Informasaun atu uza hamutuk livru Moris Kristaun no Haklaken
7-13 MARSU
RIKUSOIN HUSI BÍBLIA | 1 SAMUEL 12-13
“Foti an sei lori moe boot”
w00-E 8/1 p. 13 par. 17
Foti an sei lori moe boot
17 Se haree liu deʼit, karik ita bele hanoin katak buat neʼebé Saul halo mak loos. Maromak nia povu “hasoru problema boot” no “iha susar laran”, no sira sente taʼuk tanba situasaun susar neʼe. (1Sa 13:6, 7) Loloos, la sala atu halo buat ruma tuir situasaun. Maibé hanoin-hetan katak Jeová bele haree ema nia laran no hatene ema nia motivu. (1Sa 16:7) Tan neʼe, ita bele fiar katak Jeová haree buat ruma husi Saul maski la temi iha Bíblia. Porezemplu, karik Jeová haree katak Saul lakon pasiénsia tanba nia foti an. Karik Saul sai nervozu tanba maski nia mak liurai ba nasaun Izraél tomak, maibé nia tenke hein ba profeta katuas ida neʼebé demora atu halo buat neʼebé nia presiza! Saul sente katak tanba Samuel mak demora hela, nia iha direitu atu foti desizaun rasik no la presiza halo tuir mandamentu neʼebé nia simu. Rezultadu mak saida? Samuel la gaba buat neʼebé Saul halo ona. Duké gaba, nia hatete ba Saul: “Ó-nia ukun sei la hamriik ba nafatin . . . tanba ó la halo tuir mandamentu neʼebé Jeová fó ona ba ó.” (1Sa 13:13, 14) Dala ida tan, hahalok foti an lori moe boot.
w07-E 6/15 p. 27 par. 8
Jeová hafolin kuandu Ita halo tuir
8 Istória kona-ba Liurai Saul hanorin ita katak importante tebes atu halo tuir. Foufoun Saul mak liurai neʼebé haraik an, no ‘nia haree ninia an nuʼudar buat folin-laek’. Maibé neineik-neineik, hahalok foti an no hanoin neʼebé la loos mak komesa domina ninia desizaun sira. (1Sa 10:21, 22; 15:17) Loron ida, Saul presiza halo funu hasoru ema Filístia. Samuel haruka Saul hein nia atu hasaʼe sakrifísiu ba Jeová no fó matadalan liután. Maibé Samuel la mai tuir tempu neʼebé nia fó-hatene ona no povu komesa husik hela Saul. Bainhira Saul haree ida-neʼe, nia “hasaʼe sakrifísiu sunu nian”. Neʼe halo Jeová la kontente. Ikusmai bainhira Samuel toʼo, Saul fó razaun tanbasá nia halo nuneʼe hodi dehan katak Samuel la mai tuir tempu, tan neʼe nia “obriga an” atu hasaʼe sakrifísiu sunu nian hodi husu Jeová nia laran-sadiʼa. Liurai Saul hanoin katak hasaʼe sakrifísiu mak importante liu fali halo tuir mandamentu neʼebé nia simu atu hein Samuel hodi hasaʼe sakrifísiu. Samuel hatete ba Saul: “Ó halo ona hahalok beik. Ó la halo tuir Jeová, ó-nia Maromak, nia mandamentu neʼebé nia fó ba ó.” Tanba la halo tuir Jeová, Saul lakon ninia pozisaun nuʼudar liurai.—1Sa 10:8; 13:5-13.
Keʼe no hetan buat murak husi Bíblia
Ita sei halo tuir Jeová nia matadalan ka lae?
15 Karik ema Israel hanoin katak diʼak liu atu tau fiar ba liurai duké ba Maromak Jeová. Tuir loloos, se sira iha hanoin hanesan neʼe, sira tuir buat neʼebé laʼós realidade! No ida-neʼe perigu ba sira tanba fasil deʼit atu sira mós tau fiar ba buat seluk tan neʼebé laʼós realidade neʼebé mai husi Satanás. Porezemplu, liurai sira-neʼe bele halo sira adora maromak falsu. Ema neʼebé adora maromak falsu neʼebé halo husi ai ka fatuk, sira hanoin katak sira bele fiar maromak sira-neʼe tanba sira bele haree no kaer sira. Sira la tau fiar ba Jeová neʼebé matan la haree, no neʼebé kria buat hotu-hotu. Maibé, apóstolu Paulo hatete katak maromak falsu sira-neʼe “la iha folin”. (1Ko 8:4) Maromak falsu sira-neʼe la bele haree, rona, koʼalia no halo buat ida. Karik ema bele haree sira no kona sira, maibé se ema adora maromak falsu sira-neʼe ida, ida-neʼe hanesan ema tuir buat neʼebé laʼós realidade no bele lori sira ba perigu.—Sal 115:4-8.
