Jeová dehan ba Moisés: ‘Saʼe mai foho. Haʼu sei hakerek haʼu-nia mandamentu sira iha fatuk-belar no fó ba ó.’ Moisés saʼe ba foho no hela iha neʼebá ba loron 40 no kalan 40. Jeová hakerek mandamentu sanulu neʼebé importante liu iha fatuk-belar rua. Mandamentu sira-neʼe mak bolu nuʼudar Ukun-Fuan Sanulu.

Ema Izraél hanoin katak Moisés husik ona sira. Tan neʼe, sira dehan ba Arão: ‘Halo maromak ida hodi bele dirije ami!’ Arão dehan: ‘Lori imi-nia osan-mean mai.’ Nia halo osan-mean nabeen no kria estátua karau-oan. Povu dehan: ‘Karau-oan neʼe mak ita-nia Maromak neʼebé lori ita sai husi Ejitu!’ Sira komesa adora estátua neʼe no halo festa. Neʼe sala ka lae? Sala duni. Sira promete ona atu adora Jeová mesak deʼit, maibé sira la kumpre.

Jeová haree buat neʼebé akontese, no dehan ba Moisés: ‘Tun ba kraik. Povu la halo tuir haʼu no adora fali maromak falsu.’ Moisés lori fatuk-belar rua no tun husi foho.

Bainhira Moisés besik povu nia hela-fatin, nia rona ema kanta. Tuirmai, nia haree sira dansa no hakruʼuk ba estátua karau-oan. Moisés hirus tebes. Nia soe fatuk-belar rua ba rai, no fatuk-belar rua neʼe rahun. Moisés harahun kedas estátua neʼe. Tuirmai, nia husu ba Arão: ‘Tanbasá mak ó halo tuir povu atu halo buat aat hanesan neʼe?’ Arão dehan: ‘Keta hirus. Ó hatene sira mak ema oinsá. Sira hakarak maromak ida, tan neʼe haʼu soe sira-nia osan-mean ba ahi laran, no estátua karau-oan neʼe mosu!’ Buat neʼebé Arão halo mak sala. Moisés saʼe fali ba foho atu husu Jeová fó perdua ba povu.

Jeová fó perdua ba ema neʼebé hakarak halo tuir nia. Entaun, importante tebes atu halo tuir Jeová no ema neʼebé nia hili atu dirije ita, loos ka lae?

Iha Foho Sinai, Jeová haruka Moisés atu halo tenda espesiál ida neʼebé bolu tenda santu, ka tabernákulu. Ema Izraél uza tenda neʼe atu adora Jeová. Tenda neʼe bele sobu no lori kuandu sira muda ba fatin seluk.

Jeová dehan: ‘Husu povu atu fó buat neʼebé sira iha atu ajuda halo tenda santu.’ Povu Izraél lori sira-nia osan-mean, osan-mutin, riti, fatuk-murak oioin, korrente, no brinkus. Sira mós lori bibi-fulun, kabas-liñu, animál nia kulit, no buat seluk tan. Sira fó buat barak tebes toʼo Moisés dehan: ‘Toʼo ona! Imi lalika lori tan.’

Mane no feto barak neʼebé iha matenek oioin ajuda atu halo tenda santu. Ema balu tiʼi kabas, homan, ka borda. Iha mós ema neʼebé halo sasán oioin hodi uza fatuk-murak, osan-mean, no bahat ai. Jeová fó sira matenek atu bele serbisu ho didiʼak.

Povu halo tenda santu hodi tuir buat hotu neʼebé Jeová haruka. Sira halo kortina neʼebé furak atu haketak Fatin Santu no Fatin Santu Liu Hotu. Iha Fatin Santu Liu Hotu, iha arka aliansa nian ho modelu hanesan kaixa, neʼebé halo husi ai-akásia no osan-mean. Iha Fatin Santu, iha ahi-oan fatin osan-mean, meza, no altár atu sunu insensu. Iha pátiu, iha basia riti no altár boot. Arka aliansa nian fó-hanoin ema Izraél kona-ba sira-nia promesa atu halo tuir Jeová. Ó hatene aliansa katak sá? Neʼe mak promesa espesiál ida.

Jeová hili Arão no ninia oan-mane sira atu serbí nuʼudar amlulik. Sira mak tau matan ba tenda santu no hasaʼe sakrifísiu ba Jeová. Arão mak sai amlulik boot, no nia deʼit mak bele tama ba Fatin Santu Liu Hotu. Nia tama ba fatin neʼe tinan ida dala ida atu hasaʼe sakrifísiu hodi taka ninia sala, ninia família nia sala, no nasaun Izraél tomak nia sala.

Tenda santu neʼe halo hotu kuandu ema Izraél sai husi Ejitu ba tinan ida ona. Ikusmai sira iha ona fatin atu adora Jeová.

Jeová kontente ho tenda santu neʼe no nia halo kalohan mosu iha tenda leten. Kuandu kalohan neʼe iha tenda leten, ema Izraél sei la muda ba fatin ida. Maibé kuandu kalohan neʼe hiʼit saʼe, sira presiza muda ba fatin seluk. Sira sei sobu tenda santu no laʼo tuir kalohan neʼe.