Informasaun atu uza hamutuk livru Moris Kristaun no Haklaken
© 2024 Watch Tower Bible and Tract Society of Pennsylvania
6-12 JANEIRU
RIKUSOIN HUSI BÍBLIA SALMO 127-134
Inan-aman, kontinua tau matan imi-nia oan neʼebé folin-boot
Hafolin priviléjiu atu sai parte ba Jeová nia família
9 Jeová fó ba ema abilidade atu bele iha oan, no mós responsabilidade atu hanorin sira-nia oan atu hadomi no serbí Jeová. Se Ita mak inan ka aman, Ita hafolin prezente furak neʼe ka lae? Maski Jeová fó anju sira abilidade oioin, maibé nia la fó ba sira abilidade atu iha oan. Tan neʼe, se Ita mak inan ka aman, Ita presiza hafolin Ita-nia knaar atu haboot oan sira. Jeová fó Ita responsabilidade importante atu haboot oan sira “ho dixiplina no ho hanorin neʼebé tuir Jeová nia hakarak”. (Éf 6:4; Deu 6:5-7; Sal 127:3) Atu ajuda inan-aman sira, Maromak nia organizasaun prepara informasaun barak neʼebé bazeia ba Bíblia hanesan publikasaun sira, vídeo, múzika no informasaun online. Ida-neʼe hatudu ho klaru katak Jeová no Jesus hadomi ita-nia oan sira. (Lc 18:15-17) Bainhira inan-aman sadere ba Jeová no hakaʼas an atu tau matan ba sira-nia oan, neʼe halo Jeová sente kontente. Hodi halo nuneʼe, inan-aman ajuda sira-nia oan atu hetan oportunidade hodi sai parte ba Jeová nia família ba nafatin.
Inan-aman, treinu imi-nia oan atu hadomi Jeová
20 Koñese didiʼak Ita-nia oan. Salmo 127 kompara labarik sira ho rama-oan. (Lee Salmo 127:4.) Rama-oan bele halo husi buat oioin no iha medida la hanesan, nuneʼe mós ho labarik sira, labarik ida-idak la hanesan. Tan neʼe, inan-aman presiza buka-hatene oinsá atu treinu oan ida-idak. Feen-laʼen ida husi rai-Izraél neʼebé haboot oan naʼin-rua ho susesu atu adora Jeová, fó sai buat neʼebé ajuda sira, hodi dehan: “Ami naʼin-rua halaʼo estuda Bíblia ho oan ketaketak.” Tuir loloos, família ida-idak nia ulun bele deside se sira presiza ka iha posibilidade ka lae atu halaʼo estudu hanesan neʼe.
Keʼe no hetan buat murak husi Bíblia
Haksolok tanba serbí Jeová ho laran tomak
Inan-aman bele aprende lisaun importante husi Salmo 131:1, 2. (Lee.) Liurai David hatete katak nia “la buka buat neʼebé boot liu” ka buat neʼebé liu fali ninia kbiit. Tanba nia haraik an, nia kontente ho buat neʼebé nia iha ona no sente dame. Inan-aman bele aprende saida husi David? Inan-aman bele hatudu haraik an hodi la koko atu halo buat neʼebé liu fali sira-nia kbiit no la husu oan sira atu halo buat neʼebé liu fali sira-nia kbiit. Bainhira inan-aman rekoñese oan sira-nia kbiit no limitasaun, no tuirmai ajuda oan sira atu halo planu neʼebé sira bele kumpre, neʼe bele ajuda oan sira atu sente katak sira iha folin. Irmán Marina konta: “Amá nunka kompara haʼu ho haʼu-nia naan naʼin-tolu ka ho labarik seluk. Amá hanorin haʼu katak ema ida-idak iha abilidade neʼebé la hanesan no ita ida-idak folin-boot ba Jeová. Tanba dalan neʼebé amá haboot haʼu, haʼu nunka kompara haʼu-nia an ho ema seluk.”
13-19 JANEIRU
RIKUSOIN HUSI BÍBLIA SALMO 135-137
“Ita-nia Naʼi mak boot liu fali maromak sira seluk hotu”
it-2-E p. 661 par. 4-5
Kbiit, Serbisu neʼebé halo ho kbiit
Jeová nia kbiit atu kontrola natureza mak úniku. Atu prova katak nia mak Maromak neʼebé loos, lójiku se Jeová hatudu sai ninia kbiit atu kontrola buat neʼebé nia kria, no mós halo ida-neʼe iha dalan neʼebé liga ho ninia naran. (Sal 135:5, 6) Loro-matan, fulan, planeta, no fitun sira laʼo tuir dalan neʼebé organiza ho didiʼak, mundu nia atmosfera (neʼebé hamosu anin, udan, no buat seluk) halo tuir lei neʼebé ukun sira, gafañotu no manu sira semo ba fatin neʼebé dook tuir sira-nia tempu, maibé buat sira-neʼe no prosesu seluk tan la toʼo atu halo santu Maromak nia naran kuandu ema kontra no halaʼo adorasaun falsu.