14-20 MARSU
RIKUSOIN HUSI BÍBLIA | 1 SAMUEL 14-15
“Halo tuir diʼak liu fali sakrifísiu”
w07-E 6/15 p. 26 par. 4
Jeová hafolin kuandu Ita halo tuir
4 Nuʼudar Kriadór, Jeová iha ona buat hotu neʼebé ita iha. Entaun, iha ka lae buat neʼebé ita bele fó ba nia? Sin iha, ita bele fó ba nia buat neʼebé folin-boot tebes. Saida mak neʼe? Ita bele hetan resposta husi Jeová nia liafuan tuirmai neʼe: “Haʼu-nia oan, sai matenek bá, no halo haʼu-nia laran haksolok, atu nuneʼe haʼu bele hatán ba ida neʼebé koʼalia aat haʼu.” (Prv 27:11) Buat neʼebé ita bele fó ba Maromak mak hahalok halo tuir. Maski ita ida-idak nia situasaun no moris la hanesan, maibé ita hotu bele halo tuir Jeová hodi fó resposta ba lia-bosok neʼebé Diabu Satanás hasaʼe, katak ema sei la hatudu laran-metin ba Maromak bainhira hasoru susar. Neʼe mak priviléjiu neʼebé furak tebes!
it-2-E p. 521 par. 2
Halo tuir
La iha buat ida mak bele troka ho hahalok halo tuir, no se la iha hahalok halo tuir, ita labele halo Maromak kontente. Samuel hatete ba Liurai Saul: “Saida mak Jeová hakarak? Nia hakarak liu atu ema halo tuir nia, ka hasaʼe sakrifísiu sunu nian no sakrifísiu sira seluk? Halo tuir Jeová mak diʼak liu fali hasaʼe sakrifísiu ida, no rona didiʼak mak diʼak liu fali fó bibi-malae aman nia bokur.” (1Sa 15:22) La halo tuir mak hanesan la simu Jeová nia liafuan, no neʼe hatudu katak ema neʼe la fiar ba liafuan neʼe no Ida neʼebé fó sai liafuan neʼe. Tan neʼe ema neʼebé la halo tuir mak hanesan deʼit ho ema neʼebé halo espiritizmu ka adora estátua. (1Sa 15:23; kompara ho Rom 6:16.) Koʼalia ho ibun deʼit la lori rezultadu ida se la akompaña ho hahalok; se la halo tuir, neʼe hatudu katak la iha fiar no la respeitu ba ida neʼebé fó matadalan. (Mt 21:28-32) Se ema ida kontente atu rona no konkorda kona-ba lia-loos husi Maromak maibé la halo tuir, ema neʼe lohi sira-nia an ho hanoin neʼebé la loos no la hetan bensaun. (Tgo 1:22-25) Maromak nia Oan-Mane fó sai ho klaru katak maski ema ruma halo buat neʼebé atu hanesan ho mandamentu neʼebé fó sai ona, maibé se nia halo nuneʼe iha dalan neʼebé sala ka ho motivu neʼebé la loos, Maromak sei la simu nia no nia sei la tama ba Maromak nia Ukun.—Mt 7:15-23.
Keʼe no hetan buat murak husi Bíblia
it-1-E p. 493
Laran-sadiʼa
Ita sei hetan konsekuénsia neʼebé sériu se ita hatudu laran-sadiʼa hodi halo tuir ema seluk nia hakarak maibé neʼe mak kontra Maromak nia hakarak. Ita bele aprende kona-ba neʼe liuhusi buat neʼebé akontese ba Liurai Saul kuandu tempu toʼo ona atu halaʼo Maromak nia tesi-lia hasoru ema Amalec. Ema Amalec mak povu primeiru neʼebé ataka ema Izraél bainhira Izraél sai husi rai-Ejitu. Jeová haruka ona Saul atu labele hatudu laran-sadiʼa ba sira. Maibé Saul halo tuir fali ninia povu, no la halo tuir ho loloos Jeová nia mandamentu. Tan neʼe, Jeová la simu tan Saul nuʼudar liurai. (1Sa 15:2-24) Se ita hafolin tebes Maromak nia dalan neʼebé loos no hakarak duni atu hatudu laran-metin ba Nia, neʼe bele ajuda ita atu la halo sala neʼebé hanesan Saul hodi halo Maromak triste.
