Informasaun atu uza hamutuk livru Moris Kristaun no Haklaken
© 2022 Christian Congregation of Jehovah’s Witnesses
2-8 JANEIRU
RIKUSOIN HUSI BÍBLIA | 2 REIS 22-23
“Tanbasá presiza haraik an?”
w00-E 9/15 p. 29-30
Jeová kontente ho Josias neʼebé haraik an
1Husi dadeer-saan, ema barak serbisu badinas atu hadiʼa templu. Ita fiar Josias agradese tebes ba Jeová tanba serbisu-naʼin sira-neʼe hadiʼa Maromak nia uma neʼebé ninia jerasaun antes neʼe estraga ona. Nuʼudar serbisu neʼe laʼo ba oin, Safan mai atu fó-hatene buat ruma ba Josias. Maibé kona-ba saida? Safan lori surat-tahan lulun ida! Nia esplika katak Amlulik Boot Hilquias hetan ona “livru Ukun-Fuan neʼebé Jeová fó sai liuhusi Moisés nia liman”. (2Kr 34:12-18, nota) Neʼe mak livru orijinál neʼebé hakerek Ukun-Fuan!
Josias laran-manas atu rona liafuan hotu iha livru neʼe. Bainhira Safan lee, Liurai Josias koko atu komprende oinsá mak ukun-fuan ida-idak bele aplika ba nia no povu. Livru neʼe fokus ba adorasaun neʼebé loos no fó-hatene nanis kona-ba susar no situasaun dadur neʼebé sei mosu se povu halaʼo adorasaun falsu. Liafuan sira-neʼe book tebes Josias nia laran. Nia komprende katak iha duni Maromak nia mandamentu balu neʼebé sira seidauk halo tuir, tan neʼe nia lees ninia roupa no fó orden ba Hilquias, Safan no ema seluk: ‘Husu Jeová kona-ba liafuan husi livru neʼe, tanba Jeová sei fakar sai ninia hirus makaʼas ba ita tanba ita-nia beiʼala sira la halo tuir liafuan iha livru neʼe.’—2Rs 22:11-13; 2Kr 34:19-21.
w00-E 9/15 p. 30 par. 2
Jeová kontente ho Josias neʼebé haraik an
Josias haruka ninia atan sira bá hasoru profeta feto ida naran Hulda iha Jeruzalein no sira fila no hatoʼo fali profeta neʼe nia liafuan. Hulda hatoʼo Jeová nia liafuan katak susar oioin neʼebé temi iha livru neʼe sei kona duni nasaun neʼebé fila kotuk ona. Maibé tanba Josias haraik an iha Maromak Jeová nia oin, susar sira-neʼe sei la akontese iha Josias nia tempu. Josias sei mate ho dame no hakoi iha ninia rate.—2Rs 22:14-20; 2Kr 34:22-28.
Keʼe no hetan buat murak husi Bíblia
w01-E 4/15 p. 26 par. 3-4
Ita bele hetan susesu maski Ita-nia moris iha tempu labarik mak la diʼak
Maski Josias nia moris iha tempu labarik mak la diʼak, maibé nia kontinua halo buat neʼebé diʼak tuir Jeová nia haree. Tanba Josias konsege halaʼo ninia ukun ho susesu, Bíblia dehan: “Antes Josias nia tempu, la iha liurai ida mak hanesan nia neʼebé fila fali ba Jeová ho ninia laran tomak, ninia moris tomak no ninia kbiit tomak, hodi tuir Moisés nia Ukun-Fuan hotu, no depois ninia tempu mós la iha liurai ida hanesan nia.”—2Rs 23:19-25.
Josias nia ezemplu anima tebes ema neʼebé hasoru susar barak bainhira sei kiʼik! Saida mak ita bele aprende husi ninia ezemplu? Saida mak ajuda Josias atu hili no kontinua laʼo tuir dalan neʼebé loos?
9-15 JANEIRU
RIKUSOIN HUSI BÍBLIA | 2 REIS 24-25
“Nafatin matan-moris iha ita-nia tempu”
w01-E 2/15 p. 12 par. 2
Jeová nia loron tesi-lia nian besik ona!
2 Ita fiar katak Sofonias nia profesia ajuda duni joven Josias atu komprende katak nia presiza halakon adorasaun falsu husi nasaun Judá. Maibé maski liurai Josias hakaʼas an mós la konsege halakon buat aat hotu husi povu no kasu ninia avó Liurai Manasés nia sala, neʼebé “halo nakonu Jeruzalein ho ema laran-moos sira-nia raan”. (2Rs 24:3, 4; 2Kr 34:3) Tan neʼe, Jeová nia loron tesi-lia nian tenke akontese.
w07-E 3/15 p. 11 par. 10
Pontu importante husi livru Jeremias
Tinan 607 AEC mak tinan neʼebé liurai Zedequias nia ukun tama ona ba tinan 11. Liurai Nabukodonozór husi Babilónia serku ona sidade Jeruzalein ba fulan 18. Iha loron hitu fulan-lima tinan 19 husi Liurai Nabukodonozór nia ukun ba rai-Babilónia, Nebuzaradan, xefe ba guarda sira, “mai toʼo” Jeruzalein. (2Rs 25:8) Karik husi tropa Babilónia nia kampu militár iha moru Jeruzalein nia liʼur, Nebuzaradan haree didiʼak situasaun no halo planu kona-ba oinsá atu ataka sidade neʼe. Liutiha loron tolu, katak loron 10 iha fulan neʼe, nia “mai toʼo” Jeruzalein no tama ba laran. Tuirmai nia komesa sunu sidade neʼe.—Jer 52:12, 13.
Keʼe no hetan buat murak husi Bíblia
w05-E 8/1 p. 12 par. 1
Pontu importante husi 2 Reis
24:3, 4. Tanba Manasés fakar ona ema barak nia raan, Jeová “lakohi fó perdua” ba nasaun Judá. Maromak hafolin ema laran-moos nia raan. Ita bele fiar metin katak Jeová sei selu fali hodi halakon ema neʼebé fakar ema laran-moos nia raan.—Sal 37:9-11; 145:20.
