Saida mak Testemuña ba Jeová nia hanoin kona-ba funerál?
Ami-nia fiar no hanorin hotu bazeia ba Bíblia, inklui mós kona-ba funerál. Hanorin balu neʼebé ami fiar mak:
Normál atu sente triste bainhira ema neʼebé ita hadomi mate. Jesus nia dixípulu sira sente triste tebes kuandu ema neʼebé sira hadomi mate. (João 11:33-35, 38; Apóstolu 8:2; 9:39) Ami la haree serimónia funerál nuʼudar tempu atu halo festa arbiru. (Eclesiastes 3:1, 4; 7:1-4) Maibé neʼe mak tempu atu hatudu domin ba sira neʼebé sente triste tebes.—Roma 12:15.
Ema neʼebé mate ona la hatene buat ida. Maski ami mai husi kultura oioin, maibé ami la halo tuir kostume neʼebé kontra Bíblia nia hanorin, hanesan fiar kona-ba mate-klamar neʼebé bele ajuda ka halo aat ba ema neʼebé sei moris. (Eclesiastes 9:5, 6, 10) Neʼe inklui hadeer-mate, ai-funan moruk, ai-funan midar, kore-metan, oho animál atu hasaʼe ba matebian, ka koʼalia ba ema mate. Ami la hola parte iha atividade sira-neʼe tanba ami halo tuir Bíblia nia matadalan neʼebé dehan: “Haketak imi-nia an, . . . no keta kona buat neʼebé la moos.”—2 Korinto 6:17.
Iha esperansa ba ema neʼebé mate ona. Bíblia hanorin katak ema neʼebé mate ona sei moris hiʼas no mate sei la iha tan iha futuru. (Apóstolu 24:15; Apokalipse 21:4) Esperansa neʼe ajuda ema Kristaun iha tempu uluk no mós ohin loron atu la triste demais.—1 Tesalónika 4:13.
Bíblia fó konsellu atu halaʼo serimónia neʼebé simples. (Provérbios 11:2) Ami fiar katak serimónia funerál laʼós tempu atu hatudu ami-nia rikusoin ba ema seluk. (1 João 2:16) Ami la halo funerál neʼebé gasta osan barak, ka uza kaixaun neʼebé karun atu buka oin .
Ami la obriga ema seluk atu iha fiar hanesan ho ami kona-ba funerál. Ami halo tuir Bíblia nia matadalan neʼebé dehan: “Ita ida-idak sei hatán ba Maromak kona-ba ita-nia hahalok rasik.” (Roma 14:12) Maibé se ema husu kona-ba ami-nia fiar, ami hakaʼas an atu esplika ho “laran-maus no respeitu kleʼan”.—1 Pedro 3:15.
Oinsá Testemuña ba Jeová halaʼo funerál?
Fatin: Se família ida deside atu halaʼo funerál, sira bele hili fatin hanesan ami-nia Reuniaun-Fatin, uma, fatin neʼebé sira bele aluga, ka rate.
Programa: Ami halaʼo reuniaun no hatoʼo diskursu husi Bíblia neʼebé sei fó kmaan ba ema hodi esplika kona-ba mate no esperansa moris-hiʼas nian. (João 11:25; Roma 5:12; 2 Pedro 3:13) Programa neʼe mós ajuda ami hanoin fali kona-ba hahalok diʼak neʼebé ema mate neʼe hatudu durante ninia moris, no aprende oinsá mak ami bele halo tuir ninia ezemplu diʼak.—2 Samuel 1:17-27.
Baibain, ami mós kanta knananuk neʼebé bazeia ba Bíblia. (Koloso 3:16) Programa neʼe sei remata ho orasaun neʼebé sei fó kmaan ba rona-naʼin hotu.—Filipe 4:6, 7.
Selu ka ezmola: Ami-nia reuniaun hotu mak gratuitu, inklui mós ami-nia serimónia funerál, no ami mós la husu ezmola iha ami-nia reuniaun.—Mateus 10:8.
Ema neʼebé tuir: Ema neʼebé laʼós Testemuña mós bele tuir funerál neʼebé ami halaʼo iha Reuniaun-Fatin. Hanesan ho ami-nia reuniaun sira seluk, ema hotu bele asiste serimónia funerál.
Testemuña ba Jeová bele tuir relijiaun seluk nia funerál ka lae?
Testemuña ba Jeová ida-idak sei deside rasik hodi tuir sira-nia konxiénsia neʼebé hetan ona treinu husi Bíblia. (1 Timóteo 1:19) Maibé, ami la hola parte iha serimónia neʼebé kontra Bíblia nia matadalan.—2 Korinto 6:14-17.