21-27 MARSU
RIKUSOIN HUSI BÍBLIA | 1 SAMUEL 16-17
“Funu neʼe mak Jeová nian”
“Funu neʼe mak Jeová nian”
David esplika ba Saul hodi konta ninia esperiénsia kona-ba luta hasoru leaun no ursu. David gaba an ka lae? Lae. Nia hatene tanbasá mak nia konsege oho animál fuik sira-neʼe. Nia dehan: “Jeová, ida neʼebé salva ona haʼu husi leaun no ursu, nia mós sei salva haʼu husi ema Filístia neʼe nia liman.” Ikusmai, Saul hatete ba David: “Bá, no Jeová sei hamutuk ho ó.”—1Sa 17:37.
Ita mós hakarak iha fiar hanesan David ka lae? David nia fiar neʼe laʼós mehi deʼit. David iha fiar neʼebé metin tanba nia iha esperiénsia rasik no hatene didiʼak Jeová nuʼudar Maromak neʼebé proteje Ninia atan sira no kumpre Ninia promesa sira. Se ita mós hakarak iha fiar hanesan neʼe, ita presiza kontinua aprende kona-ba Maromak Jeová. Hodi moris tuir buat neʼebé ita aprende, ita sei hetan rezultadu diʼak, no ita-nia fiar mós sei sai metin liután.—Ebr 11:1.
“Funu neʼe mak Jeová nian”
Joven David nia resposta ba Golias hatudu sai ninia fiar neʼebé metin tebes! Ho lian boot, David hatán ba Golias: “Ó mai atu kontra haʼu ho surik no diman rua, maibé haʼu mai hasoru ó hodi Jeová nia naran, ukun-naʼin ba tropa lalehan nian, nia mak Maromak ba Izraél nia tropa sira neʼebé ó sadik.” David hatene katak ema nia forsa ka armas oioin la importante ida. Golias la respeitu Maromak Jeová, no Jeová sei fó kastigu ba nia. Ba David, “funu neʼe mak Jeová nian”.—1Sa 17:45-47.
David hatene katak Golias mak ema ain-aas ho isin-boot, no ninia surik ho diman mós boot tebetebes. Maibé la hanesan ho Liurai Saul no ninia soldadu sira, David la taʼuk. Neʼe tanba nia la kompara Golias ho ninia an rasik, maibé nia kompara Golias ho Maromak Jeová. Maski Golias ain-aas liu toʼo metru 2,9 maibé ba Maromak neʼebé Boot Liu Hotu, Golias mak ema deʼit, hanesan nehek ida neʼebé la susar atu halakon kedas!
“Funu neʼe mak Jeová nian”
Ohin loron, Maromak nia atan sira la hola parte iha funu hanesan tempu antigu. (Mt 26:52) Maibé, ita presiza banati-tuir David nia fiar. Hanesan ho David, ita presiza tau fiar ba Jeová nuʼudar Maromak neʼebé moris, sin, Maromak loos mesak ida deʼit. Dala ruma ita sente katak ita-nia problema mak boot demais, maibé tuir loloos, problema sira-neʼe mak kiʼik deʼit se kompara ho Maromak Jeová nia forsa neʼebé la iha rohan. Se ita serbí Jeová no tau fiar ba nia hanesan David, ita sei la sente taʼuk maski hasoru susar no problema naran deʼit. Loos duni, la iha buat ida mak boot liu fali Jeová nia kbiit!
Keʼe no hetan buat murak husi Bíblia
Domin no justisa iha Izraél antigu (Parte 1 husi parte 4)
11 Lisaun: Jeová la haree deʼit ba ema husi liʼur maibé nia haree ita ema oinsá loos iha laran. (1Sa 16:7) Ita labele subar ita-nia hanoin, sentimentu no hahalok husi nia. Nia gosta haree buat diʼak husi ita. No nia hakarak ita atu buka-hatene no kontrola hanoin sala antes neʼe hamosu hahalok sala.—2Kr 16:9; Mt 5:27-30.
28 MARSU–3 ABRÍL
RIKUSOIN HUSI BÍBLIA | 1 SAMUEL 18-19
“Haraik an nafatin kuandu hetan susesu”
w04-E 4/1 p. 15 par. 4
Tau fiar ba Maromak nia espíritu bainhira hasoru mudansa iha moris
4 Lakleur tan bibi-atan joven neʼe sei sai ema naran-boot iha nasaun tomak. Nia komesa serbí liurai no toka múzika ba liurai. Nia oho asuwaʼin Golias neʼebé isin-boot no siʼak-teen, neʼebé halo soldadu Izraél hotu taʼuk atu funu hasoru. David sai ulun-naʼin ba asuwaʼin sira no konsege manán hasoru ema Filístia. Povu hadomi nia, no halo knananuk atu gaba nia. Antes neʼe, Liurai Saul nia konsellu-naʼin ida hatete ona katak David mak mane joven neʼebé “matenek atu toka arpa” no nia mós “funu-naʼin ida neʼebé kbiit boot no aten-brani”, “bele koʼalia ho matenek”, no “oin bonitu”.—1Sa 16:18; 17:23, 24, 45-51; 18:5-7.
