LISAUN 6

Esplika oinsá atu halo tuir eskritura sira

Apóstolu 17:2, 3

SAIDA MAK ITA PRESIZA HALO: La bele lee deʼit eskritura no hakat kedas ba pontu tuirmai. Kuandu lee tiha, diʼak atu hatudu ba rona-naʼin oinsá eskritura neʼe liga ho pontu importante neʼebé ita hanorin.

OINSÁ ATU HALO IDA-NEʼE:

Hili liafuan neʼebé importante. Depois lee tiha eskritura, halo klaru liafuan neʼebé liga ho Ita-nia pontu importante. Karik Ita bele halo ida-neʼe hodi repete liafuan sira ka husu pergunta neʼebé book rona-naʼin atu hanoin kona-ba liafuan neʼebé importante.

Se Ita uza liafuan seluk atu esplika eskritura ida, Ita presiza ajuda rona-naʼin komprende oinsá liafuan sira iha eskritura neʼe liga ho pontu importante.
Énfaze pontu importante. Esplika uluk razaun tansá lee eskritura ida, tuirmai lee eskritura no esplika oinsá liafuan importante husi eskritura neʼe liga no apoia informasaun neʼebé Ita hatoʼo.

Bainhira Ita koʼalia kona-ba eskritura, husik Ita-nia Bíblia loke nafatin. Neʼe ajuda rona-naʼin sira atu liga Ita-nia liafuan ho versíkulu neʼebé Ita foin lee.
Esplika ho simples oinsá atu halo tuir. Keta fó sai informasaun neʼebé ladún liga ho Ita-nia pontu importante. Hanoin kona-ba informasaun neʼebé rona-naʼin sira hatene ona, no deside informasaun hira mak Ita presiza fó sai atu ajuda rona-naʼin komprende no halo tuir.