16-22 JANEIRU
RIKUSOIN HUSI BÍBLIA | 1 KRÓNIKAS 1-3
“Bíblia konta kona-ba faktu, laʼós istória deʼit”
w09-E 9/1 p. 14 par. 1
Adão no Eva—Sira moris duni ka lae?
Porezemplu, hanoin toʼok kona-ba lista jerasaun Judeu nian neʼebé hakerek iha livru Primeiru Krónikas kapítulu 1 toʼo 9 no Evanjellu Lucas kapítulu 3. Lista iha Krónikas fó sai ho loloos jerasaun 48 no Lucas fó sai jerasaun 75. Lucas nia lista mak jerasaun neʼebé toʼo ba Jesus Kristu, no Krónikas fó sai jerasaun liurai nian no amlulik nian husi nasaun Izraél. Lista sira-neʼe hotu inklui naran neʼebé ema barak hatene, hanesan Salomão, David, Jacob, Isaac, Abraão, Noé, no Adão. Naran sira-neʼe hotu neʼebé temi iha lista neʼe mak ema neʼebé moris duni, no Adão mak ema primeiru iha lista rua neʼe.
w08-E 6/1 p. 3 par. 4
Noé no Rai-Nabeen—Faktu, laʼós inventa deʼit
Lista jerasaun rua iha Bíblia prova katak Noé mak ema neʼebé moris duni iha tempu uluk. (1Kr 1:4; Lc 3:36) Ezra no Lucas mak fó sai lista jerasaun rua neʼe, no sira estuda didiʼak atu fó sai jerasaun ho loloos. Lucas fó sai Jesus Kristu nia beiʼala sira toʼo Noé.
w09-E 9/1 p. 14-15
Adão no Eva—Sira moris duni ka lae?
Porezemplu, hanoin toʼok kona-ba Bíblia nia hanorin ida neʼebé ema barak gosta. Neʼe mak kona-ba Jesus nia sakrifísiu. Bíblia hanorin katak, Jesus Kristu fó ninia moris nuʼudar ema perfeitu atu salva ema hodi kasu sira-nia sala. (Mt 20:28; Jo 3:16) Hanesan ita hatene, sakrifísiu neʼe mak atu salva ka selu ba buat neʼebé lakon ona. Tan neʼe mak Bíblia dehan katak Jesus nia sakrifísiu mak “folin neʼebé hanesan atu sosa fali ema hotu”. (1Ti 2:6) Folin hanesan ho saida? Bíblia fó resposta: “Ema hotu mate tanba Adão, nuneʼe mós ema hotu sei hetan moris tanba Kristu.” (1Ko 15:22) Moris perfeitu neʼebé Jesus fó nuʼudar sakrifísiu atu sosa fali ema mak folin hanesan ho moris perfeitu neʼebé Adão halakon tanba halo sala iha Eden. (Rom 5:12) Klaru, se karik Adão la moris, Kristu nia sakrifísiu saugati deʼit.
Keʼe no hetan buat murak husi Bíblia
it-1-E p. 911 par. 3-4
Jenealojia
Feto nia naran. Bíblia mós dala ruma temi feto nia naran bainhira iha razaun diʼak atu halo ida-neʼe. Iha Génesis 11:29, 30 temi Sarai (Sara) nia naran, tanba Bei-oan neʼebé promete nanis sei moris liuhusi nia, laʼós liuhusi Abraão nia feen ida seluk. Bíblia mós temi Milca nia naran, tanba nia mak Isaac nia feen Rebeca nia avó-feto, neʼe hatudu katak Rebeca mai husi Abraão nia família, tanba Isaac labele kaben ho feto husi nasaun seluk. (Gén 22:20-23; 24:2-4) Génesis 25:1 mós temi Ketura, neʼebé ikusmai sai Abraão nia feen. Neʼe hatudu katak depois Sara mate, Abraão kaben fali, no hatudu mós katak depois Abraão ho Sara iha oan liuhusi milagre husi Jeová, Abraão nafatin iha kbiit atu iha oan. (Rom 4:19; Gén 24:67; 25:20) Neʼe mós fó sai relasaun entre ema Izraél ho ema Midian no ema Arabi nia suku seluk.
Bíblia mós temi Lea, Raquel, no Jacob nia feen kiʼik sira, no mós sira-nia oan-mane nia naran. (Gén 35:21-26) Neʼe ajuda ita atu komprende oinsá mak Maromak trata oan-mane sira-neʼe. Ho razaun neʼebé atu hanesan, ita bele hetan feto sira seluk nia naran iha lista jerasaun nian. Ema neʼebé hetan liman-rohan mós inklui iha lista neʼe. (Núm 26:33) Bíblia mós temi kona-ba Tamar, Raab, no Rute tanba sira halo buat espesiál neʼebé halo sira sai beiʼala ba Mesias, ka Jesus Kristu. (Gén 38; Rut 1:3-5; 4:13-15; Mt 1:1-5) Ita mós bele hetan feto seluk nia naran iha lista jerasaun iha 1 Krónikas 2:35, 48, 49; 3:1-3, 5.
23-29 JANEIRU
RIKUSOIN HUSI BÍBLIA | 1 KRÓNIKAS 4-6
“Haʼu-nia orasaun hatudu saida kona-ba haʼu?”
Maromak neʼebé “rona orasaun”
Jabez iha toman atu halo orasaun ho laran. Nia komesa ninia orasaun hodi husu Maromak nia bensaun. Nia husu kona-ba buat tolu, no ida-neʼe hatudu katak nia ema neʼebé fiar metin ba Maromak.
Primeiru, Jabez husu ba Maromak: “Haluan haʼu-nia rai.” (Versíkulu 10) Jabez mak ema naran-boot neʼebé ema barak respeitu, nia laʼós ema kaan-teen neʼebé hakarak hadau ema seluk nia rai. Karik nia husu nuneʼe tanba nia hanoin, laʼós kona-ba rai, maibé kona-ba ema. Karik nia hakarak atu haluan ninia rai hodi nia bele ajuda ema barak neʼebé hela iha rai neʼe atu hatene no adora Maromak neʼebé loos.
