Josué dirije Jeová nia povu ba tinan barak, no nia mate ho idade 110. Durante nia sei moris, ema Izraél laran-metin ba Jeová. Maibé kuandu nia mate tiha, sira komesa adora maromak falsu hanesan ema Kanaan halo. Tan neʼe, Jeová husik liurai Kanaan naran Jabin fó-terus ba sira. Ema Izraél husu ajuda ba Jeová, entaun Jeová hili ulun-naʼin foun, neʼe mak Barac. Nia sei ajuda ema Izraél atu fila fali ba Jeová.

Profeta feto ida naran Débora haruka lia-menon husi Jeová ba Barac: ‘Lori mane naʼin-10.000, no bá funu hasoru Jabin nia tropa iha Mota Kison. Ó sei manán hasoru Sísera, neʼebé dirije tropa neʼe.’ Barac hatán: ‘Haʼu sei halo nuneʼe se ó mós bá ho haʼu.’ Débora hatete: ‘Haʼu sei tuir, maibé laʼós ó mak sei oho Sísera. Jeová dehan katak feto ida mak sei oho nia.’

Débora, Barac, no ninia tropa saʼe ba Foho Tabor atu prepara ba funu. Kuandu Sísera hatene kona-ba neʼe, nia halibur ninia kuda-karreta funu nian no tropa sira. Débora dehan ba Barac: ‘Ohin Jeová sei halo ó manán.’ Barac ho tropa naʼin-10.000 halai tun husi foho leten atu halo funu hasoru Sísera nia tropa neʼebé kbiit boot.

Jeová halo bee iha Mota Kison sai nakonu. Sísera nia kuda-karreta funu nian mout iha tahu laran. Sísera husik hela ninia karreta no halai. Barac no ninia tropa manán hasoru Sísera nia tropa, maibé Sísera halai no subar iha feto ida naran Jael nia tenda. Jael fó susubeen ba nia atu hemu no taka nia ho manta. Sísera toba-dukur tanba kole. Tuirmai, Jael laʼo neineik hakbesik nia no baku pregu iha ninia ulun no Sísera mate.

Barac mai atu buka Sísera. Jael sai husi ninia tenda no hatete: ‘Tama mai. Haʼu sei hatudu ema neʼebé Ita buka.’ Barac tama no haree Sísera mate tiha ona. Barac no Débora kanta hodi fó hahiʼi ba Jeová tanba halo ema Izraél manán sira-nia inimigu. Depois, ema Izraél moris hakmatek ba tinan 40.

Bainhira rai-hamlaha mosu iha Izraél, feto Izraél ida naran Noemi muda ba rai-Moab hamutuk ho ninia laʼen no oan-mane naʼin-rua. Maibé liutiha tempu balu, Noemi nia laʼen mate. Noemi nia oan-mane sira kaben ho feto Moab naran Rute no Orpa. Maibé lakleur, oan-mane naʼin-rua neʼe mós mate.

Bainhira Noemi rona katak rai-hamlaha remata, nia deside atu fila ba ninia rai. Rute no Orpa mós tuir, maibé iha dalan, Noemi dehan: ‘Imi mak feen no feto-foun neʼebé diʼak. Haʼu hakarak imi kaben fali. Fila fali ba Moab.’ Sira hatán: ‘Ami hadomi Ita! Ami lakohi husik Ita.’ Maibé Noemi nafatin haruka sira fila. Ikusmai Orpa fila maibé Rute lakohi. Noemi dehan ba Rute: ‘Orpa fila ona ba ninia povu no ninia maromak. Ó mós fila ho nia bá ó-nia inan nia uma.’ Maibé Rute dehan: ‘Haʼu sei la husik amá mesak. Amá nia povu mak haʼu-nia povu, no amá nia Maromak mak haʼu-nia Maromak.’ Tuir ó-nia hanoin, Noemi sente oinsá ho Rute nia liafuan neʼe?

Rute no Noemi toʼo Izraél iha tempu neʼebé komesa koʼa sevada. Loron ida, Rute bá hili sevada restu iha Boaz nia toʼos. Boaz mak Raab nia oan. Nia rona katak Rute mak feto Moab neʼebé laran-metin ba Noemi. Tan neʼe, Boaz haruka ninia serbisu-naʼin sira atu husik sevada-fulin barak atu Rute bele hili.

Iha kalan, Noemi husu Rute: ‘Ohin ó bá sé-nia toʼos?’ Rute hatán: ‘Mane ida naran Boaz nia toʼos.’ Noemi dehan: ‘Boaz mak haʼu-nia laʼen nia família. Kontinua hili sevada iha ninia toʼos hamutuk ho feto joven seluk. Ó sei seguru iha neʼebá.’

Rute kontinua halibur sevada iha Boaz nia toʼos toʼo tempu koʼa nian remata. Boaz haree Rute serbisu badinas no nia mak feto neʼebé diʼak tebes. Iha tempu uluk, se mane ida mate no la iha oan, ninia família ida sei kaben ho mane neʼe nia feen. Tan neʼe Boaz kaben ho Rute. Sira iha oan-mane naran Obed, no Obed sai Liurai David nia avó. Noemi nia belun sira sai kontente no hatete: ‘Jeová fó Rute ba ó, no nia mak diʼak tebes ba ó. No agora, ó iha bei-oan ida. Mai ita hahiʼi Jeová.’