Atu apoia ninia pozisaun nuʼudar Maromak, Jeová bele uza kriasaun no buat seluk husi natureza iha dalan neʼebé la hanesan baibain no iha tempu neʼebé nia deside nanis atu bele kumpre ninia hakarak. Maski akontesimentu sira, hanesan bailoro naruk, udan boot, ka akontesimentu seluk neʼebé envolve klima, mak buat neʼebé baibain deʼit, maibé buat sira-neʼe sai úniku se neʼe akontese hodi kumpre profesia. (Kompara ho 1Rs 17:1; 18:1, 2, 41-45.) Maibé dala barak akontesimentu sira-neʼe mak úniku duni tanba mosu iha dalan neʼebé kmanek tebes (Éx 9:24) ka tanba akontese iha dalan no iha tempu neʼebé la baibain.—Éx 34:10; 1Sa 12:16-18.
Ita hafolin Jeová nia domin neʼebé laran-metin
16 Bainhira ita fiar katak Jeová sei proteje ita, ita bele sente seguru. Maski nuneʼe, karik dala ruma ita sente laran-kraik no sentimentu neʼe labele lakon. Bainhira ita sente hanesan neʼe, oinsá Jeová bele ajuda ita? (Lee Salmo 136:23.) Ho laran-diʼak, nia sei apoia ita hodi koʼus ita ho ninia liman no ajuda ita atu la sente tan laran-kraik. (Sal 28:9; 94:18) Oinsá neʼe ajuda ita? Ita hatene katak Jeová sei sempre apoia ita, no neʼe ajuda ita iha dalan rua. Primeiru, ita hatene katak Jeová sei sempre proteje ita, maski ita hela iha fatin naran deʼit. Segundu, ita hatene katak ita-nia Aman Jeová hadomi tebes ita.
Keʼe no hetan buat murak husi Bíblia
it-1-E p. 1248
Jah
Baibain sílaba Jah uza atu fó hahiʼi iha knananuk, orasaun no harohan neʼebé ema hatoʼo ho laran. No baibain ema uza sílaba neʼe kuandu koʼalia kona-ba ksolok neʼebé sira sente tanba manán no hetan salvasaun, ka bainhira fó agradese ba Jeová nia ajuda no ninia kbiit neʼebé boot. Iha ezemplu barak kona-ba oinsá ema uza sílaba Jah. Porezemplu, fraze “Fó hahiʼi ba Jah!” (Aleluia) mak fraze ida neʼebé mosu iha livru Salmo atu fó hahiʼi Maromak. Dala primeiru fraze neʼe mosu mak iha Salmo 104:35. Dala ruma, neʼe mosu deʼit iha parte primeiru husi salmo ida (Sal 111, 112), mosu iha salmo nia parte klaran (135:3), ka mosu iha salmo nia parte rohan (Sal 104, 105, 115-117), maibé dala barak neʼe mosu iha parte primeiru no mós rohan (Sal 106, 113, 135, 146-150). Iha livru Apokalipse, anju sira fó hahiʼi beibeik ba Jeová hodi uza fraze neʼe.—Apk 19:1-6.
Eskritura seluk iha Bíblia mós temi sílaba “Jah” iha knananuk no orasaun atu fó hahiʼi ba Jeová. Moisés hakerek knananuk ida kona-ba oinsá Jeová salva ninia povu. (Éx 15:2) Iha knananuk neʼebé Isaias hakerek, nia temi “Jah Jeová” hodi fó énfaze. (Isa 12:2; 26:4) Kuandu Jeová halo milagre atu kura Ezequias neʼebé besik mate, Ezequias hakerek poezia ida atu fó hahiʼi ba Jeová no repete beibeik sílaba Jah. (Isa 38:9, 11) Bíblia halo komparasaun entre ema mate neʼebé labele hahiʼi Jah ho ema neʼebé hakaʼas an atu uza sira-nia moris hodi hahiʼi nia. (Sal 115:17, 18; 118:17-19) No salmo seluk tan mak orasaun atu fó agradese tanba hetan salvasaun, protesaun, no korrije.—Sal 94:12; 118:5, 14.
20-26 JANEIRU
RIKUSOIN HUSI BÍBLIA SALMO 138-139
Keta husik sentimentu taʼuk hanetik Ita
Hahiʼi Jeová iha kongregasaun laran
10 Ita sente nakdedar bainhira atu foti liman hodi fó komentáriu ka lae? Se nuneʼe, Ita la mesak. Tuir loloos, ita barak sente taʼuk uitoan bainhira fó komentáriu. Atu bele manán sentimentu taʼuk neʼe, Ita presiza buka-hatene uluk razaun tanbasá Ita sente taʼuk. Ita sente taʼuk tanba Ita sei haluha buat neʼebé Ita atu hatete ka taʼuk Ita sei koʼalia sala ka lae? Ita hanoin resin Ita-nia komentáriu sei la furak hanesan ema seluk nian ka lae? Tuir loloos, la sala atu sente hanesan neʼe. Neʼe hatudu katak Ita haraik an no haree ema seluk boot liu fali Ita. Jeová gosta tebes hahalok haraik an. (Sal 138:6; Flp 2:3) Maibé Jeová mós hakarak Ita atu hahiʼi nia no fó laran-manas ba irmaun-irmán sira iha reuniaun. (1Ts 5:11) Nia hadomi Ita no nia sei fó aten-brani ba Ita.
Anima malu iha reuniaun
7 Karik Ita bele lee fali sujestaun sira neʼebé uluk fó sai iha Livru Haklaken. Porezemplu, prepara ho didiʼak. (Prv 21:5) Bainhira Ita hatene didiʼak informasaun, fasil liu ba Ita atu fó komentáriu. Diʼak mós atu fó komentáriu neʼebé badak. (Prv 15:23; 17:27) Ita sei la sente taʼuk demais se Ita fó komentáriu neʼebé badak. Dala ruma fasil liu ba irmaun-irmán sira atu komprende komentáriu neʼebé badak ho fraze ida ka rua deʼit duké komentáriu neʼebé naruk. Bainhira Ita fó komentáriu neʼebé badak ho Ita-nia liafuan rasik, Ita hatudu katak Ita prepara ho didiʼak no komprende didiʼak informasaun.