Segundu, Jabez husu Maromak nia “liman” atu hamutuk ho nia. Maromak nia liman reprezenta Maromak nia forsa neʼebé nia uza atu ajuda ninia atan sira. (1Kr 29:12) Atu ninia hakarak sai loos, Jabez sadere ba Maromak neʼebé prontu atu lolo nia liman ba ema neʼebé tau fiar iha nia.—Isa 59:1.
Terseiru, Jabez husu: “Proteje haʼu husi dezastre, atu ida-neʼe labele hakanek haʼu.” Liafuan “atu ida-neʼe labele hakanek haʼu” karik hatudu katak Jabez husu Maromak laʼós atu dezastre labele kona nia, maibé atu ajuda nia labele sai triste demais ka labele husik buat aat neʼe halakon ninia fiar.
Jabez nia orasaun hatudu katak nia hanoin tebes kona-ba adorasaun neʼebé loos no hatudu mós katak nia tau fiar metin ba Maromak neʼebé rona orasaun. Oinsá mak Maromak Jeová hatán ba ninia orasaun neʼe? Istória badak kona-ba Jabez ramata ho liafuan tuirmai neʼe: “Maromak halo buat neʼebé nia husu.”
Keʼe no hetan buat murak husi Bíblia
w05-E 10/1 p. 9 par. 7
Pontu importante husi livru 1 Krónikas
5:10, 18-22. Iha Liurai Saul nia tempu, suku sira iha Mota Jordaun nia parte leste manán ema Agar maski ema Agar mak barak liu dala rua se kompara ho ema husi suku sira-neʼe. Ida-neʼe akontese tanba funu-naʼin kbiit boot sira husi suku sira-neʼe tau fiar ba Jeová no husu ninia ajuda. Mai ita tau fiar tomak ba Jeová bainhira ita halaʼo ita-nia funu espirituál nian hodi kontra hasoru buat oioin neʼebé forsa boot.—Éf 6:10-17.
30 JANEIRU–5 FEVEREIRU
RIKUSOIN HUSI BÍBLIA | 1 KRÓNIKAS 7-9
“Ita bele kumpre knaar neʼebé susar ho Jeová nia ajuda”
w05-E 10/1 p. 9 par. 8
Pontu importante husi livru 1 Krónikas
9:26, 27. Ema Levi sira neʼebé hein portaun kaer knaar importante neʼebé ema seluk presiza tau fiar. Sira kaer xave atu loke odamatan ba área santu iha templu. Sira prova katak ema seluk bele tau fiar ba sira atu loke odamatan loroloron. Ita mós simu responsabilidade atu buka ema iha ita-nia territóriu no ajuda sira atu adora Jeová. Ita mós presiza sai ema neʼebé bele tau fiar hanesan ema Levi sira neʼebé hein portaun, loos ka lae?
Ita hatudu hahalok hanesan Finéas ka lae?
Iha tempu Israel antigu, Finéas kaer responsabilidade neʼebé todan, maibé ho aten-brani, matenek, no hodi tau fiar ba Maromak, nia bele hasoru problema oioin ho susesu. Tanba Finéas mós hakaʼas an atu tau matan didiʼak ba Maromak nia povu, nia monu loos ba Jeová nia laran. Liutiha maizumenus tinan 1.000, Jeová leno Esdras atu hakerek: “Finéas, Eleazar nia oan-mane, mak sai sira-nia ulun-naʼin iha tempu uluk. Jeová hamutuk ho nia.” (1Kr 9:20) Sin, ita fiar katak Jeová mós hamutuk ho katuas sira neʼebé tau matan ba ninia povu ohin loron, no mós hamutuk ho ema kristaun hotu neʼebé serbí nia ho laran-metin.
Keʼe no hetan buat murak husi Bíblia
Kanta ba Maromak Jeová!
6 Sin, liuhusi profeta sira Maromak Jeová haruka ninia povu atu hahiʼi nia ho knananuk sira. Tuir loloos ema levita sira neʼebé iha knaar atu kanta la presiza halo knaar sira neʼebé ema levita seluk tenkesér halo. Hodi nuneʼe sira bele uza tempu barak liu atu halo múzika no mós karik atu prátika.—1Kr 9:33.
TREINU KONA-BA HAKLAKEN
Ajuda estudante Bíblia hetan batizmu
3 Antes estudante Bíblia ida hetan batizmu, nia presiza aplika Bíblia nia hanorin. (Lee Mateus 28:19, 20.) Bainhira nia halo nuneʼe, nia sei sai hanesan “ema matenek” iha Jesus nia ai-knanoik neʼebé keʼe kleʼan rai atu harii ninia uma iha fatuk nia leten. (Mt 7:24, 25; Lc 6:47, 48) Oinsá ita bele ajuda estudante ida atu aplika buat neʼebé nia aprende? Mai ita haree sujestaun tolu.
4 Ajuda estudante Bíblia atu halo planu. Tanbasá? Hanoin toʼok ai-knanoik neʼe. Se Ita halo viajen ba fatin dook, karik Ita deside atu para tuituir dalan iha fatin neʼebé furak. Hodi halo nuneʼe, Ita sei la lakon Ita-nia ksolok tanba hanoin katak fatin neʼebé Ita atu bá mak dook tebes. Nuneʼe mós kuandu Ita-nia estudante halo planu kiʼik oioin no kumpre ida-neʼe, nia sei haree katak nia bele duni kumpre planu atu hetan batizmu. Ita bele uza kaixa iha livru Moris Haksolok ba Nafatin ho títulu “Planu” atu ajuda estudante Bíblia laʼo ba oin. Bainhira Ita remata lisaun ida-idak, koʼalia kona-ba oinsá planu neʼe bele ajuda nia atu aplika buat neʼebé nia aprende. Se Ita hakarak nia kumpre planu seluk, diʼak atu nia hakerek ida-neʼe iha parte ho títulu “Planu seluk”. Uza beibeik kaixa neʼe atu koʼalia hamutuk ho estudante kona-ba planu neʼebé nia bele kumpre iha tempu badak no iha futuru.
