Moisés hela iha Midian ba tinan 40, nia kaben no iha oan. Loron ida bainhira nia hein hela bibi besik Foho Sinai, nia haree buat ruma hanesan milagre. Iha ai-hun tarak neʼebé ahi lakan maibé ahi la han ai-hun neʼe! Bainhira nia koko hakbesik atu haree, nia rona lian sai husi ai-hun neʼe: ‘Moisés! Keta hakbesik liután. Hasai ó-nia sandálias, tanba rai neʼebé ó hamriik bá mak fatin santu.’ Neʼe mak Jeová neʼebé koʼalia liuhusi anju ida.

Moisés sai taʼuk, entaun nia taka ninia oin. Jeová dehan ba nia: ‘Haʼu haree ema Izraél hetan terus barak. Haʼu sei salva sira husi ema Ejitu no lori sira ba rai neʼebé diʼak.’ Tuir ó-nia hanoin, Moisés hakfodak ka lae kuandu rona ida-neʼe?

Moisés husu: ‘Saida mak haʼu sei dehan kuandu ema husu sé mak haruka haʼu?’ Jeová hatán: ‘Dehan ba sira katak Jeová, Abraão nia Maromak, Isaac nia Maromak, no Jacob nia Maromak mak haruka ó.’ Moisés dehan: ‘Oinsá se sira la rona haʼu?’ Jeová fó prova katak nia sei ajuda Moisés. Nia haruka Moisés atu soe ai-tonka ba rai, no ai-tonka neʼe sai samea ida! Bainhira Moisés kaer samea nia ikun, samea neʼe sai fali ai-tonka. Jeová dehan: ‘Sinál neʼe sei sai prova katak haʼu mak haruka ó.’

Moisés dehan: ‘Haʼu la iha matenek atu koʼalia.’ Jeová promete: ‘Haʼu sei hanorin ó saida mak ó sei koʼalia, no haʼu mós sei haruka ó-nia maun Arão atu ajuda ó.’ Tanba Moisés hatene Jeová sei ajuda nia, nia fila fali ba Ejitu hamutuk ho ninia feen no oan sira.

Ema Ejitu obriga ema Izraél atu halo serbisu makaʼas nuʼudar atan. Jeová haruka Moisés no Arão atu koʼalia ba Faraó: ‘Husik haʼu-nia povu sai, atu sira bele adora haʼu iha rai-fuik.’ Faraó ho foti an dehan: ‘Haʼu lakohi rona ba Jeová no haʼu sei la husik ema Izraél bá.’ Depois neʼe Faraó obriga sira atu serbisu makaʼas liután. Tan neʼe, Jeová deside atu fó kastigu ba Faraó. Ó hatene saida mak Jeová halo? Nia hamosu Susar Sanulu ba Ejitu. Jeová dehan ba Moisés: ‘Faraó la rona mai haʼu. Aban dadeer, nia sei bá Mota Nilo. Bá hasoru nia no hatete katak Mota Nilo sei sai raan, tanba nia la husik livre haʼu-nia povu.’ Entaun Moisés bá hasoru Faraó. Faraó haree Arão baku mota neʼe ho ninia ai-tonka, no mota neʼe sai raan. Mota neʼe sai dois tebetebes, ikan sira mate hotu, no labele mós hemu bee husi mota neʼe. Maski nuneʼe, Faraó nafatin lakohi atu husik ema Izraél sai husi Ejitu.

Liutiha loron hitu, Jeová haruka fali Moisés atu bá hasoru Faraó hodi dehan: ‘Se ó la husik haʼu-nia povu sai, Ejitu tomak sei nakonu ho manduku.’ Faraó lakohi husik ema Izraél sai, tan neʼe Arão hiʼit saʼe ninia ai-tonka no manduku komesa mosu iha fatin hotu. Ema hetan manduku iha sira-nia uma, iha kama leten, no iha manko laran. Faraó dehan ba Moisés atu husu Jeová hapara susar neʼe. Faraó mós promete atu husik ema Izraél sai. Entaun Jeová hapara susar neʼe, no ema Ejitu halibur manduku mate barak tebes, no nasaun neʼe sai dois tebetebes. Maibé dala ida tan, Faraó lakohi husik ema Izraél sai.

Entaun Jeová dehan ba Moisés: ‘Arão tenke baku ninia ai-tonka ba rai, no rai-rahun sei sai susuk.’ No susuk mosu kedas iha fatin hotu. Faraó nia ema sira dehan ba nia: ‘Susar neʼe mai husi Maromak.’ Maibé Faraó nafatin lakohi husik ema Izraél sai.