Keʼe no hetan buat murak husi Bíblia
it-1-E p. 862 par. 4
Perdua
Liután neʼe, ema Kristaun presiza perdua ema seluk neʼebé halo sala hasoru sira, maski ema neʼe halo beibeik ida-neʼe. (Lc 17:3, 4; Éf 4:32; Kol 3:13) Maromak la perdua ema neʼebé lakohi fó perdua ba ema seluk. (Mt 6:14, 15) Maski “ema neʼebé halo hahalok aat” presiza hasai husi kongregasaun, maibé ikusmai se ema neʼe arrepende an ho laran, nia bele hetan perdua. Kuandu neʼe akontese, kongregasaun bele hatudu sai sira-nia domin ba nia. (1Ko 5:13; 2Ko 2:6-11) Maski nuneʼe, ema Kristaun la presiza perdua ema neʼebé halo beibeik sala sériu ho neon no la arrepende an. Ema neʼebé hatudu hahalok hanesan neʼe sai nuʼudar Maromak nia inimigu.—Ebr 10:26-31; Sal 139:21, 22.
27 JANEIRU–2 FEVEREIRU
RIKUSOIN HUSI BÍBLIA SALMO 140-143
Hakaʼas an halo tuir Ita-nia orasaun atu husu ajuda
“Rona ba ema matenek nia liafuan”
13 Haree konsellu nuʼudar dalan neʼebé Jeová hatudu domin ba ita. Jeová hakarak buat neʼebé diʼak liu ba ita. (Prv 4:20-22) Bainhira nia fó konsellu liuhusi Bíblia, publikasaun sira neʼebé bazeia ba Bíblia, ka maluk fiar-naʼin neʼebé maduru, nia hatudu sai ninia domin ba ita. Ebreu 12:9, 10 hatete: “Maromak fó dixiplina ba ita-nia diʼak.”
14 Tau fokus ba konsellu, laʼós dalan neʼebé ema fó konsellu. Dala ruma, ita sente katak dalan neʼebé ema fó konsellu ba ita mak la diʼak. Klaru katak bainhira fó konsellu ba ema ruma, ita presiza hatoʼo neʼe iha dalan neʼebé fasil ba nia atu simu. (Gal 6:1) Maibé se ema fó konsellu mai ita, diʼak atu hakaʼas an tau fokus ba informasaun maski ita sente katak ninia dalan atu fó konsellu mak la diʼak. Karik ita bele husu ba ita-nia an: ‘Maski haʼu la gosta ninia dalan atu fó konsellu, maibé iha buat neʼebé haʼu bele aprende husi ida-neʼe ka lae? Duké tau fokus ba ninia fraku, haʼu bele aprende buat ruma husi ninia konsellu ka lae?’ Ita bele hatudu matenek liuhusi buka dalan atu aplika konsellu neʼebé ita simu.—Prv 15:31.
Nafatin “laran moos” iha tempu susar
Maromak nia atan balu sente laran-tun kuandu ema kontra sira, kuandu hasoru susar kona-ba ekonomia, no kuandu hetan moras. Dala ruma, situasaun sira-neʼe bele kona sira-nia laran iha dalan neʼebé la diʼak. Liurai David mós sente hanesan neʼe, nia hatete: “Haʼu lakon ona haʼu-nia aten-brani; haʼu-nia laran la sente tan ona buat ida.” (Sal 143:4) Saida mak ajuda nia atu hasoru situasaun neʼe? David hanoin-hetan kona-ba oinsá mak Maromak tau matan ba Ninia atan sira no kona-ba oinsá mak Maromak salva ona nia. David hanoin kleʼan kona-ba saida mak Maromak Jeová halo ona ba Ninia naran. David nafatin hanoin kona-ba Maromak nia hahalok sira. (Sal 143:5) Hanesan neʼe mós, se ita hanoin kleʼan kona-ba ita-nia Kriadór no kona-ba buat neʼebé nia halo tiha ona no sei halo ba ita, ida-neʼe sei ajuda ita kuandu ita hasoru susar.
Konsellu kaben deʼit “iha Naʼi”—Sei vale ka lae?
Dala ruma Ita bele sente hanesan David. Nia dehan: “Oh Jeová, hatán haʼu lalais bá; haʼu-nia forsa besik maran ona. Keta subar husi haʼu.” (Sal 143:5-7, 10) Iha tempu hanesan neʼe, keta rende an. Fó Jeová tempu hodi hatudu ba Ita, nia hakarak Ita atu halo saida. Rona ba nia hodi lee ninia Liafuan beibeik no hanoin kleʼan kona-ba buat sira neʼebé Ita lee. Neʼe bele ajuda Ita hodi haree saida mak Jeová hakarak husi Ita no oinsá mak nia ajuda ninia atan sira iha tempu uluk. Se Ita rona didiʼak ba nia, Ita mós bele fiar ba ninia matadalan sira.