5 Ajuda estudante Bíblia atu halo mudansa boot. (Lee Marcos 10:17-22.) Jesus hatene katak susar ba mane riku ida atu faʼan ninia sasán hotu. (Mc 10:23) Maski nuneʼe, Jesus haruka nia atu halo mudansa boot iha ninia moris. Tanbasá? Tanba Jesus hadomi nia. Dala ruma ita dada an atu anima estudante Bíblia atu aplika buat neʼebé nia aprende tanba ita sente katak nia seidauk prontu atu halo mudansa. Dala ruma presiza tempu ba ema ida atu hasai hahalok tuan no tau fali hahalok foun. (Kol 3:9, 10) Se Ita la demora atu koʼalia ba estudante Bíblia kona-ba mudansa neʼebé nia presiza halo, neʼe sei ajuda nia atu halo mudansa sedu. Neʼe hatudu katak Ita hadomi nia.—Sal 141:5; Prv 27:17.
6 Importante atu husu estudante nia hanoin kona-ba tópiku ruma. Neʼe sei ajuda Ita hatene buat neʼebé estudante komprende no fiar. Se Ita halo ida-neʼe beibeik, fasil liu ba Ita atu koʼalia ba nia iha futuru kona-ba tópiku neʼebé susar. Iha livru Moris Haksolok ba Nafatin, iha pergunta barak neʼebé ajuda estudante atu fó sai ninia hanoin. Porezemplu, pergunta ida iha lisaun 04 hatete: “Tuir Ita-nia hanoin, Jeová sente oinsá bainhira Ita uza ninia naran?” Pergunta ida iha lisaun 09 hatete: “Ita hakarak halo orasaun kona-ba saida deʼit?” Karik foufoun Ita-nia estudante presiza tempu atu hanoin kona-ba oinsá atu hatán ba pergunta sira-neʼe. Ita bele ajuda nia liuhusi treinu nia atu hanoin kona-ba eskritura no mós dezeñu sira iha livru neʼe.
7 Bainhira Ita-nia estudante komprende ona saida mak nia presiza halo, Ita bele konta ema nia esperiénsia ba nia hodi bele anima nia atu aplika ida-neʼe. Porezemplu, se nia la tuir reuniaun beibeik, Ita bele hatudu ba nia vídeo iha lisaun 14 ho títulu Jeová tau matan mai haʼu neʼebé fó sai iha parte “Buka-hatene liután”. Ita bele hetan esperiénsia hanesan neʼe iha parte “Keʼe kleʼan” ka “Buka-hatene liután” iha livru Moris Haksolok ba Nafatin. Kuidadu atu la kompara Ita-nia estudante ho ema seluk, hodi hatete: “Se nia bele, ó mós bele.” Ajuda nia atu rekoñese rasik katak nia bele halo mudansa. Duké kompara nia ho ema seluk, koʼalia kona-ba buat neʼebé ajuda ema iha esperiénsia neʼe atu aplika Bíblia nia hanorin. Karik Ita bele temi eskritura importante ka buat espesífiku neʼebé ema neʼe halo. Se bele, tau fokus ba oinsá Jeová ajuda ema neʼe.
8 Ajuda estudante Bíblia atu hadomi Jeová. Oinsá? Buka oportunidade atu ajuda nia aprende liután kona-ba Jeová nia hahalok sira. Ajuda nia atu haree Jeová nuʼudar Maromak neʼebé apoia ninia atan sira neʼebé hadomi nia no Maromak neʼebé kontente. (1Ti 1:11; Ebr 11:6) Hatudu ba nia oinsá nia bele hetan benefísiu hodi aplika informasaun, no esplika oinsá ida-neʼe hatudu katak Jeová hadomi nia. (Isa 48:17, 18) Bainhira nia hametin liután ninia domin ba Jeová, neʼe sei book nia atu halo mudansa.—1Jo 5:3.
6-12 FEVEREIRU
RIKUSOIN HUSI BÍBLIA | 1 KRÓNIKAS 10-12
“Hametin Ita-nia hakarak atu halo tuir Jeová nia hakarak”
“Hanorin haʼu atu halo Ita-nia hakarak”
12 Ita mós bele aprende buat seluk tan husi David nia ezemplu. Husi Maromak nia ukun-fuan sira, David komprende Jeová nia hanoin iha situasaun oioin hodi bele halo desizaun neʼebé diʼak. Porezemplu, loron ida, David hatete katak nia hakarak hemu bee husi “bee-posu iha Belém”. David nia soldadu naʼin-tolu hakaʼas an hodi tama iha sidade Belém neʼebé ema Filístia mak okupa, no sira lori fali bee ba David. Maski nuneʼe, “David lakohi hemu bee neʼe, maibé fakar ba rai hodi fó fali ba Jeová”. Tanbasá? David hatete: “Ba haʼu, kuandu haʼu hanoin kona-ba haʼu-nia Maromak, haʼu labele halo ida-neʼe! Haʼu sei hemu raan husi ema sira-neʼe neʼebé tau sira-nia an iha perigu ka lae? Tanba hodi tau sira-nia moris iha perigu mak sira lori ida-neʼe.”—1Kr 11:15-19.
13 David hatene katak Ukun-Fuan bandu atu labele han raan no haruka atu fakar raan ba rai hodi fó fali ba Jeová. David mós hatene tanbasá mak nia tenke halo tuir ukun-fuan neʼe. Nia hatene katak “raan mak reprezenta kriatura nia moris”. Maibé, buat neʼebé soldadu sira lori mak bee, laʼós raan. Se nuneʼe, tanbasá mak David lakohi hemu bee neʼe? Tanba husi Maromak nia ukun-fuan kona-ba raan David komprende Maromak nia hanoin. Nia hatene katak Jeová haree raan nuʼudar buat neʼebé iha folin boot. No tanba soldadu sira tau sira-nia moris iha perigu laran atu lori bee, David sente katak bee neʼe folin boot hanesan sira-nia raan. Tan neʼe, duké hemu bee neʼe, David halo desizaun atu fakar fali ba rai.—Lev 17:11; Deu 12:23, 24.
