José moris bainhira Jacob idade ona. José nia maun sira haree katak sira-nia aman hadomi liu José, tan neʼe sira laran-moras ba José no odi nia. Bainhira José hetan mehi balu neʼebé oin-seluk uitoan, nia konta fali ba ninia maun sira. Mehi sira-neʼe fó sai katak loron ida sira sei hakruʼuk ba nia. Neʼe halo sira odi liután José!

Loron ida, José nia maun sira hein bibi besik sidade Siquém. Jacob haruka José atu bá haree sira. Bainhira sira haree José laʼo mai daudaun, sira koʼalia ba malu: ‘Mehidór mai ona. Mai ita oho tiha nia!’ Sira kaer José no soe nia ba bee-posu laran. Maibé ninia maun Judá dehan: ‘Keta oho nia! Mai ita faʼan nia atu sai atan.’ Tan neʼe, sira faʼan José ho osan-mutin 20 ba negósiu-naʼin sira husi Midian neʼebé laʼo daudaun atu bá rai-Ejitu.

Tuirmai, José nia maun sira hoban ninia roupa iha bibi-timur nia raan, no haruka ba sira-nia aman, hodi dehan: ‘Neʼe mak José nia roupa, loos ka lae?’ Jacob hanoin katak animál fuik mak oho José. Nia triste tebes no tanis. La iha ema ida mak bele fó kmaan ba nia.

Iha Ejitu, José sai atan ba ema-boot ida naran Potifar. Maibé Jeová nafatin hamutuk ho José. Potifar haree katak José halo serbisu ho diʼak no bele tau fiar nia. Lakleur, Potifar fó knaar ba José atu tau matan ba ninia rikusoin hotu.

Potifar nia feen haree katak José mak bonitu no isin forte. Loron-loron, nia husu José atu toba hamutuk ho nia. José sei halo saida? Nia dehan: ‘Lae! Neʼe sala. Haʼu-nia naʼi fiar haʼu, no Ita-Boot mak ninia feen. Se haʼu toba hamutuk ho Ita, haʼu sei halo sala hasoru Maromak!’

Loron ida, Potifar nia feen obriga José atu toba hamutuk. Nia rasta José nia roupa, maibé José halai sai. Kuandu Potifar fila ba uma, feto neʼe bosok hodi dehan katak José koko atu estraga nia. Potifar sai hirus tebes, no hatama José ba komarka. Maibé Jeová la haluha kona-ba José.

Bainhira José iha komarka laran, Faraó, ka liurai Ejitu, mehi kona-ba buat balu neʼebé ema ida labele esplika. Faraó nia atan ida dehan ba nia katak José bele esplika ninia mehi. Faraó bolu kedas José mai.

Faraó husu ba José: ‘Ó bele esplika haʼu-nia mehi ka?’ José hatán: ‘Sei iha ai-han barak ba tinan hitu iha Ejitu, depois neʼe sei mosu rai-hamlaha ba tinan hitu. Hili ema ida neʼebé matenek atu halibur ai-han atu nuneʼe Ita-nia povu la hamlaha.’ Faraó dehan: ‘Haʼu hili ó! Ó sei sai ema segundu neʼebé iha pozisaun aas iha Ejitu!’ Oinsá mak José bele esplika Faraó nia mehi? Jeová mak ajuda nia.

Durante tinan hitu José halibur ai-han. Tuirmai, rai-hamlaha mosu iha mundu tomak, hanesan José hatete nanis ona. Ema mai husi fatin oioin atu sosa ai-han husi José. Ninia aman Jacob rona katak iha ai-han iha Ejitu, entaun nia haruka ninia oan-mane naʼin-sanulu atu bá sosa ai-han balu.

Jacob nia oan sira bá hasoru José. Sira la hatene katak nia mak José, maibé nia hatene kedas sira. Sira hakruʼuk ba nia, tuir José nia mehi kuandu nia sei joven. José hakarak hatene se sira-nia hahalok troka ona ka lae. Entaun nia dehan ba sira: ‘Imi mak espiaun! Imi mai atu buka-hatene ami-nia nia fraku!’ Sira hatán: ‘Lae! Ami mai husi Kanaan, no ami iha maun-alin naʼin-12. Ami-nia alin ida mate ona, no ida kiʼik liu hamutuk ho ami-nia aman.’ Tuirmai José dehan: ‘Lori imi-nia alin mai atu haʼu bele fiar.’ Entaun nia fahe ai-han ba sira no haruka sira fila.

Kuandu ai-han komesa hotu ona, Jacob haruka fali ninia oan sira bá Ejitu. Sira lori ho sira-nia alin Benjamim. José koko ninia maun sira. Nia tau ninia kopu osan-mutin iha Benjamim nia karón, no duun katak sira mak naʼok. Bainhira José nia atan sira hetan kopu neʼe iha Benjamim nia karón, ninia maun sira hakfodak. Sira husu José atu fó kastigu ba sira, laʼós Benjamim.

José haree katak ninia maun sira-nia hahalok troka ona. José labele tan kontrola ninia sentimentu. Nia tanis no dehan: ‘Haʼu mak José, imi-nia alin. Apá sei moris ka?’ Ninia maun sira hakfodak tebes. José dehan ba sira: ‘Keta fó-sala imi-nia an kona-ba buat neʼebé uluk imi halo. Maromak mak haruka haʼu mai iha neʼe atu salva imi. Lalais, bá lori apá mai.’

Sira fila fali no fó-hatene ba sira-nia apá kona-ba José no lori nia bá Ejitu. Ba tinan barak tebes José la haree ninia apá, ikusmai nia bele hasoru ninia apá.