Keʼe no hetan buat murak husi Bíblia
it-2-E p. 1151
Venenu
Uza iha dalan simbóliku. Ema aat nia lia-bosok no liafuan neʼebé hafoʼer ema seluk nia naran bele estraga duni vítima nia reputasaun, neʼe atu hanesan ho samea nia venenu neʼebé bele oho ema. (Sal 58:3, 4) Kona-ba ema neʼebé koʼalia hodi hafoʼer ema seluk nia naran, Bíblia hatete katak “liafuan husi sira-nia ibun mak hanesan samea nia venenu”. (Sal 140:3; Rom 3:13) Bainhira ema koʼalia hodi hafoʼer ema nia naran, koʼalia aat ema, hanorin buat falsu, ka koʼalia iha dalan sala seluk tan, neʼe hanesan sira-nia nanál “nakonu ho venenu neʼebé halo ema mate”.—Tgo 3:8.
3-9 FEVEREIRU
RIKUSOIN HUSI BÍBLIA SALMO 144-146
“Ksolok ba povu neʼebé adora Jeová nuʼudar sira-nia Maromak!”
Pergunta husi lee-naʼin
1. Hanoin kona-ba Salmo 144 tomak. Liafuan “hodi nuneʼe” iha versíkulu 12, hatudu katak bensaun sira neʼebé temi iha versíkulu 12 toʼo 14 aplika ba ema laran-loos, sira neʼebé husu atu hetan ‘salvasaun’ husi ema aat (versíkulu 11). Versíkulu 15 mós apoia ideia neʼe. Liafuan rua “ksolok” aplika ba ema neʼebé hanesan, ema neʼebé “adora Jeová nuʼudar ninia Maromak!”
2. Esplikasaun neʼe apoia malu ho eskritura seluk neʼebé temi Maromak nia bensaun ba ninia povu neʼebé laran-metin ba nia. Salmo 144 fó sai David nia esperansa katak, bainhira Maromak salva tiha nasaun Izraél husi inimigu, Maromak sei fó bensaun ba ninia povu atu iha moris neʼebé diʼak no haksolok. (Lev 26:9, 10; Deu 7:13; Sal 128:1-6) Porezemplu, Deuteronómio 28:4 hatete: “Bensaun sei toʼo ba imi-nia oan sira no ba rezultadu husi imi-nia toʼos no bensaun sei toʼo ba imi-nia animál-hakiak nia oan sira, imi-nia karau-oan no bibi-oan sira.” Neʼe mak buat neʼebé akontese duni iha David nia oan Salomão nia ukun, nasaun Izraél moris ho diʼak no hakmatek. No Salomão nia ukun mós sai ilas ba Mesias nia ukun iha futuru.—1Rs 4:20, 21; Sal 72:1-20.
Hametin ita-nia esperansa
16 Esperansa kona-ba moris ba nafatin mak prezente folin-boot husi Maromak. Ita hein namanas ba futuru kapás neʼebé sei akontese duni. Esperansa mak hanesan ankor neʼebé bele ajuda ita tahan bainhira hasoru susar sira, ema fó-terus, ka ita-nia moris iha perigu laran. Esperansa mós hanesan kapasete tanba bele proteje ita-nia hanoin atu ita bele halo buat neʼebé loos no la monu ba sala. Esperansa husi Bíblia ajuda ita hakbesik liután ba Maromak no hatudu katak nia hadomi tebes ita. Ita hetan benefísiu boot bainhira ita kontinua hametin ita-nia esperansa
17 Iha apóstolu Paulo nia karta ba kongregasaun Roma, nia anima sira: “Haksolok tanba imi-nia esperansa.” (Rom 12:12) Paulo sente haksolok tanba nia iha konfiansa katak se nia laran-metin nafatin, nia sei hetan moris rohan-laek iha lalehan. Ita mós bele haksolok ho ita-nia esperansa tanba fiar metin katak Jeová sei kumpre ninia promesa sira. Ema ida neʼebé hakerek Salmo hatete: “Ksolok ba ema neʼebé . . . tau esperansa ba ninia Maromak Jeová . . . Ida neʼebé sempre laran-metin.”—Sal 146:5, 6.
Domin saida mak lori ksolok neʼebé loos?
19 Satanás nia mundu halo ema terus maizumenus ba tinan 6.000 ona. Agora daudaun, iha loron ikus sira-neʼe, mundu nakonu ho ema neʼebé hanoin deʼit kona-ba sira-nia an, osan, no ksolok. Sira hanoin deʼit kona-ba saida mak sira bele hetan, no buat neʼebé importante liu hotu iha sira-nia moris mak halo tuir sira rasik nia hakarak. Maibé ema hanesan neʼe la iha kontente neʼebé loos! Tanba Bíblia dehan katak ema neʼebé husu ajuda husi Maromak Jeová no tau esperansa ba nia mak sei hetan ksolok.—Sal 146:5.
20 Jeová nia atan sira hadomi tebes nia, no tinan-tinan ema neʼebé hatene no hadomi nia aumenta barak tan deʼit. Ida-neʼe hatudu katak Maromak nia Governu mak ukun daudaun, no lakleur tan Governu neʼe sei lori bensaun oioin neʼebé ita la bele imajina! Se ita mak halo buat neʼebé Jeová hakarak ita atu halo, nia sei kontente ho ita, no mós lori ksolok neʼebé loos ba ita. Ema neʼebé hadomi Jeová sei haksolok ba nafatin! Iha lisaun tuirmai, ita sei koʼalia kona-ba hahalok aat balu neʼebé ema hatudu iha loron ikus sira-neʼe. No ita mós sei haree oinsá mak hahalok sira-neʼe la hanesan ho hahalok furak neʼebé Jeová nia atan sira hatudu.
