Ema Izraél husik Jeová dala ida tan no adora fali maromak falsu sira. Bainhira ema Amon ataka no funu hasoru ema Izraél, maromak falsu sira-neʼe la halo buat ida atu ajuda sira. Ba tinan barak ema Izraél hetan terus. Ikusmai sira hatete ba Jeová: ‘Ami halo ona sala. Favór salva ami husi ami-nia inimigu.’ Ema Izraél harahun estátua sira no komesa fali adora Jeová. Jeová lakohi haree sira atu hetan terus nafatin.

Asuwaʼin ida naran Jefte mak sai ulun-naʼin atu dirije ema Izraél funu hasoru ema Ammon. Nia dehan ba Jeová: ‘Se Ita-Boot ajuda ami manán funu neʼe, haʼu promete katak haʼu sei fó ba Ita ema primeiru neʼebé sai husi haʼu-nia uma mai hasoru haʼu.’ Jeová rona ba Jefte nia orasaun no ajuda nia manán iha funu neʼe.

Kuandu Jefte fila fali ba uma, ema primeiru neʼebé sai mai hasoru nia mak ninia oan-feto. Jefte iha oan ida deʼit. Ninia oan dansa no baku tamborín. Jefte hanoin-hetan ninia promesa no hatete: ‘Eipá, haʼu-nia oan! Ó halo haʼu-nia laran triste. Haʼu halo ona promesa ba Jeová. Haʼu labele dada fali, haʼu sei haruka ó bá serbí iha tenda santu iha Silo.’ Maibé ninia oan-feto hatete: ‘Se apá promete ona ba Jeová, entaun apá presiza halo tuir. Maibé husik haʼu ba fulan rua atu bá foho hamutuk ho haʼu-nia kolega feto sira, depois neʼe haʼu sei bá.’ Jefte nia oan-feto serbí ho laran-metin iha tenda santu iha ninia moris tomak. Tinan-tinan ninia belun sira bá Silo atu vizita nia.

Amlulik Boot Eli iha oan-mane naʼin-rua naran Hofni no Fineias. Sira serbí nuʼudar amlulik iha tenda santu, maibé sira la halo tuir Jeová nia lei no trata aat ema seluk. Bainhira ema Izraél lori sakrifísiu ba Jeová, Hofni no Fineias foti naʼan neʼebé diʼak liu ba sira-nia an. Eli rona kona-ba buat neʼebé ninia oan sira halo, maibé nia la halo buat ida. Jeová husik deʼit ida-neʼe akontese ka lae?

Maski Samuel idade kiʼik liu Hofni no Fineias, maibé nia la halo tuir sira. Jeová kontente ho Samuel. Kalan ida kuandu Samuel toba hela, nia rona lian neʼebé bolu ninia naran. Nia hadeer, halai ba Eli, no hatete: ‘Haʼu mak neʼe!’ Maibé Eli hatete: ‘Haʼu la bolu ó. Bá toba fali.’ Samuel bá toba fali. Depois nia rona tan lian neʼebé hanesan. Kuandu Samuel rona lian neʼe ba dala terseiru, Eli rekoñese neʼe mak Jeová nia lian neʼebé bolu Samuel. Nia hatete ba Samuel: ‘Se rona fali lian neʼe, ó tenke dehan: “Jeová, koʼalia bá. Ita-Boot nia atan rona hela.”’

Samuel bá toba fali. Depois nia rona tan: ‘Samuel! Samuel!’ Nia hatán: ‘Koʼalia bá, Ita-Boot nia atan rona hela.’ Jeová dehan: ‘Fó-hatene Eli katak haʼu sei fó kastigu ba nia no ninia família. Nia hatene ninia oan sira halo buat aat oioin iha haʼu-nia tenda santu, maibé nia la halo buat ida.’ Dadeer tuirmai hanesan baibain Samuel loke tenda santu nia odamatan. Nia taʼuk atu fó sai Jeová nia lia-menon ba amlulik boot. Maibé Eli bolu nia no husu: ‘Samuel, Jeová hatete saida? Fó-hatene haʼu buat hotu.’ Entaun Samuel konta buat hotu.

Samuel sai boot no Jeová kontinua ajuda nia. Ema Izraél hotu hatene katak Jeová hili Samuel nuʼudar profeta no juís.