Husik Maromak nia ukun-fuan no prinsípiu sira treinu Ita-nia konxiénsia
5 Atu Jeová nia ukun-fuan sira bele ajuda ita, la toʼo atu lee ka hatene deʼit ukun-fuan sira-neʼe. Ita presiza hadomi no respeitu ukun-fuan sira-neʼe. Bíblia hatete: “Odi buat neʼebé aat, no hadomi buat neʼebé diʼak.” (Am 5:15) Maibé oinsá mak ita bele halo ida-neʼe? Xave mak, ita presiza aprende oinsá atu haree buat hotu tuir Jeová nia haree. Porezemplu, hanoin toʼok, ba semana balu ona, ita la bele dukur iha kalan. Doutór haruka ita atu han hahán neʼebé diʼak, ezersísiu liután, no halo mudansa seluk tan iha ita-nia moris. Ita halo tuir ninia konsellu neʼe, no lakleur, ita haree rezultadu neʼebé diʼak. Ita sei sente agradese tebes ba doutór tanba hodi halo tuir ninia matadalan, ita sente diʼak liután iha ita-nia moris.
6 Hanesan neʼe mós, ita-nia Kriadór fó mai ita ukun-fuan sira atu proteje ita husi konsekuénsia aat tanba sala, no atu ita bele iha moris neʼebé diʼak. Porezemplu, Bíblia hanorin katak ita labele bosok, naʼok, halo sala seksuál, halo violénsia no espiritizmu. (Lee Provérbios 6:16-19; Apk 21:8) Bainhira ita haree rasik benefísiu husi halo tuir Jeová, ita sei hadomi liután nia no ninia ukun-fuan sira.
Keʼe no hetan buat murak husi Bíblia
it-1-E p. 1058 par. 5-6
Laran
Serbí ho “laran tomak”. Laran bele fahe ba rua. David halo orasaun: “Halo haʼu labele laran-rua hodi hamtaʼuk Ita-nia naran”, neʼe hatudu katak ema nia laran bele fahe ba rua kona-ba ninia domin no taʼuk. (Sal 86:11, nota) Ema hanesan neʼe karik “la fó laran tomak” atu adora Maromak, hanesan ema neʼebé morna deʼit. (Sal 119:113; Apk 3:16) Ema mós bele “laran-rua” hodi koko atu serbí patraun rua, ka koʼalia buat ida maibé hanoin buat seluk. (1Kr 12:33; Sal 12:2, nota) Jesus kontra duni hahalok laran-rua no laran-makerek hanesan neʼe.—Mt 15:7, 8.
Ema neʼebé hakarak halo Maromak kontente labele laran-rua, maibé tenke serbí nia ho laran tomak. (1Kr 28:9) Ita presiza duni hakaʼas an tanba laran mak buat neʼebé perigozu no lalais atu hanoin buat aat. (Jer 17:9, 10; Gén 8:21) Buat neʼebé ajuda ita atu mantein laran tomak mak: orasaun ho laran (Sal 119:145; Lam 3:41), estuda beibeik Maromak nia Liafuan (Ezr 7:10; Prv 15:28), sai badinas atu hola parte iha serbisu haklaken kona-ba liafuan diʼak (kompara Jer 20:9), no ransu ho ema neʼebé fó laran tomak ba Jeová.—Kompara 2Rs 10:15, 16.
13-19 FEVEREIRU
RIKUSOIN HUSI BÍBLIA | 1 KRÓNIKAS 13-16
“Halo tuir matadalan lori susesu”
w03-E 5/1 p. 10-11 par. 12
Ita husu ka lae pergunta, “Maromak iha neʼebé?”
12 Depois lori fila Arka Aliansa ba Izraél no rai durante tinan barak iha Kiriat-Jearim, Liurai David hakarak muda Arka neʼe ba Jeruzalein. Nia koʼalia hamutuk ho povu nia xefe sira no dehan katak Arka neʼe sei muda ‘se sira simu ninia ideia no Jeová mós simu ideia neʼe’. Maibé David la buka-hatene didiʼak Jeová nia hakarak. Se karik nia halo ida-neʼe, Arka neʼe sei la tula iha kuda-karreta, maibé ema Levi neʼebé husi jerasaun Kohat mak sei hulan deʼit tuir matadalan klaru neʼebé Maromak fó sai ona. Maski David sempre husu matadalan husi Jeová, maibé iha situasaun neʼe nia la halo ida-neʼe ho didiʼak. Rezultadu mak susar boot. Ikusmai David rekoñese ida-neʼe hodi dehan: “Jeová, ita-nia Maromak, sai hirus tebes hasoru ita, tanba ita la buka-hatene matadalan kona-ba oinsá atu lori Arka neʼe.”—1Kr 13:1-3; 15:11-13; Núm 4:4-6, 15; 7:1-9.
w03-E 5/1 p. 11 par. 13
Ita husu ka lae pergunta, “Maromak iha neʼebé?”
13 Bainhira ema Levi lori Arka neʼe husi Obed-Edom nia uma ba Jeruzalein, sira kanta knananuk ida neʼebé David mak hakerek. Knananuk neʼe inklui avizu neʼebé fó sai ho sentimentu kleʼan: “Buka Jeová no husu nia atu fó kbiit. Buka nia beibeik. Hanoin-hetan hahalok furak sira neʼebé nia halo ona, ninia milagre no desizaun sira neʼebé nia fó sai ona.”—1Kr 16:11, 12.