Ema neʼebé serbí Jeová no ema neʼebé la serbí nia
6 Ema balu sai foti-an tanba iha oin kapás, famozu, iha talentu kona-ba múzika, forsa, ka ema seluk gosta tebes sira. David iha buat sira-neʼe hotu, maibé nia hatudu haraik-an iha ninia moris tomak. Porezemplu, bainhira David oho tiha Golias, Liurai Saul hatete ba David katak nia bele kaben ho Saul nia oan-feto. Maibé David dehan: “Haʼu neʼe sé? Iha Izraél, haʼu-nia aman nia família mak sé? Oinsá mak haʼu bele sai liurai nia mane-foun?” (1Sa 18:18) Saida mak ajuda David hodi haraik-an nafatin? Nia hatene katak hahalok furak oioin, abilidade, no priviléjiu hotu neʼebé nia iha tanba Maromak neʼebé haraik-an mak fó ba nia. (Sal 113:5-8) David rekoñese katak buat diʼak naran deʼit neʼebé nia iha mai hotu husi Jeová.—Kompara 1Ko 4:7.
7 Hanesan David, Jeová nia atan sira ohin loron mós koko atu hatudu haraik-an. Maski Jeová mak Maromak neʼebé Aas Liu Hotu, nia haraik-an no neʼe book tebes ita-nia laran. (Sal 18:35) Ita hakarak duni atu halo tuir liafuan tuirmai neʼe: “Tau hahalok domin ho laran-sadiʼa nuʼudar imi-nia hatais hamutuk ho laran-diʼak, haraik-an, laran-maus, no pasiénsia.” (Kol 3:12) Ita mós hatene katak domin “la gaba an, la foti-an”. (1Ko 13:4) Ita-nia haraik-an bele book ema seluk atu buka-hatene kona-ba Jeová. Se feen mak bele dada ninia laʼen neʼebé la adora Jeová liuhusi hahalok diʼak, Jeová nia atan mós bele dada ema ba Maromak liuhusi hahalok haraik-an.—1Pe 3:1.
Keʼe no hetan buat murak husi Bíblia
it-2-E p. 695-696
Profeta
Maski profeta sira simu knaar husi Jeová liuhusi ninia espíritu, maibé neʼe la dehan katak sira sempre fó sai mensajen husi Maromak. Profeta sira fó sai mensajen husi Maromak bainhira Maromak nia espíritu mak “tun” ba sira. (Eze 11:4, 5; Miq 3:8) Maromak nia espíritu mak book sira atu fó sai ninia mensajen. (1Sa 10:10; Jer 20:9; Am 3:8) Kuandu ida-neʼe akontese, profeta sira bele halo buat neʼebé la baibain, no sira-nia dalan atu koʼalia, sira-nia hahalok no sentimentu neʼebé sira fó sai mós haree la hanesan baibain. Karik tan neʼe mak Bíblia esplika kona-ba ema balu neʼebé “hatudu hahalok hanesan profeta”. (1Sa 10:6-11; 19:20-24; Jer 29:24-32; kompara ho Aps 2:4, 12-17; 6:15; 7:55.) Karik sira tau atensaun tomak ba sira-nia knaar no hatudu aten-brani no badinas, halo ema seluk sente katak sira-nia hahalok mak oin-seluk ka la hanesan baibain. Neʼe mak akontese bainhira profeta ida fui mina ba Jeú, xefe tropa sira hanoin katak profeta neʼe bulak. Maibé bainhira xefe sira hatene katak mane neʼe mak profeta ida, sira simu profeta neʼe nia liafuan ho sériu. (2Rs 9:1-13; kompara ho Aps 26:24, 25.) Bainhira Saul duni tuir David no Maromak nia espíritu book Saul atu “hatudu hahalok hanesan profeta”, nia hasai ninia roupa no “latan ho isin-tanan loron tomak no kalan tomak”, neʼe fó tempu ba David atu halai. (1Sa 19:18–20:1) Neʼe la dehan katak profeta sira sempre isin-tanan. Bíblia fó sai situasaun rua tan kona-ba profeta sai isin-tanan atu kumpre objetivu ruma, hodi hatudu buat neʼebé nia sei fó sai iha ninia profesia. (Isa 20:2-4; Miq 1:8-11) Bíblia la fó sai ho klaru tanbasá mak Saul sai isin-tanan, karik neʼe akontese atu hatudu katak Saul mós ema deʼit neʼebé hasai ona ninia roupa liurai nian, no la iha forsa atu kontra hasoru Jeová nia kbiit no podér, ka iha objetivu seluk ruma.