Keʼe no hetan buat murak husi Bíblia
it-1-E p. 111 par. 9
Animál sira
Bíblia hanorin katak ema tenke trata kriatura moris sira seluk ho laran-diʼak no justisa. Jeová rasik hatudu katak nia mak Hun ba sira-nia moris no nia tau matan ba sira. (Prv 12:10; Sal 145:15, 16) Moisés nia Ukun-Fuan haruka ema Izraél atu tau matan didiʼak ba sira-nia animál hakiak. Bainhira ema ida hetan ema seluk nia animál hakiak neʼebé lakon, ema neʼe presiza fó fila animál neʼe. Bainhira ema ida haree sasán todan hanehan ema seluk nia animál hakiak, nia presiza hasai sasán todan neʼe. (Éx 23:4, 5) Presiza trata animál sira ho diʼak kuandu uza sira ba serbisu. (Deu 22:10; 25:4) Hanesan ho ema, animál sira mós labele halo serbisu iha loron Sábadu. (Éx 20:10; 23:12; Deu 5:14) Ema presiza kontrola ka oho animál neʼebé siʼak. (Gén 9:5; Éx 21:28, 29) Labele fó kaben ba animál neʼebé la hanesan.—Lev 19:19.
10-16 FEVEREIRU
RIKUSOIN HUSI BÍBLIA SALMO 147-150
Ita iha razaun barak atu hahiʼi Jah
Tanbasá mak “fó hahiʼi ba Jah”?
5 Jeová fó kmaan ba nasaun Izraél no mós ba ema Izraél ida-idak. Ohin loron, Jeová mós fó kmaan ba ita iha dalan neʼebé hanesan. Ema neʼebé hakerek salmo dehan katak Maromak “kura ema neʼebé laran-kanek; nia falun sira-nia kanek”. (Sal 147:3) Bainhira ita moras ka laran-tun, ita bele fiar katak Jeová sei tau matan ba ita. Jeová hakarak tebes atu fó kmaan no kura ita-nia laran-kanek. (Sal 34:18; Isa 57:15) Nia fó matenek no forsa ba ita atu ita bele tahan hasoru problema naran deʼit.—Tgo 1:5
6 Tuirmai ema neʼebé hakerek salmo hateke ba lalehan no hatete katak Jeová “sura fitun sira” no “bolu sira hotu tuir ida-idak nia naran”. (Sal 147:4) Ema neʼebé hakerek salmo bele haree ba fitun sira, maibé nia la hatene fitun sira-neʼe iha hira. Ohin loron, sientista sira hatene katak iha universu laran iha fitun biliaun ba biliaun! Ema la bele sura fitun sira-neʼe hotu, maibé Kriadór bele. Laʼós neʼe deʼit, nia mós hatene fitun ida-idak toʼo fó naran ba sira hotu. (1Ko 15:41) Maromak neʼebé hatene fitun ida-idak mós hatene kona-ba Ita. Nia sempre hatene Ita iha fatin neʼebé, Ita sente oinsá, no Ita presiza saida!
Tanbasá mak “fó hahiʼi ba Jah”?
7 Jeová hatene Ita hasoru daudauk problema saida, no nia iha forsa atu ajuda Ita. (Lee Salmo 147:5.) Karik Ita sente katak situasaun neʼebé Ita hasoru daudauk mak susar tebes no Ita la bele tahan ho situasaun neʼe. Maromak hatene ita-nia kbiit toʼo iha neʼebé, no “nia hanoin-hetan katak ita mak rai-rahun”. (Sal 103:14) Ita la perfeitu, tan neʼe mak ita sempre halo sala neʼebé hanesan, no neʼe bele halo ita laran-tun. Dala ruma ita arrepende tebes kona-ba liafuan sira neʼebé ita hasai, ita-nia hakarak neʼebé aat, ka laran-moras ba ema seluk. Maski Jeová la iha fraku hanesan neʼe, maibé nia komprende tebes kona-ba ita-nia sentimentu.—Isa 40:28.
Tanbasá mak “fó hahiʼi ba Jah”?
18 Ema neʼebé hakerek salmo hatene katak, husi nasaun hotu iha mundu, Jeová hili deʼit nasaun Izraél antigu hodi sai ninia povu. Sira mak nasaun neʼebé simu ona Maromak nia “liafuan” ho “ukun-fuan no desizaun” sira. (Lee Salmo 147:19, 20.) Ohin loron, ita iha priviléjiu boot atu lori Maromak nia naran. Ita agradese tebes tanba ita hatene nia, ita iha ninia Liafuan atu dirije ita, no bele iha relasaun neʼebé besik ho nia. Hanesan ho ema neʼebé hakerek Salmo 147, Ita mós iha razaun barak atu “fó hahiʼi ba Jah!” no anima ema seluk atu fó hahiʼi ba nia.