Keʼe no hetan buat murak husi Bíblia
Adora Jeová, Liurai rohan-laek
14 David lori arka aliansa nian ba Jerusalém. Iha tempu haksolok neʼe, ema levita sira kanta knananuk atu hahiʼi Jeová. Knananuk neʼe inklui liafuan furak neʼebé hakerek iha 1 Krónikas 16:31, hodi dehan: “Fó sai iha nasaun sira-nia leet bá: ‘Jeová mak sai ona Liurai!’” Karik ita hanoin: ‘Jeová mak Liurai husi ulukliu kedas! Entaun, oinsá mak nia bele sai Liurai iha tempu neʼebá?’ Tuir loloos, Jeová sai Liurai kuandu nia hatudu sai ninia kbiit nuʼudar Ukun-Naʼin ka kuandu nia foti ema ruma atu reprezenta nia. Antes David mate, Jeová promete ba nia katak ninia ukun sei hela ba nafatin, hodi dehan: “Haʼu sei foti ó-nia bei-oan depois ó, ó-nia oan rasik, no haʼu sei hametin ninia ukun.” (2Sa 7:12, 13) Promesa neʼe sai loos liutiha tinan 1.000, bainhira David nia “bei-oan” ida mosu. Entaun, sé mak ema neʼe? Bainhira loos mak nia sai Liurai?
TREINU KONA-BA HAKLAKEN
Husik Maromak nia “prezente boot liu” book ita
7 Primeiru, domin tenkesér book ita atu moris tuir Jesus Kristu. Hodi nuneʼe mak apóstolu Paulo hatete katak: “Kristu nia domin book ami makaʼas.” (Lee 2 Korinto 5:14, 15.) Paulo rekoñese katak se ita simu Kristu nia domin, domin neʼe sei book ita atu hadomi no hatudu respeitu ba Jesus. Loos duni, bainhira ita komprende didiʼak saida mak Jeová halo ona mai ita, ninia domin neʼe sei book ita atu fó ita-nia laran tomak atu moris tuir Jesus Kristu. Oinsá mak ita bele halo nuneʼe?
8 Domin ba Jeová mak book ita atu banati-tuir Jesus nia ezemplu, no laʼo tuir ninia ain-fatin ho didiʼak. (1Pe 2:21; 1Jo 2:6) Bainhira ita halo tuir Jeová no Jesus, ita hatudu katak ita mós hadomi sira. Tan neʼe mak Jesus hatete: “Ema neʼebé hatene haʼu-nia ukun-fuan no halo tuir sira, ema neʼe mak hadomi haʼu. No ema neʼebé hadomi haʼu, haʼu-nia Aman mós sei hadomi nia, no haʼu sei hadomi nia, no haʼu sei halo nia hatene didiʼak kona-ba haʼu.”—Jo 14:21; 1Jo 5:3.
9 Iha tempu Memoriál, diʼak atu haree didiʼak fali ba dalan neʼebé ita halaʼo ita-nia moris. Husu ba ita-nia an: ‘Iha dalan saida mak haʼu halo tuir ona Jesus? Haʼu bele halo tan mudansa saida ba haʼu-nia moris?’ Diʼak atu husu beibeik hanesan neʼe ba ita-nia an tanba mundu neʼe sempre lori tentasaun ba ita-nia moris. (Rom 12:2) Se ita la kuidadu, karik ita mós bele moris tuir ema neʼebé hanorin filozofia, artista, ka desportu-naʼin sira-nia moris. (Kol 2:8; 1Jo 2:15-17) Oinsá mak ita bele kontra hasoru tentasaun sira-neʼe?
10 Ita bele uza tempu Memoriál neʼe atu haree didiʼak toʼok ita-nia almari laran, filme ka múzika sira neʼebé ita iha, no karik programa sira neʼebé ita hatama iha komputadór, telemovel, no tablet sira. Bainhira ita loke ita-nia almari, husu ba ita-nia an: ‘Se haʼu mak hatais roupa neʼe atu bá fatin neʼebé Jesus mós atu bá, haʼu sei sente an ka lae atu hatais roupa neʼe iha Jesus nia oin?’ (Lee 1 Timóteo 2:9, 10.) ‘Se haʼu mak hatais roupa neʼe, neʼe bele halo ema seluk koñese kedas katak haʼu mak ema kristaun ida ka lae?’ Ita mós bele husu pergunta hanesan neʼe kona-ba filme ka múzika neʼebé ita iha. Porezemplu, ‘Jesus gosta haree filme ka rona ba múzika hanesan neʼe ka lae? Se nia mak empresta haʼu-nia telemovel ka tablet, haʼu sei sente moe ka lae se nia haree ba programa ka foto balu neʼebé haʼu hatama iha laran?’ Kona-ba vídeo game, husu ba ita-nia an: ‘Haʼu sente susar ka lae, atu esplika ba Jesus tanbasá haʼu gosta halimar game balu?’ Domin ba Jeová tenkesér book ita atu soe hotu buat neʼebé mak ladiʼak ba ema kristaun, maski karun mós ita tenke soe. (Aps 19:19, 20) Iha tempu neʼebé ita halo ita-nia dedikasaun, ita promete katak ita sei la moris tuir tan ita rasik nia hakarak, maibé moris deʼit ba Jesus. Tan neʼe ita lakohi atu kaer metin ba buat sira neʼebé mak bele hanetik ita atu laʼo tuir Jesus nia ain-fatin ho didiʼak.—Mt 5:29, 30; Flp 4:8.
20-26 FEVEREIRU
RIKUSOIN HUSI BÍBLIA | 1 KRÓNIKAS 17-19
“Kontinua haksolok maski sente laran-kraik”
w06-E 7/15 p. 19 par. 1
Fokus ba buat diʼak sira iha Jeová nia organizasaun
DAVID husi Izraél tempu antigu mak ema ida neʼebé ninia naran sempre temi iha Eskritura Lian Ebraiku. Nuʼudar bibi-atan, kantadór, profeta, no mós liurai, nia sadere tomak ba Maromak Jeová. David iha relasaun neʼebé metin ho Jeová, no neʼe halo nia hakarak atu harii uma ka templu ba Maromak. Templu neʼe sei uza nuʼudar fatin sentru ba adorasaun loos iha Izraél. David hatene katak arranju hotu kona-ba templu neʼe sei lori ksolok no bensaun ba Maromak nia povu. Tan neʼe David kanta: “Ksolok ba ema neʼebé Ita [Jeová] hili no lori besik Ita hodi hela iha Ita-nia pátiu sira. Ami sei haksolok ho buat diʼak sira husi Ita-nia uma, Ita-nia templu.”—Sal 65:4.