TREINU KONA-BA HAKLAKEN
km-E 1/03 p. 1
Serbisu neʼebé presiza haraik an
1 Maromak nia Liafuan haruka ita atu ‘hatudu haraik an’ no ‘keta selu aat ho aat, maibé koʼalia ho laran-diʼak’. (1Pe 3:8, 9) Konsellu neʼe aplika duni ba serbisu haklaken. Tuir loloos, dala ruma serbisu haklaken koko duni ita-nia haraik an.
2 Haraik an mak hahalok ida neʼebé ajuda ita atu tahan situasaun neʼebé la diʼak. Bainhira haklaken, ita hakbesik ba ema neʼebé ita la koñese maski ema neʼe la konvida ita, no ita hatene katak ema balu sei la hatudu laran-diʼak mai ita. Presiza duni haraik an atu bele kontinua haklaken maski hasoru situasaun hanesan neʼe. Iha área ida, irmán pioneiru naʼin-rua kontinua haklaken husi uma ba uma loron-loron, maibé durante tinan rua, la iha ema ida mak hakarak rona ba sira! Maski nuneʼe irmán sira-neʼe tahan, no agora iha kongregasaun rua iha área neʼe.
3 Hatudu hahalok diʼak ba ema neʼebé trata aat ita: Haraik an sei ajuda ita atu halo tuir Jesus nia ezemplu bainhira ema seluk hatudu hahalok la diʼak no la respeitu ita. (1Pe 2:21-23) Irmán ida hasoru uma-naʼin neʼebé trata aat nia, primeiru husi feen, no tuirmai ninia laʼen duni sai irmán neʼe. Irmán neʼe hatudu oin-midar no hatete katak nia hein atu koʼalia fali ho sira iha tempu seluk. Irmán neʼe nia hahalok book tebes feen-laʼen neʼe, no bainhira Testemuña seluk mak vizita sira, sira rona no simu konvite atu tuir reuniaun. Bainhira sira bá Reuniaun-Fatin, irmán ida primeiru neʼebé sira trata aat fó benvindu ba sira no koʼalia liután ho sira. kuandu ita hatudu “laran-maus no respeitu kleʼan”, neʼe bele book ema neʼebé foufoun lakohi simu atu rona ba lia-loos.—1Pe 3:15; Prv 25:15.
4 Keta foti an: Ita-nia koñesimentu kona-ba Bíblia laʼós razaun ba ita atu hatún ema seluk ka koʼalia aat kona-ba sira. (Jo 7:49) Duké sai hanesan neʼe, Maromak nia Liafuan fó konsellu mai ita atu “la koʼalia aat kona-ba ema ida”. (Tit 3:2) Kuandu ita haraik an hanesan Jesus, ita bele halo ema seluk sente kmaan. (Mt 11:28, 29) Kuandu ita hatudu haraik an, neʼe sei halo ita-nia mensajen sai furak liután.
5 Sin, haraik an ajuda ita atu kontinua haklaken iha área neʼebé susar atu haklaken. Hahalok haraik an bele book ema neʼebé foufoun lakohi simu ita, no dada ema ba mensajen kona-ba Maromak nia Ukun. Importante liu mak, ita sei halo kontente Jeová, neʼebé “hatudu ninia laran-diʼak neʼebé boot ba ema neʼebé haraik an”.—1Pe 5:5.
4-10 ABRÍL
RIKUSOIN HUSI BÍBLIA | 1 SAMUEL 20-22
“Oinsá atu sai belun neʼebé diʼak”
Haburas relasaun diʼak nuʼudar belun agora
18 Ohin loron, ita-nia irmaun-irmán sira hasoru susar oioin. Porezemplu, sira barak hasoru susar tanba dezastre naturais ka funu. Bainhira neʼe akontese, ita balu karik bele simu sira iha ita-nia uma. Ema seluk karik bele fó ajuda osan. Maibé ita hotu bele halo orasaun hodi husu Jeová atu ajuda sira. Bainhira ita hatene katak ita-nia irmaun ka irmán ida laran-kraik, karik ita la hatene atu dehan saida ka halo saida. Maibé ita hotu bele ajuda. Porezemplu, ita bele gasta tempu hamutuk ho irmaun ka irmán neʼe, rona didiʼak bainhira nia koʼalia, no mós fahe eskritura neʼebé ita gosta neʼebé bele fó kmaan ba nia. (Isa 50:4) Buat neʼebé importante liu mak Ita prontu atu ajuda Ita-nia irmaun-irmán bainhira sira presiza.—Lee Provérbios 17:17.
