Liurai Ben-Hadad husi rai-Síria ataka beibeik Izraél. Maibé liurai Izraél konsege sees husi perigu tanba profeta Eliseu sempre fó avizu nanis ba nia. Tan neʼe, Ben-Hadad deside atu kaer Eliseu. Nia rona katak Eliseu iha sidade Dotan, entaun nia haruka tropa Síria bá neʼebá atu kaer Eliseu.

Iha kalan tropa Síria bá Dotan, no dadeer tuirmai bainhira Eliseu nia ajudante sai ba liʼur, nia haree tropa barak haleʼu sidade. Nia taʼuk no hatete ba Eliseu: ‘Haʼu-nia naʼi, ita sei halo saida?’ Eliseu dehan: ‘Keta taʼuk! Tropa neʼebé hamutuk ho ita mak barak liu fali sira.’ Tuirmai, Jeová halo ajudante neʼe haree kuda no kuda-karreta funu nian neʼebé barak no nabilan hanesan ahi iha foho neʼebé haleʼu sidade neʼe.

Bainhira tropa Síria koko atu kaer Eliseu, nia halo orasaun hodi husu Jeová nia ajuda. Tan neʼe, Jeová halo tropa sira-neʼe konfuzaun no la hatene sira iha neʼebé. Eliseu dehan ba sira: ‘Imi laʼo sala dalan. Mai tuir haʼu, haʼu sei lori imi ba mane neʼebé imi buka daudaun.’ Sira tuir Eliseu toʼo Samaria, neʼe mak fatin neʼebé liurai Izraél hela.

Ikusmai tropa Síria foin rekoñese katak sira toʼo iha fatin neʼebé sala, maibé tarde ona. Liurai Izraél husu Eliseu: ‘Haʼu bele oho sira ka lae?’ Eliseu sei selu aat ba sira ka lae? Lae. Eliseu dehan: ‘Labele. Fó ai-han ba sira no haruka sira fila.’ Tuirmai liurai halo festa boot ba sira no haruka sira fila fali ba sira-nia rai.

Jezabel iha oan-feto ida naran Atalia, nia mós laran-aat hanesan ninia inan. Atalia kaben ho liurai Judá. Bainhira Atalia nia laʼen mate, ninia oan-mane mak sai liurai. Maibé bainhira ninia oan-mane neʼe mate, Atalia rasik mak komesa ukun Judá. Nia koko atu oho ema hotu neʼebé iha direitu atu sai liurai, inklui ninia bei-oan rasik. Ema hotu taʼuk nia.

Amlulik Boot Jeoada no ninia feen Jeoseba hatene katak buat neʼebé Atalia halo mak aat tebes. Sira tau sira-nia moris iha perigu laran hodi subar Atalia nia bei-oan ida naran Jeoas neʼebé sei bebé. Sira haboot Jeoas iha templu.

Bainhira Jeoas tinan hitu, Jeoada halibur xefe sira no ema Levi hotu no haruka sira atu seguransa metin templu nia portaun no keta husik ema ida tama. Tuirmai Jeoada foti Jeoas sai liurai no tau koroa iha ninia ulun. Bainhira povu Judá haree ida-neʼe, sira haklalak: ‘Viva liurai!’

Liurai-Feto Atalia rona lian husi ema-lubun no halai lalais ba templu. Bainhira nia haree liurai foun, nia hakilar: ‘Traidór! Traidór!’ Xefe sira kaer liurai-feto neʼe, lori nia sai, no oho nia. Maibé oinsá ho nasaun neʼe, neʼebé hetan ona influénsia aat husi Atalia?

Jeoada ajuda povu atu halo aliansa ho Jeová, katak sira sei adora Nia mesak deʼit. Jeoada haruka povu atu baku rahun Baal nia templu no estátua sira. Nia mós hili amlulik no ema Levi atu serbisu iha templu, hodi nuneʼe povu bele adora fali Jeová. Nia fó knaar ba guarda sira atu hein templu nia portaun atu la husik ema neʼebé la moos tuir Jeová nia haree tama ba laran. Tuirmai Jeoada no xefe sira lori Jeoas ba palásiu atu tuur iha liurai nia kadunan. Neʼe halo povu Judá haksolok. Ikusmai sira bele adora Jeová no livre husi Atalia no adorasaun ba Baal. Jeoada nia hahalok aten-brani ajuda ema barak, loos ka lae?