Ema Izraél sai husi Foho Sinai no laʼo liu rai-fuik Paran. Bainhira sira toʼo iha Kades, Jeová dehan ba Moisés: ‘Haruka mane naʼin-12, mane ida husi suku ida-idak, atu bá hafuhu rai-Kanaan neʼebé haʼu sei fó ba ema Izraél.’ Entaun Moisés hili mane naʼin-12 no dehan: ‘Bá Kanaan. Imi tenke haree rai neʼe bokur ka lae, ema iha neʼebá mak forte ka fraku, no sira hela iha sidade ka iha tenda laran.’ Tuirmai espiaun naʼin-12, neʼebé inklui Josué no Caleb, bá Kanaan.

Liutiha loron 40, espiaun sira-neʼe fila no lori ho ai-figeira fuan, romaun, no uvas-fuan. Sira hatete ba Moisés: ‘Rai neʼe diʼak, maibé ema iha neʼebá mak forte, no sira-nia sidade nia moru mak aas.’ Caleb dehan: ‘Ita bele manán sira. Mai ita bá neʼebá agora!’ Tuir ó-nia hanoin, tanbasá mak Caleb brani tebes? Tanba nia no Josué tau fiar ba Jeová. Maibé espiaun naʼin-10 seluk dehan: ‘Labele! Sira hanesan jigante! Se kompara ho sira, ita mak hanesan gafañotu.’

Ema Izraél sai taʼuk. Sira komesa muramura no hatete ba malu: ‘Mai ita hili ulun-naʼin ida no fila fali ba Ejitu. Se ita bá neʼebá, ita sei mate.’ Josué no Caleb dehan: ‘Ita tenke halo tuir Jeová no labele taʼuk. Jeová sei proteje ita.’ Maibé ema Izraél lakohi rona no mós hakarak oho Josué no Caleb!

Saida mak Jeová halo? Nia dehan ba Moisés: ‘Haʼu halo buat barak ona ba ema Izraél, maibé sira nafatin lakohi halo tuir. Entaun sira sei hela iha rai-fuik ba tinan 40, no mate iha neʼe. Só deʼit sira-nia oan, Josué, no Caleb mak sei tama ba rai neʼebé haʼu promete ona.’

Bainhira ema Izraél iha rai-fuik, Kora, Datan, Abiram, no mane naʼin-250 tan kontra hasoru Moisés no Arão. Sira dehan: ‘Ami baruk ona ho imi! Tanbasá ó mak tenke sai ami-nia ulun, no Arão mak sai amlulik boot? Jeová hamutuk ho ita hotu, laʼós ó no Arão deʼit.’ Jeová la kontente. Ba Jeová, neʼe hanesan sira kontra hasoru nia!

Moisés dehan ba Kora no ema neʼebé apoia nia: ‘Aban, imi mai tenda santu, no lori insensu fatin neʼebé tau ona insensu. Jeová sei hatudu sé mak nia hili.’

Loron tuirmai, Kora no mane naʼin-250 bá hasoru Moisés iha tenda santu. Iha neʼebá sira sunu insensu hanesan amlulik. Jeová haruka Moisés no Arão: ‘Haketak imi-nia an husi Kora no ninia maluk sira.’

Kora bá hasoru Moisés iha tenda santu, maibé Datan, Abiram, no sira-nia família lakohi bá. Jeová haruka ema hotu atu hadook an husi Kora, Datan, no Abiram nia tenda. Ema hotu halo tuir kedas. Datan, Abiram, no sira-nia família hamriik iha sira-nia tenda oin. Derrepente deʼit, rai nakfera no tolan sira! Tuirmai iha tenda santu, ahi tun husi lalehan no han mohu Kora no mane naʼin-250.

Tuirmai Jeová dehan ba Moisés: ‘Suku ida-idak nia xefe tenke lori ninia ai-tonka, no ó tenke hakerek sira ida-idak nia naran ba ai-tonka neʼe. Hakerek Arão nia naran iha ai-tonka husi suku Levi. Tau ai-tonka sira-neʼe iha tenda santu. Ida neʼebé haʼu hili, ninia ai-tonka sei iha funan.’

Loron tuirmai, Moisés foti fali ai-tonka hotu no hatudu ba xefe sira. Iha Arão nia ai-tonka, iha ai-funan no ai-amendueira fuan. Neʼe hatudu ho klaru katak Jeová hili duni Arão nuʼudar amlulik boot.