Keʼe no hetan buat murak husi Bíblia
cl-E chap. 5 par. 16
Manu sira
16 Salmo 148:10 mós temi kona-ba “manu sira”. Jeová kria manu oioin. Jeová koʼalia ba Job kona-ba manu-avestrús, neʼebé “hamnasa fali ba kuda no ema neʼebé saʼe kuda”. Manu neʼe aas metru 2,5, no maski manu neʼe labele semo, maibé nia bele halai ho velosidade kilómetru 65 kada oras no ninia hakat ida deʼit mak luan metru 4,5. (Job 39:13, 18) Manu seluk mak manu-albatroz, manu neʼe gasta tempu barak liu hodi semo iha tasi leten. Manu neʼe nia liras husi sorin ida ba sorin seluk mak naruk metru tolu. Nia bele semo ba oras barak maski la presiza baku ninia liras. Maibé neʼe la hanesan duni ho manu-beijaflór, manu neʼe mak sentímetru lima deʼit. No nia mak manu neʼebé kiʼik liu iha mundu. Maski nuneʼe, nia bele baku ninia liras dala 80 iha segundu ida nia laran. Manu-beijaflór iha liras neʼebé furak ho kór oioin no bele semo iha fatin deʼit no mós bele semo ba kotuk.
TREINU KONA-BA HAKLAKEN
Rona ba Jeová nia lian
7 Lee Mateus 17:1-5. Dala segundu neʼebé Jeová koʼalia husi lalehan mak bainhira “Jesus nakfila an”. Iha momentu neʼe, Jesus konvida ona Pedro, Tiago, no João atu akompaña nia ba foho aas ida. Iha neʼebá, sira haree vizaun furak ida. Jesus nia oin sai naroman no ninia roupa sai nabilan loos. Iha ema naʼin-rua, neʼebé reprezenta Moisés no Elias, komesa koʼalia ba Jesus kona-ba ninia mate no moris-hiʼas. Maski apóstolu naʼin-tolu neʼe “matan-dukur loos”, maibé sira matan-moos ona bainhira sira haree vizaun kmanek neʼe. (Lc 9:29-32) Tuirmai, kalohan nabilan ida taka sira, no sira rona Maromak nia lian husi kalohan! Hanesan bainhira Jesus hetan batizmu, Jeová mós fó sai katak nia simu no hadomi ninia Oan-Mane. Nia dehan: “Neʼe mak haʼu-nia Oan-Mane neʼebé haʼu hadomi, neʼebé halo haʼu-nia laran kontente.” Maibé iha momentu neʼe, Jeová hatutan tan: “Rona nia bá.”
8 Vizaun neʼe fó sai nanis kona-ba glória no kbiit neʼebé Jesus sei simu iha futuru nuʼudar Liurai ba Maromak nia Ukun. Ita bele fiar katak vizaun neʼe anima no hametin Kristu atu sai prontu hodi tahan susar no mate. Vizaun neʼe mós hametin dixípulu sira-nia fiar atu bele tahan hasoru susar no halo serbisu barak. Maizumenus tinan 30 depois neʼe, apóstolu Pedro temi vizaun kona-ba Jesus nakfila an, neʼe hatudu katak nia sei hanoin-hetan vizaun neʼe.—2Pe 1:16-18.
9 “Rona nia bá.” Jeová hatudu ho klaru katak nia hakarak ita atu rona ba ninia Oan-Mane no halo tuir. Saida mak Jesus dehan bainhira nia iha rai? Nia fó sai buat barak neʼebé importante! Porezemplu, nia hanorin ninia dixípulu sira oinsá atu haklaken liafuan diʼak, no nia fó-hanoin sira beibeik atu matan-moris nafatin. (Mt 24:42; 28:19, 20) Nia mós anima sira atu hakaʼas an makaʼas no la rende an. (Lc 13:24) Jesus dehan katak ninia dixípulu sira presiza hatudu domin ba malu, iha unidade, no halo tuir ninia mandamentu sira. (João 15:10, 12, 13) Konsellu neʼebé Jesus fó ba ninia dixípulu sira mak diʼak duni! Konsellu neʼe mós diʼak ba ita ohin loron.
10 Jesus hatete: “Ema hotu neʼebé halo tuir lia-loos rona haʼu-nia lian.” (João 18:37) Ita hatudu ita rona ba ninia lian bainhira ita “kontinua hatudu pasiénsia ba malu no prontu atu fó perdua ba malu ho laran tomak”. (Kol 3:13; Lc 17:3, 4) Ita mós hatudu ita rona ba ninia lian bainhira ita haklaken liafuan diʼak ho laran-manas “iha tempu neʼebé diʼak no iha tempu neʼebé susar”.—2Ti 4:2.
11 Jesus hatete: “Haʼu-nia bibi sira rona haʼu-nia lian.” (João 10:27) Kristu nia dixípulu sira hatudu katak sira rona Jesus hodi tau atensaun ba ninia liafuan no mós halo tuir. Sira la husik “hanoin resin kona-ba moris neʼe” dada sira-nia atensaun. (Lc 21:34) Sira sente katak importante tebes atu halo tuir Jesus nia mandamentu maski hasoru susar. Ita-nia irmaun-irmán barak hasoru susar boot, inklui ema haterus, kiak tebes, no dezastre naturais. Maski hasoru susar sira-neʼe hotu, sira nafatin laran-metin ba Jeová. Jesus promete ba sira: “Ema neʼebé hatene haʼu-nia ukun-fuan no halo tuir, ema neʼe mak hadomi haʼu. No ema neʼebé hadomi haʼu, haʼu-nia Aman mós sei hadomi nia.”—João 14:21.
17-23 FEVEREIRU
RIKUSOIN HUSI BÍBLIA PROVÉRBIOS 1
Joven sira, imi sei rona ba sé?
