Dala barak ona povu iha nasaun Judá husik Jeová no adora fali maromak falsu. Durante tinan barak, Jeová koko atu ajuda sira. Nia haruka profeta barak atu fó avizu ba sira, maibé sira lakohi rona. Sira goza profeta sira-neʼe. Oinsá mak Jeová hapara sira-nia adorasaun falsu?

Liurai Nabukodonozór husi Babilónia domina nasaun barak. Dala primeiru nia ataka Jeruzalein, nia kaer Liurai Jeoquim, ulun-naʼin, soldadu, no badaen sira, depois lori sira hotu ba Babilónia. Nia mós foti sasán folin-boot hotu husi Jeová nia templu. Tuirmai, nia hili Zedequias sai liurai ba Judá.

Foufoun Zedequias halo tuir Nabukodonozór. Maibé, nasaun sira neʼebé besik no profeta falsu sira hatete ba Zedequias atu kontra hasoru Babilónia. Tan neʼe, Jeremias fó avizu ba Zedequias: ‘Se Ita-Boot kontra Babilónia, povu iha Judá sei hamlaha, moras, no ema sei oho sira.’

Depois ukun tiha ba tinan ualu, Zedequias kontra hasoru Babilónia. Nia husu ajuda ba tropa husi Ejitu. Nabukodonozór mós haruka ninia tropa atu ataka Jeruzalein, no sira halo serku haleʼu sidade neʼe. Jeremias hatete ba Zedequias: ‘Jeová dehan se Ita-Boot rende an ba Babilónia, neʼe sei salva Ita-Boot no sidade neʼe. Maibé se lae, ema Babilónia sei sunu Jeruzalein no lori Ita-Boot nuʼudar dadur ba Babilónia.’ Zedequias hatete: ‘Haʼu sei la rende!’

Tinan ida ho balu liu tiha, tropa Babilónia harahun moru Jeruzalein no sunu sidade neʼe. Sira sunu templu, oho ema barak, kaer ema rihun ba rihun no lori ba Babilónia.

Zedequias halai husi Jeruzalein, maibé ema Babilónia duni tuir nia. Sira kaer nia besik Jerikó no lori ba Nabukodonozór. Liurai Nabukodonozór oho Zedequias nia oan-mane sira iha ninia oin. Tuirmai nia halo Zedequias nia matan sai delek no hatama nia ba komarka toʼo nia mate. Maibé Jeová promete ba ema Judá: ‘Haʼu sei lori fali imi ba Jeruzalein iha tinan 70 tan.’

Saida mak akontese ba joven sira neʼebé ema lori ba Babilónia? Sira laran-metin nafatin ba Jeová ka lae?

Bainhira Nabukodonozór lori liurai nia família no ulun-naʼin sira-nia jerasaun husi Judá ba Babilónia, nia fó knaar ba xefe palásiu naran Aspenaz atu tau matan ba sira. Nabukodonozór haruka Aspenaz atu hili mane joven sira neʼebé isin-diʼak no matenek liu. Joven sira-neʼe sei hetan treinu ba tinan tolu atu sira bele halaʼo knaar importante iha Babilónia. Sira presiza aprende lee, hakerek, no koʼalia língua Babilónia. Sira sei han hahán neʼebé hanesan ho liurai no ema-boot sira. Joven sira-neʼe inklui Daniel, Hananias, Misael, no Azarias. Aspenaz fó naran Babilónia nian ba sira: Beltesazar, Sadrak, Mexak, no Abednego. Sira sei para atu serbí Jeová ka lae?

Mane joven naʼin-haat hakarak kontinua halo tuir Jeová. Sira hatene katak sira labele han liurai nia hahán tanba Jeová nia Ukun-Fuan bandu atu la han animál balu. Tan neʼe sira dehan ba Aspenaz: ‘Favór labele haruka ami han liurai nia hahán.’ Aspenaz dehan: ‘Se imi la han no liurai haree imi-nia saúde la diʼak, nia sei oho haʼu!’

Daniel iha ideia neʼebé diʼak. Nia dehan ba ema neʼebé tau matan sira: ‘Favór fó mai ami modo no bee deʼit durante loron sanulu. Depois neʼe, kompara ami ho joven sira neʼebé han liurai nia hahán.’ Ema neʼebé tau matan ba sira konkorda.

Liutiha loron sanulu, Daniel ho ninia belun naʼin-tolu haree hanesan isin-diʼak liu fali joven seluk. Jeová kontente tanba sira halo tuir nia. Jeová mós fó ba Daniel matenek no kbiit atu komprende vizaun no mehi.

Bainhira joven sira-neʼe remata sira-nia treinu, Aspenaz lori sira bá hasoru Liurai Nabukodonozór. Liurai koʼalia ho sira no haree katak Daniel, Hananias, Misael, no Azarias mak matenek liu fali joven seluk. Tan neʼe, nia hili sira naʼin-haat atu serbisu iha palásiu. Liurai sempre husu sira-nia konsellu kona-ba buat oioin neʼebé importante. Jeová halo sira matenek liu fali siʼikdór no matenek-naʼin sira iha Babilónia.

Daniel, Hananias, Misael, no Azarias la haluha katak sira mak Jeová nia povu maski hela iha rai seluk. Ó mós sempre hanoin kona-ba Jeová maski dook husi inan-aman ka lae?