Isaac tinan 40 kuandu nia kaben ho Rebeca. Nia hadomi tebes Rebeca. Sira iha oan-mane kaduak.

Oan primeiru naran Esaú, no ida segundu naran Jacob. Esaú gosta sai ba liʼur no matenek atu kasa animál. Maibé Jacob gosta ajuda halo serbisu iha uma.

Iha tempu neʼebá, oan-mane primeiru mak iha direitu atu simu rai no osan kuandu ninia aman mate. Buat sira-neʼe hanaran liman-rohan. Iha Isaac nia família, liman-rohan neʼe mós inklui Jeová nia promesa ba Abraão. Esaú la hafolin promesa neʼe, maibé Jacob hatene neʼe importante tebes.

Loron ida, Esaú kasa ba loron tomak no kole tebes. Kuandu fila fali ba uma, Esaú horon hahán nia morin neʼebé Jacob teʼin. Nia dehan ba Jacob: ‘Haʼu hamlaha loos, fó mai haʼu ó-nia koto-mean balu!’ Jacob dehan: ‘Haʼu sei fó, maibé promete uluklai katak haʼu sei hetan ó-nia liman-rohan.’ Esaú hatán: ‘Liman-rohan neʼe la iha folin mai haʼu! Ó bele foti bá. Haʼu hakarak deʼit atu han.’ Tuir ó-nia hanoin, buat neʼebé Esaú halo neʼe matenek ka lae? Lae. Esaú troka tiha buat neʼebé folin-boot tebes ho deʼit koto bikan ida.

Kuandu Isaac sai katuas liu ona, nia hakarak haraik bensaun ba ninia oan-mane primeiru. Maibé Rebeca ajuda Jacob atu hetan bensaun. Kuandu Esaú hatene kona-ba neʼe, nia sai hirus tebes no planu atu oho ninia alin. Isaac no Rebeca hakarak atu proteje Jacob, entaun sira dehan ba nia: ‘Halai ba ó-nia inan nia maun Labão no hela iha ninia fatin toʼo Esaú la hirus tan.’ Jacob rona ba ninia inan-aman nia liafuan no halai atu salva ninia moris.

Jeová promete ba Jacob katak nia sei proteje Jacob hanesan uluk nia proteje Abraão no Isaac. Ikusmai Jacob hela iha Haran. Nia kaben iha neʼebá no ninia família sai boot. Nia mós sai ema neʼebé riku tebes.

Loron ida Jeová koʼalia ba Jacob: ‘Fila fali ba ó-nia rai.’ Entaun Jacob no ninia família komesa halo viajen atu fila fali ba ninia rai. Iha dalan, Jacob nia atan balu fó-hatene ba nia: ‘Ita-nia maun Esaú mai daudaun hamutuk ho mane naʼin-400!’ Jacob taʼuk tanba hanoin katak Esaú sei halo aat ba nia no ninia família. Nia halo orasaun ba Jeová: ‘Favór salva haʼu husi haʼu-nia maun.’ Loron tuirmai, Jacob haruka prezente barak ba Esaú, nia fó bibi-malae, bibi-timur, karau, kuda-kamelu, no kuda-burru.

Iha kalan neʼebá kuandu Jacob mesak hela, nia haree anju ida! Anju neʼe hahú luta ho nia. Sira luta malu toʼo dadeer. Maski Jacob sente moras, nia la rende an. Anju neʼe dehan ba nia: ‘Husik haʼu.’ Maibé Jacob dehan: ‘Haraik uluk bensaun mai haʼu mak haʼu sei husik Ita.’

Ikusmai anju neʼe haraik bensaun ba Jacob. Agora Jacob hatene ona katak Jeová sei la husik Esaú atu halo aat ba nia.

Iha dadeer, husi dook Jacob haree Esaú no mane naʼin-400. Jacob bá uluk hasoru Esaú no hakruʼuk dala hitu ho oin ba rai nuʼudar nia hakbesik ba ninia maun. Esaú halai hasoru Jacob no hakoʼak nia. Sira naʼin-rua tanis hamutuk no hadame malu. Tuir ó-nia hanoin, Jeová sente oinsá kuandu haree buat neʼebé Jacob halo iha situasaun neʼe?

Esaú fila fali ba ninia hela-fatin, no Jacob kontinua halo viajen ba ninia rai. Jacob iha oan-mane hamutuk naʼin-12. Sira-nia naran mak Ruben, Simeão, Levi, Judá, Dan, Naftali, Gad, Aser, Issacar, Zebulão, José, no Benjamim. Ikusmai, Jeová uza José atu salva ninia povu. Ó hatene oinsá? Mai ita haree hamutuk.