma 5:12.

      Maromak kria mane importante liu fali feto ka lae?

      Lae. Gênesis 1:27 hatete: “Maromak komesa kria ema tuir nia ilas, iha Maromak nia ilas nia kria ema; nia kria sira mane no feto.” Entaun, horiuluk kedas sira naʼin-rua iha kbiit atu haleno Maromak nia hahalok sira. Maski Adão no Eva nia isin no sentimentu la hanesan, maibé sira simu matadalan neʼebé hanesan husi Maromak. No mós, sira iha direitu neʼebé hanesan iha sira-nia Kriadór nia oin.—Gênesis 1:28-31.

      Antes Maromak kria Eva, nia hatete: “Haʼu sei halo ba nia [Adão] ajuda-naʼin ida atu halo nia sai kompletu.” (Gênesis 2:18) Liafuan “atu halo nia sai kompletu”, neʼe katak Eva ladún importante ka lae? Lae. Hanoin toʼok kona-ba ema neʼebé lori karreta bombeiru nian no ida neʼebé rega ahi. Se ida la iha, ida seluk bele halo serbisu mesak ka lae? Lae. Maski ida neʼebé rega mak hamate ahi, maibé nia importante liu fali ida neʼebé