Ema iha sidade Nínive iha rai-Asíria mak aat tebes. Tan neʼe, Jeová haruka ninia profeta Jonas atu bá Nínive no fó avizu ba sira atu troka sira-nia hahalok. Maibé Jonas lakohi bá, nia saʼe ró atu halai ba Tarsis.

Durante viajen, anin boot huu makaʼas, no serbisu-naʼin sira iha ró sai taʼuk. Sira halo orasaun ba sira-nia maromak no husu: ‘Tanbasá mak buat neʼe akontese?’ Ikusmai, Jonas hatete ba sira: ‘Neʼe akontese tanba haʼu-nia sala. Haʼu halai husi knaar neʼebé Jeová fó ba haʼu. Soe haʼu ba tasi, no anin boot sei para.’ Sira lakohi soe Jonas ba tasi, maibé Jonas obriga nafatin. Bainhira sira soe tiha nia ba tasi, anin boot para kedas.

Jonas hanoin nia sei mate. Bainhira nia mout daudaun iha tasi laran, nia halo orasaun ba Jeová. Jeová haruka ikan boot ida. Ikan neʼe tolan tiha Jonas, maibé Jonas la mate. Husi ikan nia kabun laran, Jonas halo orasaun: ‘Haʼu promete atu nafatin halo tuir Ita.’ Jeová proteje Jonas iha ikan nia kabun ba loron tolu, no ikusmai halo ikan muta sai Jonas iha tasi-ibun.

Depois neʼe Jeová haruka fali Jonas atu bá Nínive no Jonas halo tuir. Nia bá neʼebá no hatete ba ema aat sira: ‘Hela deʼit loron 40, Nínive sei naksobu.’ Ikusmai, buat ruma akontese. Ema Nínive rona Jonas nia avizu no troka sira-nia hahalok. Liurai Nínive dehan ba povu: ‘Harohan ba Maromak, no arrepende imi-nia sala bá. Karik nia sei la halakon ita.’ Bainhira Jeová haree sira arrepende an, nia deside atu la halakon Nínive.

Jonas sai hirus tanba Jeová la halakon Nínive. Hanoin toʼok: Jeová hatudu pasiénsia no laran-sadiʼa ba Jonas, maibé Jonas la hatudu laran-sadiʼa ba ema Nínive. Nia sai husi sidade no tuur ho oin-buis iha lakeru-hun okos. Lakleur, lakeru-hun neʼe mate, no Jonas sai hirus. Jeová dehan ba Jonas: ‘Ó hanoin liu ai-horis neʼe duké ema iha Nínive. Haʼu hanoin no laran-sadiʼa ba sira, tan neʼe haʼu salva sira.’ Lisaun mak saida? Ema Nínive iha folin boot liu fali ai-horis.

Nasaun Asíria domina ona nasaun Izraél suku sanulu. Agora liurai Asíria naran Senaquerib hakarak manán nasaun Judá neʼebé iha suku rua. Nia komesa manán sidade kiʼik sira iha rai-Judá, maibé sidade ida neʼebé nia hakarak liu mak Jeruzalein. Senaquerib la hatene katak Jeová mak proteje Jeruzalein.

Liurai Ezequias husi nasaun Judá selu ona osan barak ba Senaquerib atu nuneʼe labele ataka Jeruzalein. Maski Senaquerib hetan ona osan barak, maibé nia haruka nafatin ninia tropa atu ataka sidade Jeruzalein. Ema iha sidade laran sai taʼuk tanba tropa Asíria hakbesik daudaun. Entaun Ezequias dehan: ‘Keta taʼuk. Tropa Asíria iha forsa boot, maibé Jeová sei halo ita forsa liu fali sira.’

Senaquerib haruka Rabsaque ba Jeruzalein atu goza ema iha sidade laran. Rabsaque hamriik iha sidade nia liʼur no hakilar: ‘Jeová labele ajuda imi. Keta husik Ezequias lohi imi. La iha maromak ida mak bele proteje imi husi ami.’

Ezequias husu Jeová saida mak nia presiza halo. Jeová hatán: ‘Keta taʼuk ba Rabsaque nia liafuan. Senaquerib sei la hadau Jeruzalein.’ Tuirmai, Ezequias simu karta balu husi Senaquerib. Karta sira-neʼe dehan: ‘Rende an deʼit. Jeová labele salva imi.’ Ezequias halo orasaun: ‘Jeová, favór salva ami, atu nuneʼe ema hotu sei hatene katak Ita mesak deʼit mak Maromak neʼebé loos.’ Jeová dehan ba Ezequias: ‘Liurai Asíria sei la tama Jeruzalein. Haʼu sei proteje haʼu-nia sidade.’

Senaquerib fiar katak nia sei manán Jeruzalein. Maibé iha kalan neʼebá, Jeová haruka anju ida bá tropa Asíria nia kampu militár iha sidade nia liʼur no oho tropa naʼin-185.000! Tropa Asíria neʼebé kbiit boot mate hotu. Liurai Senaquerib labele halo buat ida no fila ba ninia rai. Jeová proteje Ezequias no Jeruzalein hanesan nia promete ona. Se ó mak iha Jeruzalein iha tempu neʼebá, ó tau fiar ba Jeová ka lae?