w08-E 2/15 p. 8 par. 7
Laʼo iha Jeová nia dalan
7 Maromak hakarak ita atu sai belun neʼebé bele tau fiar. (Prv 17:17) Liurai Saul nia oan-mane Jonatan sai belun diʼak ho David. Bainhira Jonatan rona katak David oho tiha Golias, “Jonatan no David sai belun diʼak neʼebé laran-metin ba malu, no Jonatan komesa hadomi nia hanesan ninia an rasik”. (1Sa 18:1, 3) Jonatan mós fó avizu ba David bainhira Saul hakarak atu oho David. Depois David halai sees husi Saul, Jonatan bá hasoru David no halo aliansa. Jonatan tau ninia moris iha perigu laran hodi koʼalia ba Saul kona-ba David, maibé Jonatan hasoru fali David no hametin sira-nia relasaun nuʼudar belun. (1Sa 20:24-41) Bainhira David ho Jonatan hasoru malu ba dala ikus, Jonatan ajuda David atu “hametin ninia fiar ba Jeová”.—1Sa 23:16-18.
Nafatin iha relasaun neʼebé diʼak nuʼudar belun
11 Hatudu laran-metin. Salomão hakerek: “Belun neʼebé loos sempre hatudu domin, no nia mak maun neʼebé mosu mai iha tempu susar nia laran.” (Prv 17:17) Kuandu Salomão hakerek liafuan sira-neʼe, karik nia hanoin kona-ba ninia aman David nia relasaun nuʼudar belun ho Jónatas. (1Sa 18:1) Liurai Saul hakarak nia oan Jónatas atu sai nuʼudar liurai ba Izraél. Maibé Jónatas hatene katak Maromak Jeová hili ona David atu sai liurai, no nia simu ida-neʼe. La hanesan Saul, Jónatas la laran-moras ba David. Nia la sai hirus kuandu rona ema gaba David, no nia mós la fiar kedas liafuan aat neʼebé Saul habelar kona-ba David. (1Sa 20:24-34) Ita hanesan Jónatas ka lae? Kuandu ita-nia belun hetan knaar espesiál ruma, ita sai kontente kona-ba neʼe ka lae? Kuandu sira hasoru susar ruma, ita ajuda no fó kmaan ba sira ka lae? Se ita rona ema konta aat kona-ba ita-nia belun, ita fiar kedas ka lae? Ka Ita hanesan Jónatas neʼebé ho laran-metin defende nia belun?
Keʼe no hetan buat murak husi Bíblia
w05-E 3/15 p. 24 par. 4
Pontu importante husi livru 1 Samuel
21:12, 13. Jeová hakarak ita uza ita-nia abilidade atu hanoin hodi bele tahan hasoru situasaun susar oioin iha ita-nia moris. Nia fó ona mai ita ninia Liafuan neʼebé ajuda ita atu haburas matenek, koñesimentu no kbiit atu hanoin. (Prv 1:4) Ita mós bele hetan ajuda husi katuas Kristaun sira.
18-24 ABRÍL
RIKUSOIN HUSI BÍBLIA | 1 SAMUEL 23-24
“Hein ba Jeová ho pasiénsia”
w04-E 4/1 p. 16 par. 8
Tau fiar ba Maromak nia espíritu bainhira hasoru mudansa iha moris
8 David lakohi hakanek Saul. Ho fiar no pasiénsia, nia kontente atu husik problema neʼe ba Jeová nia liman. Bainhira liurai Saul sai husi fatuk-kuak, David hatete ba nia: “Haʼu harohan katak Jeová sei tesi-lia ba Ita no haʼu, no Jeová sei selu fali ba Ita tanba buat neʼebé Ita halo ba haʼu, maibé haʼu rasik sei la foti liman hasoru Ita.” (1Sa 24:12) Maski David hatene katak Saul mak sala, maibé nia la selu fali aat; nia mós la koʼalia aat ba Saul ka kritika kona-ba Saul ba ema seluk. Iha mós situasaun seluk tan neʼebé David la koko atu hadiʼa rasik problema neʼebé kona nia. Duké halo nuneʼe, nia tau fiar ba Jeová atu hadiʼa problema.—1Sa 25:32-34; 26:10, 11.
Husik hahalok atu tahan treinu ita ho didiʼak
15 Espíritu santu leno Tiago hakerek katak: “Se imi-nia hahalok atu tahan treinu imi ho didiʼak, imi bele sai kompletu no sai diʼak iha buat hotu, hodi la kuran buat ida.” (Tgo 1:4) Oinsá mak hahalok atu tahan bele fó treinu ita? Susar no terus neʼebé ita hasoru bele hatudu sai ita-nia fraku no hahalok neʼebé ita presiza atu hadiʼa. Bainhira ita tahan hasoru susar no terus sira-neʼe, ita mós aprende oinsá atu hadiʼa ita-nia hahalok sira, no neʼe bele halo ita sai pasiénsia, hatudu agradese, no iha domin liután.
