Depois Adão no Eva sai tiha husi jardín Eden, sira iha oan barak. Oan primeiru mak Caim, nia sai toʼos-naʼin. Oan segundu mak Abel, nia sai bibi-atan.

Loron ida Caim no Abel hasaʼe sakrifísiu ba Jeová. Ó hatene sakrifísiu mak saida? Neʼe hanesan prezente espesiál. Jeová kontente ho Abel nia sakrifísiu, maibé la kontente ho Caim nia sakrifísiu. Neʼe halo Caim hirus tebes. Jeová fó avizu ba Caim: ‘Se ó hirus nafatin, ó sei halo buat neʼebé aat.’ Maibé Caim lakohi rona.

Loron ida, Caim hatete ba Abel: ‘Mai ita bá rai-luan.’ Bainhira sira mesak deʼit iha rai-luan, Caim oho Abel. Saida mak Jeová halo ba Caim? Jeová fó kastigu ba Caim hodi haruka nia bá fatin neʼebé dook husi ninia família no la fó lisensa ba nia atu fila fali.

Ita bele aprende saida husi istória neʼe? Dala ruma ita hirus tanba buat neʼebé ita hakarak la sai loos. Se ita sente hirus, ka ema seluk fó konsellu ba ita tanba haree ita hirus, ita tenke kontrola lalais ita-nia sentimentu antes ita hirus makaʼas.

Tanba Abel hadomi Jeová no halo buat neʼebé loos, Jeová sei la haluha nia. Kuandu Maromak halo mundu neʼe sai fali paraízu, nia sei fó moris-hiʼas ba Abel.

Mundu komesa nakonu ho ema, maibé ema barak mak aat. Anju balu iha lalehan mós sai aat. Sira husik sira-nia hela-fatin iha lalehan no tun mai mundu hodi halo sira-nia an sai ema. Ó hatene tanbasá sira halo hanesan neʼe? Tanba sira hakarak kaben ho feto sira.

Anju aat ho feto sira iha oan-mane. Oan sira-neʼe sai boot no forte tebes. Sira gosta halo aat ema. Jeová lakohi husik buat sira-neʼe akontese beibeik, tan neʼe nia deside atu halakon ema aat sira hodi halo rai-nabeen.

Maibé iha mane ida naran Noé neʼebé hadomi tebes Jeová. Nia iha feen no oan-mane naʼin-tolu, Sem, Ham, Jafet, no sira ida-idak iha feen. Jeová haruka Noé atu halo ró boot hodi bele salva sira-nia an husi Rai-Nabeen. Ró neʼe halo husi ai ho modelu hanesan kaixote neʼebé bele namlele iha bee leten. Jeová mós haruka Noé atu hatama animál barak iha ró laran atu sira labele mate.

Noé hahú kedas atu halo ró boot. Noé no ninia família serbisu maizumenus tinan 50 atu halo ró boot neʼe. Sira halo tuir Jeová nia liafuan hotu kona-ba oinsá atu halo ró. Iha tempu neʼebá, Noé mós fó avizu ba ema kona-ba Rai-Nabeen. Maibé la iha ema ida mak rona ba Noé.

Ikusmai, tempu toʼo ona ba Noé no ninia família atu tama ba ró laran. Haree toʼok saida mak akontese.