Keta husik buat ida hanetik Ita atu manán kolen iha futuru
16 Oinsá se Ita mak joven ida no Ita sente katak Ita-nia inan-aman la komprende Ita ka sira hakaʼas demais Ita? Karik neʼe bele halo Ita hirus tebes toʼo Ita hanoin atu la serbí tan Jeová. Maibé se Ita mak husik Jeová, Ita sei hatene katak la iha ema ida iha mundu neʼe mak hadomi Ita hanesan Ita-nia inan-aman ka maluk sira iha kongregasaun.
17 Hanoin toʼok: Se Ita-nia inan-aman la korrije Ita, oinsá mak Ita hatene katak sira hadomi Ita? (Ebr 12:8) Sira laʼós ema neʼebé perfeitu, tan neʼe dalan neʼebé sira fó dixiplina bele halo Ita sai hirus. Maibé keta hanoin deʼit kona-ba neʼe. Koko atu komprende razaun tanbasá mak sira hakarak korrije Ita. Sai kalma nafatin no keta sai hirus. Maromak nia Liafuan hatete: “Ema neʼebé iha koñesimentu kuidadu kona-ba ninia liafuan sira, no ema neʼebé matenek sei kalma nafatin.” (Prv 17:27) Hakaʼas an atu sai ema neʼebé maduru hodi simu konsellu no halo tuir konsellu neʼe maski dalan neʼebé inan-aman fó, Ita ladún gosta. (Prv 1:8) Keta haluha katak inan-aman neʼebé hadomi Jeová mak prezente furak ida ba Ita. Sira hakarak ajuda Ita atu moris ba nafatin.
w05-E 2/15 p. 19-20 par. 11-12
Proteje ita-nia identidade nuʼudar ema Kristaun
11 Hakaʼas an atu halo Maromak kontente, laʼós ema. Dala ruma hodi sai parte ba grupu ida bele fó influénsia ba ita-nia identidade. Ema hotu presiza iha belun, no kuandu ema habelun ho ita, neʼe halo ita sente kontente. Durante tempu foin-saʼe no kuandu adultu ona, presaun husi kolega sira bele fó influénsia boot, no neʼe bele book ema atu halo tuir kolega sira ka halo buat ruma tan deʼit hakarak halo kolega sira kontente. Maibé dala ruma kolega sira la hanoin ita-nia diʼak. Dala ruma sira buka deʼit ema atu hamaluk sira halo hahalok aat. (Prv 1:11-19) Bainhira ema Kristaun ida monu ba influénsia la diʼak husi ema seluk, baibain nia koko subar ninia hahalok aat. (Sal 26:4) Apóstolu Paulo fó avizu hodi hatete: “Keta halo tuir mundu ohin neʼe.” (Rom 12:2) Jeová fó ba ita kbiit neʼebé ita presiza atu bele luta hasoru presaun atu halo tuir ema seluk.—Ebr 13:6.
12 Bainhira presaun husi liʼur koko atu estraga ita-nia identidade nuʼudar ema Kristaun, diʼak atu hanoin-hetan katak ita-nia laran-metin ba Maromak mak importante liu fali ema seluk nia opiniaun kona-ba ita ka buat neʼebé ema barak liu mak halo. Prinsípiu iha Éxodo 23:2 bele ajuda ita: “Imi labele tuir deʼit ema-lubun hodi halo aat.” Bainhira ema Izraél barak duvida kona-ba Jeová nia kbiit atu kumpre ninia promesa sira, Caleb lakohi atu halo tuir ema-lubun neʼe. Nia fiar metin katak Maromak sei kumpre ninia promesa sira, no nia simu bensaun barak tanba laran-metin. (Núm 13:30; Jos 14:6-11) Ita mós prontu ka lae atu tahan hasoru presaun husi ema seluk hodi bele proteje Ita-nia relasaun diʼak ho Maromak?
Keʼe no hetan buat murak husi Bíblia
Matenek neʼebé loos mak diʼak liu
‘Ema neʼebé la iha esperiénsia’ mak ema neʼebé tau fiar ba liafuan hotu no fasil deʼit atu monu ba lia-bosok. (Prv 14:15) Ita hasoru beibeik ema hanesan neʼe bainhira haklaken. Hanoin toʼok ema millaun ba millaun neʼebé tau fiar ba lia-bosok husi ulun-naʼin relijiaun no ukun-naʼin sira. Ema balu hakfodak tebes bainhira hatene katak ulun-naʼin sira-neʼe bosok sira. Maibé ema sira neʼebé temi iha Provérbios 1:22 hili atu kontinua sai ema neʼebé la iha esperiénsia tanba sira gosta ida-neʼe. (Jer 5:31) Sira halo tuir deʼit sira-nia hakarak no lakohi aprende Bíblia nia hanorin ka lakohi halo tuir Bíblia nia ukun-fuan. Ema barak sente hanesan feto relijiozu ida iha rai-Kanadá neʼebé dehan ba Testemuña ida: “Se ami-nia ulun-naʼin relijiaun bosok duni ami, neʼe sira-nia sala, laʼós ami-nia sala!” Ita lakohi duni halo tuir ema sira hanesan neʼe.—Prv 1:32; 27:12.
24 FEVEREIRU–2 MARSU
RIKUSOIN HUSI BÍBLIA PROVÉRBIOS 2
Tanbasá diʼak atu estuda Bíblia mesak ho badinas?