16 Hahalok atu tahan bele treinu ita sai ema kristaun neʼebé diʼak. Tan neʼe mak bainhira ita hasoru susar no terus ruma, ita lakohi rende an ka halo buat neʼebé kontra Jeová nia ukun-fuan hodi hapara susar no terus sira-neʼe. Porezemplu, se ita mak luta hela hasoru hanoin neʼebé foʼer, halo orasaun ba Jeová atu husu ajuda hodi ita la bele monu ba tentasaun. Se ema ida husi ita-nia família mak kontra ita, keta halo tuir deʼit sira. Kaer metin nafatin ba Jeová hodi adora nia. Halo buat sira-neʼe bele hametin ita-nia fiar ba Jeová. Tenke hanoin-hetan katak: Atu Jeová simu ita, ita tenke tahan.—Rom 5:3-5; Tgo 1:12.
Keʼe no hetan buat murak husi Bíblia
Keta husik buat ida hanetik Ita atu manán kolen iha futuru
11 Se ita mak hakaʼas an atu hatudu domin no laran-diʼak, ita sei la sai laran-moras ba ema. Maromak nia Liafuan dehan: “Domin mak pasiénsia no laran-diʼak. Domin la laran-moras.” (1Ko 13:4) Se ita lakohi atu iha hahalok laran-moras, ita presiza iha hanoin hanesan Jeová nian. Ita presiza haree ita-nia irmaun-irmán nuʼudar parte oioin husi isin-lolon ida deʼit, neʼe mak kongregasaun. Bíblia dehan: “Se parte ida simu glória, parte hotu mós haksolok hamutuk ho nia.” (1Ko 12:16-18, 26) Se ita-nia maluk ida mak simu bensaun ruma, ita haksolok hamutuk ho nia, laʼós laran-moras ba nia. Hanoin kona-ba ezemplu diʼak husi Liurai Saul nia oan Jónatas. Nia la sai laran-moras ba David bainhira David mak hetan knaar atu sai liurai, laʼós nia. Duké sai laran-moras, Jónatas fó fali laran-manas no apoia David. (1Sa 23:16-18) Ita bele sai laran-diʼak no iha domin hanesan Jónatas ka lae?
TREINU KONA-BA HAKLAKEN
Hanoin ema kuandu haklaken
12 Terseiru, hatudu pasiénsia ba ema neʼebé ita hanorin. Hanoin-hetan katak karik sira la hatene kona-ba lia-loos balu husi Bíblia neʼebé ita hatene ho didiʼak. Ema balu gosta tebes buat neʼebé sira fiar. Karik sira sente katak sira-nia relijiaun lori unidade ba sira-nia família, kultura, no komunidade. Oinsá mak ita bele ajuda sira?
13 Hanoin toʼok komparasaun tuirmai: Saida mak akontese se presiza troka ponte neʼebé tuan no ferrujen ona? Dala barak, ema uza nafatin ponte tuan bainhira harii hela ponte foun. Kuandu ponte foun remata ona, ponte tuan sei harahun tiha. Nuneʼe mós, se ita hakarak ema atu husik sira-nia fiar “tuan” neʼebé sira hafolin, ita presiza ajuda sira atu hafolin lia-loos “foun”, katak Bíblia nia hanorin sira neʼebé sira la hatene bainhira ita komesa estuda ho sira. Ho ida-neʼe, sira bele prontu atu husik sira-nia fiar uluk nian. Ita presiza tempu atu ajuda ema halo mudansa.—Rom 12:2.
14 Ita hatudu pasiénsia ba ema iha serbisu haklaken hodi la obriga sira atu komprende ka simu lia-loos husi Bíblia neʼebé sira foin rona. Tanba ita hanoin ema, ita sei uza tempu atu ajuda sira hanoin didiʼak saida mak Bíblia hatete. Porezemplu, hanoin kona-ba oinsá mak ita bele ajuda ema komprende kona-ba esperansa atu moris ba nafatin iha mundu paraízu. Ema barak hatene uitoan ka la hatene buat ida kona-ba esperansa neʼe. Karik sira fiar katak ema mate labele moris fali. Ka karik sira hanoin katak ema diʼak sei bá lalehan. Oinsá mak ita bele ajuda sira?