Haksolok ho knaar neʼebé ita iha
11 Ita mós sei sente haksolok liután se ita hakaʼas an atu halo didiʼak knaar hotu neʼebé ita simu. Ita mós bele hakaʼas an liután iha serbisu haklaken no iha kongregasaun. (Aps 18:5; Ebr 10:24, 25) Prepara didiʼak ba reuniaun sira atu nuneʼe Ita bele fó komentáriu neʼebé anima ema seluk. Se Ita simu knaar iha reuniaun loron baileet, haree ida-neʼe nuʼudar buat neʼebé importante. Se katuas sira husu Ita atu halo knaar ruma, halo ida-neʼe ho didiʼak no tuir oras. Keta hanoin katak knaar neʼe la importante. No hakaʼas an atu aumenta Ita-nia matenek kona-ba knaar neʼe. (Prv 22:29) Bainhira Ita serbí Jeová ho badinas, Ita-nia relasaun ho nia sai diʼak liután, no Ita sei haksolok liután. (Gal 6:4) Neʼe mós sei ajuda Ita atu sente kontente bainhira ema seluk hetan responsabilidade neʼebé Ita hakarak.—Rom 12:15; Gal 5:26.
Keʼe no hetan buat murak husi Bíblia
w20.02 p. 12, kaixa
Ita hadomi tebes ita-nia Aman Jeová
Jeová haree haʼu ka lae?
Ita husu ona ba Ita-nia an: ‘Husi ema millaun ba millaun iha rai neʼe, tanbasá Jeová tau atensaun ba haʼu?’ Iha ema laran-diʼak barak neʼebé husu pergunta neʼe. Liurai David hakerek: “Oh Jeová, ema iha folin saida hodi Ita haree ba nia? Ema iha folin saida hodi Ita tau atensaun ba nia?” (Sal 144:3) David iha konfiansa katak Jeová hatene didiʼak nia. (1Kr 17:16-18) Liuhusi Jeová nia Liafuan no ninia organizasaun, nia fó konfiansa mai Ita katak nia haree domin neʼebé Ita hatudu ba nia. Haree toʼok liafuan balu iha Bíblia neʼebé bele ajuda Ita atu iha konfiansa kona-ba neʼe:
• Jeová haree ona Ita antes Ita moris mai.—Sal 139:16.
• Jeová hatene Ita-nia hanoin no sentimentu.—1Kr 28:9.
• Jeová rasik mak rona ba Ita-nia orasaun hotu.—Sal 65:2.
• Ita-nia hahalok kona Jeová nia sentimentu.—Prv 27:11.
• Jeová mak dada Ita ba nia.—Jo 6:44.
• Se Ita mate, Jeová hatene didiʼak Ita no nia sei fó moris-hiʼas ba Ita. Nia sei kria fali Ita-nia isin no tau fali Ita-nia hanoin hamutuk ho Ita-nia memória no jeitu neʼebé hanesan.—Jo 11:21-26, 39-44; Aps 24:15.
27 FEVEREIRU–5 MARSU
RIKUSOIN HUSI BÍBLIA | 1 KRÓNIKAS 20-22
“Ajuda joven sira atu hetan susesu”
“Fó sai buat sira-neʼe ba ema neʼebé laran-metin”
8 Lee 1 Krónikas 22:5. Karik David bele hanoin katak Salomão seidauk prontu atu halaʼo projetu importante hanesan neʼe. Templu neʼebé nia atu harii mak “boot tebetebes” no Salomão sei “joven no seidauk iha matenek”. Maibé David hatene katak Jeová sei ajuda Salomão atu halo serbisu espesiál neʼe. Tan neʼe David hakaʼas an hodi ajuda Salomão hodi halo preparasaun ba projetu boot neʼe.
“Fó sai buat sira-neʼe ba ema neʼebé laran-metin”
7 Karik David sente laran-tun uitoan tanba nia hakarak tebes atu harii templu ida ba Jeová. Maski nuneʼe nia fó nafatin ninia apoiu ba ninia oan Salomão atu halaʼo projetu neʼe. David ajuda hodi arranja serbisu-naʼin no halibur besi, riti, osan-mutin, osan-mean, no ai sira. Ikusmai ema hotu bolu templu neʼe nuʼudar Salomão nia templu, maibé David la hanoin kona-ba sé mak atu sai naran boot hodi harii templu neʼe. Nia fó laran-manas ba Salomão hodi dehan: “Haʼu-nia oan, husik Jeová hamutuk ho ó, no husik buat neʼebé ó halo iha susesu no harii uma neʼe ba Jeová ó-nia Maromak, tuir buat neʼebé nia koʼalia ona kona-ba ó.”—1Kr 22:11, 14-16.
Inan-aman sira, imi ajuda daudauk oan atu hetan batizmu ka lae?
14 Katuas kongregasaun sira bele apoia inan-aman liuhusi koʼalia pozitivu kona-ba halo planu espirituál. Irmán ida sei hanoin-hetan irmaun Charles T. Russell koʼalia ba nia bainhira nia foin tinan neen. Nia dehan, “Irmaun Russell uza minutu 15 hodi koʼalia ba haʼu kona-ba planu espirituál.” Neʼe lori rezultadu saida? Ikusmai irmán neʼe foti pioneiru no serbí ba tinan 70 liu nuʼudar pioneiru! Sin, liafuan neʼebé pozitivu no fó anima bele lori impaktu ba ema nia moris tomak. (Prv 25:11) Katuas kongregasaun sira mós bele konvida inan-aman ho sira-nia oan atu ajuda ho projetu ruma iha Reuniaun-Fatin. Sira bele fó knaar ba labarik sira atu halo, tuir sira-nia tinan no abilidade.