“Kontinua laʼo iha lia-loos”
16 Laʼós ema hotu gosta lee no estuda. Maibé Jeová konvida ita atu “kontinua buka” hodi bele komprende diʼak liután lia-loos. (Lee Provérbios 2:4-6.) Bainhira ita hakaʼas an, ita sei hetan benefísiu. Irmaun ida naran Corey koʼalia kona-ba dalan neʼebé nia lee Bíblia no dehan katak nia tau fokus ba eskritura ida ba ida. Nia esplika: “Haʼu lee nota-rodapé no referénsia marjinál hotu, no mós halo riset liután. . . . Neʼe ajuda haʼu atu aprende buat barak.” Maski ita halo tuir irmaun Corey nia dalan atu estuda ka lae, maibé atu hatudu katak ita hafolin lia-loos, ita presiza uza tempu no hakaʼas an atu estuda lia-loos.—Sal 1:1-3.
Matenek neʼebé loos mak diʼak liu
3 Matenek bele refere ba abilidade atu uza ita-nia koñesimentu hodi halo desizaun neʼebé diʼak. Maibé matenek neʼebé loos envolve buat seluk tan. Bíblia hatete: “Hamtaʼuk Jeová mak hakat primeiru atu bele hetan matenek, no koñesimentu kona-ba Maromak neʼebé Santu Liu Hotu mak sei fó kbiit atu komprende.” (Prv 9:10) Entaun buka-hatene Jeová nia hanoin bainhira ita presiza halo desizaun neʼebé importante. Ita bele halo nuneʼe hodi estuda Bíblia no publikasaun sira neʼebé bazeia ba Bíblia. Neʼe ajuda ita atu hatudu matenek neʼebé loos.—Prv 2:5-7.
4 Só Jeová deʼit mak bele fó ita matenek neʼebé loos. (Rom 16:27) Tanbasá Jeová mak Hun ba matenek? Primeiru, Jeová mak Kriadór no nia hatene buat hotu kona-ba ninia kriatura sira. (Sal 104:24) Segundu, buat hotu neʼebé Jeová halo hatudu sai ninia matenek. (Rom 11:33) Terseiru, Jeová nia konsellu sempre lori benefísiu ba ema neʼebé halo tuir ida-neʼe. (Prv 2:10-12) Se ita hakarak atu iha matenek neʼebé loos, ita tenke simu lia-loos báziku sira-neʼe no husik neʼe dirije ita-nia hahalok no desizaun sira.
Joven sira, hametin imi-nia fiar
2 Ohin loron, ema barak la fiar katak Maromak mak kria ita. Se ita mak joven ida neʼebé adora Jeová ka aprende hela kona-ba Jeová, karik ita bele hanoin saida mak bele ajuda ita atu prova katak Jeová mak Kriadór. Se nuneʼe, Bíblia bele ajuda ita atu uza ita-nia kbiit atu hanoin hodi haburas no hametin ita-nia fiar, tanba Bíblia dehan: “Kbiit atu hanoin sei tau matan ba ó.” Oinsá? Kbiit neʼe bele proteje ita husi hanorin neʼebé la loos hodi hametin ita-nia fiar ba Jeová.—Lee Provérbios 2:10-12.
3 Ita tenke hatene didiʼak Jeová se ita atu iha fiar neʼebé metin ba nia. (1Ti 2:4) Tan neʼe mak bainhira ita lee Bíblia ka ita-nia livru sira, importante atu para no hanoin didiʼak no koko atu komprende informasaun neʼe. (Mt 13:23) Mai ita haree dalan balu neʼebé sei ajuda ita buka-hetan evidénsia barak liután atu prova katak Jeová mak ita-nia Kriadór no Bíblia mak ninia Liafuan.—Ebr 11:1.
Keʼe no hetan buat murak husi Bíblia
it-1-E p. 1211 par. 4
Integridade
Ema ida labele kaer metin ba ninia integridade, se nia sadere deʼit ba ninia kbiit rasik, maibé nia presiza iha fiar neʼebé metin no iha konfiansa ba Jeová no Ninia kbiit atu salva ema. (Sal 25:21) Maromak promete katak nia sei sai hanesan “eskudu” no “fó protesaun” hodi proteje ema neʼebé laʼo ho integridade. (Prv 2:6-8; 10:29; Sal 41:12) Bainhira ema ida sempre hanoin kona-ba oinsá atu halo Maromak kontente, neʼe ajuda nia iha moris neʼebé estavel, neʼe ajuda nia atu laʼo iha dalan loos hodi kumpre ninia golu sira. (Sal 26:1-3; Prv 11:5; 28:18) Job haree ona katak ema neʼebé moris ho hahalok loos hasoru susar tanba ema aat nia ukun no sira mós bele mate hamutuk ho ema aat. Maski nuneʼe, Jeová promete katak nia haree didiʼak ema neʼebé moris ho hahalok loos no garantia katak ninia liman-rohan sei hela ba nafatin, nia sei iha futuru neʼebé nakonu ho dame, no sei hetan buat neʼebé diʼak. (Job 9:20-22; Sal 37:18, 19, 37; 84:11; Prv 28:10) Hanesan ho Job, ema ida bele iha folin no merese hetan respeitu laʼós tanba ninia rikusoin, maibé tanba nia hatudu integridade. (Prv 19:1; 28:6) Labarik sira neʼebé iha inan ka aman hanesan neʼe, sira sei sente ksolok (Prv 20:7), sira-nia inan ka aman nia ezemplu sai nuʼudar liman-rohan espesiál, no sira bele hetan naran diʼak no respeitu tanba sira-nia inan ka aman iha naran diʼak.