15 Irmaun ida konta kona-ba dalan diʼak neʼebé nia uza. Primeiru, nia lee Génesis 1:28. Tuirmai, nia husu uma-naʼin kona-ba Maromak hakarak ema atu moris iha neʼebé no iha situasaun saida. Ema barak hatán: “Iha rai, iha situasaun neʼebé diʼak.” Tuirmai, irmaun neʼe lee Isaias 55:11 no husu sira se Maromak nia hakarak troka ona ka lae. Dala barak uma-naʼin hatán lae. Ikusmai, irmaun neʼe lee Salmo 37:10, 11 no husu kona-ba ema nia futuru mak saida. Hodi uza Bíblia iha dalan neʼe, nia ajuda ona ema barak atu komprende katak Maromak hakarak ema diʼak atu moris ba nafatin iha Paraízu.
25 ABRÍL–1 MAIU
RIKUSOIN HUSI BÍBLIA | 1 SAMUEL 25-26
“Ita hanoin uluk antes atu halo buat ruma ka lae?”
Nia hatudu hahalok matenek
10 Oinsá mak David nia soldadu sira haree Nabal nia bibi-atan sira? Maski fasil deʼit ba sira atu naʼok bibi, maibé sira nunka halo ida-neʼe. Sira sai fali fatin protesaun haleʼu Nabal nia bibi-lubun no bibi-atan sira. (Lee 1 Samuel 25:15, 16.) Baibain, bibi no bibi-atan sira hasoru perigu barak. Iha tempu neʼebá iha animál fuik barak, no tanba Izraél nia fronteira iha parte súl la dook, ema naʼok-teen husi rai seluk mai beibeik atu asalta no ataka.
11 Klaru katak la fasil atu hetan hahán ba soldadu hotu iha rai-fuik neʼe. Tan neʼe, loron ida David haruka ema naʼin-10 atu bá hasoru Nabal hodi husu ajuda. Ho matenek David hili tempu neʼebé loos, tempu atu tesi bibi fulun. Baibain iha tempu hanesan neʼe, ema halo festa no hatudu laran-diʼak. David mós hili liafuan sira ho matenek no respeitu atu koʼalia. Nia uza liafuan “Ita-nia oan, David”, karik atu hatudu respeitu ho laran tanba Nabal idade boot liu nia. Saida mak Nabal halo?—1Sa 25:5-8.
12 Nia hirus tebes! Mane joven neʼebé temi iha parágrafu primeiru hatete ba Abigail katak Nabal “hakilar ho hirus ba sira”. Ho lian makaʼas Nabal hatete katak nia lakohi fó ninia paun, bee, no naan husi ninia animál. Nia goza David nuʼudar ema kiʼik no dehan David hanesan atan ida neʼebé halai-sees husi ninia naʼin. Nabal nia hanoin karik hanesan deʼit ho Saul nian, neʼebé odi David. Sira naʼin-rua la iha hanoin hanesan Jeová. Maromak hadomi David no haree nia laʼós nuʼudar atan neʼebé kontradór, maibé nuʼudar ema neʼebé sei sai liurai ba ninia povu Izraél.—1Sa 25:10, 11, 14.
Nia hatudu hahalok matenek
18 Abigail simu responsabilidade ba problema neʼe no nia husu David atu fó perdua ba nia. No nia fó sai katak ninia laʼen la matenek duni, hanesan ninia naran hatudu. Karik nia halo ida-neʼe atu hatudu katak, atu fó kastigu ba ema hanesan neʼe bele hafoʼer deʼit David nia naran. Abigail fó sai katak nia tau fiar ba David nuʼudar reprezentante husi Jeová, no nia rekoñese katak David halaʼo “Jeová nia funu sira”. Nia mós hatudu katak nia hatene Maromak nia promesa ba David no katak nia sei ukun nuʼudar liurai, tanba nia hatete: “Jeová . . . sei fó knaar duni ba Ita-Boot atu sai ukun-naʼin ba Izraél.” Tuirmai, nia husu makaʼas ba David atu la foti desizaun neʼebé bele halo nia hetan sala kona-ba ema nia raan ka ikusmai bele halo “nia laran sidi”, katak halo ninia laran fó-terus ba nia. (Lee 1 Samuel 25:24, 25, 28, 30, 31.) Abigail nia liafuan neʼe book duni David nia laran!
Keʼe no hetan buat murak husi Bíblia
Nia hatudu hahalok matenek
16 Ida-neʼe katak Abigail kontra ninia laʼen nia pozisaun nuʼudar ulun ka lae? Lae duni. La haluha katak Nabal hatudu hahalok aat ba Jeová nia atan ida neʼebé nia hili atu sai liurai, no hahalok neʼe bele halo ema barak iha Nabal nia umakain neʼebé la sala mós mate. Se Abigail la halo buat ruma, karik nia mós bele hola parte iha ninia laʼen nia hahalok aat neʼe. Nuneʼe, Abigail hili atu hakruʼuk ulukliu ba ninia Maromak, duké ba ninia laʼen.