15 Oinsá mak ema seluk iha kongregasaun bele ajuda? Ita bele fó atensaun ba oan sira-neʼe. Haree didiʼak ba labarik sira neʼebé hatudu lalaʼok ruma katak sira laʼo ba oin daudauk iha lia-loos. Porezemplu, nia hatoʼo komentáriu furak iha reuniaun, halaʼo parte ruma iha reuniaun loron baileet, haklaken iha eskola, ka foti desizaun ho matenek bainhira hetan tentasaun ruma. Se nia halo buat sira-neʼe, gaba kedas nia. Ita bele halo planu ida hodi koʼalia ba labarik sira antes reuniaun hahú no ramata. Se ita mak halo nuneʼe, labarik sira sei sente katak sira mós parte ida husi “kongregasaun boot nia leet”.—Sal 35:18.
Keʼe no hetan buat murak husi Bíblia
w05-E 10/1 p. 11 par. 6
Pontu importante husi livru 1 Krónikas
21:13-15. Jeová haruka anju atu hapara susar neʼe tanba nia hanoin ninia povu nia terus. Klaru katak “ninia laran-sadiʼa mak boot tebetebes”.
TREINU KONA-BA HAKLAKEN
Joven sira—Oinsá mak imi bele prepara an ba batizmu?
10 Bíblia dehan: “Se fiar la hamutuk ho hahalok, fiar neʼe mate.” (Tgo 2:17) Se Ita iha fiar neʼebé metin, Ita sei hatudu ida-neʼe liuhusi Ita-nia hahalok. Hahalok hanesan saida? Bíblia dehan ita presiza “hahalok santu” no ‘hatudu katak ita serbí Maromak ho laran-metin’.—Lee 2 Pedro 3:11.
11 “Hahalok santu” mak saida? Se Ita-nia hahalok mak santu, ita mós moris tuir morál neʼebé moos. Porezemplu, hanoin filafali toʼok kona-ba fulan neen liubá. Oinsá mak Ita hatudu katak Ita treinu didiʼak ona Ita-nia “kbiit atu hanoin” bainhira hasoru tentasaun ruma? (Ebr 5:14) Ita bele hanoin fali ka lae ba tempu neʼebé Ita hakaʼas an atu la monu ba tentasaun ruma ka hakaʼas an atu tahan hasoru susar husi kolega sira? Iha eskola Ita hatudu hahalok diʼak ba ema seluk ka lae? Ita nafatin laran-metin ba Jeová ka Ita halo tuir deʼit kolega sira iha eskola atu sira la goza Ita? (1Pe 4:3, 4) Loos, ita hotu mak sala-naʼin. Tan neʼe dala ruma Ita sente moe ka susar atu haklaken ba ema seluk. Ema balu neʼebé serbí Jeová ba tempu kleur ona mós sente hanesan neʼe. Maibé ema neʼebé dedika an ba Jeová sente orgullu tebes tanba sai ona Jeová nia testemuña ida, no nia hatudu ida-neʼe liuhusi ninia hahalok santu.
12 Oinsá mak Ita ‘hatudu katak Ita serbí Maromak ho laran-metin’? Liuhusi atividade sira neʼebé Ita halo iha kongregasaun, hanesan tuir reuniaun sira no bá haklaken. No mós buat neʼebé Ita halo mesak-mesak, hanesan Ita rasik nia orasaun no estuda mesak. Ema neʼebé dedika ona ninia moris ba Jeová sei la hanoin katak atu halo buat sira-neʼe mak hanesan naha todan ida. Nia sei sente hanesan ho Liurai David neʼebé dehan: “Oh, haʼu-nia Maromak, atu halo Ita-nia hakarak mak buat neʼebé halo haʼu haksolok, no Ita-nia ukun-fuan iha haʼu-nia laran.”—Sal 40:8.
13 Saida mak bele ajuda Ita atu ‘hatudu katak Ita serbí Maromak ho laran-metin’? Karik bele hanoin kona-ba pergunta sira tuirmai neʼe: “Ita halo orasaun ba Maromak husi Ita-nia laran ka lae, no oinsá mak Ita-nia orasaun hatudu katak Ita iha domin ba Jeová? Ita estuda informasaun saida deʼit iha Ita-nia estuda mesak? Ita hola parte nafatin iha serbisu haklaken ka lae maski Ita-nia inan-aman la halo?” Ita bele hakerek hela resposta ba pergunta sira-neʼe, tanba neʼe bele ajuda Ita atu halo planu hodi hadiʼa Ita-nia orasaun, estuda mesak no haklaken.
14 Joven balu sente katak hakerek hela resposta ba pergunta sira-neʼe ajuda duni sira atu halo planu ba batizmu. Irmán joven ida naran Tilda dehan katak halo hanesan neʼe ajuda nia kumpre ninia planu ida-idak, no tinan ida liutiha nia mós prontu ona atu hetan batizmu. Irmaun joven ida seluk naran Patrick mós halo nuneʼe. Nia dehan: “Haʼu hatene ona haʼu-nia planu mak saida, maibé bainhira haʼu hakerek sai planu sira-neʼe, neʼe halo haʼu hakaʼas an liután atu kumpre.”
15 Pergunta importante ida seluk mak: “Se Ita-nia inan-aman ka kolega balu mak para ona la serbí tan Jeová, Ita sei serbí nafatin Jeová ka lae?” Hanoin-hetan katak bainhira Ita dedika ona Ita-nia moris ba Jeová no hetan batizmu, Ita haburas ona Ita rasik nia relasaun ida ho Jeová. Tan neʼe mak Ita la bele depende ba inan-aman ka kolega sira mak atu determina Ita atu serbí Jeová. Liuhusi Ita-nia hahalok santu no hahalok laran-metin mak Ita hatudu katak Ita fiar duni lia-loos no hakarak halo tuir Jeová. Neʼe mak sinál neʼebé hatudu katak Ita laʼo ba oin daudauk atu hetan batizmu.